অভিজ্ঞানশাকুন্তলম্ ০৬

ষষ্ঠোঽঙ্কঃ |

( ততঃ প্রবিশতি নাগরিকঃ শ্যালঃ পশ্চাদ্বদ্ধং পুরুষমাদায রক্ষিণৌ চ )
রক্ষিণৌ – – ( পুরুষং তাডযিত্বা )
অরে কুম্ভীরক কথয কুত্র ত্বযেতন্মণিবন্ধনোত্কীর্ণনামধেযং
রাজকীযমঙ্গুলীযকং সমাসাদিতম্ |
পুরুষঃ – – ( ভীতিনাটিতকেন )
প্রসীদন্তু ভাবমিশ্রাঃ | নাহমীদৃশকর্মকারী |
প্রথমঃ – – কিং শোভনো ব্রাহ্মণ ইতি কৃত্বা
( কলযিত্বা )
রাজ্ঞা প্রতিগ্রহো দত্তঃ |
পুরুষঃ – – শৃণুতেদানীম্ | অহং শক্রাবতারাভ্যন্তরবাসী
ধীবরঃ |
দ্বিতিযঃ – – পাটচ্চর কিমস্মাভির্জাতিঃ পৃষ্টা |
শ্যালঃ – – সূচক কথযতু সর্বননুক্রমেণ | মৈনমন্তরা
প্রতিবধ্নীতম্ |
উভৌ – – যদাবুত্ত আজ্ঞাপযতি | কথয |
পুরুষঃ – – অহং জালোদ্গালাদিভির্মত্স্যবন্ধনোপাযৈঃ কুটুম্বভরণং
করোমি |
শ্যালঃ – – ( বিহস্য )
বিশুদ্ধ ইদানীমাজীবঃ |
পুরুষঃ – – ভর্তঃ মা এবং ভণ |
সহজং কিল যদ্বিনিন্দিতং ন খলু তত্কর্ম বিবর্জনীযম্ |
পশুমারণকর্মদারুণোঽনুকম্পামৃদুরেব শ্রোত্রিযঃ||১||
শ্যালঃ – – ততস্ততঃ |
পুরুষঃ – – একস্মিন্দিবসে খণ্ডশো রোহিতমত্স্যো মযা কল্পিতঃ |
যাবত্তস্যোদরাভ্যন্তরে প্রেক্ষে তাবদিদং রত্নভাসুরমঙ্গুলীযকং
দৃষ্টম্ | পশ্চাদহমস্য বিক্রযায দর্শযন্গৃহীতো ভাবমিশ্রৈঃ |
মারযত বা মুঞ্চত বা | অযমস্যাগমবৃত্তান্তঃ |
শ্যালঃ – – জানুক বিস্রগন্ধী গোধাদী মত্স্যবন্ধ এব নিঃসংশযম্ |
অঙ্গুলীযকদর্শনমস্য বিমর্শযিতব্যম্ | রাজকুলমেব গচ্ছামঃ |
রক্ষিণৌ – – তথা | গচ্ছ অরে গ্রন্থিভেদক |
( সর্বে পরিক্রামন্তি )
শ্যালঃ – – সূচক ইমং গোপুরদ্বারেঽপ্রমত্তৌ প্রতিপালযতং
যাবদিদমঙ্গুলীযকং যথাগমনং ভর্তে নিবেদ্য ততঃ শাসনং প্রতীষ্য
নিষ্ক্রামামি |
উভৌ – – প্রবিশত্বাবুত্তঃ স্বামিপ্রসাদায |
( ইতি নিষ্ক্রান্তঃ শ্যালঃ )
প্রথমঃ – – জানুক চিরাযতে খল্বাবুত্তঃ |
দ্বিতীযঃ – – নন্ববসরোপসর্পণীযা রাজানঃ |
প্রথমঃ – – জানুক স্ফুরতো মম হস্তাবস্য বধস্য সুমনসঃ পিনদ্ধুম্
|
( ইতি পুরুষং নির্দিশতি )
পুরুষঃ – – নার্হতি ভাবোঽকারণমারণো ভবিতুম্ |
দ্বিতীযঃ – – ( বিলোক্য )
এষ নৌ স্বামী পত্রহস্তো রাজশাসনং প্রতীষ্যেতোমুখো দৃশ্যতে |
গৃধ্রবলির্ভবিষ্যসি শুনো মুখং বা দ্রক্ষ্যাসি |
( প্রবিশ্য )
শ্যালঃ – – সূচক মুচ্যতামেষ জালোপজীবী | উপপন্নঃ
খল্বস্যাঙ্গুলীযকস্যাগমঃ |
সূচকঃ – – যথাবুত্তো ভণতি | এষ যমসদনং প্রবিশ্য
প্রতিনিবৃত্তঃ |
( ইতি পুরুষং পরিমুক্তবন্ধনং করোতি )
পুরুষঃ – – ( শ্যালং প্রণম্য )
ভর্তঃ অথ কীদৃশো ম আজীবঃ |
শ্যালঃ – – এষ ভর্ত্রাঙ্গুলীযকমূল্যসংমিতঃ প্রসাদোঽপি দাপিতঃ |
( ইতি পুরুষায স্বং প্রযচ্ছতি )
পুরুষঃ – – ( সপ্রণামং প্রতিগৃহ্য )
ভর্তঃ অনুগৃহীতোঽস্মি |
সূচকঃ – – এষ নামানুগ্রহো যচ্ছূলাদবতার্য হস্তিস্কন্ধে
প্রতিষ্ঠাপিতঃ |
জানুক – – আবুত্ত পারিতোষিকং কথযতি তেনাঙ্গুলীযকেন ভর্তুঃ
সংমতেন ভবিতব্যমিতি |
শ্যালঃ – – ন তস্মিন্মহার্হং রত্নং ভর্তুর্বহুমতমিতি তর্কযামি | তস্য
দর্শনেন ভর্ত্রাঽভিমতো জনঃ স্মৃতঃ | মুহূর্তং প্রকৃতিগম্ভীরোঽপি
পর্যশ্রুনযন আসীত্ |
সূচকঃ – – সেবিতং নামাবুত্তেন |
জানুকঃ – – ননু ভণ | অস্য কৃতে মাত্স্যিকভর্তুরিতি |
( ইতি পুরুষমসূযযা পশ্যতি )
পুরুষঃ – – ভট্টারক ইতোঽর্ধং যুষ্মাকং সুমনোমূল্যং ভবতু |
জানুকঃ – – এতাবদ্যুজ্যতে |
শ্যালঃ – – ধীবর মহত্তরস্ত্বং প্রিযবযস্যক ইদানীং মে সংবৃত্তঃ |
কাদম্বরীসাক্ষিকমস্মাকং প্রথমসৌহৃদমিষ্যতে | তচ্ছৌণ্ডিকাপণমেব
গচ্ছামঃ |
( ইতি নিষ্ক্রান্তাঃ সর্বে)
প্রবেশকঃ |
( ততঃ প্রবিশত্যাকাশযানেন সানুমতী নামাপ্সরাঃ )
সানুমতী – – নির্বর্তিতং মযা
পর্যাযনির্বর্তনীযমপ্সরস্তীর্থসাংনিধ্যং
যাবত্সাধুজনস্যভিষেককাল ইতি সাংপ্রতমস্য রাজর্ষেরুদন্তং
প্রত্যক্ষীকরিষ্যামি | মেনকাসম্বন্ধেন শরীরভূতা মে শকুংতলা |
তযা চ দুহিতৃনিমিত্তমাদিষ্টপূর্বাস্মি |
( সমন্তাদবলোক্য )
কিং নু খলু ঋতূত্সবেঽপি নিরুত্সবারম্ভমিব রাজকুলং দৃশ্যতে | অস্তি
মে বিভবঃ প্রণিধানেন সর্বং পরিজ্ঞাতুম্ | কিং তু সখ্যা আদরো মযা
মানযিতব্যঃ | ভবতু | অনযোরেবোদ্যানপালিকযোস্তিরস্করিণীপ্রতিচ্ছন্না
পার্শ্ববর্তিনী ভূত্বোপলপ্স্যে |
( ইতি নাট্যেনাবতীর্য স্থিতা )
( ততঃ প্রবিশতি চূতাঙ্কুরমবলোকযন্তী চেটী | অপরা চ
পৃষ্ঠতস্তস্যাঃ )
প্রথমা – –
আতাম্রহরিতপাণ্ডুর জীবিতসর্বং বসন্তমাসস্য ( যোঃ ) |
দৃষ্টোঽসি চূতকোরক ঋতুমঙ্গল ত্বাং প্রসাদযামি||২||
দ্বিতীযা – – পরভৃতিকে কিমেকাকিনী মন্ত্রযসে |
প্রথমা – – মধুকরিকে চূতকলিকাং দৃষ্ট্ত্বোন্মত্তা পরভৃতিকা
ভবতি |
দ্বিতীযা – – ( সহর্ষং ত্বরযোপগম্য )
কথমুপস্থিতো মধুমাসঃ |
প্রথমা – – মধুকরিকে তবেদানীং কাল এষ মদবিভ্রমগীতানাম্ |
দ্বিতীযা – – সখি অবলম্বস্ব মাং যাবদগ্রপাদস্থিতা ভূত্বা
চূতকলিকাং গৃহীত্বা কামদেবার্চনং করোমি |
প্রথমা – – যদি মমাপি খল্বর্ধমর্চনফলস্য |
দ্বিতীযা – – অকথিতেঽপ্যেতত্সংপদ্যতে যত একমেব নৌ জীবীতং
দ্বিধাস্থিতং শরীরম্ |
( সখীমবলম্ব্য স্থিতা চূতাঙ্কুরং গৃহ্ণাতি )
অযে অপ্রতিবুদ্ধোঽপি চূতপ্রসবোঽত্র বন্ধনভঙ্গসুরভির্ভবতি |
( ইতি কপোতহস্তকং কৃত্বা )
ত্বমসি মযা চূতাঙ্কুর দত্তঃ কামায গৃহীতধনুষে |
পথিকজনযুবতিলক্ষ্যঃ পঞ্চাভ্যধিকঃ শরো ভব||৩||
( ইতি চূতাঙ্কুরং ক্ষিপতি )
( প্রবিশ্যাপটীক্ষেপেণ কুপিতঃ ) |
কঞ্চুকী – – মা তাবদনাত্মজ্ঞে | দেবেন প্রতিষিদ্ধে বসন্তোত্সবে
ত্বমাম্রকলিকাভঙ্গং কিমারভসে |
উভে – – ( ভীতে )
প্রসীদত্বার্যঃ | অগৃহীতার্থে আবাম্ |
কঞ্চুকী – – ন কিল শ্রুতং যুবাভ্যাং যদ্বাসন্তিকৈস্তরুভিরপি দেবস্য
শাসনং প্রমাণীকৃতং তদাশ্রযিভিঃ পত্রিভিশ্চ | তথা হি
চূতানাং চিরনির্গতাপি কলিকা বধ্নাতি ন স্বং রজঃ
সংনদ্ধং যদপি স্থিতং কুরবকং তত্কোরকাবস্থযা |
কণ্ঠেষু স্খলিতং গতেঽপি শিশিরে পুংস্কোকিলানাং রুতং
শঙ্কে সংহরতি স্মরোঽপি চকিতস্তূণার্ধকৃষ্টং শরম্||৪||
সনুমতী – – নাস্তি সংদেহঃ | মহাপ্রভাবো রাজর্ষিঃ |
প্রথমা – – আর্য কতি দিবসান্যাবযোর্মিত্রাবসুনা রাষ্ট্রিযেণ
ভট্টিনীপাদমূলং প্রেষিতযোঃ | অত্র চ নৌ প্রমদবনস্য পালনকর্ম
সমর্পিতম্ | তদাগন্তুকতযাঽশ্রুতপূর্ব আবাভ্যামেষ বৃত্তান্তঃ |
কঞ্চুকী – – ভবতু | ন পুনরেবং প্রবর্তিতব্যম্ |
উভে – – আর্য কৌতূহলং নৌ | যদ্যনেন জনেন শ্রোতব্যং কথযত্বার্যঃ
কিংনিমিত্তং ভর্ত্রা বসন্তোত্সবঃ প্রতিষিদ্ধঃ |
সানুমতী – – উত্সবপ্রিযাঃ খলু মনুষ্যাঃ | গুরুণা কারণেন
ভবিতব্যম্ |
কঞ্চুকী – – বহুলীভূতমেতত্কিং ন কথ্যতে | কিমত্রভবত্যোঃ কর্ণপথং
নাযাতং শকুংতলাপ্রত্যাদেশকৌলীনম্ |
উভে – – শ্রুতং রাষ্ট্রিযমুখাদ্যাবদঙ্গুলীযকদর্শনম্ |
কঞ্চুকী – – তেন হ্যল্পং কথযিতব্যম্ | যদৈব খলু
স্বাঙ্গুলীযকদর্শনাদনুস্মৃতং দেবেন সত্যমূঢপূর্বা মে তত্রভবতী
রহসি শকুংতলা মোহাত্প্রত্যাদিষ্টেতি তদাপ্রভৃত্যেব
পশ্চাত্তাপমুপগতো দেবঃ | তথা হি
রম্যং দ্বেষ্টি যথা পুরা প্রকৃতিভির্ন প্রত্যহং সেব্যতে
শয্যাপ্রান্তবিবর্তনৈর্বিগমযত্যুন্নিদ্র এব ক্ষপাঃ |
দাক্ষিণ্যেন দদাতি বাচমুচিতামন্তঃপুরেভ্যো যদা গোত্রেষু
স্খলিতস্তদা ভবতি চ ব্রীডাবিলক্ষশ্চিরম্||৫||
সানুমতী – – প্রিযং মে |
কঞ্চুকী – – অস্মাত্প্রভবতো বৈমনস্যাদুত্সবঃ প্রত্যাখ্যাতঃ |
উভে – – যুজ্যতে |
( নেপথ্যে )
এতু এতু ভবান্ |
কঞ্চুকী – – ( কর্ণং দত্ত্বা )
অযে | ইত এবাভিবর্ততে দেবঃ | স্বকর্মানুষ্ঠীযতাম্ |
উভে – – তথা |
( ইতি নিষ্ক্রান্তে)
( ততঃ প্রবিশতি পশ্চাত্তাপসদৃশবেষো রাজা বিদূষকঃ
প্রতীহারী চ | )
কঞ্চুকী – – ( রাজানমবলোক্য )
অহো সর্বাস্ববস্থাসু রমণীযত্বমাকৃতিবিশেষাণাম্ | এবমুত্সুকোঽপি
প্রিযদর্শনো দেবঃ | তথা হি
প্রত্যাদিষ্টবিশেষমণ্ডনবিধির্বামপ্রকোষ্ঠার্পিতং
বিভ্রত্কাঞ্চনমেকমেব বলযং শ্বাসোপরক্তাধরঃ |
চিন্তাজাগরণপ্রতান্তনযনস্তেজোগুণাদাত্মনঃ
সংস্কারোল্লিখিতো মহামণিরিব ক্ষীণোঽপি নালক্ষ্যতে||৬||
সানুমতী – – ( রাজানং দৃষ্ট্বা )
স্থানে খলু প্রত্যাদেশবিমানিতাঽপ্যস্য কৃতে শকুংতলা ক্লাম্যতি |
রাজাঃ – – ( ধ্যানমন্দং পরিক্রম্য )
প্রথমং সারঙ্গাক্ষ্যা প্রিযযা প্রতিবোধ্যমানমপি সুপ্তম্ |
অনুশযদুঃখাযেদং হতহৃদযং সংপ্রতি বিবুদ্ধম্||৭||
সানুমতী – – নন্বীদৃশানি তপস্বিন্যা ভাগধেযানি |
বিদূষকঃ – – ( অপবার্য )
লঙ্ঘিত এষ ভূযোঽপি শকুংতলাব্যাধিনা | ন জানে কথং
চিকিত্সিতব্যো ভবিষ্যতীতি |
কঞ্চুকী – – ( উপগম্য )
জযতু জযতু দেবঃ | মহারাজ প্রত্যবেক্ষিতাঃ প্রমদবনভূমযঃ
যথাকামমধ্যাস্তাং বিনোদস্থানানি মহারাজঃ |
রাজাঃ – – বেত্রবতি মদ্বচনাদমাত্যমার্যপিশুনং ব্রূহি |
চিরপ্রবোধান্ন সংভাবিতমস্মাভিরদ্য ধর্মাসনমধ্যাসিতুম্ |
যত্প্রত্যবেক্ষিতং পৌরকার্যমার্যেণ তত্পত্রমারোপ্য দীযতামিতি |
প্রতীহারী – – যদ্দেব আজ্ঞাপযতি |
( ইতি নিষ্ক্রান্তা )
রাজাঃ – – বাতাযন ত্বমপি স্বং নিযোগমশূন্যং কুরু |
কঞ্চুকী – – যদাজ্ঞাপযতি দেবঃ |
( ইতি নিষ্ক্রান্তঃ )
বিদূষকঃ – – কৃতং ভবতা নির্মক্ষিকম্ | সাম্প্রতং
শিশিরাতপচ্ছেদরমণীযেঽস্মিন্প্রমদবনোদ্দেশ আত্মানং রমযিষ্যসি |
রাজাঃ – – বযস্য যদুচ্যতে রন্ধ্রোপনিপাতিনোঽনর্থা ইতি তদ্ব্যভিচারি
বচঃ | কুতঃ
মুনিসুতাপ্রণযস্মৃতিরোধিনা মম চ মুক্তমিদং তমসা মনঃ |
মনসিজেন সখে প্রহরিষ্যতা ধনুষি চূতশরশ্চ নিবেশিতঃ||৮||
বিদূষকঃ – – তিষ্ঠ তাবত্ | অনেন দণ্ডকাষ্ঠেন কন্দর্পবাণং
নাশযিষ্যামি |
( ইতি দণ্ডকাষ্ঠমুদ্যম্য চূতাঙ্কুরং পাতযিতুমিচ্ছতি )
রাজাঃ – – ( সস্মিতম্ )
ভবতু | দৃষ্টং ব্রহ্মবর্চসম্ | সখে ক্বোপবিষ্টঃ প্রিযাযাঃ
কিংচিদনুকারিণীষু লতাসু দৃষ্টিং বিলোভযামি |
বিষূষক – – নন্বাসন্নপরিচারিকা চতুরিকা ভবতা সংদিষ্টা |
মাধবীমণ্ডপ ইমাং বেলামতিবাহযিষ্যে | তত্র মে চিত্রফলকগতাং
স্বহস্তলিখিতাং তত্রভবত্যাঃ শকুংতলাযাঃ প্রতিকৃতিমানযেতি |
রাজাঃ – – ঈদৃশং হৃদযবিনোদনস্থানম্ | তত্তমেব মার্গমাদেশয
|
বিদূষকঃ – – ইত ইতো ভবান্ |
( উভৌ পরিক্রমতঃ | সানুমত্যনুগচ্ছতি )
বিদূষকঃ – – এষ মণিশিলাপট্টকসনাথো মাধবীমণ্ডপ
উপহাররমণীযতযা নিঃসংশযং স্বাগতেনেব নৌ প্রতীচ্ছতি |
তত্প্রবিশ্য নিষীদতু ভবান্ |
( উভৌ প্রবেশং কৃত্বোপবিষ্টৌ )
সানুমতী – – লতাসংশ্রিতা দ্রক্ষ্যামি তাবত্সখ্যাঃ প্রতিকৃতম্ |
ততস্তস্যৈ ভর্তুর্বহুমুখমনুরাগং নিবেদযিষ্যামি |
( ইতি তথা কৃত্বা স্থিতা )
রাজাঃ – – সখে সর্বমিদানীং স্মরামি শকুংতলাযাঃ
প্রথমবৃত্তান্তম্ | কথিতবানস্মি ভবতে চ | স
ভবান্প্রত্যাদেশবেলাযাং মত্সমীপগতো নাসীত্ | পূর্বমপি ন ত্বযা
কদাচিত্সংকীর্তিতং তত্রভবত্যা নাম | কচ্চিদহমিব বিস্মৃতবানসি
ত্বম্ |
বিদূষকঃ – – ন বিস্মরামি | কিং তু সর্বং কথযিত্বাবসানে পুনস্ত্বযা
পরিহাসবিজল্প এষ ন ভূতার্থ ইত্যাখ্যাতম্ | মযাপি
মৃত্পিণ্ডবুদ্ধিনা তথৈব গৃহীতম্ | অথবা ভবিতব্যতা খলু
বলবতী |
সানুমতী – – এবং ন্বিদম্ |
রাজাঃ – – ( ধ্যাত্বা )
সখে ত্রাযস্ব মাম্ |
বিদূষকঃ – – ভোঃ কিমেতত্ | অনুপপন্নং খল্বীদৃশং ত্বযি | কদাপি
সত্পুরুষাঃ শোকবাস্তব্যা ন ভবন্তি | ননু প্রবাতেঽপি নিষ্কম্পা
গিরযঃ |
রাজাঃ – – বযস্য নিরাকরণবিক্লবাযাঃ প্রিযাযাঃ সমবস্থামনুস্মৃত্য
বলবদশরণোঽস্মি | সা হি
ইতঃ প্রত্যাদেশাত্স্বজনমনুগন্তুং ব্যবসিতা
স্থিতা তিষ্ঠেত্যুচ্চৈর্বদতি গুরুশিষ্যে গুরুসমে |
পুনর্দৃষ্টিং বাষ্পপ্রসরকলুষামর্পিতবতী মযি
ক্রূরে যত্তত্সবিষমিব শল্যং দহতি মাম্||৯||
সানুমতী – – অহো | ঈদৃশী স্বকার্যপরতা | অস্য সংতাপেনাহং রমে |
বিদূষকঃ – – ভোঃ অস্তি মে তর্কঃ কেনাপি তত্রভবত্যাকাশচারিণা
নীতেতি |
রাজাঃ – – কঃ পতিদেবতামন্যঃ পরামর্ষ্টুমুত্সহেত | মেনকা কিল
সখ্যাস্তে জন্মপ্রতিষ্ঠেতি শ্রুতবানস্মি | তত্সহচারিণীভিঃ সখী তে
হৃতেতি মে হৃদযমাশঙ্কতে |
সানুমতী – – সংমোহঃ খলু বিস্মযনীযো ন প্রতিবোধঃ |
বিদূষকঃ – – যদ্যেবমস্তি খলু সমাগমঃ কালেন তত্রভবত্যা |
রাজাঃ – – কথমিব |
বিদূষকঃ – – ন খলু মাতাপিতরৌ ভর্তৃবিযোগদুঃখিতাং দুহিতরং
চিরং দ্রষ্টুং পারযতঃ |
রাজাঃ – – বযস্য |
স্বপ্নো নু মাযা নু মতিভ্রমো নু ক্লিষ্টং নু তাবত্ফলমেব পুণ্যম্ |
অসংনিবৃত্ত্যৈ তদতীতমেতে মনোরথা নাম তটপ্রপাতাঃ||১০||
বিদূষকঃ – – মৈবম্ | নন্বঙ্গুলীযকমেব নিদর্শনমবশ্যং
ভাব্যচিন্তনীযঃ সমাগমো ভবতীতি |
রাজাঃ – – ( অঙ্গুলীযকং বিলোক্য )
অযে ইদং তাবদসুলভস্থানভ্রংশি শোচনীযম্ |
তব সুচরিতমঙ্গুলীয নূনং প্রতনু মমেব বিভাব্যতে ফলেন |
অরুণনখমনোহরাসু তস্যাশ্চ্যুতমসি লব্ধপদং যদঙ্গুলীষু||১১||
সানুমতী – – যদ্যন্যহস্তগতং ভবেত্সত্যমেব শোচনীযং ভবেত্ |
বিদূষকঃ – – ভোঃ ইযং নামমুদ্রা কেনোধ্দাতেন তত্রভবত্যা
হস্তাভ্যাসং প্রাপিতা |
সানুমতী – – মমাপি কৌতূহলেনাকারিত এষঃ |
রাজাঃ – – শ্রূযতাম্ | স্বনগরায প্রস্থিতং মাং প্রিযা
সবাষ্পমাহ কিযচ্চিরেণার্যপুত্রঃ প্রতিপত্তিং দাস্যতীতি |
বিদূষকঃ – – ততস্ততঃ |
রাজাঃ – – পশ্চাদিমাং মুদ্রাং তদঙ্গুলৌ নিবেশযতা মযা
প্রত্যভিহিতা |
একৈকমত্র দিবসে দিবসে মদীযং নামাক্ষরং গণয গচ্ছসি যাবদন্তম্
|
তাবত্প্রিযে মদবরোধগৃহপ্রবেশং নেতা জনস্তব সমীপমুপৈষ্যতীতি
||১২||
তচ্চ দারুণাত্মনা মযা মোহান্নানুষ্ঠিতম্ |
সানুমতী – – রমণীযঃ খল্ববধির্বিধিনা বিসংবাদিতঃ |
বিদূষকঃ – – অথ কথং ধীবরকল্পিতস্য রোহিতমত্স্যস্যোদরাভ্যন্তর
আসীত্ |
রাজাঃ – – শচীতীর্থং বন্দমানাযাঃ সখ্যাস্তে
হস্তাদ্গঙ্গাস্রোতসি পরিভ্রষ্টম্ |
বিদূষকঃ – – যুজ্যতে |
সানুমতী – – অত এব তপস্বিন্যাঃ শকুংতলাযা অধর্মভীরোরস্য
রাজর্ষেঃ পরিণযে সংদেহ আসীত্ |
অথ বেদৃশোঽনুরাগোঽভিজ্ঞানমপেক্ষতে | কথমিবৈতত্ |
রাজাঃ – – উপালপ্স্যে তাবদিদমঙ্গুলীযকম্ |
বিদূষকঃ – – ( আত্মগতম্ )
গৃহীতোঽনেন পন্থা উন্মত্তানাম্ |
রাজাঃ – – কথং নু তং বন্ধুরকোমলাঙ্গুলিং করং বিহাযাসি
নিমগ্নমম্ভসি | অথবা |
অচেতনং নাম গুণং ন লক্ষযেন্মযৈব কস্মাদবধীরিতা প্রিযা||১৩||
বিদূষকঃ – – ( আত্মগতম্ )
কথং বুভুক্ষযা খাদিতব্যোঽস্মি |
রাজাঃ – – প্রিযে
অকারণপরিত্যাগানুশযতপ্তহৃদযস্তাবদনুকম্প্যতামযং জনঃ
পুনর্দর্শনেন |
( প্রবিশ্যাপটীক্ষেপেণ চিত্রফলকহস্তা )
চতুরিকা – – ইযং চিত্রগতা ভট্টিনী |
( ইতি চিত্রফলকং দর্শযতি )
বিদূষকঃ – – ( বিলোক্য )
সাধু বযস্য | মধুরাবস্থানদর্শনীযো ভাবানুপ্রবেশঃ | স্খলতীব
মে দৃষ্টির্নিম্নোন্নতপ্রদেশেষু |
সানুমতী – – অহো এষা রাজর্ষের্নিপুণতা | জানে সখ্যগ্রতো মে বর্তত
ইতি |
রাজাঃ – –
যদ্যত্সাধু ন চিত্রে স্যাত্ক্রিযতে তত্তদন্যথা |
তথাপি তস্যা লাবণ্যং রেখযা কিঞ্চিদন্বিতম্||১৪||
সানুমতী – – সদৃশমেতত্পশ্চাত্তাপগুরোঃ স্নেহস্যানবলেপস্য চ |
বিদূষকঃ – – ভোঃ ইদানীং তিস্রস্তত্রভবত্যো দৃশ্যন্তে | সর্বাশ্চ
দর্শনীযাঃ | কতমাঽত্র তত্রভবতী শকুংতলা |
সানুমতী – – অনভিজ্ঞঃ খল্বীদৃশস্য রূপস্য মোঘদৃষ্টিরযং জনঃ
|
রাজাঃ – – ত্বং তাবত্কতমাং তর্কযসি |
বিদূষকঃ – – তর্কযামি যৈষা শিথিলবন্ধনোদ্বান্তকুসুমেন
কেশান্তেনোদ্ভিন্নস্বেদবিন্দুনা বদনেন বিশেষতোঽপসৃতাভ্যাং
বাহুভ্যামবসেকস্নিগ্ধতরুণপল্লবস্য চূতপাদপস্য পার্শ্ব
ইষত্পরিশ্রান্তেবালিখিতা সা শকুংতলা | ইতরে সখ্যাবিতি |
রাজাঃ – – নিপুণো ভবান্ | অস্ত্যত্র মে ভাবচিহ্নম্ |
স্বিন্নাঙ্গুলিবিনিবেশো রেখাপ্রান্তেষু দৃশ্যতে মলিনঃ |
অশ্রু চ কপোলপতিতং দৃশ্যমিদং বর্ণিকোচ্ছ্বাসাত্||১৫||
চতুরিকে অর্ধলিখিতমেতদ্বিনোদস্থানম্ | গচ্ছ | বর্তিকাং তাবদানয
|
চতুরিকা – – আর্য মাধব্য অবলম্বস্ব চিত্রফলকং যাবদাগচ্ছামি
|
রাজাঃ – – অহমেবৈতদবলম্বে |
( ইতি যথোক্তং করোতি )
( নিষ্ক্রান্তা চেটি )
রাজাঃ – – ( নিঃশ্বস্য )
সাক্ষাত্প্রিযামুপগতামপহায পূর্বং চিত্রার্পিতাং পুনরিমাং বহু
মন্যমানঃ |
স্ত্রোতোবহাং পথি নিকামজলামতীত্য জাতঃ সখে
প্রণযবান্মৃগতৃষ্ণিকাযাম্||১৬||
বিদূষকঃ – – ( আত্মগতম্ )
এষোঽত্রভবান্নদীমতিক্রম্য মৃগতৃষ্ণিকাং সঙ্ক্রান্তঃ |
( প্রকাশম্ )
ভোঃ অপরং কিমত্র লেখিতব্যম্ |
সানুমতি – – যো যঃ প্রদেশঃ সখ্যা মেঽভিরূপস্তং তমালেখিতুকামো
ভবেত্ |
রাজাঃ – – শ্রূযতাম্ |
কার্যা সৈকতলীনহংসমিথুনা স্রোতোবহা মালিনী
পাদাস্তামভিতো নিষণ্ণহরিণা গৌরীগুরোঃ পাবনাঃ |
শাখালম্বিতবল্কলস্য চ তরোর্নির্মাতুমিচ্ছাম্যধঃ
শৃঙ্গে কৃষ্ণমৃগস্য বামনযনং কণ্ডূযমানাং মৃগীম্||১৭||
বিদূষকঃ – – ( আত্মগতম্ )
যথাহং পশ্যামি পূরিতব্যমনেন চিত্রফলকং লম্বকূর্চানাং
তাপসানাং কদম্বৈঃ |
রাজাঃ – – বযস্য অন্যশ্চ | শকুংতলাযাঃ প্রসাধনমভিপ্রেতমত্র
বিস্মৃতমস্মাভিঃ |
বিদূষকঃ – – কিমিব |
সানুমতী – – বনবাসস্য সৌকুমার্যস্য বিনযস্য চ যত্সদৃশং
ভবিষ্যতি |
রাজাঃ – –
কৃতং ন কর্ণার্পিতবন্ধনং সখে শিরীষমাগণ্ডবিলম্বিকেসরম্ |
ন বা শরচ্চন্দ্রমরীচিকোমলং মৃণালসূত্রং রচিত স্তনান্তরে||
১৮||
বিদূষকঃ – – ভোঃ কিং নু তত্রভবতী
রক্তকুবলযপল্লবশোভিনাঽগ্রহস্তেন মুখমাবার্য চকিতচকিতেব
স্থিতা |
( সাবধানং নিরূপ্য দৃষ্ট্বা )
আঃ এষ দাস্যাঃপুত্রঃ কুসুমরসপাটচ্চরস্তত্রভবত্যা
বদনকমলমভিলঙ্ঘতে মধুকরঃ |
রাজাঃ – – ননু বার্যতামেষ ধৃষ্টঃ |
বিদূষকঃ – – ভবানেবাবিনীতানাং শাসিতাঽস্য বারণে
প্রভবিষ্যতি |
রাজাঃ – – যুজ্যতে | অযি ভোঃ কুসুমলতাপ্রিযাতিথে কিমত্র
পরিপতনখেদমনুভবসি |
এষা কুসুমনিষণ্ণা তৃষিতাপি সতী ভবন্তমনুরক্তা
প্রতিপালযতি মধুকরী ন খলু মধু বিনা ত্বযা পিবতি||১৯||
সানুমতী – – অদ্যাভিজাতং খল্বেষ বারিতঃ |
বিদূষকঃ – – প্রতিষিদ্ধাপি বামৈষা জাতিঃ |
রাজাঃ – – এবং ভো ন মে শাসনে তিষ্ঠসি | শ্রূযতাং তর্হি সংপ্রতি |
অক্লিষ্টবালতরুপল্লবলোভনীযং পীতং মযা সদযমেব রতোত্সবেষু |
বিম্বাধরং স্পৃশসি চেদ্ভ্রমর প্রিযাযাস্ত্বাং কারযামি
কমলোদরবন্ধনস্থম্||২০||
বিদূষকঃ – – এবং তীক্ষ্ণদণ্ডস্য কিং ন ভেষ্যতি |
( প্রহস্য | আত্মগতম্ )
এষ তাবদুন্মত্তঃ | অহমপ্যেতস্য সঙ্গেনেদৃশবর্ণ ইব সংবৃত্তঃ |
( প্রকাশম্ )
ভোঃ চিত্রং খল্বেতত্ |
রাজাঃ – – কথং চিত্রম্ |
সানুমতী – – অহমপীদানীমবগতার্থা | কিং
পুনর্যথালিখিতানুভাব্যেষঃ |
রাজাঃ – – বযস্য কিমিদমনুষ্ঠিতং পৌরোভাগ্যম্ |
দর্শনসুখমনুভবতঃ সাক্ষাদিব তন্মযেন হৃদযেন |
স্মৃতিকারিণা ত্বযা মে পুনরপি চিত্রীকৃতা কান্তা||২১||
( ইতি বাষ্পং বিহরতি )
সানুমতী – – পূর্বাপরবিরোধ্যপূর্ব এষ বিরহমার্গঃ |
রাজাঃ – – বযস্য কথমেবমবিশ্রান্তদুঃখমনুভবামি |
প্রজাগরাত্খিলীভূতস্তস্যাঃ স্বপ্নে সমাগমঃ |
বাষ্পস্তু ন দদাত্যেনাং দ্রষ্টুং চিত্রগতামপি||২২||
সানুমতী – – সর্বথা প্রমার্জিতং ত্বযা প্রত্যাদেশদুঃখং
শকুংতলাযাঃ |
( প্রবিশ্য )
চতুরিকা – – জযতু ভর্তা | বর্তিকাকরণ্ডকং গৃহীত্বেতোমুখং
প্রস্থিতাস্মি |
রাজাঃ – – কিং চ |
চতুরিকা – – স মে হস্তাদন্তরা তরলিকাদ্বিতীযযা দেব্যা
বসুমত্যাহমেবার্যপুত্রস্যোপনেষ্যামীতি সবলাত্কারং গৃহীতঃ |
বিদূষকঃ – – দিষ্ট্যা ত্বং মুক্তা |
চতুরিকা – – যাবদ্দেব্যা বিটপলগ্নমুত্তরীযং তরলিকা মোচযতি
তাবন্মযা নির্বাহিত আত্মা |
রাজাঃ – – বযস্য উপস্থিতা দেবী বহুমানগর্বিতা চ | ভবানিমাং
প্রতিকৃতিং রক্ষতু |
বিদূষকঃ – – আত্মানমিতি ভণ |
( চিত্রফলকমাদাযোত্থায চ )
যদি ভবানন্তঃপুরকূটবাগুরাতো মোক্ষ্যতে তদা মাং মেঘপ্রতিচ্ছন্দে
প্রাসাদে শব্দাযয |
( ইতি দ্রুতপদং নিষ্ক্রান্তঃ )
সানুমতী – – অন্যসংক্রান্তহৃদযোঽপি প্রথমসংভাবনামপেক্ষতে |
অতিশিথিলসৌহার্দ ইদানীমেষঃ |
( প্রবিশ্য পত্রহস্তা )
প্রতীহারী – – জযতু জযতু দেবঃ |
রাজাঃ – – বেত্রবতি ন খল্বন্তরা দৃষ্টা ত্বযা দেবী |
প্রতীহারী – – অথ কিম্ | পত্রহস্তাং মাং প্রেক্ষ্য প্রতিনিবৃত্তা |
রাজাঃ – – কার্যজ্ঞা কার্যোপরোধং মে পরিহরতি |
প্রতীহারী – – দেব অমাত্যো বিজ্ঞাপযতি |
অর্থজাতস্য গণনাবহুলতযৈকমেব পৌরকার্যমবেক্ষিতং তদ্দেবঃ
পত্রারূঢং প্রত্যক্ষীকরোত্বিতি |
রাজাঃ – – ইতঃ পত্রং দর্শয |
( প্রতিহার্যুপনযতি )
রাজাঃ – – ( অনুবাচ্য )
কথম্ | সমুদ্রব্যবহারী সার্থবাহো ধনমিত্রো নাম নৌব্যসনে বিপন্নঃ
| অনপত্যশ্চ কিল তপস্বী | রাজগামী তস্যার্থসংচয
ইত্যেতদমাত্যেন লিখিতম্ | কষ্টং খল্বনপত্যতা | বেত্রবতি
বহুধনত্বাদ্বহুপত্নীকেন তত্রভবতা ভবিতব্যম্ | বিচার্যতাং যদি
কাচিদাপন্নসত্ত্বা তস্য ভার্যাসু স্যাত্ |
প্রতীহারী – – দেব ইদানীমেব সাকেতকস্য শ্রেষ্ঠিনো দুহিতা
নির্বৃত্তপুংসবনা জাযাস্য শ্রূযতে |
রাজাঃ – – ননু গর্ভঃ পিত্র্যং রিক্থমর্হতি | গচ্ছ | এবমমাত্যং
ব্রূহি |
প্রতীহারী – – যদ্দেব আজ্ঞাপযতি |
( ইতি প্রস্থিতা )
রাজাঃ – – এহি তাবত্ |
প্রতীহারী – – ইযমস্মি |
রাজাঃ – – কিমনেন সংততিরস্তি নাস্তীতি |
যেন যেন বিযুজ্যন্তে প্রজাঃ স্নিগ্ধেন বন্ধুনা |
স স পাপাদৃতে তাসাং দুষ্যন্ত ইতি ঘুষ্যতাম্||২৩||
প্রতীহারী – – এবং নাম ঘোষযিতব্যম্ |
( নিষ্ক্রম্য | পুনঃ প্রবিষ্য )
কালে প্রবৃষ্টমিবাভিনন্দিতং দেবস্য শাসনম্ |
রাজাঃ – – ( দীর্ঘমুষ্ণং চ নিঃশ্বস্য )
এবং ভোঃ সংততিছেদনিরবলম্বানাং কুলানাং মূলপুরুষাবসানে
সংপদঃ পরমুপতিষ্ঠন্তে | মমাপ্যন্তে পুরুবংশশ্রিয এষ এব
বৃত্তান্তঃ |
প্রতীহারী – – প্রতিহতমমঙ্গলম্ |
রাজাঃ – – ধিঙ্মামুপস্থিতশ্রেযোবমানিনম্ |
সানুমতী – – অসংশযং সখীমেব হৃদযে কৃত্বা নিন্দিতোঽনেনাত্মা |
রাজাঃ – –
সংরোপিতেঽপ্যাত্মনি ধর্মপত্নী ত্যক্তা মযা নাম কুলপ্রতিষ্ঠা |
কল্পিষ্যমাণা মহতে ফলায বসুংধরা কাল ইবোপ্তবীজা||২৪||
সানুমতী – – অপরিচ্ছিন্নেদানীং তে সংততির্ভবিষ্যতি |
চতুরিকা – – ( জনান্তিকম্ )
অযে অনেন সার্থবাহবৃত্তান্তেন দ্বিগুণোদ্বেগো ভর্তা | এনমাশ্বাসযিতুং
মেঘপ্রতিচ্ছন্দাদার্যং মাধব্যং গৃহীত্বাগচ্ছ |
প্রতীহারী – – সুষ্ঠু ভণসি |
( ইতি নিষ্ক্রান্তা )
রাজাঃ – – অহো দুষ্যন্তস্য সংশযমারূঢাঃ পিণ্ডভাজঃ | কুতঃ |
অস্মাত্পরং বত যথাশ্রুতি সংভৃতানি কো নঃ কুলে নিবপনানি
নিযচ্ছতীতি |
নূনং প্রসূতিবিকলেন মযা প্রসিক্তং ধৌতাশ্রুশেষমুদকং পিতরঃ
পিবন্তি||২৫||
( ইতি মোহমুপগতঃ )
চতুরিকা – – ( সসংভ্রমমবলোক্য )
সমাশ্বসিতু সমাশ্বসিতু ভর্তা |
সানুমতী – – হা ধিক্ হা ধিক্ | সতি খলু দীপে
ব্যবধানদোষেণৈষোঽন্ধকারদোষমনুভবতি | অহমিদানীমেব
নির্বৃতং করোমি |
অথ বা শ্রুতং মযা শকুংতলাং সমাশ্বাসযন্ত্যা মহেন্দ্রজনন্যা
মুখাদ্যজ্ঞভাগোত্সুকা দেবা এব তথানুষ্ঠাস্যন্তি যথাচিরেণ
ধর্মপত্নীং ভর্তাভিনন্দিষ্যতীতি | তদ্যুক্তমেতং কালং
প্রতিপালযিতুম্ | যাবদনেন বৃত্তান্তেন প্রিযসখীং সমাশ্বাসযামি |
( ইত্যুদ্ভ্রান্তকেন নিষ্ক্রান্তা )
( নেপথ্যে )
অব্রহ্মণ্যম্ |
রাজাঃ – – ( প্রত্যাগতঃ | কর্ণং দত্ত্বা )
অযে মাধব্যস্যেবার্তস্বরঃ | কঃ কোঽত্র ভোঃ |
( প্রবিশ্য )
প্রতীহারী – – ( সসম্ভ্রমম্ )
পরিত্রাযতাং দেবঃ সংশযগতং বযস্যম্ |
রাজাঃ – – কেনাত্তগন্ধো মাণবকঃ |
প্রতীহারী – – অদৃষ্টরূপেণ কেনাপি সত্ত্বেনাতিক্রম্য
মেঘপ্রতিচ্ছন্দস্য প্রাসাদস্যাগ্রভূমিমারোপিতঃ |
রাজাঃ – – ( উত্থায )
মা তাবত্ | মমাপি সত্ত্বৈরভিভূযন্তে গৃহাঃ | অথ বা |
অহন্যহন্যাত্মন এব তাবজ্জ্ঞাতুং প্রমাদস্খলিতং ন শক্যম্ |
প্রজাসু কঃ কে পথা প্রযাতীত্যশেষতো বেদিতুমস্তি শক্তিঃ||২৬||
( নেপথ্যে )
ভো বযস্য অবিহা অবিহা |
রাজাঃ – – ( গতিভেদেন পরিক্রামন্ )
সখে ন ভেতব্যম্ |
( নেপথ্যে )
( পুনস্তদেব পঠিত্বা )
কথং ন ভেষ্যামি | এষ মাং কোঽপি প্রত্যবনতশিরোধরমিক্ষুমিব
ত্রিভঙ্গং করোতি |
রাজাঃ – – ( সদৃষ্টিক্ষেপম্ )
ধনুস্তাবত্ |
( প্রবিশ্য শার্ঙ্গহস্তা )
যবনী – – ভর্তঃ এতধ্দস্তাবাপসহিতং শরাসনম্ |
( রাজা সশরং ধনুরাদত্তে )
( নেপথ্যে )
এষ ত্বামভিনবকণ্ঠশোণিতার্থী শার্দূলঃ পশুমিব হন্মি
চেষ্টমানম্ |
আর্তানাং ভযমপনেতুমাত্তধন্বা দুষ্যন্তস্তব শরণং
ভবত্বিদানীম্||২৭||
রাজাঃ – – ( সরোষম্ )
কথং মামেবোদ্দিশতি | তিষ্ঠ কুণপাশন | ত্বমিদানীং ন ভবিষ্যসি |
( শার্ঙ্গমারোপ্য )
বেত্রবতি সোপানমার্গমাদেশয |
প্রতিহারী – – ইত ইতো দেবঃ |
( সর্বে সত্বরমুপসর্পন্তি )
রাজাঃ – – ( সমন্তাদ্বিলোক্য )
শূন্যং খল্বিদম্ |
( নেপথ্যে )
অবিহা | অবিহা | অহং অত্রভবন্তং পশ্যামি | ত্বং মাং ন পশ্যসি |
বিডালগৃহীতো মূষক ইব নিরাশোঽস্মি জীবিতে সংবৃত্তঃ |
রাজাঃ – – ভোস্তিরস্করিণীগর্বিত মদীযমস্ত্রং ত্বাং দ্রক্ষ্যতি | এষ
তমিষুং সংদধে |
যো হনিষ্যতি বধ্যং ত্বাং রক্ষ্যং রক্ষিষ্যতি দ্বিজম্ |
হংসো হি ক্ষীরমাদত্তে তন্মিশ্রা বর্জযত্যপঃ||২৮||
( ইত্যস্ত্রং সংধত্তে )
( ততঃ প্রবিশতি বিদূষকমুত্সৃজ্য মাতলিঃ )
মাতলিঃ – –
কৃতা শরব্যং হরিণা তবাসুরাঃ শরাসনং তেষু বিকৃষ্যতামিদম্
|
প্রসাদসৌম্যানি সতাং সুহৃজ্জনে পতন্তি চক্ষূংষি ন দারুণাঃ শরাঃ
||২৯||
রাজাঃ – – ( সসম্ভ্রমমস্ত্রমুপসংহরন্ )
অযে মাতলিঃ | স্বাগতং মহেন্দ্রসারথে |
( প্রবিশ্য )
বিদূষকঃ – – অহং যেনেষ্টিপশুমারং মারিতঃ সোঽনেন
স্বাগতেনাভিনদ্যতে |
মাতলিঃ – – ( সস্মিতম্ )
আযুষ্মন্শ্রূযতাং যদর্থমস্মি হরিণা ভবত্সকাশং প্রেষিতঃ |
রাজাঃ – – অবহিতোঽস্মি |
মাতলিঃ – – অস্তি কালনেমিপ্রসূতির্দুর্জযো নাম দানবগণঃ |
রাজাঃ – – অস্তি | শ্রুতপূর্বং মযা নারদাত্ |
মাতলিঃ – –
সখ্যুস্তে স কিল শতক্রতোরজয্য স্তস্য ত্বং রণশিরসি স্মৃতো নিহন্তা |
উচ্ছেত্তুং প্রভবতি যন্ন সপ্তসপ্তিস্তন্নৈশং তিমিরমপাকরোতি চন্দ্রঃ
||৩০||
স ভবানাত্তশস্ত্র এব ইদানীমৈন্দ্ররথমারুহ্য বিজযায
প্রতিষ্ঠতাম্ |
রাজাঃ – – অনুগৃহীতোঽহমনযা মঘবতঃ সংভাবনযা | অথ
মাধব্যং প্রতি ভবতা কিমেবং প্রযুক্তম্ |
মাতলিঃ – – তদপি কথ্যতে | কিংচিন্নিমিত্তাদপি
মনঃসংতাপাদাযুষ্মান্মযা বিক্লবো দৃষ্টঃ |
পশ্চাত্কোপযিতুমাযুষ্মন্তং তথা কৃতবানস্মি | কুতঃ |
জ্বলতি চলিতেন্ধনোঽগ্নির্বিপ্রকৃতঃ পন্নগঃ ফণাং কুরুতে |
প্রাযঃ স্বং মহিমানং ক্ষোভাত্প্রতিপদ্যতে হি জনঃ||৩১||
রাজাঃ – – ( জনান্তিকম্ )
বযস্য অনতিক্রমণীযা দিবস্পতেরাজ্ঞা | তদত্র পরিগতার্থং কৃত্বা
মদ্বচনাদমাত্যপিশুনং ব্রূহি |
ত্বন্মতিঃ কেবলা তাবত্ পরিপালযতু প্রজাঃ |
অধিজ্যমিদমন্যস্মিন্কর্মণি ব্যাপৃতং ধনুঃ||৩২||
ইতি |
বিদূষকঃ – – যদ্ভবানাজ্ঞাপযতি |
( ইতি নিষ্ক্রান্তঃ )
মাতলিঃ – – আযুষ্মান্রথমারোহতু |
( রাজা রথারোহণং নাট্যতি )
( নিষ্ক্রান্তাঃ সর্বে )

( ইতি ষষ্ঠো অঙ্কঃ | )