অভিজ্ঞানশাকুন্তলম্ ০৫

পঞ্চমোঽঙ্কঃ |

( ততঃ প্রবিশত্যাসনস্থো রাজা বিদূষকশ্চ )
বিদুষকঃ – – ( কর্ণং দত্ত্বা )
ভো বযস্য সংগীতশালান্তরেঽবধানং দেহি | কলবিশুদ্ধাযা গীতেঃ
স্বরসংযোগঃ শ্রূযতে | জানে ত্রযভবতী হংসপদিকা বর্ণপরিচযং
করোতীতি |
রাজাঃ – – তূষ্ণীং ভব | যাবদাকর্ণযামি |
( আকাশে গীযতে )
অভিনবমধুলোলুপস্ত্বং তথা পরিচুম্ব্য চূতমঞ্জরীম্ |
কমলবসতিমাত্রনির্বৃতো মধুকর বিস্মৃতোঽস্যেনাং কথম্||১||
রাজাঃ – – অহো রাগপরিবাহিণী গীতিঃ |
বিদুষকঃ – – কিং তাবদ্গীত্যা অবগতোঽক্ষরার্থঃ |
রাজাঃ – – ( স্মিতং কৃত্বা )
সকৃত্কৃতপ্রণযোঽযং জনঃ | তদস্যা দেবীং বসুমতীমন্তরেণ
মহদুপালম্ভনং গতোঽস্মি | সখে মাধব্য মদ্বচনাদুচ্যতাং
হংসপদিকা | নিপুণমুপালব্ধাঃ স্ম ইতি |
বিদুষকঃ – – যদ্ভবানাজ্ঞাপযতি |
( উত্থায )
ভো বযস্য গৃহীতস্য তযা পরকীযৈর্হস্তৈঃ শিখণ্ডকে
তাড্যমানস্যাপ্সরসা বীতরাগস্যেব নাস্তীদানীং মে মোক্ষঃ |
রাজাঃ – – গচ্ছ | নাগরিকবৃত্ত্যা সংজ্ঞাপযৈনাম্ |
বিদুষকঃ – – কা গতিঃ | ( ইতি নিষ্ক্রান্তাঃ )
রাজাঃ – – ( আত্মগতম্ )
কিং নু খলু গীতমেবংবিধার্থমাকর্ণ্যেষ্টজনবিরহাদৃতেপি
বলবদুত্কণ্ঠিতোস্মি | অথবা |
রম্যাণি বীক্ষ্য মধুরাংশ্চ নিশম্য শব্দান্পর্যুত্সুকো ভবতি
যত্সুখিতোঽপি জন্তুঃ |
তচ্চেতসা স্মরতি নূনমবোধপূর্বং ভাবস্থিরাণি
জননান্তরসৌহৃদানি||২||
( ইতি পর্যাকুলস্তিষ্ঠতি )
( ততঃ প্রবিশতি কঞ্চুকী )
কঞ্চুকী – – অহো নু খল্বীদৃশীমবস্থাং প্রতিপন্নোঽস্মি |
আচার ইত্যবহিতেন মযা গৃহীতা
যা বেত্রযষ্টিরবরোধগৃহেষু রাজ্ঞঃ |
কালে গতে বহুতিথে মম সৈব জাতা
প্রস্থানবিক্লবগতেরবলম্বনার্থা||৩||
ভোঃ কামং ধর্মকার্যমনতিপাত্যং দেবস্য | তথাপীদানীমেব
ধর্মাসনাদুত্থিতায পুনরুপরোধকারি কণ্বশিষ্যাগমনমস্মৈ নোত্সহে
নিবেদযিতুম্ | অথ বাঽবিশ্রমোঽযং লোকতন্ত্রাধিকারঃ | কুতঃ |
ভানুঃ সকৃদ্যুক্ততুরঙ্গ এব রাত্রিংদিবং গন্ধবহঃ প্রযাতি |
শেষঃ সদৈবাহিতভূমিভারঃ ষষ্ঠাংশবৃত্তেরপি ধর্ম এষঃ||
৪||
যাবন্নিযোগমনুতিষ্ঠামি |
( পরিক্রম্যাবলোক্য চ )
এষ দেবঃ
প্রজাঃ প্রজাঃ স্বা ইব তন্ত্রযিত্বা
নিষেবতে শ্রান্তমনা বিবিক্তম্ |
যূথানি সংচার্য রবিপ্রতপ্তঃ
শীতং দিবা স্থানমিব দ্বিপেন্দ্রঃ||৫||
( উপগম্য )
জযতু জযতু দেবঃ | এতে খলু হিমগিরেরুপত্যকারণ্যবাসিনঃ
কাশ্যপসংদেশমাদায সস্ত্রীকাস্তপস্বিনঃ সংপ্রাপ্তাঃ | শ্রুত্বা দেবঃ
প্রমাণম্ |
রাজাঃ – – ( সাদরম্ )
কিং কাশ্যপসংদেশহারিণঃ |
কঞ্চুকী – – অথ কিম্ |
রাজাঃ – – তেন হি মদ্বচনাদ্বিজ্ঞাপ্যতামুপাধ্যাযঃ সোমরাতঃ |
অমূনাশ্রমবাসিনঃ শ্রৌতেন বিধিনা সত্কৃত্য স্বযমেব
প্রবেশযিতুমর্হসীতি | অহমপ্যত্র তপস্বিদর্শনোচিতে প্রদেশে স্থিতঃ
প্রতিপালযামি |
ক’ ন্চুকী – – যদাজ্ঞাপযতি দেবঃ |
( ইতি নিষ্ক্রান্তঃ )
রাজাঃ – – ( উত্থায )
বেত্রবতি অগ্নিশরণমার্গমাদেশয |
প্রতিহারী – – ইত ইতো দেবঃ |
রাজাঃ – – ( পরিক্রামতি | অধিকারখেদং নিরূপ্য )
সর্বঃ প্রার্থিতমর্থমধিগম্য সুখী সংপদ্যতে জন্তুঃ | রাজ্ঞাং তু
চরিতার্থতা দুঃখোত্তরৈব |
ঔত্সুক্যমাত্রমবসাযযতি প্রতিষ্ঠা
ক্লিশ্নাতি লব্ধপরিপালনবৃত্তিরেব |
নাতিশ্রমাপনযনায যথা শ্রমায
রাজ্যং স্বহস্তধৃতদণ্ডমিবাতপত্রম্||৬||
( নেপথ্যে )
বৈতালিকৌ – – বিজযতাং দেবঃ |
প্রথমঃ – –
স্বসুখনিরভিলাষঃ খিদ্যসে লোকহেতোঃ
প্রতিদিনমথবা তে বৃত্তিরেবংবিধৈব |
অনুভবতি হি মূর্ধ্না পদপস্তীব্রমুষ্ণং
শমযতি পরিতাপং ছাযযা সংশ্রিতানাম্||৭||
দ্বিতীযঃ – –
নিযমযসি বিমার্গপ্রস্থিতানাত্তদণ্ডঃ
প্রশমযসি বিবাদং কল্পসে রক্ষণায |
অতনুষু বিভবেষু জ্ঞাতযঃ সন্তু নাম
ত্বযি তু পরিসমাপ্তং বন্ধুকৃত্যং প্রজানাম্||৮||
রাজাঃ – – এতে ক্লান্তমনসঃ পুনর্নবীকৃতাঃ স্মঃ |
( ইতি পরিক্রামতি )
প্রতিহারী – – এষ অভিনবসংমার্জনসশ্রীকঃ
সংনিহিতহোমধেনুরগ্নিশরণালিন্দঃ | আরোহতু দেবঃ |
রাজাঃ – – ( আরুহ্য পরিজনাংসাবলম্বী তিষ্ঠতি )
বেত্রবতি কিমুদ্দিশ্য ভগবতা কাশ্যপেন মত্সকাশমৃষযঃ প্রেষিতাঃ
স্যুঃ |
কিং তাবদ্ব্রতিনামুপোঢতপসাং বিঘ্নৈস্তপো দূষিতং
ধর্মারণ্যচরেষু কেনচিদুত প্রাণিষ্বসচ্চেষ্টিতম্ |
আহোস্বিত্প্রসবো মমাপচরিতৈর্বিষ্টম্ভিতো
বীরুধামিত্যারূঢবহুপ্রতর্কমপরিচ্ছেদাকুলং মে মনঃ||৯||
প্রতিহারী – – সুচরিতনন্দিন ঋষযো দেবং সভাজযিতুমাগতা ইতি
তর্কযামি |
( ততঃ প্রবিশন্তি গৌতমীসহিতাঃ শকুংতলাং পুরস্কৃত্য মুনযঃ |
পুরশ্চৈষাং কঞ্চুকী পুরোহিতশ্চ )
কঞ্চুকী – – ইত ইতো ভবন্তঃ |
শার্ঙ্গরবঃ – – শারদ্বত |
মহাভাগঃ কামং নরপতিরভিন্নস্থিতিরসৌ
ন কশ্চিদ্বর্ণানামপথমপকৃষ্টোঽপি ভজতে |
তথাপীদং শশ্বত্পরিচিতবিবিক্তেন মনসা
জনাকীর্ণং মন্যে হুতবহপরীতং গৃহমিব||১০||
শারদ্বতঃ – – স্থানে ভবান্পুরপ্রবেশাদিত্থংভূতঃ সংবৃত্তঃ |
অহমপি
অভ্যক্তমপি স্নাতঃ শুচিরশুচিমিব প্রবুদ্ধ ইব সুপ্তম্ |
বদ্ধমিব স্বৈরগতির্জনমিহ সুখসঙ্গিনমবৈমি||১১||
শকুংতলা – – ( নিমিত্তং সূচযিত্বা )
অহো কিং মে বামেতরন্নযনং বিস্ফুরতি |
গৌতমী – – জাতে প্রতিহতমমঙ্গলম্ | সুখানি তে ভর্তৃকুলদেবতা
বিতরন্তু |
( ইতি পরিক্রামতি )
পুরোহিতঃ – – ( রাজানং নির্দিশ্য )
ভো ভোস্তপস্বিনঃ অসাবত্রভবান্বর্ণাশ্রমাণাং রক্ষিতা প্রাগেব
মুক্তাসনো বঃ প্রতিপালযতি | পশ্যতৈনম্ |
শার্ঙ্গরবঃ – – ভো মহাব্রাহ্মণ কামমেতদভিনন্দনীযং তথাপি
বযমত্র মধ্যস্থাঃ | কুতঃ
ভবন্তি নম্রাস্তরবঃ ফলাগমৈর্নবাম্বুভির্দূরবিলম্বিনো ঘনাঃ |
অনুদ্ধতাঃ সত্পুরুষাঃ সমৃদ্ধিভিঃ স্বভাব এবৈষ পরোপকারিণাম্
||১২||
প্রতীহারী – – দেব প্রসন্নমুখবর্ণা দৃশ্যন্তে | জানামি
বিশ্রব্ধকার্যা ঋষযঃ |
রাজাঃ – – ( শকুংতলাং দৃষ্ট্বা )
অথাত্রভবতী
কা স্বিদবগুণ্ঠনবতী নাতিপরিস্ফুটশরীরলাবণ্যা |
মধ্যে তপোধনানাং কিসলযমিব পাণ্ডুপত্রাণাম্||১৩||
প্রতীহারী – – দেব কুতূহলগর্ভঃ প্রহিতো ন মে তর্কঃ প্রসরতি | ননু
দর্শনীযা পুনরস্যা আকৃতির্লক্ষ্যতে |
রাজাঃ – – ভবতু | অনির্বর্ণনীযং পরকলত্রম্ |
শকুংতলা – – ( হস্তমুরসি কৃত্বা | আত্মগতম্ )
হৃদয কিমেবং বেপসে | আর্যপুত্রস্য ভাবমবধার্য ধীরং তাবদ্ভব |

পুরোহিতঃ – – ( পুরো গত্বা )
এতে বিধিবদর্চিতাস্তপস্বিনঃ | কশ্চিদেষামুপাধ্যাযসংদেশঃ | তং
দেবঃ শ্রোতুমর্হতি |
রাজাঃ – – অবহিতোঽস্মি |
ঋষযঃ – – ( হস্তানুদ্যম্য )
বিজযস্ব রাজন্ |
রাজাঃ – – সর্বানভিবাদযে |
ঋষযঃ – – ইষ্টেন যুজ্যস্ব |
রাজাঃ – – অপি নির্বিঘ্নতপসো মুনযঃ |
ঋষযঃ – –
কুতো ধর্মক্রিযাবিঘ্নঃ সতাং রক্ষিতরি ত্বযি |
তমস্তপতি ধর্মাংশৌ কথমাবির্ভবিষ্যতি||১৪||
রাজাঃ – – অর্থবান্খলু মে রাজশব্দঃ | অথ ভগবান্লোকানুগ্রহায
কুশলী কাশ্যপঃ |
শার্ঙ্গরবঃ – – স্বাধীনকুশলাঃ সিদ্ধিমন্তঃ | স
ভবন্তমনামযপ্রশ্নপূর্বকমিদমাহ |
রাজাঃ – – কিমাজ্ঞাপযতি ভগবান্ |
শার্ঙ্গরবঃ – – যন্মিথঃসমযাদিমাং মদীযাং দুহিতরং
ভবানুপাযংস্ত তন্মযা প্রীতিমতা যুবযোরনুজ্ঞাতম্ | কুতঃ
ত্বমর্হতাং প্রাগ্রসরঃ স্মৃতোঽসি নঃ
শকুংতলা মূর্তিমতী চ সত্ক্রিযা |
সমানযংস্তুল্যগুণং বধূবরং
চিরস্য বাচ্যং ন গতঃ প্রজাপতিঃ||১৫||
তদিদানীমাপন্নসত্ত্বেযং প্রতিগৃহ্যতাং সহধর্মাচরণাযেতি |
গৌতমী – – আর্য কিমপি বক্তুকামাস্মি | ন মে বচনাবসরোঽস্তি |
কথমিতি |
নাপেক্ষিতো গুরুজনোঽনযা ত্বযা পৃষ্টো ন বন্ধুজনঃ |
একৈকস্মিন্নেব চরিতে ভণামি কিমেকৈকম্||১৬||
শকুংতলা – – ( আত্মগতম্ )
কিং নু খল্বার্যপুত্রো ভণতি |
রাজাঃ – – কিমিদমুপন্যস্তম্ |
শকুংতলা – – ( আত্মগতম্ )
পাবকঃ খলু বচনোপন্যাসঃ |
শার্ঙ্গরবঃ – – কথমিদং নাম | ভবন্ত এব সুতরাং
লোকবৃত্তান্তনিষ্ণাতাঃ |
সতীমপি জ্ঞাতিকুলৈকসংশ্রযাং
জনোঽন্যথা ভর্তৃমতীং বিশঙ্কতে |
অতঃ সমীপে পরিণেতুরিষ্যতে |
প্রিযাঽপ্রিযা বা প্রমদা স্ববন্ধুভিঃ||১৭||
রাজাঃ – – কিমত্রভবতী মযা পরিণীতপূর্বা |
শকুংতলা – – ( সবিষাদম্ আত্মগতম্ )
হৃদয সাংপ্রতং তে আশঙ্কা |
শার্ঙ্গরবঃ – –
কিং কৃতকার্যদ্বেষো ধর্মং প্রতি বিমুখতা |
কৃতাবজ্ঞা |
রাজাঃ – – কুতোঽযমসত্কল্পনাপ্রশ্নঃ |
শার্ঙ্গরবঃ – –
মূর্চ্ছন্ত্যমী বিকারাঃ প্রাযেণৈশ্বর্যমত্তেষু||১৮||
রাজাঃ – – বিশেষেণধিক্ষিপ্তোঽস্মি |
গৌতমী – – জাতে মুহূর্তং মা লজ্জস্ব | অপনেষ্যামি
তাবত্তেঽবগুণ্ঠনম্ | ততস্ত্বাং ভর্তাভিজ্ঞাস্যতি |
( ইতি যথোক্তং করোতি )
রাজাঃ – – ( শকুংতলাং নির্বর্ণ্য | আত্মগতম্ )
ইদমুপনতমেবং রূপমক্লিষ্টকান্তি
প্রথমপরিগৃহীতং স্যান্ন বেত্যব্যবস্যন্ |
ভ্রমর ইব বিভাতে কুন্দমন্তস্তুষারং
ন চ খলু পরোভোক্তুং নাপি শক্নোমি হাতুম্||১৯||
( ইতি বিচারযন্স্থিতঃ )
প্রতীহারী – – ( স্বগতম্ )
অহো ধর্মাপেক্ষিতা ভর্তুঃ | ইদৃশং নাম সুখোপনতং রূপং দৃষ্টা
কোঽন্যো বিচারযতি |
শার্ঙ্গরবঃ – – ভো রাজন্ কিমিতি জোষমাস্যতে |
রাজাঃ – – ভোস্তপোধনাঃ চিন্তযন্নপি ন খলু স্বীকরণমত্রভবত্যাঃ
স্মরামি | তত্কথমিমামভিব্যক্তসত্ত্বলক্ষণাং প্রত্যাত্মানং
ক্ষেত্রিণমাশঙ্কমানঃ প্রতিপত্স্যে |
শকুংতলা – – ( অপবার্য )
আর্যস্য পরিণয এব সংদেহঃ | কুত ইদানীং মে দূরাধিরোহিণ্যাশা |
শার্ঙ্গরবঃ- – মা তাবত্ |
কৃতাভিমর্শামনুমন্যমানঃ সুতাং ত্বযা নাম মুনির্বিমান্যঃ |
মুষ্টং প্রতিগ্রাহযতা স্বমর্থং পাত্রীকৃতো দস্যুরিবাসি যেন||| ২০||

শারদ্বতঃ – – শার্ঙ্গরব বিরম ত্বমিদানীম্ | শকুন্তলে
বক্তব্যমুক্তমস্মাভিঃ | সোঽযমত্রভবানেবমাহ |
দীযতামস্মৈ প্রত্যযপ্রতিবচনম্ |
শকুংতলা – – ( অপবার্য )
ইদমবস্থান্তরং গতে তাদৃশেঽনুরাগে কিং বা স্মারিতেন | আত্মেদানীং
মে শোচনীয ইতি ব্যবসিতমেতত্ |
( প্রকাশম্ )
আর্যপুত্র –
( ইত্যর্ধোক্তে )
সংশযিত ইদানীং পরিণযে নৈষ সমুদাচারঃ |
পৌরব যুক্তং নাম তে তথা পুরাশ্রমপদে স্বভাবোত্তানহৃদযমিমং
জনং সমযপূর্বং প্রতার্য সাংপ্রতমীদৃশৈরক্ষরৈঃ প্রত্যাখ্যাতুম্ |
রাজাঃ – – ( কর্ণৌ বিধায )
শান্তং পাপম্ |
ব্যপদেশমাবিলযিতুং কিমীহসে জনমিমং চ পাতযিতুম্ |
কূলংকষেব সিন্ধুঃ প্রসন্নমম্ভস্তটতরুং চ||২১||
শকুংতলা – – ভবতু | যদি পরমার্থতঃ পরপরিগ্রহশঙ্কিনা
ত্বযৈবং প্রবৃত্তং তদভিজ্ঞানেনানেন তবাশঙ্কামপনেষ্যামি |
রাজাঃ – – উদারঃ কল্পঃ |
শকুংতলা – – ( মুদ্রাস্থানং পরামৃশ্য )
হা ধিক্ হা ধিক্ | অঙ্গুলীযকশূন্যা মেঽঙ্গুলিঃ |
( ইতি সবিষাদং গৌতমীমবেক্ষতে )
গৌতমী – – নূনং তে শক্রাবতারাভ্যন্তরে শচীতীর্থসলিলং
বন্দমানাযাঃ প্রভ্রষ্টমঙ্গুলীযকম্ |
রাজাঃ – – ( সস্মিতম্ )
ইদং তত্প্রত্যুত্পন্নমতি স্ত্রৈণমিতি যদুচ্যতে |
শকুংতলা – – অত্র তাবদ্বিধিনা দর্শিতং প্রভুত্বম্ | অপরং তে
কথযিষ্যামি |
রাজাঃ – – শ্রোতব্যমিদানীং সংবৃত্তম্ |
শকুংতলা – – নন্বেকস্মিন্দিবসে নবমালিকামণ্ডপে
নলিনীপত্রভাজনগতমুদকং তব হস্তে সংনিহিতমাসীত্ |
রাজাঃ – – শৃণুমস্তাবত্ |
শকুংতলা – – তত্ক্ষণে স মে পুত্রকৃতকো দীর্ঘাপাঙ্গো নাম মৃগপোতক
উপস্থিতঃ | ত্বযাযং তাবত্প্রথমং পিবত্বিত্যনুকম্পিনোপচ্ছন্দিত উদকেন
| ন পুনস্তেঽপরিচযাধ্দস্তাভ্যাসমুপগতঃ | পশ্চাত্তস্মিন্নেব মযা
গৃহীতে সলিলেঽনেন কৃতঃ প্রণযঃ | তদা ত্বমিত্থং প্রহসিতোঽসি |
সর্বঃ সগংধেষু বিশ্বসিতি | দ্বাবপ্যত্রারণ্যকাবিতি |
রাজাঃ – –
এবমাদিভিরাত্মকার্যনির্বর্তিনীনামনৃতমযবাঙ্মধুভিরাকৃষ্যন্তে
বিষযিণঃ |
গৌতমী – – মহাভাগ নার্হস্যেবং মন্ত্রযিতুম্ |
তপোবনসংবর্ধিতোঽনভিজ্ঞোঽযং জনঃ কৈতবস্য |
রাজাঃ – – তাপসবৃদ্ধে |
স্ত্রীণামশিক্ষিতপটুত্বমমানুষীষু
সংদৃশ্যতে কিমুত যাঃ প্রতিবোধবত্যঃ |
প্রাগন্তরিক্ষগমনাস্ত্বমপত্যজাতমন্যৈর্দ্বিজৈঃ
পরভৃতাঃ খলু পোষযন্তি||২২||
শকুংতলা – – ( সরোষম্ )
অনার্য আত্মনো হৃদযানুমানেন প্রেক্ষসে | ক ইদানীমন্যো
ধর্মকঞ্চুকপ্রবেশিনস্তৃণচ্ছন্নকূপোপমস্য তবানুকৃতিং
প্রতিপত্স্যতে |
রাজাঃ – – ( আত্মগতম্ )
সংদিগ্ধবুদ্ধিং মাং কুর্বন্নকৈতব ইবাস্যাঃ কোপো লক্ষ্যতে | তথা হ্যনযা
ময্যেব বিস্মরণদারুণচিত্তবৃত্তৌ
বৃত্তং রহঃ প্রণযমপ্রতিপদ্যমানে |
ভেদাদ্ভ্রুবোঃ কুটিলযোরতিলোহিতাক্ষ্যা
ভগ্নং শরাসনমিবাতিরুষা স্মরস্য||২৩||
( প্রকাশম্ )
ভদ্রে প্রথিতং দুষ্যন্তস্য চরিতম্ | তথাপীদং ন দৃশ্যতে |
শকুংতলা – – সুষ্ঠু তাবদত্র স্বচ্ছন্দচারিণী কৃতাস্মি
যাহমস্য পুরুবংশপ্রত্যযেন মুখমধোর্হৃদযবিষস্য
হস্তাভ্যাসমুপগতা |
শার্ঙ্গরবঃ – – ইত্থমাত্মকৃতং চাপলং দহতি |
অতঃ পরীক্ষ্য কর্তব্যং বিশেষাত্সংগতং রহঃ |
অজ্ঞাতহৃদযেষ্বেবং বৈরীভবতি সৌহৃদম্||২৪||
রাজাঃ – – অযি ভোঃ কিমত্রভবতীপ্রত্যযাদেবাস্মান্সংযুতদোষাক্ষরৈঃ
ক্ষিণুথ |
শার্ঙ্গরবঃ – – ( সাসূযম্ )
শ্রুতং ভবদ্ভিরধরোত্তরম্ |
আ জন্মনঃ শাঠ্যমশিক্ষিতো যস্তস্যাপ্রমাণং বচনং জনস্য |
পরাতিসংধানমধীযতে যৈর্বিদ্যেতি তে সন্তু কিলাপ্তবাচঃ||২৫||
রাজাঃ – – ভোঃ সত্যবাদিন্ অভ্যুপগতং তাবদস্মাভিরেবম্ | কিং
পুনরিমামতিসংধায লভ্যতে |
শার্ঙ্গরবঃ – – বিনিপাতঃ |
রাজাঃ – – বিনিপাতঃ পৌরবৈঃ প্রার্থ্যত ইতি ন শ্রদ্ধেযমেতত্ |
শারদ্বতঃ- – শার্ঙ্গরব কিমুত্তরেণ | অনুষ্ঠিতো গুরোঃ সংদেশঃ |
প্রতিনিবর্তামহে বযম্ |
( রাজানং প্রতি )
তদেষা ভবতঃ কান্তা ত্যজ বৈনাং গৃহাণ বা |
উপপন্না হি দারেষু প্রভুতা সর্বতোমুখী||২৬||
গৌতমি গচ্ছাগ্রতঃ |
( ইতি প্রস্থিতাঃ )
শকুংতলা – – কথমনেন কিতবেন বিপ্রলব্ধাস্মি | যূযমপি মাং
পরিত্যজথ |
( ইত্যনুপ্রতিষ্ঠতে )
গৌতমী – – ( স্থিত্বা )
বত্স শার্ঙ্গরব অনুগচ্ছতীযং খলু নঃ করুণপরিদেবিনী শকুংতলা |
প্রত্যাদেশপরুষে ভর্তরি কিং বা মে পুত্রিকা করোতু |
শার্ঙ্গরবঃ – – ( সরোষং নিবৃত্য )
কিং পুরোভাগে স্বাতন্ত্র্যমবলম্বসে |
( শকুংতলা ভীতা বেপতে )
শার্ঙ্গরবঃ – – শকুংতলে |
যদি যথা বদতি ক্ষিতিপস্তথা ত্বমসি কিং পিতুরুত্কুলযা ত্বযা |
অথ তু বেত্সি শুচি ব্রতমাত্মনঃ পতিকুলে তব দাস্যমপি ক্ষমম্||২৭||
তিষ্ঠ | সাধযামো বযম্ |
রাজাঃ – – ভোস্তপস্বিন্ কিমত্রভবতীং বিপ্রলভসে |
কুমুদান্যেব শশাঙ্কঃ সবিতা বোধযতি পঙ্কজান্যেব |
বশিনাং হি পরপরিগ্রহসংশ্লেষপরাঙ্মুখী বৃত্তিঃ||২৮||
শার্ঙ্গরবঃ – – যদা তু পূর্ববৃত্তমন্যসঙ্গাদ্বিস্মৃতো ভবাংস্তদা
কথমধর্মভীরুঃ |
রাজাঃ – – ভবন্তমেবাত্র গুরুলাঘবং পৃচ্ছামি |
মূঢঃ স্যামহমেষা বা বদেন্মিথ্যেতি সংশযে |
দারত্যাগী ভবাম্যাহো পরস্ত্রীস্পর্শপাংসুলঃ||২৯||
পুরোহিতঃ – – ( বিচার্য )
যদি তাবদেবং ক্রিযতাম্ |
রাজাঃ – – অনুশাস্তু মাং ভবান্ |
পুরোহিতঃ – – অত্রভবতী তাবদাপ্রসবাদস্মদ্গৃহে তিষ্ঠতু | কুত
ইদমুচ্যত ইতি চেত্ | ত্বং সাধুভিরাদিষ্টপূর্বঃ প্রথমমেব
চক্রবর্তিনং পুত্রং জনযিষ্যসীতি | স চেন্মুনিদৌহিত্রস্তল্লক্ষণোপপন্নো
ভবিষ্যতি অভিনন্দ্য শুদ্ধান্তমেনাং প্রবেশযিষ্যসি | বিপর্যযে তু
পিতুরস্যাঃ সমীপনযনমবস্থিতমেব |
রাজাঃ – – যথা গুরুভ্যো রোচতে |
পুরোহিতঃ – – বত্সে অনুগচ্ছ মাম্ |
শকুংতলা – – ভগবতি বসুধে দেহি মে বিবরম্ |
( ইতি রুদতী প্রস্থিতা | নিষ্ক্রান্তা সহ পুরোধসা তপস্বিভিশ্চ )
( রাজা শাপব্যবহিতস্মৃতিঃ শকুংতলাগতমেব চিন্তযতি )
( নেপথ্যে )
আশ্চর্যমাশ্চর্যম্ |
রাজাঃ – – ( আকর্ণ্য )
কিং নু খলু স্যাত্ |
( প্রবিশ্য )
পুরোহিতঃ – – ( সবিস্মযম্ )
দেব অদ্ভুতং খলু সংবৃত্তম্ |
রাজাঃ – – কিমিব |
পুরোহিতঃ – – দেব পরাবৃত্তেষু কণ্বশিষ্যেষু –
সা নিন্দন্তী স্বানি ভাগ্যানি বালা বাহূত্ক্ষেপং ক্রন্দিতুং চ প্রবৃত্তা |
রাজাঃ – – কিং চ |
পুরোহিতঃ – –
স্ত্রীসংস্থানং চাপ্সরস্তীর্থমারাদুত্ক্ষিপ্যৈনাং জ্যোতিরেকং জগাম||৩০||
( সর্বে বিস্মযং রূপযন্তি )
রাজাঃ – – ভগবন্ প্রাগপি সোঽস্মাভিরর্থঃ প্রত্যাদিষ্ট এব | কিং
বৃথা তর্কেণান্বিষ্যতে | বিশ্রাম্যতু ভবান্ |
পুরোহিত – – ( বিলোক্য )
বিজযস্ব |
( ইতি নিষ্ক্রান্তঃ )
রাজাঃ – – বেত্রবতি পর্যাকুলোঽস্মি | শযনভূমিমার্গমাদেশয |
প্রতীহারী – – ইত ইতো দেবঃ |
( ইতি প্রস্থিতা )
রাজাঃ – –
কামং প্রত্যাদিষ্টাং স্মরামি ন পরিগ্রহং মুনেস্তনযাম্ |
বলবত্তু দূযমানং প্রত্যাযযতীব মাং হৃদযম্||৩১||
( ইতি নিষ্ক্রান্তাঃ সর্বে )

( ইতি পঞ্চমোঽঙ্কঃ | )