কুমারসম্ভবম্ সর্গঃ ০২

কুমারসম্ভবম্ সর্গঃ ২

তস্মিন্বিপ্রকৃতাঃ কালে তারকেণ দিবৌকসঃ |
তুরাসাহং পুরোধায় ধাম স্বায়ম্ভুবং যয়ুঃ || ২.১||
তেষামাবিরভূদ্ব্রহ্মা পরিম্লানমুখশ্রিয়াম্ |
সরসাং সুপ্তপদ্মানাং প্রাতর্দীধিতিমানিব || ২.২, ||
অথ সর্বস্য ধাতারং তে সর্বে সর্বতোমুখম্ |
বাগীশং বাগ্ভিরর্থ্যাভিঃ প্রণিপত্যোপতস্থিরে || ২.৩||
নমস্ত্রিমূর্তয়ে তুভ্যং প্রাক্সৃষ্টেঃ কেবলাত্মনে |
গুণত্রয়বিভাগায় পশ্চাদ্ভেদমুপেয়ুষে || ২.৪||
যদমোঘমপামন্তরুপ্তং বীজমজ ৎবয়া |
অতশ্চরাচরং বিশ্বং প্রভবস্তস্য গীয়সে || ২.৫||
তিসৃভিস্ত্বমবস্থাভির্মহিমানমুদীরয়ন্ |
প্রলয়স্থিতিসর্গাণামেকঃ কারণতাং গতঃ || ২.৬||
স্ত্রীপুংসাবাত্মভাগৌ তে ভিন্নমূর্তেঃ সিসৃক্ষয়া |
প্রসূতিভাজঃ সর্গস্য তাবেব পিতরৌ স্মৃতৌ || ২.৭||
স্বকালপরিমাণেন ব্যস্তরাত্রিন্দিবস্য তে |
যৌ তু স্বপ্নাববোধৌ তৌ ভূতানাং প্রলয়োদয়ৌ || ২.৮||
জগদ্যোনিরয়োনিস্ত্বং জগদন্তো নিরন্তকঃ |
জগদাদিরনাদিস্ত্বং জগদীশো নিরীশ্বরঃ || ২.৯||
আত্মানমাত্মনা বেৎসি সৃজস্যাত্মানমাত্মনা |
আত্মনা কৃতিনা চ ৎবমাত্মন্যেব প্রলীয়সে || ২.১০||
দ্রবঃ সঙ্ঘাতকঠিনঃ স্থূলঃ সূক্ষ্মো লঘুর্গুরুঃ |
ব্যক্তো ব্যক্তেতরশ্চাসি প্রাকাম্যং তে বিভূতিষু || ২.১১||
উদ্ঘাতঃ প্রণবো যাসাং ন্যায়ৈস্ত্রিভিরুদীরণম্ |
কর্ম যজ্ঞঃ ফলং স্বর্গস্তাসাং ৎবং প্রভবো গিরাম্ || ২.১২||
ৎবামামনন্তি প্রকৃতিং পুরুষার্থপ্রবর্তিনীম্ |
তদ্দর্শিনমুদাসীনং ৎবামেব পুরুষং বিদুঃ || ২.১৩||
ৎবং পিৎৠণামপি পিতা দেবানামপি দেবতা |
পরতো | অপি পরশ্চাসি বিধাতা বেধসামপি || ২.১৪||
ৎবমেব হব্যং হোতা চ ভোজ্যং ভোক্তা চ শাশ্বতঃ |
বেদ্যং চ বেদিতা চাসি ধ্যাতা ধ্যেয়ং চ যৎপরম্ || ২.১৫||
ইতি তেভ্যঃ স্তুতীঃ শ্রুৎবা যথার্থা হৃদয়ঙ্গমাঃ |
প্রসাদাভিমুখো বেধাঃ প্রত্যুবাচ দিবৌকসঃ || ২.১৬||
পুরাণস্য কবেস্তস্য চতুর্মুখসমীরিতা |
প্রবৃত্তিরাসীচ্ছব্দানাং চরিতার্থা চতুষ্টয়ী || ২.১৭||
স্বাগতং স্বানধীকারান্প্রভাবৈরবলম্ব্য বঃ |
যুগপদ্যুগবাহুভ্যঃ প্রাপ্তেভ্যঃ প্রাজ্যবিক্রমাঃ || ২.১৮||
কিমিদং দ্যুতিমাত্মীয়াং ন বিভ্রতি যথা পুরা |
হিমক্লিষ্টপ্রকাশানি জ্যোতীংষীব মুখানি বঃ || ২.১৯||
প্রশমাদর্চিষামেতদনুদ্গীর্ণসুরায়ুধম্ |
বৃত্রস্য হন্তুঃ কুলিশং কুণ্ঠিতাশ্রীব লক্ষ্যতে || ২.২০||
কিং চায়মরিদুর্বারঃ পাণৌ পাশঃ প্রচেতসঃ |
মন্ত্রেণ হতবীর্যস্য ফণিনো দৈন্যমাশ্রিতঃ || ২.২১||
কুবেরস্য মনঃশল্যং শংসতীব পরাভবম্ |
অপবিদ্ধগদো বাহুর্ভগ্নশাখ ইব দ্রুমঃ || ২.২২||
যমো | অপি বিলিখন্ভূমিং দণ্ডেনাস্তমিতৎবিষা |
কুরুতে | অস্মিন্নমোঘে | অপি নির্বাণালাতলাঘবম্ || ২.২৩||
অমী চ কথমাদিত্যাঃ প্রতাপক্ষতিশীতলাঃ |
চিত্রন্যস্তা ইব গতাঃ প্রকামালোকনীয়তাম্ || ২.২৪||
পর্যাকুলৎবান্মরুতাং বেগভঙ্গো | অনুমীয়তে |
অম্ভসামোঘসংরোধঃ প্রতীপগমনাদিব || ২.২৫||
আবর্জিতজটামৌলি-বিলম্বিশশিকোটয়ঃ |
রুদ্রাণামপি মূর্ধানঃ ক্ষতহুঙ্কারশংসিনঃ || ২.২৬||
লব্ধপ্রতিষ্ঠাঃ প্রথমং যূয়ং কিং বলবত্তরৈঃ |
অপবাদৈরিবোৎসর্গাঃ কৃতব্যাবৃত্তয়ঃ পরৈঃ || ২.২৭||
তদ্ব্রূত বৎসাঃ কিমিতঃ প্রার্থয়ধ্বে সমাগতাঃ |
ময়ি সৃষ্টির্হি লোকানাং রক্ষা যুষ্মাস্ববস্থিতা || ২.২৮||
ততো মন্দানিলোদ্ধূত-কমলাকরশোভিনা |
গুরুং নেত্রসহস্রেণ চোদয়ামাস বাসবঃ || ২.২৯||
স দ্বিনেত্রো হরেশ্চক্ষুঃ সহস্রনয়নাধিকম্ |
বাচস্পতিরুবাচেদং প্রাঞ্জলির্জলজাসনম্ || ২.৩০||
এবং যদাত্থ ভগবন্নামৃষ্টং নঃ পরৈঃ পদম্ |
প্রত্যেকং বিনিয়ুক্তাত্মা কথং ন জ্ঞাস্যসি প্রভো || ২.৩১||
ভবল্লব্ধবরোদীর্ণস্তারকাখ্যো মহাসুরঃ |
উপপ্লবায় লোকানাং ধূমকেতুরিবোত্থিতঃ || ২.৩২||
পুরে তাবন্তমেবাস্য তনোতি রবিরাতপম্ |
দীর্ঘিকাকমলোন্মেষো যাবন্মাত্রেণ সাধ্যতে || ২.৩৩||
সর্বাভিঃ সর্বদা চন্দ্রস্তং কলাভির্নিষেবতে |
নাদত্তে কেবলাং লেখাং হরচূডামণীকৃতাম্ || ২.৩৪||
ব্যাবৃত্তগতিরুদ্যানে কুসুমস্তেয়সাধ্বসাৎ |
ন বাতি বায়ুস্তৎপার্শ্বে তালবৃন্তানিলাধিকম্ || ২.৩৫||
পর্যায়সেবামুৎসৃজ্য পুষ্পসম্ভারতৎপরাঃ |
উদ্যানপালসামান্যমৃতবস্তমুপাসতে || ২.৩৬||
তস্যোপায়নয়োগ্যানি রত্নানি সরিতাং পতিঃ |
কথমপ্যম্ভসামন্তরা নিষ্পত্তেঃ প্রতীক্ষতে || ২.৩৭||
জ্বলন্মণিশিখাশ্চৈনং বাসুকিপ্রমুখা নিশি |
স্থিরপ্রদীপতামেত্য ভুজঙ্গাঃ পর্যুপাসতে || ২.৩৮||
তৎকৃতানুগ্রহাপেক্ষী তং মুহুর্দূতহারিতৈঃ |
অনুকূলয়তীন্দ্রো | অপি কল্পদ্রুমবিভূষণৈঃ || ২.৩৯||
ইত্থমারাধ্যমানো | অপি ক্লিশ্নাতি ভুবনত্রয়ম্ |
শাম্যেৎপ্রত্যপকারেণ নোপকারেণ দুর্জনঃ || ২.৪০||
তেনামরবধূহস্তৈঃ সদয়ালূনপল্লবাঃ |
অভিজ্ঞাশ্ছেদপাতানাং ক্রিয়ন্তে নন্দনদ্রুমাঃ || ২.৪১||
বীজ্যতে স হি সংসুপ্তঃ শ্বাসসাধারণানিলৈঃ |
চামরৈঃ সুরবন্দীনাং বাষ্পশীকরবর্ষিভিঃ || ২.৪২||
উৎপাট্য মেরুশৃঙ্গাণি ক্ষুণ্ণানি হরিতাং খুরৈঃ |
আক্রীডপর্বতাস্তেন কল্পিতাঃ স্বেষু বেশ্মসু || ২.৪৩||
মন্দাকিন্যাঃ পয়ঃশেষং দিগ্বারণমদাবিলম্ |
হেমাম্ভোরুহসস্যানাং তদ্বাপ্যো ধাম সাম্প্রতম্ || ২.৪৪||
ভুবনালোকনপ্রীতিঃ স্বর্গিভির্নানুভূয়তে |
খিলীভূতে বিমানানাং তদাপাতভয়াৎপথি || ২.৪৫||
যজ্বভিঃ সম্ভৃতং হব্যং বিততেষ্বধ্বরেষু সঃ |
জাতবেদোমুখান্মায়ী মিষতামাচ্ছিনত্তি নঃ || ২.৪৬||
উচ্চৈরুচ্চৈঃশ্রবাস্তেন হয়রত্নমহারি চ |
দেহবদ্ধমিবেন্দ্রস্য চিরকালার্জিতং যশঃ || ২.৪৭||
তস্মিন্নুপায়াঃ সর্বে নঃ ক্রূরে প্রতিহতক্রিয়াঃ |
বীর্যবত্যৌষধানীব বিকারে সান্নিপাতিকে || ২.৪৮||
জয়াশা যত্র চাস্মাকং প্রতিঘাতোত্থিতার্চিষা |
হরিচক্রেণ তেনাস্য কণ্ঠে নিষ্ক ইবার্পিতঃ || ২.৪৯||
তদীয়াস্তোয়দেষ্বদ্য পুষ্করাবর্তকাদিষু |
অভ্যস্যন্তি তটাঘাতং নির্জিতৈরাবতা গজাঃ || ২.৫০||
তদিচ্ছামো বিভো সৃষ্টং সেনান্যং তস্য শান্তয়ে |
কর্মবন্ধচ্ছিদং ধর্মং ভবস্যেব মুমুক্ষবঃ || ২.৫১||
গোপ্তারং সুরসৈন্যানাং যং পুরস্কৃত্য গোত্রভিৎ |
প্রত্যানেষ্যতি শত্রুভ্যো বন্দীমিব জয়শ্রিয়ম্ || ২.৫২||
বচস্যবসিতে তস্মিন্সসর্জ গিরমাত্মভূঃ |
গর্জিতানন্তরাং বৃষ্টিং সৌভাগ্যেন জিগায় যা || ২.৫৩||
সম্পৎস্যতে বঃ কামো যং কালঃ কশ্চিৎপ্রতীক্ষ্যতাম্ |
ন ৎবস্য সিদ্ধৌ যাস্যামি সর্গব্যাপারমাত্মনা || ২.৫৪||
ইতঃ স দৈত্যঃ প্রাপ্তশ্রীর্নেত এবার্হতি ক্ষয়ম্ |
বিষবৃক্ষো | অপি সংবর্ধ্য স্বয়ং ছেত্তুমসাম্প্রতম্ || ২.৫৫||
বৃতং তেনেদমেব প্রাঙ্ময়া চাস্মৈ প্রতিশ্রুতম্ |
বরেণ শমিতং লোকানলং দগ্ধুং হি তত্তপঃ || ২.৫৬||
সংযুগে সাংযুগীনং তমুদ্যতং প্রসহেত কঃ |
অংশাদৃতে নিষিক্তস্য নীললোহিতরেতসঃ || ২.৫৭||
স হি দেবঃ পরং জ্যোতিস্তমঃপারে ব্যবস্থিতম্ |
পরিচ্ছিন্নপ্রভাবর্দ্ধির্ন ময়া ন চ বিষ্ণুনা || ২.৫৮||
উমারূপেণ তে যূয়ং সংযমস্তিমিতং মনঃ |
শম্ভোর্যতধ্বমাক্রষ্টুময়স্কান্তেন লোহবৎ || ২.৫৯||
উভে এব ক্ষমে বোঢুমুভয়োর্বীর্যমাহিতম্ |
সা বা শম্ভোস্তদীয়া বা মূর্তির্জলময়ী মম || ২.৬০||
তস্যাত্মা শিতিকণ্ঠস্য সৈনাপত্যমুপেত্য বঃ |
মোক্ষ্যতে সুরবন্দীনাং বেণীর্বীর্যবিভূতিভিঃ || ২.৬১||
ইতি ব্যাহৃত্য বিবুধান্বিশ্বয়োনিস্তিরোদধে |
মনস্যাহিতকর্তব্যাস্তে | অপি প্রতিয়য়ুর্দিবম্ || ২.৬২||
তত্র নিশ্চিত্য কন্দর্পমগমৎপাকশাসনঃ |
মনসা কার্যসংসিদ্ধি-ৎবরাদ্বিগুণরংহসা || ২.৬৩||
অথ স ললিতয়োষিদ্ভ্রূলতাচারুশৃঙ্গং
রতিবলয়পদাঙ্কে চাপমাসজ্য কণ্ঠে |
সহচরমধুহস্তন্যস্তচূতাঙ্কুরাস্ত্রঃ
শতমখমুপতস্থে প্রাঞ্জলিঃ পুষ্পধন্বা || ২.৬৪||