অভিজ্ঞানশাকুন্তলম্ ০৩

তৃতীযোঽঙ্কঃ |

( ততঃ প্রবিশতি কুশানাদায যজমানশিষ্যঃ )
শিষ্যঃ – – অহো মহানুভাবঃ পার্থিবো দুষ্যন্তঃ | যত্প্রবিষ্টমাত্র
এবাশ্রমং তত্রভবতি নিরুপদ্রবাণি নঃ কর্মাণি সংবৃত্তানি |
কা কথা বাণসংধানে জ্যাশব্দেনৈব দূরতঃ |
হুংকারেণেব ধনুষঃ স হি বিঘ্নানপোহতি||১||
যাবদিমান্বেদিসংস্তরণার্থং দর্ভানৃত্বিগ্ভ্য উপহরামি |
( পরিক্রম্যাবলোক্য চ | আকাশে )
প্রিযংবদে কস্যিদমুশীরানুলেপনং মৃণালবন্তি চ নলিনীপত্রাণি
নীযন্তে |
( শ্রুতিমভিনীয )
কিং ব্রবীষি | আতপলঙ্ঘনাদ্বলবদস্বস্থা শকুংতলা তস্যাঃ
শরীরনির্বাপণাযেতি | তর্হি যত্নাদুপচর্যতাম্ | সা খলু ভগবতঃ
কণ্বস্য কুলপতেরুচ্ছ্বসিতম্ | অহমপি তাবদ্বৈতানিকং শান্ত্যুদকমস্যৈ
গৈতমীহস্তে বিসর্জযিষ্যামি |
( ইতি নিষ্ক্রান্তঃ )
বিষ্কম্ভকঃ |
( ততঃ প্রবিশতি কামযমানাবস্থো রাজা )
রাজাঃ – – ( সচিন্তং নিঃশ্বস্য )
জানে তপসো বীর্যং সা বালা পরবতীতি মে বিদিতম্ |
অলমস্মি ততো হৃদযং তথাপি নেদং নিবর্তযিতুম্||২||
( মদনবাধাং নিরূপ্য )
ভগবন্কুসুমাযুধ ত্বযা চন্দ্রমসা চ
বিশ্বসনীযাভ্যামতিসংধীযতে কামিজনসার্থঃ | কুতঃ |
তব কুসুমশরত্বং শীতরশ্মিত্বমিন্দোর্দ্বযমিদমযথার্থং
দৃশ্যতে মদ্বিধেষু |
বিসৃজতি হিমগর্ভৈংরগ্নিমিন্দুর্মযূখৈস্ত্বমপি
কুসুমবাণান্বজ্রসারীকরোষি||৩||
অথবা |
( অদ্যাপি নূনং হরকোপবহ্নিনস্ত্বযি জ্বলত্যৌর্ব ইবাম্বুরাশৌ |
( ত্বমন্যথা মন্মথ মদ্বিধানাং ভস্মাবশেষঃ
( কথমিত্থমুষ্ণঃ||
অনিশমপি মকরকেতুর্মনসো রুজমাবহন্নভিমতো মে |
যদি মদিরাযতনযনাং তামধিকৃত্য প্রহরতীতি||৪||
( সখেদং পরিক্রম্য )
ক্ব নু খলু সংস্থিতে কর্মণি সদস্যৈরনুজ্ঞাতঃ খিন্নমাত্মানং
বিনোদযামি |
( নিঃশ্বস্য )
কিং নু খলু মে প্রিযাদর্শনাদৃতে শরণমন্যত্ | যাবদেনামন্বিষ্যামি
|
( সূর্যমবলোক্য )
ইমামুগ্রাতপবেলাং প্রাযেণ লতাবলযবত্সু মালিনীতীরেষু সসখীজনা
শকুংতলা গমযতি | তত্রৈব তাবদ্গচ্ছামি |
( পরিক্রম্য সংস্পর্শং রূপযিত্বা )
অহো প্রবাতসুভগোঽযমুদ্দেশঃ |
শক্যমরবিন্দসুরভিঃ কণবাহী মালিনীতরঙ্গাণাম্ |
অঙ্গৈরনঙ্গতপ্তৈরবিরলমালিঙ্গিতুং পবনঃ||৫||
( পরিক্রম্যাবলোক্য চ )
অস্মিন্বেতসপরিক্ষিপ্তে লতামণ্ডপে সংনিহিতযা শকুংতলযা ভবিতব্যম্ |
তথা হি |
অভ্যুন্নতা পুরস্তাদবগাঢা জঘনগৌরবাত্পশ্চাত্ |
দ্বারেঽস্য পাণ্ডুসিকতে পদপঙ্ক্তির্দৃশ্যতেঽভিনবা||৬||
যাবদ্বিটপান্তরেণাবলোকযামি |
( পরিক্রম্য তথা কৃত্বা | সহর্ষম্ )
অযে লব্ধং নেত্রনির্বাণম্ | এষা মে মনোরথপ্রিযতমা সকুসুমাস্তরণং
শিলাপট্টমধিশযানাসখীভ্যামন্বাস্যতে | ভবতু | শ্রোষ্যাম্যাসাং
বিশ্রম্ভকথিতানি |
( ইতি বিলোকযন্স্থিতঃ )
( ততঃ প্রবিশতি যথোক্তব্যাপারা সহ সখীভ্যাং শকুংতলা )
সখ্যৌ – – ( উপবীজ্য | সস্নেহম্ )
হলা শকুন্তলে অপি সুখযতি তে নলিনীপত্রবাতঃ |
শকুংতলা – – কিং বীজযতো মাং সখ্যৌ |
( সখ্যৌ বিষাদং নাটযিত্বা পরস্পরমবলোকযতঃ )
রাজাঃ – – বলবদস্বস্থশরীরা শকুংতলা দৃশ্যতে |
( সবিতর্কম্ )
তত্কিমযমাতপদোষঃ স্যাদুত যথা মে মনসি বর্ততে |
( সাভিলাষং নির্বর্ণ্য )
অথ বা কৃতং সংদেহেন |
স্তনন্যস্তোশীরং প্রশিথিলমৃণালৈকবলযং
প্রিযাযাঃ সাবাধং কিমপি কমনীযং বপুরিদম্ |
সমস্তাপঃ কামং মনসিজনিদাঘপ্রসরযোর্ন
তু গ্রীষ্মস্যৈবং সুভগমপরাদ্ধং যুবতিষু||৭||
প্রিযংবদা – – ( জনান্তিকম্ )
অনসূযে তস্য রাজর্ষেঃ প্রথমদর্শনারভ্যপর্যুত্সুকেব শকুংতলা |
কিং নু খল্বস্যাস্তন্নিমিত্তোঽযমাতঙ্কো ভবেত্ |
অনসূযা – – সখি মমাপীদৃশ্যাশঙ্কা হৃদযস্য | ভবতু | প্রক্ষ্যামি
তাবদেনাম্ |
( প্রকাশম্ )
সখি প্রষ্টব্যাসি কিমপি | বলবান্খলু তে সংতাপঃ |
শকুংতলা – – ( পূর্বার্ধেন শযনাদুত্থায )
হলা কিং বক্তুকামাসি |
অনসূযা – – হলা শকুন্তলে অনভ্যন্তরে খল্বাবাং মদনগতস্য
বৃত্তান্তস্য | কিং তু যাদৃশীতিহাসনিবন্ধেষু
কামযমানানামবস্থা শ্রূযতে তাদৃশীং তব পশ্যামি | কথয
কিংনিমিত্তং তে সংতাপঃ | বিকারং খলু পরমার্থতোঽজ্ঞাত্বাঽনারংভঃ
প্রতীকারস্য |
রাজাঃ – – অনসূযামপ্যনুগতো মদীযস্তর্কঃ | ন হি স্বাভিপ্রাযেণ মে
দর্শনম্ |
শকুংতলা – – ( আত্মগতম্ )
বলবান্খলু মেঽভিনিবেশঃ | ইদানীমপি সহসৈতযোর্ন শক্নোমি
নিবেদযিতুম্ |
প্রিযংবদা – – সখি শকুন্তলে সুষ্ঠু এষা ভণতি | কিমাত্মন
আতঙ্কমুপেক্ষসে | অনুদিবসং খলু পরিহীযসেঽঙ্গৈঃ | কেবলং লাবণ্যমযী
ছাযা ত্বাং ন মুঞ্চতি |
রাজাঃ – – অবিতথমাহ প্রিযংবদা | তথা হি
ক্ষামক্ষামকপোলমাননমুরঃ কাঠিন্যমুক্তস্তনং
মধ্যঃক্লান্ততরঃ প্রকামবিনতাবংসৌ ছবিঃ পাণ্ডুরা |
শোচ্যা চ প্রিযদর্শনা চ মদনক্লিষ্টেযমালক্ষ্যতে
পত্রাণামিব শোষণেন মরুতা স্পৃষ্টা লতা মাধবী||৮||
শকুংতলা – – সখি কস্য বান্যস্য কথযিষ্যামি |
কিংত্বাযাসযিত্রীদানীং বাং ভবিষ্যামি |
উভে – – অত এব খলু নির্বন্ধঃ | স্নিগ্ধজনসংবিভক্তং হি দুঃখং
সহ্যবেদনং ভবতি |
রাজাঃ – – পৃষ্টা জনেন সমদুঃখসুখেন বালা
নেযং ন বক্ষ্যতি মনোগতমাধিহেতুম্ |
দৃষ্টো বিবৃত্য বহুশোঽপ্যনযা সতৃষ্ণমত্রান্তরে
শ্রবণকাতরতাং গতোঽস্মি||৯||
শকুংতলা – – সখি যতঃপ্রভৃতি মম দর্শনপথমাগতঃ স
তপোবনরক্ষিতা রাজর্ষিঃ |
( ইত্যর্ধোক্তে লজ্জাং নাটযতি )
উভে – – কথযতু প্রিযসখী |
শকুংতলা – – তত আরভ্য তদ্গতেনাভিলাষেণৈতদবস্থাস্মি
সংবৃত্তা |
রাজাঃ – – ( সহর্ষম্ )
শ্রুতং শ্রোতব্যম্ |
স্মর এব তাপহেতুর্নির্বাপযিতা স এব মে জাতঃ |
দিবস ইবাভ্রশ্যামস্তপাত্যযে জীবলোকস্য||১০||
শকুংতলা – – তদ্যদি বামনুমতং তথা বর্তেথাং যথা তস্য
রাজর্ষেরনুকম্পনীযা ভবামি | অন্যথাবশ্যং সিঞ্চত মে তিলোদকম্ |
রাজাঃ – – সংশযচ্ছেদি বচনম্ |
প্রিযংবদা – – ( জনান্তিকম্ )
অনসূযে দূরগতমন্মথাঽক্ষমেযং কালহরণস্য | যস্মিন্বদ্ধভাবৈষা
স ললামভূতঃ পৌরবাণাম্ | তদ্যুক্তমস্যা অভিলাষোঽভিনন্দিতুম্ |
অনসূযা – – তথা যথা ভণসি |
প্রিযংবদা – – ( প্রকাশম্ )
সখি দিষ্ট্যানুরূপস্তেঽভিনিবেশঃ | সাগরমুজ্ঝিত্বা কুত্র বা
মহানদ্যবতরতি | ক ইদানীং সহকারমন্তরেণাতিমুক্তলতাং পল্লবিতাং
সহতে |
রাজাঃ – – কিমত্র চিত্রং যদি বিশাখে শশাঙ্কলেখামনুবর্তেতে |
অনসূযা – – কঃ পুনরুপাযো ভবেদ্যেনাবিলম্বিতং নিভৃতং চ সখ্যা
মনোরথং সংপাদযাবঃ |
প্রিযংবদা – – নিভৃতমিতি চিন্তনীযং ভবেত্ | শীঘ্রমিতি সুকরম্ |

অনসূযা – – কথমিব |
প্রিযংবদা – – ননু স রাজর্ষিরস্যাং স্নিগ্ধদৃষ্ট্যা
সূচিতাভিলাষ এতান্দিবসান্প্রজাগরকৃশো লক্ষ্যতে |
রাজাঃ – – সত্যমিত্থংভূত এবাস্মি | তথা হি
ইদমশিশিরৈরন্তস্তাপাদ্বিবর্ণমণীকৃতং
নিশি নিশি ভুজন্যস্তাপাঙ্গপ্রসারিভিরশ্রুভিঃ |
অনভিলুলিতজ্যাঘাতাঙ্কং মুহুর্মণিবন্ধনাত্কনকবলযং
স্রস্তং স্রস্তং মযা প্রতিসার্যতে||১১||
প্রিযংবদা – – ( বিচিন্ত্য )
হলা মদনলেখোঽস্য ক্রিযতাম্ তং সুমনোগোপিতং কৃত্বা
দেবপ্রসাদস্যাপদেশেন তস্য হস্তং প্রাপযিষ্যামি |
অনসূযা – – রোচতে মে সুকুমারঃ প্রযোগঃ কিং বা শকুংতলা ভণতি |
শকুংতলা – – কিং নিযোগো বাং বিকল্প্যতে |
প্রিযংবদা – – তেন হ্যাত্মন উপন্যাসপূর্বং চিন্তয তাবত্কিমপি
ললিতপদবন্ধনম্ |
শকুংতলা – – হলা চিন্তযাম্যহম্ | অবধীরণাভীরুকং পুনর্বেপতে
মে হৃদযম্ |
রাজাঃ – – ( সহর্ষম্ )
অযং স তে তিষ্ঠতি সংগমোত্সুকো
বিশঙ্কসে ভীরু যতোঽবধীরণাম্ |
লভেত বা প্রার্থযিতা ন বা শ্রিযং
শ্রিযা দুরাপঃ কথমীপ্সিতো ভবেত্||১২||
সখ্যৌ – – অযি আত্মগুণাবমানিনি ক ইদানীং শরীরনির্বাপযিত্রীং
শারদীং জ্যোত্স্নাং পটান্তেন বারযতি |
শকুংতলা – – ( সস্মিতম্ )
নিযোজিতেদানীমস্মি |
( ইত্যুপবিষ্টা চিন্তযতি )
রাজাঃ – – স্থানে খলু বিস্মৃতনিমেষেণ চক্ষুষা প্রিযামবলোকযামি |
যতঃ
উন্নমিতৈ কভ্রূলতমাননমস্যাঃ পদানি রচযন্ত্যাঃ |
কণ্টকিতেন প্রথযতি ময্যনুরাগং কপোলেন||১৩||
শকুংতলা – – হলা চিন্তিতং মযা গীতবস্তু | অসংনিহিতানি
পুনর্লেখনসাধনানি |
প্রিযংবদা – – এতস্মিঞ্শুকোদরসুকুমারে নলিনীপত্রে নখৈর্নিক্ষিপ্তবর্ণং
কুরু |
শকুংতলা – – ( যথোক্তং রূপযিত্বা )
হলা শৃণুতমিদানীং সঙ্গতার্থং ন বেতি |
উভে – – অবহিতে স্বঃ |
শকুংতলা – – ( বাচযতি )
তব ন জানে হৃদযং মম পুনঃ কামো দিবাঽপি রাত্রাবপি |
নির্ঘৃণ তপতি বলীযস্ত্বযি বৃত্তমনোরথাযা অঙ্গানি||১৪||
রাজাঃ – – ( সহসোপসৃত্য )
তপতি তনুগাত্রি মদনস্ত্বামনিশং মাং পুনর্দহত্যেব |
গ্লপযতি যথা শশাঙ্কং ন তথা হি কুমুদ্বতীং দিবসঃ||১৫||
সখ্যৌ – – ( বিলোক্য সহর্ষমুত্থায )
স্বাগতমবিলম্বিনো মনোরথস্য |
( শকুংতলাঽভ্যুত্থাতুমিচ্ছতি )
রাজাঃ – – অলমলমাযাসেন |
সংদষ্টকুসুমশযনান্যাশুক্লান্তবিসভঙ্গসুরভীণি |
গুরুপরিতাপানি ন তে গাত্রাণ্যুপচারমর্হন্তি||১৬||
অনসূযা – – ইতঃ শিলাতলৈকদেশমলংকরোতু বযস্যঃ |
( রাজোপবিশতি | শকুংতলা সলজ্জা তিষ্ঠতি )
প্রিযংবদা – – দ্বযোরপি যুবযোরন্যোন্যানুরাগঃ প্রত্যক্ষঃ | সখীস্নেহঃ
পুনর্মাং পুনরুক্তবাদিনীং করোতি |
রাজাঃ – – ভদ্রে নৈতত্পরিহার্যম্ | বিবক্ষিতং হ্যনুক্তমনুতাপং জনযতি
|
প্রিযংবদা – – আপন্নস্য বিষযনিবাসিনো জনস্যার্তিহরেণ রাজ্ঞা
ভবিতব্যমিত্যেষ বো ধর্মঃ |
রাজাঃ – – নাস্মাত্পরম্ |
প্রিযংবদা – – তেন হীযমাবযোঃ প্রিযসখী ত্বামুদ্দিশ্যেদমবস্থান্তরং
ভগবতা মদনেনারোপিতা | তদর্হস্যভ্যুপপত্ত্যা জীবিতমস্যা
অবলম্বিতুম্ |
রাজাঃ – – ভদ্রে সাধারণোঽযং প্রণযঃ | সর্বথানুগৃহীতোঽস্মি |
শকুংতলা – – ( প্রিযংবদামবলোক্যং )
হলা কিমন্তঃপুরবিরহপর্যুত্সুকস্য রাজর্ষেরুপরোধেন |
রাজাঃ – – সুন্দরি
ইদমনন্যপরাযণমন্যথা হৃদযসংনিহিতে হৃদযং মম |
যদি সমর্থযসে মদিরেক্ষণে মদনবাণহতোঽস্মি হতঃ পুনঃ||১৭||
অনসূযা – – বযস্য বহুবল্লভা রাজানঃ শ্রূযন্তে | যথা নৌ
প্রিযসখী বন্ধুজনশোচনীযা ন ভবতি তথা নির্বাহয |
রাজাঃ – – ভদ্রে কিং বহুনা
পরিগ্রহবহুত্বেঽপি দ্বে প্রতিষ্ঠে কুলস্য মে |
সমুদ্ররসনা চোর্বী সখী চ যুবযোরিযম্||১৮||
উভে – – নির্বৃতে স্বঃ |
প্রিযংবদা – – ( সদৃষ্টিক্ষেপম্ )
অনসূযে এষ ইতোদত্তদৃষ্টিরুত্সুকো মৃগপোতকো মাতরমন্বিষ্যতি | এহি
| সংযোজযাব এনম্ |
( ইত্যুভে প্রস্থিতে )
শকুংতলা – – হলা অশরণাস্মি | অন্যতরা যুবযোরাগচ্ছতু |
উভে – – পৃথিব্যা যঃ শরণং স তব সমীপে বর্ততে |
( ইতি নিষ্ক্রান্তে )
শকুংতলা – – কথং গতে এব |
রাজাঃ – – অলমাবেগেন | নন্বযমারাধযিতা জনস্তব সমীপে বর্ততে |
কিং শীতলৈঃ ক্লমবিনোদিভিরার্দ্রবাতান্সঞ্চারযামি
নলিনীদলতালবৃন্তৈঃ |
অঙ্কে নিধায করভোরু যথাসুখং তে সংবাহযামি চরণাবুত পদ্মতাম্রৌ
||১৯||
শকুংতলা – – ন মাননীযেষ্বাত্মানমপরাধযিষ্যে |
( ইত্যুত্থায গন্তুমিচ্ছতি )
রাজাঃ – – সুন্দরি অনির্বাণো দিবসঃ ইযং চ তে শরীরাবস্থা |
উত্সৃজ্য কুসুমশযনং নলিনীদলকল্পিতস্তনাবরণম্ |
কথমাতপে গমিষ্যসি পরিবাধাপেলবৈরঙ্গৈঃ||২০||
( ইতি বলাদেনাং নিবর্তযতি )
শকুংতলা – – পৌরব রক্ষ বিনযম্ | মদনসংতপ্তাপি ন খল্বাত্মনঃ
প্রভবামি |
রাজাঃ – – ভীরু অলং গুরূজন্ভযেন | দৃষ্ট্বা তে বিদিতধর্মা
তত্রভবান্নাত্র দোষং গ্রহীষ্যতি কুলপতিঃ | পশ্য |
গান্ধর্বেণ বিবাহেন বহব্যো রাজর্ষিকন্যকাঃ |
শ্রূযন্তে পরিণীতাস্তাঃ পিতৃভিশ্চাভিনন্দিতাঃ||২১||
শকুংতলা – – মুঞ্চ তাবন্মাম্ | ভূযোঽপি সখীজনমনুমানযিষ্যে
|
রাজাঃ – – ভবতু | মোক্ষ্যামি |
শকুংতলা – – কদা |
রাজাঃ – –
অপরিক্ষতকোমলস্য যাবত্কুসুমস্যেব নবস্য ষট্পদেন |
অধরস্য পিপাসতা মযা তে সদযং সুন্দরি গৃহ্যতে রসোঽস্য||২২||
( ইতি মুখমস্যাঃ সমুন্নমযিতুমিচ্ছতি | শকুংতলা পরিহরতি নাট্যেন )
( নেপথ্যে )
চক্রবাকবধুকে আমন্ত্রযস্ব সহচরম্ | উপস্থিতা রজনী |
শকুংতলা – – ( সসংভ্রমম্ )
পৌরব অসংশযং মম শরীরবৃত্তান্তোপলম্ভাযার্যা গৌতমীত
এবাগচ্ছতি | তদ্বিটপান্তরিতো ভব |
রাজাঃ – – তথা |
( ইত্যাত্মানমাবৃত্য তিষ্ঠতি )
( ততঃ প্রবিশতি পাত্রহস্তা গৌতমী সখ্যৌ চ )
সখ্যৌ – – ইত ইত আর্যা গৌতমী |
গৌতমী – – ( শকুংতলামুপেত্য )
জাতে অপি লঘুসংতাপানি তেঽঙ্গানি |
শকুংতলা – – আর্যে অস্তি মে বিশেষঃ |
গৌতমী – – অনেন দর্ভোদকেন নিরাবাধমেব তে শরীরং ভবিষ্যতি |
( শিরসি শকুতলামভ্যুক্ষ্য )
বত্সে পরিণতো দিবসঃ | এহি উটজমেব গচ্ছামঃ |
( ইতি প্রস্থিতাঃ )
শকুংতলা – – ( আত্মগতম্ )
হৃদয প্র্থমমেব সুখোপনতে মনোরথে কাতরভাবং ন মুঞ্চসি |
সানুশযবিঘটিতস্য কথং তে সাংপ্রতং সংতাপঃ |
( পদান্তরে স্থিত্বা | প্রকাশম্ )
লতাবলয সংতাপহারক আমন্ত্রযে ত্বাং ভূযোঽপি পরিভোগায |
( ইতি দুঃখেন নিষ্ক্রান্তা শকুংতলা সহেতরাভিঃ )
রাজা ( পূর্বস্থানমুপেত্য | সনিঃশ্বাসম্ )
অহো বিঘ্নবত্যঃ প্রার্থিতার্থসিদ্ধযঃ | মযা হি
মুহুরঙ্গুলিসংবৃতাধরোষ্ঠং প্রতিষেধাক্ষরবিক্লবাভিরামম্ |
মুখমংসবিবর্তি পক্ষ্মলাক্ষ্যাঃ কথমপ্যুন্নমিতং ন চুম্বিতং তু||২৩||
ক্ব নু খলু সংপ্রতি গচ্ছামি | অথ বা ইহৈব প্রিযাপরিভুক্তমুক্তে
লতাবলযে মুহূর্তং স্থাস্যামি |
( সর্বতোঽবলোক্য )
তস্যাঃ পুষ্পমযী শরীরলুলিতা শয্যা শিলাযামিযং
ক্লান্তো মন্মথলেখ এষ নলিনীপত্রে নখৈরর্পিতঃ |
হস্তাদ্ভ্রষ্টমিদং বিসাভরণমিত্যাসজ্যমানেক্ষণো
নির্গন্তুং সহসা ন বেতসগৃহাচ্ছক্নোমি শূন্যাদপি||২৪||
( আকাশে )
রাজন্
সাযংতনে সবনকর্মণি সংপ্রবৃত্তে
বেদিং হুতাশনবতীং পরিতঃ প্রযস্তাঃ |
ছাযাশ্চরন্তি বহুধা ভযমাদধানাঃ
সংধ্যাপযোদকপিশাঃ পিশিতাশনানাম্||২৫||
রাজাঃ – – অযমহমাগচ্ছামি |
( ইতি নিষ্ক্রান্তঃ )

( ইতি তৃতীযোঽঙ্কঃ | )