অভিজ্ঞানশাকুন্তলম্ ০১

.. অভিজ্ঞানশাকুন্তলম্ ..
অথ অভিজ্ঞানশাকুংতলম্ |

প্রথমোঽঙ্কঃ |

যা সৃষ্টিঃ স্রষ্টুরাদ্যা বহতি বিধিহুতং যা হবির্যা চ হোত্রী
যে দ্বে কালং বিধত্তঃ শ্রুতিবিষযগুণা যা স্থিতা ব্যাপ্য বিশ্বম্ |
যাং আহুঃ সর্ববীজপ্রকৃতিরিতি যযা প্রাণিনঃ প্রাণবন্তঃ
প্রত্যক্ষাভিঃ প্রপন্নস্তনুভিরবতু বস্তাভিরষ্টাভিরীশঃ||১||
( নান্দ্যন্তে )
সূত্রধারঃ – – ( নেপথ্যাভিমুখমবলোক্য )
আর্যে যদি নেপথ্যবিধানমবসি অমিতস্তাবদাগম্যতাম্ |
( প্রবিশ্য )
নটী – আর্যপুত্র ইযমস্মি |
সূত্রধারঃ – – আর্য অভিরূপভূযিষ্ঠা পরিষদিযম্ | অদ্য খলু
কালিদাসগ্রথিতবস্তুনা নবেনাভিজ্ঞানশকুংতলাখ্যেন
নাটকেনোপস্থাতব্যমস্মাভিঃ | তত্প্রতিপাত্রমাধীযতাং যত্নঃ |
নটী – – সুবিহিতপ্রযোগতযাযার্যস্য ন কিমপি পরিহাস্যতে |
সূত্রধারঃ – – আর্যে কথযামি তে ভূতার্থম্ |
আ পরিতোষাদ্বিদুষাং ন সাধু মন্যে প্রযোগবিজ্ঞানম্ |
বলবদপি শিক্ষিতানামাত্মন্যপ্রত্যযং চেতঃ||২||
নটী – – আর্য এবমেতত্ | অনন্তরকরণীযমার্য আজ্ঞাপযতু |
সূত্রধারঃ – – কিমন্যদস্যাঃ পরিষদঃ শ্রুতিপ্রসাদনতঃ | তদিমমেব
তাবদচিরপ্রবৃত্তমুপভোগক্ষমং গ্রীষ্মসমযমধিকৃত্য গীযতাম্ |
সম্প্রতি হি –
সুভগসলিলাবগাহাঃ পাটলসংসর্গসুরভিবনবাতাঃ |
প্রচ্ছাযসুলভনিদ্রা দিবসাঃ পরিণামরমণীযাঃ||৩||
নটী – – তথা |
( ইতি গাযতি )
ঈষদীষচ্চুম্বিতানি ভ্রমরৈঃ সুকুমারকেসরশিখানি |
অবতংসযন্তি দমমানাঃ প্রমদাঃ শিরীষকুসুমানি||৪||
সূত্রধারঃ – – আর্য সাধু গীতম্ | অহো
রাগবদ্ধচিত্তবৃত্তিরালিখিত ইব সর্বতো রঙ্গঃ |
তদিদানীং কতমত্প্রকরণমাশ্রিত্যৈনমারাধযামঃ |
নটী – – নন্বার্যমিশ্রৈঃ প্রথমমেবাজ্ঞপ্তমভিজ্ঞানশকুংতলং
নামাপূর্বং নাটকং প্রযোগে অধিক্রিযতামিতি |
সূত্রধারঃ – – আর্যে সম্যগনুবোধিতোঽস্মি | অস্মিন্ক্ষণে বিস্মৃতং খলু
মযা তত্ | কুতঃ |
তবাস্মি গীতরাগেণ হারিণা প্রসভং হৃতঃ |
এষ রাজেব দুষ্যন্তঃ সারঙ্গেণতিরংহসা||৫||
( ইতি নিষ্ক্রান্তৌ )
( প্রস্তাবনা )
( ততঃ প্রবিশতি মৃগানুসারী সশরচাপহস্তো রাজা রথেন সূতশ্চ
)
সূতঃ – – ( রাজানং মৃগং চাবলোক্য ) আযুষ্মন্ |
কৃষ্ণসারে দদশ্চক্ষুস্ত্বযি চাধিজ্যকার্মুকে |
মৃগানুসারিণং সাক্ষাত্পশ্যামীব পিনাকিনম্||৬||
রাজাঃ – – সূত দূরমমুনা সারঙ্গেণ বযমাকৃষ্টাঃ | অযং
পুনরিদানীমপি গ্রীবাভঙ্গভিরামং মুহুরনুপততি স্যন্দনে দত্তদৃষ্টিঃ
পশ্চার্ধেন প্রবিষ্টঃ শরপতনভযাদ্ভূযসা পূর্বকাযম্ |
দর্ভৈণ্রর্ধাবলীঢৈঃ শ্রমবিবৃতমুখভ্রংশিভিঃ কীর্ণবর্ত্মা
পশ্যোদগ্রপ্লুতত্বাদ্বিযতি বহুতরং স্তোকমুর্ব্যাম্ প্রযাতি||৭||
( সবিস্মযম্ )
তদেষ কথমনুপতত এব মে প্রযত্নপ্রেক্ষণীযঃ সংবৃত্তঃ |
সূতঃ – – আযুষ্মন্ উদ্ঘাতিনী ভূমিরিতি মযা রশ্মিসংযমনাদ্রথস্য
মন্দীকৃতো বেগঃ | তেন মৃগ এষ বিপ্রকৃষ্টান্তরঃ সংবৃত্তঃ |
সংপ্রতি সমদেশবর্তিনস্তে ন দুরাসদো ভবিষ্যতি |
রাজাঃ – – তেন হি মুচ্যন্তামভীষবঃ |
সূতঃ – – যদাজ্ঞাপযত্যাযুষ্মান্ |
( রথবেগং নিরূপ্য )
আযুষ্মন্পশ্য পশ্য |
মুক্তেষু রশ্মিষু নিরাযতপূর্বকাযা
নিষ্কম্পচামরশিখা নিভৃতোর্ধ্বকর্ণাঃ |
আত্মৌদ্ধতৈরপি রজোভিরলঙ্ঘনীযা
ধাবন্ত্যমী মৃগজবাক্ষমযেব রথ্যাঃ||৮||
রাজাঃ – – সত্যম্ | অতীত্য হরিতো হরীংশ্চ বর্তন্তে বাজিনঃ | তথা
হি |
যদালোকে সূক্ষ্মং ব্রজতি সহসা তদ্বিপুলতাং
যদর্ধে বিছিন্নং ভবতি কৃতসংধানমিব তত্ |
প্রকৃত্যা যদ্বক্ত্রং তদপি সমরেখং নযনযোর্ন
মে দূরে কিঞ্চিত্ক্ষণমপি ন পার্শ্বে রথজ্জবাত্||৯||
সূত পশ্যৈনং ব্যাপদ্যমানম্ |
( ইতি শরসংধানং নাটযতি )
( নেপথ্যে )
ভো ভো রাজন্ আশ্রমমৃগোঽযং ন হন্তব্যো ন হন্তব্যঃ |
সূতঃ – – ( আকর্ণ্যাবলোক্য চ )
আযুষ্মনস্য খলু তে বাণপাতবর্তিনঃ কৃষ্টসারস্যান্তরে তপস্বিন
উপস্থিতাঃ |
রাজাঃ – – ( সসংভ্রমম্ )
তেন হি প্রগৃহ্যন্তাং বাজিনঃ |
সূতঃ – – তথা |
( ইতি রথং স্থাপযতি )
( ততঃ প্রবিশত্যাত্মনাতৃতীযো বৈখানসঃ )
বৈখানসঃ – – ( হস্তমুদ্যম্য )
রাজন্ আশ্রমমৃগোঽযং ন হন্তব্যো ন হন্তব্যঃ |
ন খলু ন খলু বাণঃ সংনিপাত্যোঽযমস্মিন্মৃদুনি
মৃগশরীরে পুষ্পরাশাবিবাগ্নিঃ |
ক্ব বত হরিণকানাং জীবিতং চাতিলোলং ক্ব চ
নিশিতনিপাতা বজ্রসারাঃ শরাস্তে||১০||
তত্সাধুকৃতসংধানং প্রতিসংহর সাযকম্ |
আর্তত্রাণায বঃ শস্ত্রং ন প্রহর্তুমনাগসি||১১||
রাজাঃ – – এষ প্রতিসম্হৃতঃ |
( ইতি যথোক্তং করোতি )
বৈখানসঃ – – সদৃশমেতত্ পুরুবংশপ্রদীপস্য ভবতঃ |
জন্ম যস্য পুরোর্বংশে যুক্তরূপমিদং তব |
পুত্রমেবংগুণোপেতং চক্রবর্তিনমাপ্নুহি||১২||
ইতরৌ – – ( বাহূ উদ্যম্য ) সর্বথা চক্রবর্তিনং পুত্রমাপ্নুহি |
রাজাঃ – – ( সপ্রণামম্ )
প্রতিগৃহীতং ব্রাহ্মণবচনম্ |
বৈখানসঃ – – রাজন্ সমিদাহরণায প্রস্থিতা বযম্ | এষ খলু
কণ্বস্য কুলপতেরনুমালিনীতীরমাশ্রমো দৃশ্যতে | ন
চেদন্যকার্যাতিপাতঃ প্রবিশ্য প্রতিগৃহ্যতামাতিথেযঃ সত্কারঃ | অপি
চ |
রম্যাস্তপোধনানাং প্রতিহতবিঘ্নাঃ ক্রিযাঃ সমবলোক্য |
জ্ঞাস্যসি কিযদ্ভুজো মে রক্ষতি মৌর্বীকিণাঙ্ক ইতি||১৩||
রাজাঃ – – অপি সংনিহিতোঽত্র কুলপতিঃ |
বৈখানসঃ – – ইদানীমেব দুহিতরং শকুংতলামতিথিসত্কারায
নিযুজ্য দৈবং অস্যাঃ প্রতিকূলং শমযিতুং সোমতীর্থং গতঃ |
রাজাঃ – – ভবতু | তামেব পশ্যামি | সা খলু বিদিতভক্তিং মাং
মহর্ষেঃ করিষ্যতি |
বৈখানসঃ – – সাধযামস্তাবত্ |
( ইতি সশিষ্যো নিষ্ক্রান্তঃ )
রাজাঃ – – সূত চোদযাশ্বান্ পুণ্যাশ্রমদর্শনেন তাবদাত্মানং
পুনীমহে |
সূতঃ – – যদাজ্ঞাপযত্যাযুষ্মন্ |
( ইতি ভূযো রথবেগং নিরূপযতি )
রাজাঃ – – ( সমন্তাদবলোক্য )
সূত অকথিতোঽপি জ্ঞাযত এব যথাযমাশ্রমাভোগস্তপোবনস্যেতি |
সূতঃ – – কথমিব |
রাজাঃ – – কিং ন পশ্যতি ভবান্ | ইহ হি
নীবারাঃ শুকগর্ভকোটরমুখভ্রষ্টাস্তরূণামধঃ
প্রস্নিগ্ধাঃ ক্বচিদিঙ্গুদীফলভিদঃ সূচ্যন্ত এবোপলাঃ |
বিশ্বাসোপগমাদভিন্নগতযঃ শব্দং সহন্তে
মৃগাস্তোযাধারপথাশ্চ বল্কলশিখানিষ্যন্দরেখাঙ্কিতাঃ||১৪||
কুল্যাম্ভোভিঃ পবনচপলৈঃ শাখিনো ধৌতমূলা
ভিন্নো রাগঃ কিসলযরুচামাজ্যধূমোদ্গমেন |
এতে চার্বাগুপবনভুবি চ্ছিন্নদর্ভান্কুরাযাং
নষ্টাংশকা হরিণশিশবো মন্দমন্দং চরন্তি |
সূতঃ – – সর্বমুপপন্নম্ |
রাজাঃ – – ( স্তোকমন্তরং গত্বা )
তপোবননিবাসিনামুপরোধো মা ভূত্ | এতাবত্যেব রথং স্থাপয
যাবদবতরামি |
সূতঃ – – ধৃতাঃ প্রগ্রহাঃ | অবতরত্বাযুষ্মান্ |
রাজাঃ – – ( অবতীর্য )
সূত বিনীতবেষেণ প্রবেষ্টব্যানি তপোবনানি নাম | ইদং
তাবদ্গৃহ্যতাম্ |
( ইতি সূতস্যাভরণানি ধনুশ্চোপনীযার্পযতি )
সূত যাবদাশ্রমবাসিনঃ প্রত্যবেক্ষ্যাহমুপাবর্তে
তাবদার্দ্রপৃষ্ঠাঃ ক্রিযন্তাং বাজিনঃ |
সূতঃ – – তথা |
( ইতি নিষ্ক্রান্তঃ )
রাজাঃ – – ( পরিক্রম্যাবলোক্য চ )
ইদমাশ্রমদ্বারম্ | যাবত্প্রবিশামি |
( প্রবিশ্য | নিমিত্তং সূচযন্ )
শান্তমিদমাশ্রমপদং স্ফুরতি চ বাহুঃ কুতঃ ফলমিহস্য |
অথবা ভবিতব্যানাং দ্বারাণি ভবন্তি সর্বত্র||১৫||
( নেপথ্যে )
ইত ইতঃ সখ্যৌ |
রাজাঃ – – ( কর্ণং দত্ত্বা )
অযে দক্ষিণেন বৃক্ষবাটিকামালাপ ইব শ্রূযতে | যাবদত্র গচ্ছামি |

( পরিক্রম্যাবলোক্য চ )
অযে এতাস্তপস্বিকন্যকাঃ স্বপ্রমাণানুরূপৈঃ সেচনঘটৈর্বালপাদপেভ্যঃ
পযো দাতুইত এবাভিবর্তন্তে |
( নিপুণং নিরূপ্য )
অহো মধুরমাসাং দর্শনম্ |
শুদ্ধান্তদুর্লভমিদং বপুরাশ্রমবাসিনো যদি জনস্য |
দূরীকৃতাঃ খলু গুণৈরুদ্যানলতা বনলতাভিঃ||১৬||
যাবদিমাং ছাযামাশ্রিত্য প্রতিপালযামি |
( ইতি বিলোকযন্ স্থিতঃ )
( ততঃ প্রবিশ্যতি যথোক্তব্যাপারা সহ সখীভ্যাং শকুংতল )
শকুংতলা – – ইত ইতঃ সখ্যৌ |
অনসূযা – – হলা শকুন্তলে ত্বত্তোঽপি তাতকাশ্যপস্যাশ্রমবৃক্ষকাঃ
প্রিযতরা ইতি তর্কযামি | যেন নবমালিকাকুসুমপেলবাপি
ত্বমেতেষামালবালপূরণে নিযুক্তা |
শকুংতলা – – ন কেবলং তাতনিযোগ এব | অস্তি মে সোদরস্নেহোঽপ্যেতেষু |
( ইতি বৃক্ষসেচনং রূপযতি )
রাজাঃ – – কথমিযং সা কণ্বদুহিতা | অসাধুদর্শী খলু
তত্রভবান্কাশ্যপো য ইমামাশ্রমধর্মে নিযুঙ্ক্তে |
ইদং কিলাব্যাজমনোহরং বপুস্তপঃক্ষমং সাধযিতুং য ইচ্ছতি |
ধ্রুবং স নীলোত্পলপত্রধারযা শমীলতাং ছেতুমৃষির্ব্যবস্যতি||
১৭||
ভবতু | পাদপান্তর্হিত এব বিশ্রব্ধং তাবদেনাং পশ্যামি |
( ইতি তথা করোতি )
শকুংতলা – – সখি অনসূযে অতিপিনদ্ধেন বল্কলেন প্রিযংবদযা
নিযন্ত্রিতাঽস্মি | শিথিলয তাবদেতত্ |
অনসূযা – – তথা |
( ইতি শিথিলযতি )
প্রিযংবদা – – ( সহাসম্ )
অত্র পযোধরবিস্তারযিতৃ আত্মনো যৌবনং উপালভস্ব | মাং কিং
উপালভসে |
রাজাঃ – – কামমননুরূপমস্য বপুষো বল্কলং ন
পুনরলংকারশ্রিযং ন পুষ্যতি | কুতঃ |
সরসিজমনুবিদ্ধং শৈবলেনাপি রম্যং
মলিনমপি হিমাংশোর্লক্ষ্ম লক্ষ্মীং তনোতি |
ইযমধিকমনোজ্ঞা বল্কলেনাপি তন্বী
কিমিব হি মধুরাণাং মণ্ডনং নাকৃতীনাম্||১৮||
শকুংতলা – – ( অগ্রতোঽবলোক্য )
এষ বাতীরিতপল্লবাঙ্গুলীভিস্ত্বরযতীব মাং কেসরবৃক্ষকঃ |
যাবদেনং সম্ভাবযামি |
( ইতি পরিক্রামতি )
প্রিযংবদা – – হলা শকুন্তলে অত্রৈব তাবন্মুহূর্তং তিষ্ঠ
যাবত্বযোপগতযা লতাসনাথ ইবাযং কেসরবৃক্ষকঃ প্রতিভাতি |
শকুংতলা – – অতঃ খলু প্রিযংবদাসি ত্বম্ |
রাজাঃ – – প্রিযমপি তথ্যমাহ শকুংতলাং প্রিযংবদা | অস্যাঃ খলু
অধরঃ কিসলযরাগঃ কোমলবিটপানুকারিণৌ বাহূ |
কুসুমমিব লোভনীযং যৌবনমঙ্গেষু সংনদ্ধম্||১৯||
অনসূযা – – হলা শকুন্তলে ইযং স্বযম্বরবধূঃ সহকারস্য ত্বযা
কৃতনামধেযা বনজ্যোত্স্নেতি নবমালিকা |
এনাং বিস্মৃতাঽসি |
শকুংতলা – – তদাত্মানমপি বিস্মরিষ্যামি |
( লতামুপেত্যাবলোক্য চ )
হলা রমণীযে খলু কাল এতস্য লতাপাদপমিথুনস্য ব্যতিকরঃ
সংবৃত্তঃ | নবকুসুমযৌবনা বনজ্যোত্স্না স্নিগ্ধপল্লবতযোপভোগক্ষমঃ
সহকারঃ |
( ইতি পশ্যন্তী তিষ্ঠতি )
প্রিযংবদা – – অনসূযে জানাসি কিং শকুংতলা বনজ্যোত্স্নামতিমাত্রং
পশ্যতীতি |
অনসূযা – – ন খলু বিভাবযামি | কথয |
প্রিযংবদা – – যথা বনজ্যোত্স্নানুরূপেণ পাদপেন সংগতা অপি
নামৈবমহমপ্যাত্মনোনুরূপং বরং লভেযেতি |
শকুংতলা – – এষ নূনং তবাত্মগতো মনোরথঃ |
( ইতি কলশমাবর্জযতি )
রাজাঃ – – অপি নাম কুলপতেরিযমসবর্ণক্ষেত্রসম্ভবা স্যাত্ | অথবা
কৃতং সংদেহেন |
অসংশযং ক্ষত্রপরিগ্রহক্ষমা যদার্যমস্যামভিলাষি মে মনঃ |
সতাং হি সংদেহপদেষু বস্তুষু প্রমাণমন্তঃকরণ প্রবৃত্তযঃ||২০||
তথাপি তত্ত্বত এনামুপলস্যে |
শকুংতলা – – ( সসংভ্রমম্ )
অম্ভো | সলিলসেকসংভ্রমোদ্গতো নবমালিকামুজ্ঝিত্বা বদনং মে
মধুকরোভিবর্ততে |
( ইতি ভ্রমরবাধাং রূপযতি )
রাজাঃ – – ( সস্পৃহম্ )
চলপাঙ্গাং দৃষ্টিং স্পৃশসি বহুশো বেপথুমতীং
রহস্যাখ্যাযীব স্বনসি মৃদু কর্ণান্তিকচরঃ |
করৌ ব্যাধুন্বত্যাঃ পিবসি রতিসর্বস্বমধরম্
বযং তত্ত্বান্বেষান্মধুকর হতাস্ত্বং খলু কৃতী||২১||
শকুংতলা – – ন এষ ধৃষ্টো বিরমতি | অন্যতো গমিষ্যামি |
কথমিতোঽপ্যাগচ্ছতি | হলা পরিত্রাযেথাং মামনেন দুর্বিনীতেন
মধুকরেণাভিভূযমানাম্ |
উভে – – ( সস্মিতম্ ) কে আবাং পরিত্রাতুম্ | দুষ্যংতমাক্রন্দ |
রাজরক্ষিতব্যানি তপোবনানি নাম |
রাজাঃ – – অবসরোঽযমাত্মানং প্রকাশযিতুম্ | ন ভেতব্যং ন
ভেতব্যম্ -|
( ইত্যর্ধোক্তে স্বগতম্ )
রাজভাবস্ত্বভিজ্ঞাতো ভবেত্ | ভবতু এবং তাবদভিধাস্যে |
শকুংতলা – – ( পদান্তরে স্থিত্বা | সদৃষ্টিক্ষেপম্ )
কথমিতোঽপি মামনুসরতি |
রাজাঃ – – ( সত্বরমুপসৃত্য )
আঃ
কঃ পৌরবে বসুমতীং শাসতি শাসিতরি দুর্বিনীতানাম্
অযমাচরত্যবিনযং মুগ্ধাসু তপস্বিকন্যাসু||২২||
( সর্বা রাজানং দৃষ্টা কিংচিদিব সম্ভ্রান্তাঃ )
অনসূযা – – আর্য ন খলু কিমপ্যত্যাহিতম্ | ইযং নৌ প্রিযসখী
মধুকরেণাভিভূযমানা কাতরীভূতা |
( ইতি শকুংতলাং দর্শযতি )
রাজাঃ – – ( শকুংতলাভিমুখো ভূত্বা )
অপি তপো বর্ধতে |
( শকুংতলা সাধ্বসাদবচনা তিষ্ঠতি )
অনসূযা – – ইদানীমতিথিবিশেষলাভেন | হলা শকুন্তলে
গচ্ছোটজম্ | ফলমিশ্রমর্ঘমুপহর | ইদং পাদোদকং ভবিষ্যতি|
রাজাঃ – – ভবতীনাং সূনৃতযৈব গিরাকৃতমাতিথ্যম্ |
প্রিযংবদা – – তেন হ্যস্যাং প্রছাযশীতলাযাং সপ্তপর্ণবেদিকাযাং
মুহূর্তমুপবিশ্য পরিশ্রমবিনোদং করোত্বার্যঃ |
রাজাঃ – – নূনং যূযমপ্যনেন কর্মণা পরিশ্রান্তাঃ |
অনসূযা – – হলা শকুন্তলে উচিতং নঃ পর্যুপাসনমতিথীনাম্ |
অত্রোপবিশামঃ |
( ইতি সর্বা উপবিশন্তি )
শকুংতলা – – ( আত্মগতম্ )
কিং নু খল্বিমং প্রেক্ষ্য তপোবনবিরোধিনো বিকারস্য গমনীযাস্মি
সংবৃত্তা |
রাজাঃ – – ( সর্বা বিলোক্য )
অহো সমবযোরূপরমণীযং ভবতীনাং সৌহার্দম্ |
প্রিযংবদা – – ( জনান্তিকম্ )
অনসূযে কো নু খল্বেষ চতুরগম্ভীরাকৃতির্মধুরং
প্রিযমালপন্প্রভাববানিব লক্ষ্যতে |
অনসূযা – – সখি মমাপ্যস্তি কৌতূহলম্ | পৃচ্ছামি তাবদেনম্ |
( প্রকাশম্ )
আর্যস্য মধুরালাপজনিতো বিশ্রম্ভো মাং মন্ত্রযতে কতম আর্যেণ
রাজর্ষিবংশোঽলংক্রিযতে কতমো বা বিরহপর্যুত্সুকজনঃ কুতো দেশঃ
কিংনিমিত্তং বা সুকুমারতরোঽপি তপোবনগমনপরিশ্রমস্যাত্মা
পদমুপনীতঃ |
শকুংতলা – – ( আত্মগতম্ )
হৃদয মোত্তাম্য | এষা ত্বযা চিন্তিতান্যনসূযা মন্ত্রযতে |
রাজাঃ – – ( আত্মগতম্ )
কথমিদানীং আত্মানং নিবেদযামি কথং বাত্মাপহারং করোমি | ভবতু |
এবং তাবদেনাং বক্ষ্যে |
( প্রকাশম্ )
ভবতি যঃ পৌরবেণ রাজ্ঞা ধর্মাধিকারে নিযুক্তঃ
সোহমবিঘ্নক্রিযৌপলম্ভায ধর্মারণ্যমিদং আযাতঃ |
( শকুংতলা শৃঙ্গারলজ্জাং রূপযতি )
অনসূযা – – ( উভযোরাকারং বিদিত্বা | জনান্তিকম্ )
হলা শকুন্তলে যদ্যত্রাদ্য তাতঃ সংনিহিতো ভবেত্ |
শকুংতলা – – ততঃ কিং ভবেত্ |
সখ্যৌ – – ইমং জীবিতসর্বস্বেনাপ্যতিথিবিশেষং কৃতার্থং
করিষ্যতি |
শকুংতলা – – যুবামপেতম্ | কিমপি হৃদযে কৃত্বা মত্রযেথে | ন
যুবযোর্বচনং শ্রোষ্যামি |
রাজাঃ – – বযমপি তাবদ্ভবত্যোঃ সখীগতং কিমপি পৃচ্ছামঃ |
সখ্যৌ – – আর্য অনুগ্রহ ইবেযমভ্যর্থনা |
রাজাঃ – – ভগবান্কাশ্যপঃ শাশ্বতে ব্রহ্মণি স্থিত ইতি প্রকাশঃ |
ইযং চ বঃ সখী তদাত্মজেতি কথমেতত্ |
অনসূযা – – শৃণোত্বার্যঃ | অস্তি কোঽপি কৌশিক ইতি গোত্রনামধেযো
মহাপ্রভাবো রাজর্ষিঃ |
রাজাঃ – – অস্তি | শ্রূযতে |
অনসূযা – – তমাবযোঃ প্রিযসখ্যাঃ প্রভবমবগচ্ছ | উজ্ঝিতাযাঃ
শরীরসংবর্ধনাদিভিস্তাতকাশ্যপোঽস্যাঃ পিতা |
রাজাঃ – – উজ্ঝিতশব্দেন জনিতং মে কৌতূহলম্ |
আমূলাচ্ছ্হ্রোতুমিচ্ছামি |
অনসূযা – – শৃণোত্ব্ আর্যঃ | গৌতমীতীরে পুরা কিল তস্য
রাজর্ষেরুগ্রে তপসি বর্তমানস্য কিমপি জাতশঙ্কৈর্দেবৈর্মেনকা
নামাপ্সরাঃ প্রেষিতা নিযমবিঘ্নকারিণী |
রাজাঃ – – অস্ত্যেতদন্যসমাধিভীরুত্বং দেবানাম্ |
অনসূযা – – ততো বসংতোদারসমযে তস্যা উন্মাদযিতৃ রূপং প্রেক্ষ্য –
( ইত্যর্ধোক্তে লজ্জযা বিরমতি )
রাজাঃ – – পরস্তাজ্জ্ঞাযত এব | সর্বথাপ্সরঃসংভবৈষা |
অনসূযা – – অথ কিম্ |
রাজাঃ – – উপপদ্যতে |
মানুষীষু কথং বা স্যাদস্য রূপস্য সংভবঃ |
ন প্রভাতরলং জ্যোতিরুদেতি বসুধাতলাত্||২৩||
( শকুংতলাঽধোমুখী তিষ্ঠতি )
রাজাঃ – – ( আত্মগতম্ )
লব্ধাবকাশো মে মনোরথঃ | কিং তু সখ্যা পরিহাসোদাহৃতাং
বরপ্রার্থনাং শ্রুত্বা ধৃতদ্বৈধীভাবকাতরং মে মনঃ |
প্রিযংবদা – – ( সস্মিতং শকুংতলাং বিলোক্য নাযকাভিমুখী ভূত্বা )
পুনরপি বক্তুকাম ইবার্যঃ |
( শকুংতলা সখীমঙ্গুল্যা তর্জযতি )
রাজাঃ – – সম্যগুপলক্ষিতং ভবত্যা | অস্তি নঃ
সচ্চরিতশ্রবণলোভাদন্যদপি প্রষ্টব্যম্ |
প্রিযংবদা – – অলং বিচার্য | অনিযন্ত্রণানুযোগস্তপস্বিজনো নাম |
রাজাঃ – – ইতি সখীং তে জ্ঞাতুমিচ্ছামি |
বৈখানসং কিমনযা ব্রতমাপ্রদানাদ্ –
ব্যাপাররোধি মদনস্য নিষেবিতব্যম্ |
অত্যন্তমাত্মসদৃশেক্ষণবল্লভাভিরাহো
নিবত্স্যতি সমং হরিণাঙ্গনাভি||২৪||
প্রিযংবদা – – আর্য ধর্মচরণেঽপি পরবশোঽযং জনঃ | গুরোঃ
পুনরস্যা অনুরূপবরপ্রদানে সংকল্পঃ |
রাজাঃ – – ( আত্মগতম্ )
ন দুরবাপেযং খলু প্রার্থনা |
ভব হৃদয সাভিলাষং সংপ্রতি সংদেহনির্ণযো জাতঃ |
আশঙ্কসে যদগ্নিং তদিদং স্পর্শক্ষমং রত্নম্||২৫||
শকুংতলা – – ( সরোষমিব )
অনসূযে গমিষ্যাম্যহম্ |
অনসূযা – – কিংনিমিত্তম্ |
শকুংতলা – – ইমামসম্বদ্ধপ্রলাপিনীং প্রিযংবদাং আর্যাযৈ গৌতম্যৈ
নিবেদযিষ্যামি |
অনসূযা – – সখি ন যুক্তমকৃতসত্কারমতিথিবিশেষং বিসৃজ্য
স্বছন্দতো গমনম্ |
( শকুংতলা ন কিংচিদুক্ত্বা প্রস্থিতৈব )
রাজাঃ – – ( গ্রহীতুমিচ্ছন্নিগৃহ্যাত্মানম্ | আত্মগতম্ )
অহো চেষ্টাপ্রতিরূপিকা কামিজনমনোবৃত্তিঃ | অহং হি
অনুযাস্যন্মুনিতনযাং সহসা বিনযেন বারিতপ্রসরঃ |
স্থানাদনুচ্চলন্নপি গত্বেব পুনঃ প্রতিনিবৃত্তঃ||২৬||
প্রিযংবদা – – ( শকুংতলাং নিরুধ্য )
হলা ন তে যুক্তং গন্তুম্ |
শকুংতলা – – ( সভ্রূভঙ্গম্ )
কিংনিমিত্তম্ |
প্রিযংবদা – – বৃক্ষসেচনে দ্বে ধারযসি মে | এহি তাবত্ | আত্মানং
মোচযিত্বা ততো গমিষ্যসি |
( ইতি বলাদেনাং নিবর্তযতি )
রাজাঃ – – ভদ্রে বৃক্ষসেচনাদেব পরিশ্রান্তামত্রভবতীং লক্ষযে |
তথা হ্যস্যাঃ
স্রস্তাংসাবতিমাত্রলোহিততলৌ বাহূ ঘটোত্ক্ষেপণাদদ্যপি স্তনবেপথুং
জনযতি শ্বাসঃ প্রমাণাধিকঃ |
বদ্ধং কর্ণশিরীষরোধি বদনে ধর্মাম্ভসাং জালকং
বন্ধে স্রংসিনি চৈকহস্তযমিতাঃ পর্যাকুলা মূর্ধজাঃ||২৭||
তদহমেনাংনৃণাং করোমি |
( ইত্যঙ্গুলীযং দাতুমিচ্ছতি )
( উভে নামমুদ্রাক্ষরাণ্যনুবাচ্য পরস্পরমবলোকযতঃ )
রাজাঃ – – অলমস্মানন্যথা সংভাব্য | রাজ্ঞঃ পরিগ্রহোযমিতি
রাজপুরুষ মামবগচ্ছত |
প্রিযংবদা – – তেন হি নার্হত্যঙ্গুলীযকমঙ্গুলীবিযোগম্ | আর্যস্য
বচনেনানৃণেদানীমেষা |
( কিঞ্চিদ্বিহস্য )
হলা শকুন্তলে মোচিতাস্যনুকম্পিনার্যেণ | অথবা মহারাজেন |
গচ্ছেদানীম্ |
শকুংতলা – – ( আত্মগতম্ )
যদ্যাত্মনঃ প্রভবিষ্যামি |
( প্রকাশম্ )
কা ত্বং বিস্রষ্টব্যস্য রোদ্ধব্যস্য বা |
রাজাঃ – – ( শকুংতলাং বিলোক্য | আত্মগতম্ )
কিং নু খলু যথা বযমস্যামেবমিযমপ্যস্মান্প্রতি স্যাত্ | অথবা
লব্ধাবকাশা মে প্রার্থনা | কুতঃ |
বাচং ন মিশ্রযতি যদ্যপি মদ্বচোভিঃ
কর্ণং দদাত্যভিমুখং মযি ভাষমাণে |
কামং ন তিষ্ঠতি মদাননসংমুখীনা
ভূযিষ্ঠমন্যবিষযা ন তু দৃষ্টিরস্যাঃ||২৮||
( নেপথ্যে )
ভো ভোস্তপস্বিনঃ সংনিহিতাস্তপোবনসত্ত্বরক্ষাযৈ ভবত | প্রত্যাসন্নঃ
কিল মৃগযাবিহারী পার্থিবো দুষ্যন্তঃ |
তুরগখুরহতস্তথা হি রেণুর্বিটপবিষক্তজলার্দ্রবল্কলেষু |
পততি পরিণতারুণপ্রকাশঃ শলভসমূহ ইবাশ্রমদ্রুমেষু||২৯||
অপি চ |
তীব্রাঘাতপ্রতিহততরুস্কন্ধলগ্নৈকদন্তঃ
পাদাকৃষ্টব্রততিবলযাসঙ্গসংজাতপাশঃ |
মূর্তো বিঘ্নস্তপস ইব নো ভিন্নসারঙ্গযূথো
ধর্মারণ্যং প্রবিশতি গজঃ স্যন্দনালোকভীতঃ||৩০||
( সর্বাঃ কর্ণং দত্ত্বা কিংচিদিব সম্ভ্রান্তাঃ )
রাজাঃ – – ( আত্মগতম্ )
অহো ধিক্ পৌরা অস্মদন্বেষিণস্তপোবনুপরুন্ধন্তি | ভবতু |
প্রতিগমিষ্যামস্তাবত্ |
সখ্যৌ – – আর্য অনেনারণ্যকবৃত্তান্তেন পর্যাকুলাঃ স্মঃ | অনুজানীহি
ন উটজগমনায |
রাজাঃ – – ( সসংভ্রমম্ )
গচ্ছন্তু ভবত্যঃ | বযমপ্যাশ্রমপীডা যথা ন ভবতি তথা
প্রযতিষ্যামহে |
( সর্বে উত্তিষ্ঠন্তি )
সখ্যৌ – – আর্য অসংভাবিতাতিথিসত্কারং ভূযোঽপি প্রেক্ষণনিমিত্তং
লজ্জামহে আর্যং বিজ্ঞাপযিতুম্ |
রাজাঃ – – মা মৈবম্ | দর্শনেনৈব ভবতীনাং পুরস্কৃতোঽস্মি |
শকুংতলা – – অনসূযে অভিনবকুশসূচ্যা পরিক্ষতং মে চরণং
কুরবকশাখাপরিলগ্নং চ বল্কলম্ | তাবত্পরিপালযত মাং
যাবদেতন্মোচযামি |
( শকুংতলা রাজানমবলোকযন্তী সব্যাজং বিলম্ব্য সহ সখীভ্যাং
নিষ্ক্রান্তা )
রাজাঃ – – মন্দৌত্সুক্যোঽস্মি নগরগমনং প্রতি |
যাবদনুযাত্রিকান্সমেত্য নাতিদূরে তপোবনস্য নিবেশযেযম্ | ন খলু
শক্নোমি শকুংতলাব্যাপারাদাত্মানং নিবর্তযিতুম্ | মম হি
গচ্ছতি পুরঃ শরীরং ধাবতি পশ্চাদসংস্তুতং চেতঃ |
চীনাংশুকমিব কেতোঃ প্রতিবাতং নীযমানস্য||৩১||
( ইতি নিষ্ক্রান্তাঃ সর্বে )

( ইতি প্রথমোঽঙ্কঃ | )