অভিজ্ঞানশাকুন্তলম্ ০৪

চতুর্থোঽঙ্কঃ |

( ততঃ প্রবিশতঃ কুসুমাবচযং নাটযন্ত্যৌ সখ্যৌ | )
অনসূযা – – হলা প্রিযংবদে যদ্যপি গান্ধর্বেণ বিধিনা নির্বৃত্তকল্যাণা
শকুংতলাঽনুরূপভর্তৃগামিনী সংবৃত্তেতি নির্বৃতং মে হৃদযং
তথাপ্যেতাবচ্চিন্তনীযম্ |
প্রিযংবদা – – কথমিব |
অনসূযা – – অদ্য স রাজর্ষিরিষ্টিং পরিসমাপ্যর্ষিভির্বিসর্জিত আত্মনো
নগরং প্রবিশ্যান্তঃপুরসমাগত ইতোগতং বৃত্তান্তং স্মরতি বা ন বেতি
|
প্রিযংবদা – – বিস্রব্ধা ভব | ন তাদৃশা আকৃতিবিশেষা
গুণবিরোধিনো ভবন্তি | তাত ইদানীমিমং ঋত্তান্তং শ্রুত্বা ন জানে কিং
প্রতিপত্স্যত ইতি |
অনসূযা – – যথাহং পশ্যামি তথা তস্যানুমতং ভবেত্ |
প্রিযংবদা – – কথমিব |
অনসূযা – – গুণবতে কন্যকা প্রতিপাদনীযেত্যযং তাবত্প্রথমঃ
সংকল্পঃ | তং যদি দৈবমেব সংপাদযতি নন্বপ্রযাসেন কৃতার্থো
গুরুজনঃ |
প্রিযংবদা – – ( পুষ্পভাজনং বিলোক্য )
সখি অবচিতানি বলিকর্মপর্যাপ্তানি কুসুমানি |
অনসূযা – – ননু সখ্যাঃ শকুংতলাযাঃ সৌভাগ্যদেবতার্চনীযা |
প্রিযংবদা – – যুজ্যতে |
( ইতি তদেব কর্মাভিনযতঃ )
( নেপথ্যে )
অযমহং ভোঃ |
অনসূযা – – ( কর্ণং দত্ত্বা )
সখি অতিথীনামিব নিবেদিতম্ |
প্রিযংবদা – – ননূটজসংনিহিতা শকুংতলা |
অনসুযা – – অদ্য পুনর্হৃদযেনাসংনিহিতা | অলমেতাবদ্ভিঃ কুসুমৈঃ |
( ইতি প্রস্থিতে )
( নেপথ্যে )
আঃ
অতিথিপরিভাবিনি বিচিন্তযন্তী যমনন্যমানসা তপোধনং বেত্সি ন
মামুপস্থিতম্ |
স্মরিষ্যতি ত্বাং ন স বোধিতোঽপি সন্কথাং প্রমত্তঃ প্রথমং কৃতামিব
||১||
প্রিযংবদা – – হা ধিক্ হা ধিক্ | অপ্রিযমেব সংবৃত্তম্ | কস্মিন্নপি
পূজার্হেঽপরাদ্ধা শূন্যহৃদযা শকুংতলা |
( পুরোঽবলোক্য )
ন খলু যস্মিন্কস্মিন্নপি | এষ দুর্বাসাঃ সুলভকোপো মহর্ষিঃ | তথা
শপ্ত্বা বেগবলোত্ফুল্লযা দুর্বারযা গত্যা প্রতিনিবৃত্তঃ |
অনসূযা – – কোঽন্যো হুতবহাদ্দগ্ধুং প্রভবতি | গচ্ছ | পাদযোঃ
প্রণম্য নিবর্তযৈনং যাবদহমর্ঘোদকমুপকল্পযামি |
প্রিযংবদা – – তথা
( ইতি নিষ্ক্রান্তা )
অনসূযা – – ( পদান্তরে স্খলিতং নিরূপ্য )
অহো আবেগস্খলিতযা গত্যা প্রভ্রষ্টং মমাগ্রহস্তাত্পুষ্পভাজনম্
|
( ইতি পুষ্পোচ্চযং রূপযতি )
( প্রবিশ্য )
প্রিযংবদা – – সখি প্রকৃতিবক্রঃ স কস্যানুনযং প্রতিগৃহ্ণাতি |
কিমপি পুনঃ সানুক্রোশঃ কৃতঃ |
অনসূযা – – ( সস্মিতম্ )
তস্মিন্বহবেতদপি | কথয |
প্রিযংবদা – – যদা নিবর্তিতুং নেচ্ছতি তদা বিজ্ঞাপিতো মযা |
ভগবন্ প্রথম ইতি প্রেক্ষ্যাবিজ্ঞাততপঃপ্রভাবস্য দুহিতৃজনস্য
ভগবতৈকোঽপরাধো মর্ষযিতব্য ইতি |
অনসূযা – – ততস্ততঃ |
প্রিযংবদা – – ততো ন মে বচনমন্যথাভবিতুমর্হতি কিং
ত্বভিজ্ঞানাভরণদর্শনেন শাপো নিবর্তিষ্যত ইতি মন্ত্রযমাণ
এবান্তর্হিতঃ |
অনসূযা – – শক্যমিদানীমাশ্বসিতুম্ | অস্তি তেন রাজর্ষিণা
সংপ্রস্থিতেন স্বনামধেযাঙ্কিতমঙ্গুলীযকং স্মরণীযমিতি স্বযং
পিনদ্ধম্ | তস্মিন্স্বাধীনোপাযা শকুংতলা ভবিষ্যতি |
প্রিযংবদা – – সখি এহি | দেবকার্যং তাবদস্যা নির্বর্তযাবঃ |
( ইতি পরিক্রামতঃ )
প্রিযংবদা – – ( বিলোক্য )
অনসূযে পশ্য তাবত্ | বামহস্তোপহিতবদনাঽঽলিখিতেব প্রিযসখী |
ভর্তৃগতযা চিন্তযাত্মানমপি নৈষা বিভাবযতি | কিং
পুনরাগন্তুকম্ |
অনসূযা – – প্রিযংবদে দ্বযোরেব নৌ মুখে এষ বৃত্তান্তস্তিষ্ঠতু |
রক্ষিতব্যা খলু প্রকৃতিপেলবা প্রিযসখী |
প্রিযংবদা – – কো নামোষ্ণোদকেন নবমালিকাং সিঞ্চতি |
( ইতি নিষ্ক্রান্তে )
বিষ্কম্ভকঃ |
( ততঃ প্রবিশতি সুপ্তোত্থিতঃ শিষ্যঃ )
শিষ্যঃ – – বেলোপলক্ষণার্থমাদিষ্টোঽস্মি তত্রভবতা
প্রবাসাদুপাবৃত্তেন কাশ্যপেন | প্রকাশং নির্গতস্তাবদবলোকযামি
কিযদবশিষ্টং রজন্যা ইতি |
( পরিক্রম্যাবলোক্য চ )
হন্ত প্রভাতম্ | তথা হি |
যাত্যেকতোঽস্তশিখরং পতিরোষধীনামাবিষ্কৃতারুণপুরঃসর
একতোঽর্কঃ |
তেজোদ্বযস্য যুগপদ্ব্যসনোদযাভ্যাং লোকো নিযম্যত ইবাত্মদশান্তরেষু||
২||
অপি চ |
অন্তর্হিতে শশিনি সৈব কুমুদ্বতী মে
বৃষ্টিং ন নন্দযতি সংস্মরণীযশোভা |
ইষ্টপ্রবাসজনিতান্যবলাজনস্য
দুঃখানি নূনমতিমাত্রসুদুঃসহানি||৩||
( প্রবিশ্যাপটীক্ষেপেণ )
অনসূযা – – যদ্যপি নাম বিষযপরাঙ্মুখস্য জনস্যৈতন্ন বিদিতং
তথাপি তেন রাজ্ঞা হকুংতলাযামনার্যমাচরিতম্ |
শিষ্যঃ – – যাবদুপস্থিতাং হোমবেলাং গুরবে নিবেদযামি |
( ইতি নিষ্ক্রান্তঃ )
অনসূযা – – প্রতিবুদ্ধাপি কিং করিষ্যামি | ন ম উচিতেষ্বপি
নিজকরণীযেষু হস্তপাদং প্রসরতি | কাম ইদানীং সকামো ভবতু
যেনাসত্যসংধে জনে শুদ্ধহৃদযা সখী পদং কারিতা | অথ বা
দুর্বাসঃশাপ এষ বিকারযতি | অন্যথা কথং স রাজর্ষিস্তাদৃশানি
মন্ত্রযিত্বৈতাবতঃ কালস্য লেখমাত্রমপি ন বিসৃজতি |
তদিতোঽভিজ্ঞানমঙ্গুলীযকং তস্য বিসৃজাবঃ | দুঃখশীলে তপস্বিজনে
কোঽভ্যর্থ্যতাম্ | ননু সখীগামী দোষ
ইতি ব্যবসিতাপি ন পারযামি প্রবাসপ্রতিনিবৃত্তস্য তাতকাশ্যপস্য
দুষ্যন্তপরিণীতামাপন্নসত্ত্বাং শকুংতলাং নিবেদযিতুম্ |
ইত্থংগতেঽস্মাভিঃ কিং করণীযম্ |
( প্রবিশ্য )
প্রিযংবদা – – ( সহর্ষম্ )
সখি ত্বরস্ব ত্বরস্ব শকুংতলাযাঃ প্রস্থানকৌতুকং নিবর্তযিতুম্ |
অনসূযা – – সখি কথমেতত্ |
প্রিযংবদা – – শৃণু | ইদানীং সুখশযিতপৃচ্ছিকা
শকুংতলাসকাশং গতাস্মি |
অনসূযা – – ততস্ততঃ |
প্রিযংবদা – – তাবদেনাং লজ্জাবনতমুখীং পরিষ্বজ্য
তাতকাশ্যপেনৈবমভিনন্দিতম্ | দিষ্ট্যা ধূমাকুলিতদৃষ্টেরপি
যজমানস্য পাবক এবাহুতিঃ পতিতা | বত্সে সুশিষ্যপরিদত্তা
বিদ্যেবশোচনীযাসি সংবৃত্তা | অদ্যৈব ঋষিরক্ষিতাং ত্বাং ভর্তুঃ
সকাশং বিসর্জযামীতি |
অনসূযা – – অথ কেন সূচিতস্তাতকাশ্যপস্য বৃত্তান্তঃ |
প্রিযংবদা – – অগ্নিশরণং প্রবিষ্টস্য শরীরং বিনা ছন্দোময্যা
বাণ্যা |
অনসূযা – – ( সবিস্মযম্ ) কথমিব |
প্রিযংবদা – – ( সংস্কৃতমাশ্রিত্য )
দুষ্যন্তেনাহিতং তেজো দধানাং ভূতযে ভুবঃ |
অবেহি তনযাং ব্রহ্মন্নগ্নিগর্ভাং শমীমিব||৪||
অনসূযা – – ( প্রিযংবদামাশ্লিষ্য )
সখি প্রিযং মে | কিং ত্বদ্যৈব শকুংতলা নীযত ইত্যুত্কণ্ঠাসাধারণং
পরিতোষমনুভবামি |
প্রিযংবদা – – সখি আবাং তাবদুত্কণ্ঠাং বিনোদযিষ্যাবঃ | সা
তপস্বিনী নির্বৃতা ভবতু |
অনসূযা – – তেন হ্যেতস্মিংশ্চূতশাখাবলম্বিতে নালিকেরসমুদ্গক
এতন্নিমিত্তমেব কালান্তরক্ষমা নিক্ষিপ্তা মযা কেসরমালিকা | তদিমাং
হস্তসংনিহিতাং কুরু | যাবদহমপি তস্যৈ মৃগরোচনাং তীর্থমৃত্তিকাং
দূর্বাকিসলযানীতি মঙ্গলসমালম্ভনানি বিরচযামি |
প্রিযংবদা – – তথা ক্রিযতাম্ |
( অনসূযা নিষ্ক্রান্তা | প্রিযংবদা নাট্যেন সুমনসো গৃহ্ণাতি )
( নেপথ্যে )
গৌতমি আদিশ্যন্তাং শার্ঙ্গরবমিশ্রাঃ শকুংতলানযনায |
প্রিযংবদা – – ( কর্ণং দত্ত্বা )
অনসূযে ত্বরস্ব ত্বরস্ব | এতে খলু হস্তিনাপুরগামিন ঋষযঃ
শব্দায্যন্তে |
( প্রবিশ্য সমালম্ভনহস্তা )
অনসূযা – – সখি এহি | গচ্ছাবঃ |
( ইতি পরিক্রামতঃ )
প্রিযংবদা – – ( বিলোক্য )
এষা সূর্যোদয এব শিখামজ্জিতা প্রতীষ্টনীবারহস্তাভিঃ
স্বস্তিবাচনিকাভিস্তাপসীভিরভিনন্দ্যমানা শকুংতলা তিষ্ঠতি |
উপসর্পাব এনাম্ |
( ইত্যুপসর্পতঃ )
( ততঃ প্রবিশতি যথোদ্দিষ্টব্যাপারা আসনস্থা শকুংতলা )
তাপসীনামন্যতমা – – ( শকুংতলাং প্রতি )
জাতে ভর্তুর্বহুমানসূচকং মহাদেবীশব্দং লভস্ব |
দ্বিতীযা – – বত্সে বীরপ্রসবিনী ভব |
তৃতীযা – – বত্সে ভর্তুর্বহুমতা ভব |
( ইত্যাশিষো দত্ত্বা গৌতমীবর্জং নিষ্ক্রান্তাঃ )
সখ্যৌ – – ( উপসৃত্য )
সখি সুখমজ্জনং তে ভবতু |
শকুংতলা – – স্বাগতং মে সখ্যোঃ | ইতো নিষীদতম্ |
উভে ( মঙ্গলপাত্রাণ্যাদায | উপবিশ্য )
হলা সজ্জা ভব | যাবত্তে মঙ্গলসমালম্ভনং বিরচযাবঃ |
শকুংতলা – – ইদমপি বহু মন্তব্যম্ | দুর্লভমিদানীং মে
সখীমণ্ডনং ভবিষ্যতি |
( ইতি বাষ্পং বিসৃজতি )
উভে – – সখি উচিতং ন তে মঙ্গলকালে রোদিতুম্ |
( ইত্যশ্রূণি প্রমৃজ্য নাট্যেন প্রসাধযতঃ)
প্রিযংবদা – – আভরণোচিতং রূপমাশ্রমসুলভৈঃ
প্রসাধনৈর্বিপ্রকার্যতে |
( প্রবিশ্যোপাযনহস্তাবৃষিকুমারকৌ )
উভৌ – – ইদমলংকরণম্ | অলংক্রিযতামত্রভবতী |
( সর্বা বিলোক্য বিস্মিতাঃ )
গৌতমী – – বত্স নারদ কুত এতত্ |
প্রথমঃ – – তাতকাশ্যপপ্রভাবাত্ |
গৌতমী – – কিং মানসী সিদ্ধিঃ |
দ্বিতীযঃ – – ন খলু | শ্রূযতাম্ | তত্রভবতা বযমাজ্ঞপ্তাঃ
শকুংতলাহেতোর্বনস্পতিভ্যঃ কুসুমান্যাহরতেতি |
তত ইদানীং
ক্ষৌমং কেনচিদিন্দুপাণ্ডু তরুণা মাঙ্গল্যমাবিষ্কৃতং
নিষ্ঠ্যূতশ্চরণোপভোগসুলভো লাক্ষারসঃ কেনচিত্ |
অন্যেভ্যো বনদেবতাকরতলৈরাপর্বভাগোত্থিতৈ-
র্দত্তান্যাভরণানি তত্কিসলযোদ্ভেদপ্রতিদ্বন্দ্বিভিঃ||৫||
প্রিযংবদা – – ( শকুংতলাং বিলোক্য )
হলা অনযাভ্যুপপত্ত্যা সূচিতা তে ভর্তুর্গেহেঽনুভবিতব্যা রাজলক্ষ্মীঃ
|
( শকুংতলা ব্রীডাং রূপযতি )
প্রথম – – গৌতম এহ্যেহি | অভিষেকোত্তীর্ণায কাশ্যপায
বনস্পতিসেবাং নিবেদযাবঃ |
দ্বিতীযঃ – – তথা |
( ইতি নিষ্ক্রান্তৌ )
সখ্যৌ – – অযে অনুপযুক্তভূষণোঽযং জনঃ |
চিত্রকর্মপরিচযেনাঙ্গেষু ত আভরণবিনিযোগং কুর্বঃ |
শকুংতলা – – জানে বাং নৈপুণম্ |
( উভে নাট্যেনালঙ্কুরূতঃ )
( ততঃ প্রবিশতি স্নানোত্তীর্ণঃ কাশ্যপঃ ) |
কাশ্যপঃ – – যাস্যত্যদ্য শকুন্তলেতি হৃদযং সংস্পৃষ্টমুত্কণ্ঠযা
কণ্ঠঃ স্তম্ভিতবাষ্পবৃত্তিকলুষশ্চিন্তাজডং দর্শনম্ |
বৈক্লব্যং মম তাবদীদৃশমিদং স্নেহাদরণ্যৌকসঃ
পীড্যন্তে গৃহিণঃ কথং নু তনযাবিশ্লেষদুঃখৈর্নবৈঃ||৬||
( ইতি পরিক্রামতি )
সখ্যৌ – – হলা শকুন্তলে অবসিতমণ্ডনাসি | পরিধত্স্ব সাম্প্রতং
ক্ষৌমযুগলম্ |
( শকুন্তলোত্থায পরিধত্তে )
গৌতমী – – জাতে এষ তে আনন্দপরিবাহিণা চক্ষুষা পরিষ্বজমান
ইব গুরুরুপস্থিতঃ | আচারং তাবত্প্রতিপদ্যস্ব |
শকুংতলা – – ( সব্রীডম্ )
তাত বন্দে |
কাশ্যপঃ – – বত্সে |
যযাতেরিব শর্মিষ্ঠা ভর্তুর্বহুমতা ভব |
সুতং ত্বমপি সম্রাজং সেব পূরুমবাপ্নুহি||৭||
গৌতমী – – ভগবান্ বরঃ খল্বেষঃ | নাশীঃ |
কাশ্যপঃ – – বত্সে ইতঃ সদ্যো হুতানগ্নীন্প্রদক্ষিণীকুরুষ্ব |
( সর্বে পরিক্রামন্তি )
কাশ্যপঃ – – ( ঋক্ছন্দসাঽঽশাস্তে )
অমী বেদিং পরিতঃ কৢপ্তধিষ্ণ্যাঃ
সমিদ্বন্তঃ প্রান্তসংস্তীর্ণদর্ভাঃ |
অপঘ্নতো দুরিতং হব্যগন্ধৈর্বৈতানাস্ত্বাং
বহ্নযঃ পাবযংতু||৮||
প্রতিষ্ঠস্বেদানীম্ |
( সদৃষ্টিক্ষেপম্ )
ক্ব তে শার্ঙ্গরবমিশ্রাঃ |
( প্রবিশ্য )
শিষ্য – – ভগবন্ ইমে স্মঃ |
কাশ্যপ – – ভগিন্যাস্তে মার্গমাদেশয |
শার্ঙ্গরব – – ইত ইতো ভবতী |
( সর্বে পরিক্রামন্তি )
কাশ্যপ – – ভো ভোঃ সংনিহিতাস্তপোবনতরবঃ |
পাতুং ন প্রথমং ব্যবস্যতি জলং যুষ্মাস্বপীতেষু যা
নাদত্তে প্রিযমণ্ডনাপি ভবতাং স্নেহেন যা পল্লবম্ |
আদ্যে বঃ কুসুমপ্রসূতিসমযে যস্যা ভবত্যুত্সবঃ
সেযং যাতি শকুংতলা পতিগৃহং সর্বৈরনুজ্ঞাযতাম্||৯||
( কোকিলরবং সূচযিত্বা )
অনুমতগমনা শকুংতলা তরুভিরিযং বনবাসবন্ধুভিঃ |
পরিভৃতবিরুতং কলং যথা প্রতিবচনীকৃতমেভিরীদৃশম্||১০||
( আকাশে )
রম্যান্তরঃ কমলিনীহরিতৈঃ
সরোভিশ্ছাযাদ্রুমৈর্নিযমিতার্কমযূখতাপঃ |
ভূযাত্কুশেশযরজোমৃদুরেণুরস্যাঃ শান্তানুকূলপবনশ্চ শিবশ্চ
পন্থাঃ||১১||
( সর্বে সবিস্মযমাকর্ণযন্তি )
গৌতমী – – জাতে জ্ঞাতিজনস্নিগ্ধাভিরনুজ্ঞাতগমনাসি
তপোবনদেবতাভিঃ | প্রণম ভগবতীঃ |
শকুংতলা – – ( সপ্রণামং পরিক্রম্য | জনান্তিকম্ )
হলা প্রিযংবদে আর্যপুত্রদর্শনোত্সুকাযা অপ্যাশ্রমপদং পরিত্যজন্ত্যা
দুঃখেন মে চরণৌ পুরতঃ প্রবর্তেতে |
প্রিযংবদা – – ন কেবলং তপোবনবিরহকাতরা সখ্যেব |
ত্বযোপস্থিতবিযোগস্য তপোবনস্যাপি তাবত্সমবস্থা দৃশ্যতে |
উদ্গলিতদর্ভকবলা মৃগ্যঃ পরিত্যক্তনর্তনা মযূরাঃ |
অপসৃতপাণ্ডুপত্রা মুঞ্চন্ত্যশ্রূণীব লতাঃ||১২||
শকুংতলা – – ( স্মৃত্বা )
তাত লতাভগিনীং বনজ্যোত্স্নাং তাবদামন্ত্রযিষ্যে |
কাশ্যপঃ – – অবৈমি তে তস্যাং সোদর্যাস্নেহম্ | ইযং তাবদ্দক্ষিণেন |
শকুংতলা – – ( উপেত্য লতামালিঙ্গ্য )
বনজ্যোত্স্নে চূতসংগতাপি মাং প্রত্যালিঙ্গেতোগতাভিঃ শাখাবাহাভিঃ |
অদ্যপ্রভৃতি দূরপরিবর্তিনী তে খলু ভবিষ্যামি |
কাশ্যপঃ – –
সংকল্পিতং প্রথমমেব মযা তবার্থে
ভর্তারমাত্মসদৃশং সুকৃতৈর্গতা ত্বম্ |
চূতেন সংশ্রিতবতী নবমালিকেযমস্যামহং
ত্বযি চ সংপ্রতি বীতচিন্তঃ||১৩||
ইতঃ পন্থানং প্রতিপদ্যস্ব |
শকুংতলা – – ( সখ্যৌ প্রতি )
হলা এষা দ্বযোর্যুবযোর্হস্তে নিক্ষেপঃ |
সখ্যৌ – – অযং জনঃ কস্য হস্তে সমর্পিতঃ |
( ইতি বাষ্পং বিহরতঃ )
কাশ্যপঃ – – অনসূযে অলং রুদিত্বা | ননু ভবতীভ্যামেব
স্থিরীকর্তব্যা শকুংতলা |
( সর্বে পরিক্রমন্তি )
শকুংতলা – – তাত এষোটজপর্যন্তচারিণী গর্ভমন্থরা
মৃগবধূর্যদাঽনঘপ্রসবা ভবতি তদা মহ্যং কমপি
প্রিযনিবেদযিতৃকং বিসর্জযিষ্যথ |
কাশ্যপঃ – – নেদং বিস্মরিষ্যামঃ |
শকুংতলা – – ( গতিভঙ্গং রূপযিত্বা )
কো নু খল্বেষ নিবসনে মে সজ্জতে |
( ইতি পরাবর্ততে )
কাশ্যপঃ – – বত্সে,
যস্য ত্বযা ব্রণবিরোপণমিঙ্গুদীনাং
তৈলং ন্যষিচ্যত মুখে কুশসুচিবিদ্ধে |
শ্যামাকমুষ্টিপরিবর্ধিতকো জহাতি
সোঽযং ন পুত্রকৃতকঃ পদবীং মৃগস্তে||১৪||
শকুংতলা – – বত্স কিং সহবাসপরিত্যাগিনীং মামনুসরসি |
অচিরপ্রসূতযা জনন্যা বিনা বর্ধিত এব | ইদানীমপি মযা বিরহিতং
ত্বাং তাতশ্চিন্তযিষ্যতি | নিবর্তস্ব তাবত্ |
( ইতি রুদতী প্রস্থিতা )
কাশ্যপঃ – –
উত্পক্ষ্মণোর্নযনযোরুপরুদ্ধবৃত্তিং
বাষ্পং কুরু স্থিরতযা বিরতানুবন্ধম্ |
অস্মিন্নলক্ষিতনতোন্নতভূমিভাগে
মার্গে পদানি খলু তে বিষমীভবন্তি||১৫||
শার্ঙ্গরবঃ – – ভবগান্ | ওদকান্তং স্নিগ্ধো জনোঽনুগন্তব্য ইতি
শ্রূযতে | তদিদং সরস্তীরম্ | অত্র সংদিশ্য প্রতিগন্তুমর্হতি |
কাশ্যপঃ – – তেন হীমাং ক্ষীরবৃক্ষছাযামাশ্রযামঃ |
( সর্বে পরিক্রম্য স্থিতাঃ )
কাশ্যপঃ – – ( আত্মগতম্ )
কিং নু খলু তত্রভবতো দুষ্যন্তস্য যুক্তরূপমস্মাভিঃ সংদেষ্টব্যম্
|
( ইতি চিন্তযতি )
শকুংতলা – – ( জনান্তিকম্ )
হলা পশ্য | নলিনীপত্রান্তরিতমপি সহচরমপশ্যন্ত্যাতুরা
চক্রবাক্যরটতি দুষ্করমহং করোমীতি |
অনসূযা – – সখি মৈবং মন্ত্রযস্ব |
এষাপি প্রিযেণ বিনা গমযতি রজনীং বিষাদদীর্ঘতরাম্ |
গুর্বপি বিরহদুঃখমাশাবন্ধঃ সাহযতি||১৬||
কাশ্যপঃ – – শার্ঙ্গরব ইতি ত্বযা মদ্বচনাত্স রাজা শকুংতলাং
পুরস্কৃত্য বক্তব্যঃ |
শার্ঙ্গরবঃ – – আজ্ঞাপযতু ভগবান্ |
কাশ্যপঃ – – অস্মান্সাধু বিচিন্ত্য সংযমধনানুচ্চৈঃ কুলং
চাত্মনস্ত্বয্যস্যাঃ কথমপ্য্বান্ধবকৃতাং স্নেহপ্রবৃত্তিং চ তাম্ |
সামান্যপ্রতিপত্তিপূর্বকমিযং দারেষু দৃশ্যা ত্বযা
ভাগ্যাযত্তমতঃ পরং ন খলু তদ্বাচ্যং বধূবন্ধুভিঃ||১৭||
শার্ঙ্গরবঃ – – গৃহীতঃ সংদেশঃ |
কাশ্যপঃ – – বত্সে ত্বমিদানীমনুশাসনীযাসি | বনৌকসোঽপি সন্তো
লৌকিকজ্ঞা বযম্ |
শার্ঙ্গরবঃ – – ন খলু ধীমতাং কশ্চিদবিষযো নাম |
কাশ্যপঃ – – সা ত্বমিতঃ পতিকুলং প্রাপ্য – –
শুশ্রূষস্ব গুরূন্কুরু প্রিযসখীবৃত্তিং সপত্নীজনে
ভর্তৃর্বিপ্রকৃতাপি রোষণতযা মা স্ম প্রতীপং গমঃ |
ভূযিষ্ঠং ভব দক্ষিণা পরিজনে ভাগ্যেষ্বনুত্সেকিনী
যান্ত্যেবং গৃহিণীপদং যুবতযো বামাঃ কুলস্যাধযঃ||১৮||
অনসুযা – – কথং বা গৌতমী মন্যতে |
গৌতমী – – এতাবান্বধূজনস্যোপদেশঃ | জাতে এতত্খলু সর্বমবধারয
|
কাশ্যপঃ – – বত্সে পরিষ্বজস্ব মাং সখীজনং চ |
শকুংতলা – – তাত ইত এব কিং প্রিযংবদানুসূযে সখ্যৌ নিবর্তিষ্যেতে |
কাশ্যপ – – বত্সে ইমে অপি প্রদেযে | ন যুক্তমনযোস্তত্র গন্তুম্ | ত্বযা
সহ গৌতমী যাস্যতি |
শকুংতলা – – ( পিতরমাশ্লিষ্য )
কথমিদানীং তাতস্যাঙ্কাত্পরিভ্রষ্টা মলযতটোন্মূলিতা চন্দনলতেব
দেশান্তরে জীবিতং ধারযিষ্যামি |
কাশ্যপঃ – – বত্সে কিমেবং কাতরাসি |
অভিজনবতো ভর্তুঃ শ্লাঘ্যে স্থিতা গৃহিণীপদে
বিভবগুরুভিঃ কৃত্যৈস্তস্য প্রতিক্ষণমাকুলা |
তনযমচিরাত্প্রাচীবার্কং প্রসূয চ পাবনং
মম বিরহজাং ন ত্বং বত্সে শুচং গণযিষ্যসি||১৯||
( শকুংতলা পিতুঃ পাদযোঃ পততি )
কাশ্যপঃ – – যদিচ্ছামি তে তদস্তু |
শকুংতলা – – ( সখ্যাবুপেত্য )
হলা দ্বে অপি মাং সমমেব পরিষ্বজেথাম্ |
সখ্যৌ – – ( তথা কৃত্বা )
সখি যদি নাম স রাজা প্রত্যভিজ্ঞানমন্থরো
ভবেত্ততস্তস্মাযিদমাত্মনামধেযাঙ্কিতমঙ্গুলীযকং দর্শয |
শকুংতলা – – অনেন সংদেহেন বামাকম্পিতাস্মি |
সখ্যৌ – – মা ভৈষীঃ | অতিস্নেহঃ পাপশঙ্কী |
শার্ঙ্গরবঃ – – যুগান্তরমারূঢঃ সবিতা | ত্বরতামত্রভবতী |
শকুংতলা – – ( আশ্রমাভিমুখী স্থিত্বা )
তাত কদা নু ভূযস্তপোবনং প্রেক্ষিষ্যে |
কাশ্যপ – – শ্রূযতাম্ |
ভূত্বা চিরায চতুরন্তমহীসপত্নী
দৌষ্যন্তিমপ্রতিরথং তনযং নিবেশ্য |
ভর্ত্রা তদর্পিতকুটুম্বভরেণ সার্ধং
শান্তে করিষ্যসি পদং পুনরাশ্রমেঽস্মিন্||২০||
গৌতমী – – জাতে পরিহীযতে গমনবেলা | নিবর্তয পিতরম্ | অথ বা
চিরেণাপি পুনঃ পুনরেষৈবং মন্ত্রযিষ্যতে | নিবর্ততাং ভবান্ |
কাশ্যপঃ – – বত্সে উপরুধ্যতে তপোঽনুষ্ঠানম্ |
শকুংতলা – – ( ভূযঃ পিতরমাশ্লিষ্য ) তপশ্চরণপীডিতং
তাতশরীরম্ | তন্মাতিমাত্রং মম কৃত উত্কণ্ঠস্ব |
কাশ্যপঃ – – ( সনিঃশ্বাসম্ )
শমমেষ্যতি মম শোকঃ কথং নু বত্সে ত্বযা রচিতপূর্বম্ |
উটজদ্বারবিরূঢং নীবারবলিং বিলোকযতঃ||২১||
গচ্ছ | শিবাস্তে পন্থানঃ সন্তু |
( নিষ্ক্রান্তা শকুংতলা সহযাযিনশ্চ )
সখ্যৌ – – ( শকুংতলাং বিলোক্য )
হা ধিক্ হা ধিক্ | অন্তর্হিতা শকুংতলা বনরাজ্যা |
কাশ্যপঃ – – ( সনিঃশ্বাসম্ )
অনসূযে গতবতী বাং সহচারিণী | নিগৃহ্য শোকমনুগচ্ছতং মাং
প্রস্থিতম্ |
উভে – – তাত শকুংতলাবিরহিতং শূন্যমিব তপোবনং কথং প্রবিশাবঃ
|
কাশ্যপঃ – – স্নেহবৃত্তিরেবংদর্শিনী |
( সবিমর্শং পরিক্রম্য )
হন্ত ভোঃ শকুংতলাং পতিকুলং বিসৃজ্য লব্ধমিদানীং স্বাস্থ্যম্ |
কুতঃ |
অর্থো হি কন্যা পরকীয এব তামদ্য সংপ্রেষ্য পরিগ্রহীতুঃ |
জাতো মমাযং বিশদঃ প্রকামং প্রত্যর্পিতন্যাস ইবান্তরাত্মা||২২||
( ইতি নিষ্ক্রান্তাঃ সর্বে )

( ইতি চতুর্থোঽঙ্কঃ | )