কুমারসম্ভবম্ সর্গঃ ০৩

কুমারসম্ভবম্ সর্গঃ ৩

তস্মিন্মঘোনস্ত্রিদশান্বিহায় সহস্রমক্ষ্ণাং যুগপৎপপাত |
প্রয়োজনাপেক্ষিতয়া প্রভূণাং প্রায়শ্চলং গৌরবমাশ্রিতেষু || ৩.১||
স বাসবেনাসনসন্নিকৃষ্টমিতো নিষীদেতি বিসৃষ্টভূমিঃ |
ভর্তুঃ প্রসাদং প্রতিনন্দ্য মূর্ধ্না বক্তুং মিথঃ প্রাক্রমতৈবমেনম্ || ৩.২||
আজ্ঞাপয় জ্ঞাতবিশেষ পুংসাং লোকেষু যত্তে করণীয়মস্তি |
অনুগ্রহং সংস্মরণপ্রবৃত্তমিচ্ছামি সংবর্ধিতমাজ্ঞয়া তে || ৩.৩||
কেনাভ্যসূয়া পদকাঙ্ক্ষিণা তে নিতান্তদীর্ঘৈর্জনিতা তপোভিঃ |
যাবদ্ভবত্যাহিতসায়কস্য মৎকার্মুকস্যাস্য নিদেশবর্তী || ৩.৪||
অসম্মতঃ কস্তব মুক্তিমার্গং পুনর্ভবক্লেশভয়াৎপ্রপন্নঃ |
বদ্ধশ্চিরং তিষ্ঠতু সুন্দরীণামারেচিতভ্রূচতুরৈঃ কটাক্ষৈঃ || ৩.৫||
অধ্যাপিতস্যোশনসাপি নীতিং প্রয়ুক্তরাগপ্রণিধির্দ্বিষস্তে |
কস্যার্থধর্মৌ বদ পীডয়ামি সিন্ধোস্তটাবোঘ ইব প্রবৃদ্ধঃ || ৩.৬||
কামেকপত্নীব্রতদুঃখশীলাং লোলং মনশ্চারুতয়া প্রবিষ্টাম্ |
নিতম্বিনীমিচ্ছসি মুক্তলজ্জাং কণ্টঃে স্বয়ঙ্গ্রাহনিষক্তবাহুম্ || ৩.৭||
কয়াসি কামিন্সুরতাপরাধাৎপাদানতঃ কোপনয়াবধূতঃ |
যস্যাঃ করিষ্যামি দৃঢানুতাপং প্রবালশয়্যাশরণং শরীরম্ || ৩.৮||
প্রসীদ বিশ্রাম্যতু বীর বজ্রং শরৈর্মদীয়ৈঃ কতমঃ সুরারিঃ |
বিভেতু মোঘীকৃতবাহুবীর্যঃ স্ত্রীভ্যো | অপি কোপস্ফুরিতাধরাভ্যঃ || ৩.৯||
তব প্রসাদাৎকুসুমায়ুধো | অপি সহায়মেকং মধুমেব লব্ধ্বা |
কুর্যাং হরস্যাপি পিনাকপাণের্ধৈর্যচ্যুতিং কে মম ধন্বিনো | অন্যে || ৩.১০||
অথোরুদেশাদবতার্য পাদমাক্রান্তিসম্ভাবিতপাদপীঠম্ |
সঙ্কল্পিথার্থে বিবৃতাত্মশক্তিমাখণ্ডলঃ কামমিদং বভাষে || ৩.১১||
সর্বং সখে ৎবয়্যুপপন্নমেতদুভে মমাস্ত্রে কুলিশং ভবাংশ্চ |
বজ্রং তপোবীর্যমহৎসু কুণ্টঃং ৎবং সর্বতোগামি চ সাধকং চ || ৩.১২||
অবৈমি তে সারমতঃ খলু ৎবাং কার্যে গুরুণ্যাত্মসমং নিয়োক্ষ্যে |
ব্যাদিশ্যতে ভূধরতামবেক্ষ্য কৃষ্ণেন দেহোদ্বহনায় শেষঃ || ৩.১৩||
আশংসতা বাণগতিং বৃষাঙ্কে কার্যং ৎবয়া নঃ প্রতিপন্নকল্পম্ |
নিবোধ যজ্ঞাংশভুজামিদানীমুচ্চৈর্দ্বিষামীপ্সিতমেতদেব || ৩.১৪||
অমী হি বীর্যপ্রভবং ভবস্য জয়ায় সেনান্যমুশন্তি দেবাঃ |
স চ ৎবদেকেষুনিপাতসাধ্যো ব্রহ্মাঙ্গভূর্ব্রহ্মণি যোজিতাত্মা || ৩.১৫||
তস্মৈ হিমাদ্রেঃ প্রয়তাং তনূজাং যতাত্মনে রোচয়িতুং যতস্ব |
যোষিৎসু তদ্বীর্যনিষেকভূমিঃ সৈব ক্ষমেত্যাত্মভুবোপদিষ্টম্ || ৩.১৬||
গুরোর্নিয়োগাচ্চ নগেন্দ্রকন্যা স্থাণুং তপস্যন্তমধিত্যকায়াম্ |
অন্বাস্ত ইত্যপ্সরসাং মুখেভ্যঃ শ্রুতং ময়া মৎপ্রণিধিঃ স বর্গঃ || ৩.১৭||
তদ্গচ্ছ সিদ্ধ্যৈ কুরু দেবকার্যমর্থো | অয়মর্থান্তরভাব্য এব |
অপেক্ষতে প্রত্যয়মুত্তমং ৎবাং বীজাঙ্কুরঃ প্রাগুদয়াদিবাম্ভঃ || ৩.১৮||
তস্মিন্সুরাণাং বিজয়াভ্যুপায়ে তবৈব নামাস্ত্রগতিঃ কৃতী ৎবম্ |
অপ্যপ্রসিদ্ধং যশসে হি পুংসামনন্যসাধারণমেব কর্ম || ৩.১৯||
সুরাঃ সমভ্যর্থয়িতার এতে কার্যং ত্রয়াণামপি বিষ্টপানাম্ |
চাপেন তে কর্ম ন চাতিহিংস্রমহো বতাসি স্পৃহণীয়বীর্যঃ || ৩.২০||
মধুশ্চ তে মন্মথ সাহচর্যাদাসবনুক্তো | অপি সহায় এব |
সমীরণো নোদয়িতা ভবেতি ব্যাদিশ্যতে কেন হুতাশনস্য || ৩.২১||
তথেতি শেষামিব ভর্তুরাজ্ঞামাদায় মূর্ধ্না মদনঃ প্রতস্থে |
ঐরাবতাস্ফালনকর্কশেন হস্তেন পস্পর্শ তদঙ্গমিন্দ্রঃ || ৩.২২||
স মাধবেনাভিমতেন সখ্যা রত্যা চ সাশঙ্কমনুপ্রয়াতঃ |
অঙ্গব্যয়প্রার্থিতকার্যসিদ্ধিঃ স্থাণ্বাশ্রমং হৈমবতং জগাম || ৩.২৩||
তস্মিন্বনে সংযমিনাং মুনীনাং তপঃসমাধেঃ প্রতিকূলবর্তী |
সঙ্কল্পয়োনেরভিমানভূতমাত্মানমাধায় মধুর্জজৃম্ভে || ৩.২৪||
কুবেরগুপ্তাং দিশমুষ্ণরশ্মৌ গন্তুং প্রবৃত্তে সময়ং বিলঙ্ঘ্য |
দিগ্দক্ষিণা গন্ধবহং মুখেন ব্যলীকনিঃশ্বাসমিবোৎসসর্জ || ৩.২৫||
অসূত সদ্যঃ কুসুমান্যশোকঃ স্কন্ধাৎপ্রভৃত্যেব সপল্লবানি |
পাদেন নাপৈক্ষত সুন্দরীণাং সম্পর্কমাসিঞ্জিতনূপুরেণ || ৩.২৬||
সদ্যঃ প্রবালোদ্গমচারুপত্রে নীতে সমাপ্তিং নবচূতবাণে |
নিবেশয়ামাস মধুর্দ্বিরেফান্নামাক্ষরাণীব মনোভবস্য || ৩.২৭||
বর্ণপ্রকর্ষে সতি কর্ণিকারং দুনোতি নির্গন্ধতয়া স্ম চেতঃ |
প্রায়েণ সামগ্র্যবিধৌ গুণানাং পরাঙ্মুখী বিশ্বসৃজঃ প্রবৃত্তিঃ || ৩.২৮||
বালেন্দুবক্রাণ্যবিকাসভাবাদ্বভুঃ পলাশান্যতিলোহিতানি |
সদ্যো বসন্তেন সমাগতানাং নখক্ষতানীব বনস্থলীনাম্ || ৩.২৯||
লগ্নদ্বিরেফাঞ্জনভক্তিচিত্রম্মুখে মধুশ্রীস্তিলকং প্রকাশ্য |
রাগেণ বালারুণকোমলেন চূতপ্রবালোষ্ঠমলঞ্চকার || ৩.৩০||
মৃগাঃ প্রিয়ালদ্রুমমঞ্জরীণাং রজঃকণৈর্বিঘ্নিতদৃষ্টিপাতাঃ |
মদোদ্ধতাঃ প্রত্যনিলং বিচেরুর্বনস্থলীর্মর্মরপত্রমোক্ষাঃ || ৩.৩১||
চূতাঙ্কুরাস্বাদকষায়কণ্ঠঃ পুংস্কোকিলো যন্মধুরং চুকূজ |
মনস্বিনীমানবিঘাতদক্ষং তদেব জাতং বচনং স্মরস্য || ৩.৩২||
হিমব্যপায়াদ্বিশদাধরাণামাপাণ্ডুরীভূতমুখচ্ছবীনাম্ |
স্বেদোদ্গমঃ কিম্পুরুষাঙ্গনানাং চক্রে পদং পত্রবিশেষকেষু || ৩.৩৩||
তপস্বিনঃ স্থাণুবনৌকসস্তামাকালিকীং বীক্ষ্য মধুপ্রবৃত্তিম্ |
প্রয়ত্নসংস্তম্ভিতবিক্রিয়াণাং কথং চিদীশা মনসাং বভূবুঃ || ৩.৩৪||
তং দেশমারোপিতপুষ্পচাপে রতিদ্বিতীয়ে মদনে প্রপন্নে |
কাষ্ঠাগতস্নেহরসানুবিদ্ধং দ্বন্দ্বানি ভাবং ক্রিয়য়া বিবব্রুঃ || ৩.৩৫||
মধু দ্বিরেফঃ কুসুমৈকপাত্রে পপৌ প্রিয়াং স্বামনুবর্তমানঃ |
শৃঙ্গেণ চ স্পর্শনিমীলিতাক্ষীং মৃগীমকণ্ডূয়ত কৃষ্ণসারঃ || ৩.৩৬||
দদৌ রসাৎপঙ্কজরেণুগন্ধি গজায় গণ্ডূষজলং করেণুঃ |
অর্ধোপভুক্তেন বিসেন জায়াং সম্ভাবয়ামাস রথাঙ্গনামা || ৩.৩৭||
গীতান্তরেষু শ্রমবারিলেশৈঃ কিঞ্চিৎসমুচ্ছ্বাসিতপত্রলেখম্ |
পুষ্পাসবাঘূর্ণিতনেত্রশোভি প্রিয়ামুখং কিম্পুরুষশ্চুচুম্বে || ৩.৩৮||
পর্যাপ্তপুষ্পস্তবকস্তনাভ্যঃ স্ফুরৎপ্রবালৌষ্ঠমনোহরাভ্যঃ |
লতাবধূভ্যস্তরবো | অপ্যবাপুর্বিনম্রশাখাভুজবন্ধনানি || ৩.৩৯||
শ্রুতাপ্সরোগীতিরপি ক্ষণে | অস্মিন্হরঃ প্রসঙ্খ্যানপরো বভূব |
আত্মেশ্বরাণাং ন হি জাতু বিঘ্নাঃ সমাধিভেদপ্রভবো ভবন্তি || ৩.৪০||
লতাগৃহদ্বারগতো | অথ নন্দী বামপ্রকোষ্ঠার্পিতহেমবেত্রঃ |
মুখার্পিতৈকাঙ্গুলিসঞ্জ্ঞয়ৈব মা চাপলায়েতি গণান্ব্যনৈষীৎ || ৩.৪১||
নিষ্কম্পবৃক্ষং নিভৃতদ্বিরেফং মূকাণ্ডজং শান্তমৃগপ্রচারম্ |
তচ্ছাসনাৎকাননমেব সর্বং চিত্রার্পিতারম্ভমিবাবতস্থে || ৩.৪২||
দৃষ্টিপ্রপাতং পরিহৃত্য তস্য কামঃ পুরঃশুক্রমিব প্রয়াণে |
প্রান্তেষু সংসক্তনমেরুশাখং ধ্যানাস্পদং ভূতপতের্বিবেশ || ৩.৪৩||
স দেবদারুদ্রুমবেদিকায়াং শার্দূলচর্মব্যবধানবত্যাম্ |
আসীনমাসন্নশরীরপাতস্ত্র্যম্বকং সংযমিনং দদর্শ || ৩.৪৪||
পর্যঙ্কবন্ধস্থিরপূর্বকায়মৃজ্বায়তং সন্নমিতোভয়াংসম্ |
উত্তানপাণিদ্বয়সন্নিবেশাৎপ্রফুল্লরাজীবমিবাঙ্কমধ্যে || ৩.৪৫||
ভুজঙ্গমোন্নদ্ধজটাকলাপং কর্ণাবসক্তদ্বিগুণাক্ষসূত্রম্ |
কণ্ঠপ্রভাসঙ্গবিশেষনীলাং কৃষ্ণৎবচং গ্রন্থিমতীং দধানম্ || ৩.৪৬||
কিঞ্চিৎপ্রকাশস্তিমিতোগ্রতারৈর্ভ্রূবিক্রিয়ায়াং বিরতপ্রসঙ্গৈঃ |
নেত্রৈরবিস্পন্দিতপক্ষ্মমালৈর্লক্ষ্যীকৃতঘ্রাণমধোময়ূখৈঃ || ৩.৪৭||
অবৃষ্টিসংরম্ভমিবাম্বুবাহমপামিবাধারমনুত্তরঙ্গম্ |
অন্তশ্চরাণাং মরুতাং নিরোধান্নিবাতনিষ্কম্পমিব প্রদীপম্ || ৩.৪৮||
কপালনেত্রান্তরলব্ধমার্গৈর্জ্যোতিঃপ্ররোহৈরুদিতৈঃ শিরস্তঃ |
মৃণালসূত্রাধিকসৌকুমার্যাং বালস্য লক্ষ্মীং গ্লপয়ন্তমিন্দোঃ || ৩.৪৯||
মনো নবদ্বারনিষিদ্ধবৃত্তি হৃদি ব্যবস্থাপ্য সমাধিবশ্যম্ |
যমক্ষরং ক্ষেত্রবিদো বিদুস্তমাত্মানমাত্মন্যবলোকয়ন্তম্ || ৩.৫০||
স্মরস্তথাভূতময়ুগ্মনেত্রং পশ্যন্নদূরান্মনসাপ্যধৃষ্যম্ |
নালক্ষয়ৎসাধ্বসসন্নহস্তঃ স্রস্তং শরং চাপমপি স্বহস্তাৎ || ৩.৫১||
নির্বাণভূয়িষ্ঠমথাস্য বীর্যং সন্ধুক্ষয়ন্তীব বপুর্গুণেন |
অনুপ্রয়াতা বনদেবতাভ্যামদৃশ্যত স্থাবররাজকন্যা || ৩.৫২||
অশোকনির্ভর্ত্সিতপদ্মরাগমাকৃষ্টহেমদ্যুতিকর্ণিকারম্ |
মুক্তাকলাপীকৃতসিন্দুবারং বসন্তপুষ্পাভরণং বহন্তী || ৩.৫৩||
আবর্জিতা কিং চিদিব স্তনাভ্যাং বাসো বসানা তরুণার্করাগম্ |
পর্যাপ্তপুষ্পস্তবকাবনম্রা সঞ্চারিণী পল্লবিনী লতেব || ৩.৫৪||
স্রস্তাং নিতম্বাদবলম্বমানা পুনঃ-পুনঃ কেসরদামকাঞ্চীম্ |
ন্যাসীকৃতাং স্থানবিদা স্মরেণ মৌর্বীং দ্বিতীয়ামিব কার্মুকস্য || ৩.৫৫||
সুগন্ধিনিঃশ্বাসবিবৃদ্ধতৃষ্ণং বিম্বাধরাসন্নচরং দ্বিরেফম্ |
প্রতিক্ষণং সম্ভ্রমলোলদৃষ্টির্লীলারবিন্দেন নিবারয়ন্তী || ৩.৫৬||
তাং বীক্ষ্য সর্বাবয়বানবদ্যাং রতেরপি হ্রীপদমাদধানাম্ |
জিতেন্দ্রিয়ে শূলিনি পুষ্পচাপঃ স্বকার্যসিদ্ধিং পুনরাশশংসে || ৩.৫৭||
ভবিষ্যতঃ পত্যুরুমা চ শম্ভোঃ সমাসসাদ প্রতিহারভূমিম্ |
যোগাৎস চান্তঃ পরমাত্মসঞ্জ্ঞং দৃষ্ট্বা পরং জ্যোতিরুপাররাম || ৩.৫৮||
ততো ভুজঙ্গাধিপতেঃ ফণাগ্রৈরধঃ কথং চিদ্ধৃতভূমিভাগঃ |
শনৈঃ কৃতপ্রাণবিমুক্তিরীশঃ পর্যঙ্কবন্ধং নিবিডং বিভেদ || ৩.৫৯||
তস্মৈ শশংস প্রণিপত্য নন্দী শুশ্রূষয়া শৈলসুতামুপেতাম্ |
প্রবেশয়ামাস চ ভর্তুরেনাং ভ্রূক্ষেপমাত্রানুমতপ্রবেশাম্ || ৩.৬০||
তস্যাঃ সখীভ্যাং প্রণিপাতপূর্বং স্বহস্তলূনঃ শিশিরাত্যয়স্য |
ব্যকীর্যত ত্র্যম্বকপাদমূলে পুষ্পোচ্চয়ঃ পল্লবভঙ্গভিন্নঃ || ৩.৬১||
উমাপি নীলালকমধ্যশোভি বিস্রংসয়ন্তী নবকর্ণিকারম্ |
চকার কর্ণচ্যুতপল্লবেন মূর্ধ্না প্রণামং বৃষভধ্বজায় || ৩.৬২||
অনন্যভাজং পতিমাপ্নুহীতি সা তথ্যমেবাভিহিতা ভবেন |
ন হীশ্বরব্যাহৃতয়ঃ কদা চিৎপুষ্যন্তি লোকে বিপরীতমর্থম্ || ৩.৬৩||
কামস্তু বাণাবসরং প্রতীক্ষ্য পতঙ্গবদ্বহ্নিমুখং বিবিক্ষুঃ |
উমাসমক্ষং হরবদ্ধলক্ষ্যঃ শরাসনজ্যাং মুহুরামমর্শ || ৩.৬৪||
অথোপনিন্যে গিরিশায় গৌরী তপস্বিনে তাম্ররুচা করেণ |
বিশোষিতাং ভানুমতো ময়ূখৈর্মন্দাকিনীপুষ্করবীজমালাম্ || ৩.৬৫||
প্রতিগ্রহীতুং প্রণয়িপ্রিয়ৎবাত্ত্রিলোচনস্তামুপচক্রমে চ |
সম্মোহনং নাম চ পুষ্পধন্বা ধনুষ্যমোঘং সমধত্ত বাণম্ || ৩.৬৬||
হরস্তু কিঞ্চিৎপরিলুপ্তধৈর্যশ্চন্দ্রোদয়ারম্ভ ইবাম্বুরাশিঃ |
উমামুখে বিম্বফলাধরোষ্ঠে ব্যাপারয়ামাস বিলোচনানি || ৩.৬৭||
বিবৃণ্বতী শৈলসুতাপি ভাবমঙ্গৈঃ স্ফুরদ্বালকদম্বকল্পৈঃ |
সাচীকৃতা চারুতরেণ তস্থৌ মুখেন পর্যস্তবিলোচনেন || ৩.৬৮||
অথেন্দ্রিয়ক্ষোভময়ুগ্মনেত্রঃ পুনর্বশিৎবাদ্বলবন্নিগৃহ্য |
হেতুং স্বচেতোবিকৃতের্দিদৃক্ষুর্দিশামুপান্তেষু সসর্জ দৃষ্টিম্ || ৩.৬৯||
স দক্ষিণাপাঙ্গনিবিষ্টমুষ্টিং নতাংসমাকুঞ্চিতসব্যপাদম্ |
দদর্শ চক্রীকৃতচারুচাপং প্রহর্তুমভ্যুদ্যতমাত্ময়োনিম্ || ৩.৭০||
তপঃপরামর্শবিবৃদ্ধমন্যোর্ভ্রূভঙ্গদুষ্প্রেক্ষ্যমুখস্য তস্য |
স্ফুরন্নুদর্চিঃ সহসা তৃতীয়াদক্ষ্ণঃ কৃশানুঃ কিল নিষ্পপাত || ৩.৭১||
ক্রোধং প্রভো সংহর সংহরেতি যাবদ্গিরঃ খে মরুতাং চরন্তি |
তাবৎস বহ্নির্ভবনেত্রজন্মা ভস্মাবশেষং মদনং চকার || ৩.৭২||
তীব্রাভিষঙ্গপ্রভবেণ বৃত্তিম্মোহেন সংস্তম্ভয়তেন্দ্রিয়াণাম্ |
অজ্ঞাতভর্তৃব্যসনা মুহূর্তং কৃতোপকারেব রতির্বভূব || ৩.৭৩||
তমাশু বিঘ্নং তপসস্তপস্বী বনস্পতিং বজ্র ইবাবভজ্য |
স্ত্রীসন্নিকর্ষং পরিহর্তুমিচ্ছন্নন্তর্দধে ভূতপতিঃ সভূতঃ || ৩.৭৪||
শৈলাত্মজাপি পিতুরুচ্ছিরসো | অভিলাষং
ব্যর্থং সমর্থ্য ললিতং বপুরাত্মনশ্চ |
সখ্যোঃ সমক্ষমিতি চাধিকজাতলজ্জা
শূন্যা জগাম ভবনাভিমুখী কথং চিৎ || ৩.৭৫||
সপদি মুকুলিতাক্ষীং রুদ্রসংরম্ভভীত্যা
দুহিতরমনুকম্প্যামদ্রিরাদায় দোর্ভ্যাম্ |
সুরগজ ইব বিভ্রৎপদ্মিনীং দন্তলগ্নাং
প্রতিপথগতিরাসীদ্বেগদীর্ঘীকৃতাঙ্গঃ || ৩.৭৬||