কুমারসম্ভবম্ সর্গঃ ০১

কুমারসম্ভবম্ সর্গঃ ১

অস্ত্যুত্তরস্যাং দিশি দেবতাত্মা হিমালয়ো নাম নগাধিরাজঃ |
পূর্বাপরৌ তোয়নিধী বিগাহ্য স্থিতঃ পৃথিব্যা ইব মানদণ্ডঃ || ১.১||
যং সর্বশৈলাঃ পরিকল্প্য বৎসং মেরৌ স্থিতে দোগ্ধরি দোহদক্ষে |
ভাস্বন্তি রত্নানি মহৌষধীশ্চ পৃথূপদিষ্টাং দুদুহুর্ধরিত্রীম্ || ১.২||
অনন্তরত্নপ্রভবস্য যস্য হিমং ন সৌভাগ্যবিলোপি জাতম্ |
একো হি দোষো গুণসন্নিপাতে নিমজ্জতীন্দোঃ কিরণেষ্বিবাঙ্কঃ || ১.৩||
যশ্চাপ্সরোবিভ্রমমণ্ডনানাং সম্পাদয়িত্রীং শিখরৈর্বিভর্তি |
বলাহকচ্ছেদবিভক্তরাগামকালসন্ধ্যামিব ধাতুমত্তাম্ || ১.৪||
আমেখলং সঞ্চরতাং ঘনানাং চ্ছায়ামধঃসানুগতাং নিষেব্য |
উদ্বেজিতা বৃষ্টিভিরাশ্রয়ন্তে শৃঙ্গাণি যস্যাতপবন্তি সিদ্ধাঃ || ১.৫||
পদং তুষারস্রুতিধৌতরক্তং যস্মিন্নদৃষ্ট্বাপি হতদ্বিপানাম্ |
বিদন্তি মার্গং নখরন্ধ্রমুক্তৈর্মুক্তাফলৈঃ কেসরিণাং কিরাতাঃ || ১.৬||
ন্যস্তাক্ষরা ধাতুরসেন যত্র ভূর্জৎবচঃ কুঞ্জরবিন্দুশোণাঃ |
ব্রজন্তি বিদ্যাধরসুন্দরীণামনঙ্গলেখক্রিয়য়োপয়োগম্ || ১.৭||
যঃ পূরয়ন্কীচকরন্ধ্রভাগান্দরীমুখোত্থেন সমীরণেন |
উদ্গাস্যতামিচ্ছতি কিন্নরাণাং তানপ্রদায়িৎবমিবোপগন্তুম্ || ১.৮||
কপোলকণ্ডূঃ করিভির্বিনেতুং বিঘট্টিতানাং সরলদ্রুমাণাম্ |
যত্র স্রুতক্ষীরতয়া প্রসূতঃ সানূনি গন্ধঃ সুরভীকরোতি || ১.৯||
বনেচরাণাং বনিতাসখানাং দরীগৃহোৎসঙ্গনিষক্তভাসঃ |
ভবন্তি যত্রৌষধয়ো রজন্যামতৈলপূরাঃ সুরতপ্রদীপাঃ || ১.১০||
উদ্বেজয়ত্যঙ্গুলিপার্ষ্ণিভাগান্মার্গে শিলীভূতহিমে | অপি যত্র |
ন দুর্বহশ্রোণিপয়োধরার্তা ভিন্দন্তি মন্দাং গতিমশ্বমুখ্যঃ || ১.১১||
দিবাকরাদ্রক্ষতি যো গুহাসু লীনং দিবা ভীতমিবান্ধকারম্ |
ক্ষুদ্রে | অপি নূনং শরণং প্রপন্নে মমৎবমুচ্চৈঃশিরসাং সতীব || ১.১২||
লাঙ্গূলবিক্ষেপবিসর্পিশোভৈরিতস্ততশ্চন্দ্রমরীচিগৌরৈঃ |
যস্যার্থয়ুক্তং গিরিরাজশব্দং কুর্বন্তি বালব্যজনৈশ্চমর্যঃ || ১.১৩||
যত্রাংশুকাক্ষেপবিলজ্জিতানাং যদৃচ্ছয়া কিম্পুরুষাঙ্গনানাম্ |
দরীগৃহদ্বারবিলম্বিবিম্বাস্তিরস্করিণ্যো জলদা ভবন্তি || ১.১৪||
ভাগীরথীনির্ঝরসীকরাণাং বোঢা মুহুঃ কম্পিতদেবদারুঃ |
যদ্বায়ুরন্বিষ্টমৃগৈঃ কিরাতৈরাসেব্যতে ভিন্নশিখণ্ডিবর্হঃ || ১.১৫||
সপ্তর্ষিহস্তাবচিতাবশেষাণ্যধো বিবস্বান্পরিবর্তমানঃ |
পদ্মানি যস্যাগ্রসরোরুহাণি প্রবোধয়ত্যূর্ধ্বমুখৈর্ময়ূখৈঃ || ১.১৬||
যজ্ঞাঙ্গয়োনিৎবমবেক্ষ্য যস্য সারং ধরিত্রীধরণক্ষমং চ |
প্রজাপতিঃ কল্পিতয়জ্ঞভাগং শৈলাধিপত্যং স্বয়মন্বতিষ্ঠৎ || ১.১৭||
স মানসীং মেরুসখঃ পিৎৠণাং কন্যাং কুলস্য স্থিতয়ে স্থিতিজ্ঞঃ |
মেনাং মুনীনামপি মাননীয়ামাত্মানুরূপাং বিধিনোপয়েমে || ১.১৮||
কালক্রমেণাথ তয়োঃ প্রবৃত্তে স্বরূপয়োগ্যে সুরতপ্রসঙ্গে |
মনোরমং যৌবনমুদ্বহন্ত্যা গর্ভো | অভবদ্ভূধররাজপত্ন্যাঃ || ১.১৯||
অসূত সা নাগবধূপভোগ্যং মৈনাকমম্ভোনিধিবদ্ধসখ্যম্ |
ক্রুদ্ধে | অপি পক্ষচ্ছিদি বৃত্রশত্রাববেদনাজ্ঞং কুলিশক্ষতানাম্ || ১.২০||
অথাবমানেন পিতুঃ প্রয়ুক্তা দক্ষস্য কন্যা ভবপূর্বপত্নী |
সতী সতী যোগবিসৃষ্টদেহা তাং জন্মনে শৈলবধূং প্রপেদে || ১.২১||
সা ভূধরাণামধিপেন তস্যাং সমাধিমত্যামুদপাদি ভব্যা |
সম্যক্প্রয়োগাদপরিক্ষতায়াং নীতাবিবোৎসাহগুণেন সম্পৎ || ১.২২||
প্রসন্নদিক্পাংসুবিবিক্তবাতং শঙ্খস্বনানন্তরপুষ্পবৃষ্টি |
শরীরিণাং স্থাবরজঙ্গমানাং সুখায় তজ্জন্মদিনং বভূব || ১.২৩||
তয়া দুহিত্রা সুতরাং সবিত্রী স্ফুরৎপ্রভামণ্ডলয়া চকাসে |
বিদূরভূমির্নবমেঘশব্দাদুদ্ভিন্নয়া রত্নশলাকয়েব || ১.২৪||
দিনে দিনে সা পরিবর্ধমানা লব্ধোদয়া চান্দ্রমসীব লেখা |
পুপোষ লাবণ্যময়ান্বিশেষাঞ্জ্যোৎস্নান্তরাণীব কলান্তরাণি || ১.২৫||
তাং পার্বতীত্যাভিজনেন নাম্না বন্ধুপ্রিয়াং বন্ধুজনো জুহাব |
উ মেতি মাত্রা তপসো নিষিদ্ধা পশ্চাদুমাখ্যাং সুমুখী জগাম || ১.২৬||
মহীভৃতঃ পুত্রবতো | অপি দৃষ্টিস্তস্মিন্নপত্যে ন জগাম তৃপ্তিম্ |
অনন্তপুষ্পস্য মধোর্হি চূতে দ্বিরেফমালা সবিশেষসঙ্গা || ১.২৭||
প্রভামহত্যা শিখয়েব দীপস্ত্রিমার্গয়েব ত্রিদিবস্য মার্গঃ |
সংস্কারবত্যেব গিরা মনীষী তয়া স পূতশ্চ বিভূষিতশ্চ || ১.২৮||
মন্দাকিনীসৈকতবেদিকাভিঃ সা কন্দুকৈঃ কৃত্রিমপুত্রকৈশ্চ |
রেমে মুহুর্মধ্যগতা সখীনাং ক্রীডারসং নির্বিশতীব বাল্যে || ১.২৯||
তাং হংসমালাঃ শরদীব গঙ্গাং মহৌষধিং নক্তমিবাত্মভাসঃ |
স্থিরোপদেশামুপদেশকালে প্রপেদিরে প্রাক্তনজন্মবিদ্যাঃ || ১.৩০||
অসম্ভৃতং মণ্ডনমঙ্গয়ষ্টেরনাসবাখ্যং করণং মদস্য |
কামস্য পুষ্পব্যতিরিক্তমস্ত্রং বাল্যাৎপরং সাথ বয়ঃ প্রপেদে || ১.৩১||
উন্মীলিতং তূলিকয়েব চিত্রং সূর্যাংশুভির্ভিন্নমিবারবিন্দম্ |
বভূব তস্যাশ্চতুরস্রশোভি বপুর্বিভক্তং নবয়ৌবনেন || ১.৩২||
অভ্যুন্নতাঙ্গুষ্ঠনখপ্রভাভির্নিক্ষেপণাদ্রাগমিবোদ্গিরন্তৌ |
আজহ্রতুস্তচ্চরণৌ পৃথিব্যাং স্থলারবিন্দশ্রিয়মব্যবস্থাম্ || ১.৩৩||
সা রাজহংসৈরিব সন্নতাঙ্গী গতেষু লীলাঞ্চিতবিক্রমেষু |
ব্যনীয়ত প্রত্যুপদেশলুব্ধৈরাদিৎসুভির্নূপুরসিঞ্জিতানি || ১.৩৪||
বৃত্তানুপূর্বে চ ন চাতিদীর্ঘে জঙ্ঘে শুভে সৃষ্টবতস্তদীয়ে |
শেষাঙ্গনির্মাণবিধৌ বিধাতুর্লাবণ্য উৎপাদ্য ইবাস যত্নঃ || ১.৩৫||
নাগেন্দ্রহস্তাস্ত্বচি কর্কশৎবাদেকান্তশৈত্যাৎকদলীবিশেষাঃ |
লব্ধ্বাপি লোকে পরিণাহি রূপং জাতাস্তদূর্বোরুপমানবাহ্যাঃ || ১.৩৬||
এতাবতা নন্বনুমেয়শোভং কাঞ্চীগুণস্থানমনিন্দিতায়াঃ |
আরোপিতং যদ্গিরিশেন পশ্চাদনন্যনারীকমনীয়মঙ্কম্ || ১.৩৭||
তস্যাঃ প্রবিষ্টা নতনাভিরন্ধ্রং ররাজ তন্বী নবলোমরাজিঃ |
নীবীমতিক্রম্য সিতেতরস্য তন্মেখলামধ্যমণেরিবার্চিঃ || ১.৩৮||
মধ্যেন সা বেদিবিলগ্নমধ্যা বলিত্রয়ং চারু বভার বালা |
আরোহণার্থং নবয়ৌবনেন কামস্য সোপানমিব প্রয়ুক্তম্ || ১.৩৯||
অন্যোন্যমুৎপীডয়দুৎপলাক্ষ্যাঃ স্তনদ্বয়ং পাণ্ডু তথা প্রবৃদ্ধম্ |
মধ্যে যথা শ্যামমুখস্য তস্য মৃণালসূত্রান্তরমপ্যলভ্যম্ || ১.৪০||
শিরীষপুষ্পাধিকসৌকুমার্যৌ বাহূ তদীয়াবিতি মে বিতর্কঃ |
পরাজিতেনাপি কৃতৌ হরস্য যৌ কণ্ঠপাশৌ মকরধ্বজেন || ১.৪১||
কণ্ঠস্য তস্যাঃ স্তনবন্ধুরস্য মুক্তাকলাপস্য চ নিস্তলস্য |
অন্যোন্যশোভাজননাদ্বভূব সাধারণো ভূষণভূষ্যভাবঃ || ১.৪২||
চন্দ্রং গতা পদ্মগুণান্ন ভুঙ্ক্তে পদ্মাশ্রিতা চান্দ্রমসীমভিখ্যাম্ |
উমামুখং তু প্রতিপদ্য লোলা দ্বিসংশ্রয়াং প্রীতিমবাপ লক্ষ্মীঃ || ১.৪৩||
পুষ্পং প্রবালোপহিতং যদি স্যান্মুক্তাফলং বা স্ফুটবিদ্রুমস্থম্ |
ততো | অনুকুর্যাদ্বিশদস্য তস্যাস্তাম্রৌষ্ঠপর্যস্তরুচঃ স্মিতস্য || ১.৪৪||
স্বরেণ তস্যামমৃতস্রুতেব প্রজল্পিতায়ামভিজাতবাচি |
অপ্যন্যপুষ্টা প্রতিকূলশব্দা শ্রোতুর্বিতন্ত্রীরিব তাড্যমানা || ১.৪৫||
প্রবাতনীলোৎপলনির্বিশেষমধীরবিপ্রেক্ষিতমায়তাক্ষ্যা |
তয়া গৃহীতং নু মৃগাঙ্গনাভ্যস্ততো গৃহীতং নু মৃগাঙ্গনাভিঃ || ১.৪৬||
তস্যাঃ শলাকাঞ্জননির্মিতেব কান্তির্ভ্রুবোরানতলেখয়োর্যা |
তাং বীক্ষ্য লীলাচতুরামনঙ্গঃ স্বচাপসৌন্দর্যমদং মুমোচ || ১.৪৭||
লজ্জা তিরশ্চাং যদি চেতসি স্যাদসংশয়ং পর্বতরাজপুত্র্যাঃ |
তং কেশপাশং প্রসমীক্ষ্য কুর্যুর্বালপ্রিয়ৎবং শিথিলং চমর্যঃ || ১.৪৮||
সর্বোপমাদ্রব্যসমুচ্চয়েন যথাপ্রদেশং বিনিবেশিতেন |
সা নির্মিতা বিশ্বসৃজা প্রয়ত্নাদেকস্থসৌন্দর্যদিদৃক্ষয়েব || ১.৪৯||
তাং নারদঃ কামচরঃ কদা চিৎকন্যাং কিল প্রেক্ষ্য পিতুঃ সমীপে |
সমাদিদেশৈকবধূং ভবিত্রীং প্রেম্ণা শরীরার্ধহরাং হরস্য || ১.৫০||
গুরুঃ প্রগল্ভে | অপি বয়স্যতো | অস্যাস্তস্থৌ নিবৃত্তান্যবরাভিলাষঃ |
ঋতে কৃশানোর্ন হি মন্ত্রপূতমর্হন্তি তেজাংস্যপরাণি হব্যম্ || ১.৫১||
অয়াচিতারং ন হি দেবদেবমদ্রিঃ সুতাং গ্রাহয়িতুং শশাক |
অভ্যর্থনাভঙ্গভয়েন সাধুর্মাধ্যস্থ্যমিষ্টে | অপ্যবলম্বতে | অর্থে || ১.৫২||
যদৈব পূর্বে জননে শরীরং সা দক্ষরোষাৎসুদতী সসর্জ |
তদাপ্রভৃত্যেব বিমুক্তসঙ্গঃ পতিঃ পশূনামপরিগ্রহো | অভূৎ || ১.৫৩||
স কৃত্তিবাসাস্তপসে যতাত্মা গঙ্গাপ্রবাহোক্ষিতদেবদারু |
প্রস্থং হিমাদ্রের্মৃগনাভিগন্ধি কিং চিৎক্বণৎকিন্নরমধ্যুবাস || ১.৫৪||
গণা নমেরুপ্রসবাবতংসা ভূর্জৎবচঃ স্পর্শবতীর্দধানাঃ |
মনঃশিলাবিচ্ছুরিতা নিষেদুঃ শৈলেয়নদ্ধেষু শিলাতলেষু || ১.৫৫||
তুষারসঙ্ঘাতশিলাঃ খুরাগ্রৈঃ সমুল্লিখন্দর্পকলঃ ককুদ্মান্ |
দৃষ্টঃ কথং চিদ্গবয়ৈর্বিবিগ্নৈরসোঢসিংহধ্বনিরুন্ননাদ || ১.৫৬||
তত্রাগ্নিমাধায় সমিৎসমিদ্ধং স্বমেব মূর্ত্যন্তরমষ্টমূর্তিঃ |
স্বয়ং বিধাতা তপসঃ ফলানাম্কেনাপি কামেন তপশ্চচার || ১.৫৭||
অনর্ঘ্যমর্ঘ্যেণ তমদ্রিনাথঃ স্বর্গৌকসামর্চিতমর্চয়িৎবা |
আরাধনায়াস্য সখীসমেতাং সমাদিদেশ প্রয়তাং তনূজাম্ || ১.৫৮||
প্রত্যর্থিভূতামপি তাং সমাধেঃ শুশ্রূষমাণাং গিরিশো | অনুমেনে |
বিকারহেতৌ সতি বিক্রিয়ন্তে যেষাং ন চেতাংসি ত এব ধীরাঃ || ১.৫৯||
অবচিতবলিপুষ্পা বেদিসম্মার্গদক্ষা
নিয়মবিধিজলানাং বর্হিষাং চোপনেত্রী |
গিরিশমুপচচার প্রত্যহং সা সুকেশী
নিয়মিতপরিখেদা তচ্ছিরশ্চন্দ্রপাদৈঃ || ১.৬০||