অভিজ্ঞানশাকুন্তলম্ ০২

দ্বিতীযোঽঙ্কঃ |

( ততঃ প্রবিশতি বিষণ্ণো বিদূষকঃ )
বিদূষকঃ – – ( নিঃশ্বস্য )
ভো দিষ্টম্ | এতস্য মৃগযাশীলস্য রাজ্ঞো বযস্যভাবেন নির্বিণ্ণোঽস্মি
| অযম্ মৃগোঽযং বহারোঽযং শার্দূল ইতি মধ্যাহ্নেঽপি
গ্রীষ্মবিরলপাদপছাযাসু বনরাজিষ্বাহিণ্ডযতে অটবীতোঽটবী |
পত্রসঙ্করকষাযাণি কদুষ্ণানি গিরিনদীজলানি পীযন্তে | অনিযতবেলং
শূল্যমাংসভূযিষ্ঠ আহারো ভুজ্যতে | তুরগানুধাবনকণ্ডিতসংধে
রাত্রাবপি নিকামং শযিতব্যং নাস্তি | ততো মহত্যেব প্রত্যূষে
দাস্যাঃপুত্রৈঃ শকুনিলুব্ধকৈর্বনগ্রহণকোলাহলেন প্রতিবোধিতোঽস্মি |
ইযতেদানীমপি পীডা ন নিষ্ক্রামতি | ততো গণ্ডস্যোপরি পিণ্ডকঃ
সংবৃত্তঃ | হ্যঃ কিলাস্মাস্ববহীনেষু তত্র ভবতো
মৃগানুসারেণাশ্রমপদং প্রবিষ্টস্য তাপসকন্যকা শকুংতলা
মমাধন্যতযা দর্শিতা | সাম্প্রতং নগরগমনায মনঃ কথমপি ন
করোতি | অদ্যাপি তস্য তামেব চিন্তযতোঽক্ষ্ণোঃ প্রভাতমাসীত্ | কা গতিঃ
| যাবত্তং কৃতাচারপরিক্রমং পশ্যামি |
( ইতি পরিক্রম্যাবলোক্য চ )
এষ বাণাসনহস্তাভির্যবনীভির্বনপুষ্পমালাধারিণীভিঃ পরিবৃত
ইত এবাগছতি প্রিযবযস্যঃ | ভবতু | অন্গভন্গবিকল ইব ভূত্বা
স্থাস্যামি | যদ্যেবমপি নাম বিশ্রমং লভেয |
( ইতি দণ্ডকাষ্ঠমবলম্ব্য স্থিতঃ )
( ততঃ প্রবিশতি যথানির্দিষ্টপরিবারো রাজা )
রাজাঃ – –
কামং প্রিযা ন সুলভা মনস্তু তদ্ভাবদর্শনাশ্বাসি |
অকৃতার্থেঽপি মনসিজে রতিমুভযপ্রার্থনা কুরুতে||১||
( স্মিতং কৃত্বা )
এবমাত্মাভিপ্রাযসম্ভাবিতেষ্টজনচিত্তবৃত্তিঃ প্রার্থযিতা বিডম্ব্যতে
|
স্নিগ্ধং বীক্ষিতমন্যতোঽপি নযনে যত্প্রেরযন্ত্যা তযা
যাতং যচ্চ নিতম্বযোর্গুরুতযা মন্দং বিলাসাদিব |
মা গা ইত্যুপরুদ্ধযা যদপি সা সাসূযমুক্তা সখী
সর্বং তত্কিল মত্পরাযণমহো কামী স্বতাং পশ্যতি||২||
বিদূষকঃ – – ( তথাস্থিত এব )
ভো বযস্য ন মে হস্তপাদং প্রসরতি তদ্বাঙ্মাত্রেণ জাপযিষ্যামি |
জযতু জযতু ভবান্ |
রাজাঃ – – কুতোঽযং গাত্রোপঘাতঃ |
বিদুষকঃ – – কুতঃ কিল স্বযমক্ষ্যাকুলীকৃত্যাশ্রুকারণং পৃচ্ছসি
|
রাজাঃ – – ন খল্বাবগচ্ছামি |
বিদুষকঃ – – ভো বযস্য যদ্বেতসঃ কুব্জলীলাং বিডম্বযতি তত্কিমাত্মনঃ
প্রভাবেণ ননু নদীবেগস্য |
রাজাঃ – – নদীবেগস্তত্র কারণম্ |
বিদুষকঃ – – মমাপি ভবান্ |
রাজাঃ – – কথমিব |
বিদুষকঃ – – এবং রাজকার্যাণ্যুজ্ঝিত্বৈতাদৃশ আকুলপ্রদেশে
বনচরবৃত্তিনা ত্বযা ভবিতব্যম্ | যত্সত্যং প্রত্যহং
শ্বাপদসমুত্সারণৈঃ সংক্ষোভিতসংধিবন্ধানাং মম
গাত্রাণামনীশোঽস্মি সংবৃত্তঃ | তত্প্রসীদ মে | একাহমপি
তাবদ্বিশ্রম্যতাম্ |
রাজাঃ – – ( স্বগতম্ )
অযং চৈবমাহ | মমাপি কাশ্যপসুতামনুস্মৃত্য মৃগযাবিক্লবং চেতঃ |
কুতঃ |
ন নমযিতুমধিজ্যমস্মি শক্তো ধনুরিদমাহিতসাযকং মৃগেষু |
সহবসতিমুপেত্য যৈঃ প্রিযাযাঃ কৃত ইব মুগ্ধবিলোকিতোপদেশঃ||৩||
বিদুষকঃ – – ( রাজ্ঞো মুখং বিলোক্য )
অত্রভবান্কিমপি হৃদযে কৃত্বা মন্ত্রযতে | অরণ্যে মযা রুদিতমাসীত্ |

রাজাঃ – – ( সস্মিতম্ )
কিমন্যত্ | অনতিক্রমণীযং মে সুহৃদ্বাক্যমিতি স্থিতোঽস্মি |
বিদুষকঃ – – চিরং জীব |
( ইতি গন্তুমিছতি )
রাজাঃ – – বযস্য তিষ্ঠ | সাবশেষং মে বচঃ |
বিদুষকঃ – – আজ্ঞাপযতু ভবান্ |
রাজাঃ – – বিশ্রান্তেন ভবতা মমাপ্যেকস্মিন্ননাযাসে কর্মণি সহাযেন
ভবিতব্যম্ |
বিদুষকঃ – – কিং মোদকখাদিকাযাম্ | তেন হ্যযং সুগৃহীতঃ ক্ষণঃ |
রাজাঃ – – যত্র বক্ষ্যামি | কঃ কোঽত্র ভোঃ |
( প্রবিশ্য )
দৌবারিকঃ – – ( প্রণম্য )
আজ্ঞাপযতু ভর্ত্তা |
রাজাঃ – – রৈবতক সেনাপতিস্তাবদাহূযতাম্ |
দৌবারিকঃ – – তথা |
( ইতি নিষ্ক্রম্য সেনাপতিনা সহ পুনঃ প্রবিশ্য )
এষ আজ্ঞাবচনোত্কণ্ঠো ভর্তেতোদত্তদৃষ্টিরেব তিষ্ঠতি |
উপসর্পত্বার্যঃ |
সেনাপতি – – ( রাজানমবলোক্য )
দৃষ্টদোষাপি স্বামিনি মৃগযা কেবলং গুণ এব সংবৃত্তা | তথা হি
দেবঃ
অনবরতধনুর্জ্যাস্ফালনক্রূরপূর্ব
রবিকিরণসহিষ্ণু স্বেদলেশৈরভিন্নম্ |
অপচিতমপি গাত্রং ব্যাযতত্বাদলক্ষ্যং
গিরিচর ইব নাগঃ প্রাণসারং বিভর্তি||৪||
( উপেত্য )
জযতু জযতু স্বামী | গৃহীতশ্বাপদমরণ্যম্ | কিমন্যত্রাবস্থীযতে |

রাজাঃ – – মন্দোত্সাহঃ কৃতোঽস্মি মৃগযাপবাদিনা মাধব্যেন |
সেনাপতি – – ( জনান্তিকম্ )
সখে স্থিরপ্রতিবন্ধো ভব | অহং
তাবত্স্বামিনশ্চিত্তবৃত্তিমনুবর্তিষ্যে |
( প্রকাশম্ )
প্রলপত্বেষ বৈধেযঃ | ননু প্রভুরেব নিদর্শনম্ |
মেদশ্ছেদকৃশোদরং লঘু ভবত্যুত্থানযোগ্যং বপুঃ
সত্ত্বানামপি লক্ষ্যতে বিকৃতিমচ্চিত্তং ভযক্রোধযোঃ |
উত্কর্ষঃ স চ ধন্বিনাং যদিষবঃ সিধ্যন্তি লক্ষ্যে চলে
মিথ্যৈব ব্যসনং বদন্তি মৃগযামীদৃগ্বিনোদঃ কুতঃ||৫||
বিদুষকঃ – – অপেহি রে উত্সাহহেতুক | অত্রভবান্প্রকৃতিমাপন্নঃ | ত্বং
তাবদটবীতোঽটবীমাহিণ্ডমানো নরনাসিকালোলুপস্য জীর্ণর্ক্ষিস্য কস্যাপি
মুখে পতিষ্যসি |
রাজাঃ – – ভদ্র সেনাপতে আশ্রমসংনিকৃষ্টে স্থিতাঃ স্মঃ | অতস্তে
বচো নাভিনন্দামি | অদ্য তাবত্ |
গাহন্তাং মহিষা নিপানসলিলং শৃঙ্গৈর্মুহুস্তাডিতম্
ছাযাবদ্ধকদম্বকং মৃগকুলং রোমন্থমভ্যস্যতু |
বিশ্রব্ধং ক্রিযতাং বরাহততিভির্মুস্তাক্ষতিঃ পল্বলে
বিশ্রামং লভতামিদং চ শিথিতলজ্যাবন্ধমস্মদ্ধনুঃ||৬||
সেনাপতি – – যত্প্রভবিষ্ণবে রোচতে |
রাজাঃ – – তেন হি নিবর্তয পূর্বগতান্বনগ্রাহিণঃ | যথা ন মে
সৈনিকাস্তপোবনমুপরুন্ধন্তি তথা নিষেদ্ধব্যাঃ | পশ্য |
শমপ্রধানেষু তপোধনেষু গূঢং হি দাহাত্মকমস্তি তেজঃ |
স্পর্শানুকূলা ইব সূর্যকান্তাস্তদন্যতেজোঽভিভবাদ্বমন্তি||৭||
সেনাপতি – – যদাজ্ঞাপযতি স্বামী |
বিদুষকঃ – – ধ্বংসতাং তে উত্সাহবৃত্তান্তঃ |
( নিষ্ক্রান্তঃ সেনাপতিঃ )
রাজাঃ – – ( পরিজনং বিলোক্য )
অপনযন্তু ভবত্যো মৃগযাবেশম্ | রৈবতক ত্বমপি স্বং নিযোগমশূন্যং
কুরু |
পরিজন – – যদ্দেব আজ্ঞাপযতি |
( ইতি নিষ্ক্রান্তঃ )
বিদুষকঃ – – কৃতং ভবতা নির্মক্ষিকম্ |
সাম্প্রতমেতস্মিন্পাদপছাযাবিরচিতবিতানসনাথে শিলাতলে নিষীদতু
ভবান্যাবদহমপি সুখাসীনো ভবামি |
রাজাঃ – – গচ্ছাগ্রতঃ |
বিদুষকঃ – – এতু ভবান্ |
( ইত্যুভৌ পরিক্রম্যৌপবিষ্টৌ )
রাজাঃ – – মাধব্য অনবাপ্তচক্ষুঃফলোঽসি | যেন ত্বযা দর্শনীযং ন
দৃষ্টম্ |
বিদুষকঃ – – ননু ভবানগ্রতো মে বর্ততে |
রাজাঃ – – সর্বঃ কান্তমাত্মীযং পশ্যতি | অহং তু তাং
এবাশ্রমললামভূতাং শকুংতলামধিকৃত্য ব্রবীমি |
বিদুষকঃ – – ( স্বগতম্ ) ভবতু | অস্যাবসরং ন দাস্যে |
( প্রকাশম্ )
ভো বযস্য তে তাপসকন্যকাভ্যর্থনীযা দৃশ্যতে |
রাজাঃ – – সখে ন পরিহার্যে বস্তুনি পৌরবাণাং মনঃ প্রবর্ততে |
সুরযুবতিসংভবং কিল মুনেরপত্যং তদুজ্ঝিতাধিগতম্ |
অর্কস্যোপরি শিথিলং চ্যুতমিব নবমালিকাকুসুমম্||৮||
বিদুষকঃ – – ( বিহস্য )
যথা কস্যাপি পিণ্ডখর্জূরৈরুদ্বেজিতস্য তিণ্ড্যাং
( তিন্তিণ্যাং )
অভিলাষো ভবেত্তথা স্ত্রীরত্নপরিভোগিণঃ ভবত ইযমভ্যর্থনা |
রাজাঃ – – ন তাবদেনাং পশ্যাসি যেনৈবমবাদীঃ |
বিদুষকঃ – – তত্খলু রমণীযং যদ্ভবতোঽপি বিস্মযমুত্পাদযতি |
রাজাঃ – – বযস্য কিং বহুনা |
চিত্রে নিবেশ্য পরিকল্পিতসত্ত্বযোগা
রূপোচ্চযেন মনসা বিধিনা কৃতা নু |
স্ত্রীরত্নসৃষ্টিরপরা প্রতিভাতি সা মে
ধাতুর্বিভুত্বমনুচিন্ত্য বপুশ্চ তস্যাঃ||৯||
বিদুষকঃ – – যদ্যেবং প্রত্যাদেশ ইদানীং রূপবতীনাম্ |
রাজাঃ – – ইদং চ মে মনসি বর্ততে |
অনাঘ্রাতং পুষ্পং কিসলযমলূনং কররুহৈরনাবিদ্ধং
রত্নং মধু নবমনাস্বাদিতরসম্ |
অখণ্ডং পুষ্যানাং ফলমিব চ তদ্রূপমনঘং ন জানে
ভোক্তারং কমিহ সমুপস্থাস্যতি বিধিঃ||১০||
বিদুষকঃ – – তেন হি লঘু পরিত্রাযতামেনাং ভবান্ | মা কস্যাপি
তপস্বিন ইন্গুদীতৈলচিক্কণশীর্ষস্য হস্তে পতিষ্যতি |
রাজা – – পরবতী খলু তত্রভবতী | ন চ সংনিহিতোঽত্র গুরুজনঃ |
বিদুষকঃ – – অথ ভবন্তমন্তরেণ কীদৃশস্তস্যা দৃষ্টিরাগঃ |
রাজাঃ – – নিসর্গাদেবাপ্রগল্ভস্তপস্বিকন্যাজনঃ | তথাপি তু
অভিমুখে মযি সম্হৃতমীক্ষিতং হসিতমন্যনিমিত্তকৃতোদযম্ |
বিনযবারিতবৃত্তিরতস্তযা ন বিবৃতো মদনো ন চ সংবৃতঃ||১১||
বিদুষকঃ – – ন খলু দৃষ্টমাত্রস্য তবাঙ্কং সমারোহতি |
রাজাঃ – – মিথঃ প্রস্থানে পুনঃ শালীনতযাপি কামমাবিষ্কৃতো
ভাবস্তত্রভবত্যা | তথা হি |
দর্ভাঙ্কুরেণ চরণঃ ক্ষত ইত্যকাণ্ডে তন্বী
স্থিতা কতিচিদেব পদানি গত্বা |
আসীদ্বিবৃত্তবদনা চ বিমোচযন্তী
শাখাসু বল্কলমসক্তমপি দ্রুমাণাম্||১২||
বিদুষকঃ – – তেন হি গৃহীতপাথেযো ভব | কৃতং ত্বযোপবনং
তপোবনমিতি পশ্যামি |
রাজাঃ – – সখে তপস্বিভিঃ কৈশ্চিত্পরিজ্ঞাতোঽস্মি | চিন্তয
তাবত্কেনাপদেশেন পুনরাশ্রমপদং গচ্ছামঃ |
বিদুষকঃ – – কোঽপরোঽপদেশো যুষ্মাকং রাজ্ঞাম্ |
নীবারষষ্ঠভাগমস্মাকমুপহরন্ত্বিতি |
রাজাঃ – – মূর্খ অন্যমেব ভাগধেযমেতে তপস্বিনো নির্বপন্তি যো
রত্নরাশীনপি বিহাযাভিনন্দ্যতে | পশ্য |
যদুত্তিষ্ঠতি বর্ণেভ্যো নৃপাণাং ক্ষযি তত্ফলম্ |
তপঃষড্ভাগমক্ষয্যং দদত্যারণ্যকা হি নঃ||১৩||
( নেপথ্যে )
হন্ত সিদ্ধার্থৌ স্বঃ |
রাজাঃ – – ( কর্ণং দত্ত্বা )
অযে ধীরপ্রশান্তস্বরৈস্তপস্বিভির্ভবিতব্যম্ |
( প্রবিশ্য )
দৌবারিকঃ – – জযতু জযতু ভর্তা | এতৌ দ্বৌ ঋষিকুমারৌ
প্রতীহারভূমিমুপস্থিতৌ |
রাজাঃ – – তেন হ্যবিলম্বিতং প্রবেশয তৌ |
দৌবারিকঃ – – এষ প্রবেশযামি |
( ইতি নিষ্ক্রম্য ঋষিকুমারাভ্যাং সহ প্রবিশ্য )
( উভৌ রাজানং বিলোকযতঃ )
প্রথমঃ – – অহো দীপ্তিমতোঽপি বিশ্বসনীযতাস্য বপুষঃ | অথবা
উপপন্নমেতদস্মিন্ ঋষিভ্যো নাতিভিন্নে রাজনি | কুতঃ |
অধ্যাক্রান্তা বসতিরমুনাপ্যাশ্রমে সর্বভোগ্যে
রক্ষাযোগাদযমপি তপঃ প্রত্যহং সংচিনোতি |
অস্যাপি দ্যাং স্পৃশতি বশিনশ্চারণদ্বন্দ্বগীতঃ
পুণ্যঃশব্দো মুনিরিতি মুহুঃ কেবলং রাজপূর্বঃ||১৪||
দ্বিতীযঃ – – গৌতম অযং স বলভিত্সখো দুষ্যন্তঃ |
প্রথমঃ – – অথ কিম্ |
দ্বিতীযঃ – – তেন হি
নৈতচ্চিত্রং যদযমুদধিশ্যামসীমাং ধরিত্রীমেকঃ
কৃত্স্নাং নগরপরিঘপ্রাংশুবাহুর্ভুনক্তি |
আশংসন্তে সমিতিষু সুরা বদ্ধবৈরা হি দৈত্যৈরস্যাধিজ্যে
ধনুষি বিজযং পৌরুহূতে চ বজ্রে||১৫||
উভৌ – – ( উপগম্য )
বিজযস্ব রাজন্ |
রাজাঃ – – ( আসনাদুত্থায )
অভিবাদযে ভবন্তৌ |
উভৌ – – স্বস্তি ভবতে |
( ইতি ফলান্যুপহরতঃ )
রাজাঃ – – ( সপ্রণামং পরিগৃহ্যঃ )
আজ্ঞাপযিতুমিচ্ছামি |
উভৌ – – বিদিতো ভবানাশ্রমসদামিহস্থঃ | তেন ভবন্তং প্রার্থযন্তে
|
রাজাঃ – – কিমাজ্ঞাপযন্তি |
উভৌ – – তত্রভবতঃ কণ্বস্য মহর্ষেরসাংনিধ্যাদ্রক্ষাংসি ন
ইষ্টিবিঘ্নমুত্পাদযন্তি | তত্কতিপযরাত্রং সারথিদ্বিতীযেন ভবতা
সনাথীক্রিযতামাশ্রম ইতি |
রাজাঃ – – অনুগৃহীতোঽস্মি |
বিদুষকঃ – – ( অপবার্য )
এষেদানীমনুকূলা তেঽভ্যর্থনা |
রাজাঃ – – ( স্মিতং কৃত্বা )
রৈবতক মদ্বচনাদুচ্যতাং সারথিঃ | সবাণাসনং রথমুপস্থাপযেতি
|
দৌবারিকঃ – – যদ্দেব আজ্ঞাপযতি |
( ইতি নিষ্ক্রান্তঃ )
উভৌ – – ( সহর্ষম্ )
অনুকারিণি পূর্বেষাং যুক্তরূপমিদং ত্বযি |
আপন্নাভযসত্রেষু দীক্ষিতাঃ খলু পৌরবাঃ||১৬||
রাজাঃ – – ( সপ্রণামম্ )
গচ্ছতাং পুরো ভবন্তৌ | অহমপ্যনুপদমাগত এব |
উভৌ – – বিজযস্ব
( ইতি নিষ্ক্রান্তৌ )
রাজাঃ – – মাধব্য অপ্যস্তি শকুংতলাদর্শনে কুতূহলম্ |
বিদুষকঃ – – প্রথমং সপরিবাহমাসীত্ | ইদানীং
রাক্ষসবৃত্তান্তেন বিন্দুরপি নাবশেষিতঃ |
রাজাঃ – – মা ভৈষীঃ | ননু মত্সমীপে বর্তিষ্যসে |
বিদুষকঃ – – এষ রাক্ষসাদ্রক্ষিতোঽস্মি |
( প্রবিশ্য )
দৌবারিকঃ – – সজ্জো রথো ভর্তুর্বিজযপ্রস্থানমপেক্ষতে | এষ
পুনর্নগরাদ্দেবীনামাজ্ঞপ্তিহরঃ করভক আগতঃ |
রাজাঃ – – ( সাদরম্ )
কিমম্বাভিঃ প্রেষিতঃ |
দৌবারিকঃ – – অথ কিম্ |
রাজাঃ – – ননু প্রবেশ্যতাম্ |
দৌবারিকঃ – – তথা |
( ইতি নিষ্ক্রম্য করভকেণ সহ প্রবিশ্য )
এষ ভর্তা | উপসর্প |
করভকঃ – – জযতু জযতু ভর্তা | দেব্যাজ্ঞাপযতি | আগামিনি
চতুর্থদিবসে প্রবৃত্তপারণো মে উপবাসো ভবিষ্যতি | তত্র
দীর্ঘাযুষাবশ্যং সংভাবনীযেতি |
রাজাঃ – – ইতস্তপস্বিকার্যম্ | ইতো গুরুজনাজ্ঞা |
দ্বযমপ্যনতিক্রমণীযম্ | কিমত্র প্রতিবিধেযম্ |
বিদুষকঃ – – ত্রিশঙ্কুরিবান্তরা তিষ্ঠ |
রাজাঃ – – সত্যমাকুলীভূতোঽস্মি |
কৃত্যযোর্ভিন্নদেশত্বাদ্ দ্বৈধীভবতি মে মনঃ |
পুরঃ পতিহতং শৈলে স্রোতঃ স্রোতোবহো যথা||১৭||
( বিচিন্ত্য )
সখে ত্বমম্বযা পুত্র ইতি প্রতিগৃহীতঃ | অতো ভবানিতঃ প্রতিনিবৃত্য
তপস্বিকার্যব্যগ্রমানসং মামাবেদ্য তত্রভবতীনাং
পুত্রকৃত্যমনুষ্ঠাতুমর্হতি |
বিদুষকঃ – – ন খলু মাং রক্ষোভীরুকং গণযসি |
রাজাঃ – – ( সস্মিতম্ )
কথমেতদ্ভবতি সংভাব্যতে |
বিদুষকঃ – – যথা রাজানুজেন গন্তব্যং তথা গচ্ছামি |
রাজাঃ – – ননু তপোবনোপরোধঃ পরিহরণীয ইতি
সর্বানানুযাত্রিকাংস্ত্বযৈব সহ প্রস্থাপযামি |
বিদুষকঃ – – ( সগর্বম্ )
তেন হি যুবরাজোঽস্মীদানীং সংবৃত্তঃ |
রাজাঃ – – ( স্বগতম্ )
চপলোঽযং বটুঃ | কদাচিদস্মত্প্রার্থনামন্তঃপুরেভ্যঃ কথযেত্ |
ভবতু | এনমেবং বক্ষ্যে |
( বিদূষকং হস্তে গৃহীত্বা | প্রকাশম্ )
বযস্য ঋষিগৌরবাদাশ্রমং গচ্ছামি | ন খলু সত্যমেব
তাপসকন্যকাযাং মমাভিলাষঃ | পশ্য |
ক্ব বযং ক্ব পরোক্ষমন্মথো মৃগশাবৈঃ সমমেধিতো জনঃ |
পরিহাসবিজল্পিতং সখে পরমার্থেন ন গৃহ্যতাং বচঃ||১৮||
বিদুষকঃ – – অথ কিম্ |
( ইতি নিষ্ক্রান্তাঃ সর্বে )
( ইতি দ্বিতীযোঽঙ্কঃ | )