কুমারসম্ভবম্ সর্গঃ ০৮

কুমারসম্ভবম্ সর্গঃ ০৮

পাণিপীডনবিধেরনন্তরং শৈলরাজদুহিতুর্হরং প্রতি |
ভাবসাধ্বসপরিগ্রহাদভূৎকামদোহদমনোহরং বপুঃ || ৮.১||
ব্যাহৃতা প্রতিবচো ন সন্দধে গন্তুমৈচ্ছদবলম্বিতাংশুকা |
সেবতে স্ম শয়নং পরাঙ্মুখী সা তথাপি রতয়ে পিনাকিনঃ || ৮.২||
কৈতবেন শয়িতে কুতূহলাৎপার্বতী প্রতিমুখং নিপাতিতম্ |
চক্ষুরুন্মিষতি সস্মিতং প্রিয়ে বিদ্যুদাহতমিব ন্যমীলয়ৎ || ৮.৩||
নাভিদেশনিহিতঃ সকম্পয়া শঙ্করস্য রুরুধে তয়া করঃ |
তদ্দুকূলমথ চাভবৎস্বয়ং দূরমুচ্ছ্বসিতনীবিবন্ধনম্ || ৮.৪||
এবমালি নিগৃহীতসাধ্বসং শঙ্করো রহসি সেব্যতামিতি |
সা সখীভিরুপদিষ্টমাকুলা নাস্মরৎপ্রমুখবর্তিনি প্রিয়ে || ৮.৫||
অপ্যবস্তুনি কথাপ্রবৃত্তয়ে প্রশ্নতৎপরমনঙ্গশাসনম্ |
বীক্ষিতেন পরিগৃহ্য পার্বতী মূর্ধকম্পময়মুত্তরং দদৌ || ৮.৬||
শূলিনঃ করতলদ্বয়েন সা সন্নিরুধ্য নয়নে হৃতাংশুকা |
তস্য পশ্যতি ললাটলোচনে মোঘয়ত্নবিধুরা রহস্যভূৎ || ৮.৭||
চুম্বনেষ্বধরদানবর্জিতং সন্নহস্তমদয়োপগূহনে |
ক্লিষ্টমন্মথমপি প্রিয়ং প্রভোর্দুর্লভপ্রতিকৃতং বধূরতম্ || ৮.৮||
যন্মুখগ্রহণমক্ষতাধরং দত্তমব্রণপদং নখং চ যৎ |
যদ্রতং চ সদয়ং প্রিয়স্য তৎপার্বতী বিষহতে স্ম নেতরৎ || ৮.৯||
রাত্রিবৃত্তমনুয়োক্তুমুদ্যতং সা বিভাতসময়ে সখীজনম্ |
নাকরোদপকুতূহলং হ্রিয়া শংসিতুং চ হৃদয়েন তৎবরে || ৮.১০||
দর্পণে চ পরিভোগদর্শিনী পৃষ্ঠতঃ প্রণয়িনো নিষেদুষঃ |
প্রেক্ষ্য বিম্বমনু বিম্বমাত্মনঃ কানি কানি ন চকার লজ্জয়া || ৮.১১||
নীলকণ্ঠপরিভুক্তয়ৌবনাং তাং বিলোক্য জননী সমাশ্বসৎ |
ভর্তৃবল্লভতয়া হি মানসীং মাতুরস্যতি শুচং বধূজনঃ || ৮.১২||
বাসরাণি কতিচিৎকথঞ্চন স্থাণুনা রতমকারি চানয়া |
জ্ঞাতমন্মথরসা শনৈঃ শনৈঃ সা মুমোচ রতিদুঃখশীলতাম্ || ৮.১৩||
সস্বজে প্রিয়মুরোনিপীডিতা প্রার্থিতং মুখমনেন নাহরৎ |
মেখলাপণয়লোলতাং গতং হস্তমস্য শিথিলং রুরোধ সা || ৮.১৪||
ভাবসূচিতমদৃষ্টবিপ্রিয়ং চাটুমৎক্ষণবিয়োগকাতরম্ |
কৈশ্চিদেব দিবসৈস্তদা তয়োঃ প্রেম রূঢমিতরেতরাশ্রয়ম্ || ৮.১৫||
তং যথাত্মসদৃশং বরং বধূরন্বরজ্যত বরস্তথৈব তাম্ |
সাগরাদনপগা হি জাহ্নবী সো | অপি তন্মুখরসৈকনির্বৃতিঃ || ৮.১৬||
শিষ্যতাং নিধুবনোপদেশিনঃ শঙ্করস্য রহসি প্রপন্নয়া |
শিক্ষিতং যুবতিনৈপুণং তয়া যত্তদেব গুরুদক্ষিণীকৃতম্ || ৮.১৭||
দষ্টমুক্তমধরোষ্ঠমাম্বিকা বেদনাবিধুতহস্তপল্লবা |
শীতলেন নিরবাপয়ৎক্ষণং মৌলিচন্দ্রশকলেন শূলিনঃ || ৮.১৮||
চুম্বনাদলকচূর্ণদূষিতং শঙ্করো | অপি নয়নং ললাটজম্ |
উচ্ছ্বসৎকমলগন্ধয়ে দদৌ পার্বতীবদনগন্ধবাহিনে || ৮.১৯||
এবমিন্দ্রিয়সুখস্য বর্ত্মনঃ সেবনাদনুগৃহীতমন্মথঃ |
শৈলরাজভবনে সহোময়া মাসমাত্রমবসদ্বৃষধ্বজঃ || ৮.২০||
সো | অনুমান্য হিমবন্তমাত্মভূরাত্মজাবিরহদুঃখখেদিতম্ |
তত্র তত্র বিজহার সম্পতন্নপ্রমেয়গতিনা ককুদ্মতা || ৮.২১||
মেরুমেত্য মরুদাশুগোক্ষকঃ পার্বতীস্তনপুরস্কৃতান্কৃতী |
হেমপল্লববিভঙ্গসংস্তরানন্বভূৎসুরতমর্দনক্ষমান্ || ৮.২২||
পদ্মনাভচরণাঙ্কিতাশ্মসু প্রাপ্তবৎস্বমৃতবিপ্রুষো নবাঃ |
মন্দরস্য কটকেষু চাবসৎপার্বতীবদনপদ্মষট্পদঃ || ৮.২৩||
বারণধ্বনিতভীতয়া তয়া কণ্ঠসক্তঘনবাহুবন্ধনঃ |
একপিঙ্গলগিরৌ জগদ্গুরুর্নির্বিবেশ বিশদাঃ শশিপ্রভাঃ || ৮.২৪||
তস্য জাতু মলয়স্থলীরতে ধূতচন্দনলতঃ প্রিয়াক্লমম্ |
আচচাম সলবঙ্গকেসরশ্চাটুকার ইব দক্ষিণানিলঃ || ৮.২৫||
হেমতামরসতাডিতপ্রিয়া তৎকরাম্বুবিনিমীলিতেক্ষণা |
খে ব্যগাহত তরঙ্গিণীমুমা মীনপঙ্ক্তিপুনরুক্তমেখলা || ৮.২৬||
তাং পুলোমতনয়ালকোচিতৈঃ পারিজাতকুসুমৈঃ প্রসাধয়ন্ |
নন্দনে চিরময়ুগ্মলোচনঃ সস্পৃহং সুরবধূভিরীক্ষিতঃ || ৮.২৭||
ইত্যভৌমমনুভূয় শঙ্করঃ পার্থিবং চ দয়িতাসখঃ সুখম্ |
লোহিতায়তি কদাচিদাতপে গন্ধমাদনগিরিং ব্যগাহত || ৮.২৮||
তত্র কাঞ্চনশিলাতলাশ্রয়ো নেত্রগম্যমবলোক্য ভাস্করম্ |
দক্ষিণেতরভুজব্যপাশ্রয়াং ব্যাজহার সহধর্মচারিণীম্ || ৮.২৯||
পদ্মকান্তিমরুণত্রিভাগয়োঃ সঙ্ক্রময়্য তব নেত্রয়োরিব |
সঙ্ক্ষয়ে জগদিব প্রজেশ্বরঃ সংহরত্যহরসাবহর্পতিঃ || ৮.৩০||
সীকরব্যতিকরং মরীচিভির্দূরয়ত্যবনতে বিবস্বতি |
ইন্দ্রচাপপরিবেষশূন্যতাং নির্ঝরাস্তব পিতুর্ব্রজন্ত্যমী || ৮.৩১||
দষ্টতামরসকেসরস্রজোঃ ক্রন্দতোর্বিপরিবৃত্তকণ্ঠয়োঃ |
নিঘ্নয়োঃ সরসি চক্রবাকয়োরল্পমন্তরমনল্পতাং গতম্ || ৮.৩২||
স্থানমাহ্নিকমপাস্য দন্তিনঃ সল্লকীবিটপভঙ্গবাসিতম্ |
আবিভাতচরণায় গৃহ্ণাতে বারি বারিরুহবদ্ধষট্পদম্ || ৮.৩৩||
পশ্য পশ্চিমদিগন্তলম্বিনা নির্মিতং মিতকথে বিবস্বতা |
দীর্ঘয়া প্রতিময়া সরো | অম্ভসাং তাপনীয়মিব সেতুবন্ধনম্ || ৮.৩৪||
উত্তরন্তি বিনিকীর্য পল্বলং গাঢপঙ্ক্তমতিবাহিতাতপাঃ |
দংষ্ট্রিণো বনবরাহয়ূথপা দষ্টভঙ্গুরবিসাঙ্কুরা ইব || ৮.৩৫||
এষ বৃক্ষশিখরে কৃতাস্পদো জাতরূপরসগৌরমণ্ডলঃ |
হীয়মানমহরত্যয়াতপং পীবরোরু পিবতীব বর্হিণঃ || ৮.৩৬||
পূর্বভাগতিমিরপ্রবৃত্তিভির্ব্যক্তপঙ্কমিব জাতমেকতঃ |
খং হৃতাতপজলং বিবস্বতা ভাতি কিঞ্চিদিব শেষবৎসরঃ || ৮.৩৭||
আবিশদ্ভিরুটজাঙ্গণং মৃগৈর্মূলসেকসরসৈশ্চ বৃক্ষকৈঃ |
আশ্রমাঃ প্রবিশদগ্নিধেনবো বিভ্রতি শ্রিয়মুদীরিতাগ্নয়ঃ || ৮.৩৮||
বদ্ধকোশমপি তিষ্ঠতি ক্ষণং সাবশেষবিবরং কুশেশয়ম্ |
ষট্পদায় বসতিং গ্রহীষ্যতে প্রীতিপূর্বমিব দাতুমন্তরম্ || ৮.৩৯||
দূরমগ্রপরিমেয়রশ্মিনা বারুণী দিগরুণেন ভানুনা |
ভাতি কেসরবতেব মণ্ডিতা বন্ধুজীবতিলকেন কন্যকা || ৮.৪০||
সামভিঃ সহচরাঃ সহস্রশঃ স্যন্দনাশ্বহৃদয়ঙ্গমস্বরৈঃ |
ভানুমগ্নিপরিকীর্ণতেজসং সংস্তুবন্তি কিরণোষ্মপায়িনঃ || ৮.৪১||
সো | অয়মানতশিরোধরৈর্হয়ৈঃ কর্ণচামরবিঘট্টিতেক্ষণৈঃ |
অস্তমেতি যুগভুগ্নকেসরৈঃ সন্নিধায় দিবসং মহোদধৌ || ৮.৪২||
খং প্রসুপ্তমিব সংস্থিতে রবৌ তেজসো মহত ঈদৃশী গতিঃ |
তৎপ্রকাশয়তি যাবদুদ্গতং মীলনায় খলু তাবতশ্চ্যুতম্ || ৮.৪৩||
সন্ধ্যয়াপ্যনুগতং রবের্বপুর্বন্দ্যমস্তশিখরে সমর্পিতম্ |
যেন পূর্বমুদয়ে পুরস্কৃতা নানুয়াস্যতি কথং তমাপদি || ৮.৪৪||
রক্তপীতকপিশাঃ পয়োমুচাং কোটয়ঃ কুটিলকেশি ভান্ত্যমূঃ |
দ্রক্ষ্যসি ৎবমিতি সন্ধ্যয়ানয়া বর্তিকাভিরিব সাধুমণ্ডিতাঃ || ৮.৪৫||
সিংহকেসরসটাসু ভূভৃতাং পল্লবপ্রসবিষু দ্রুমেষু চ |
পশ্য ধাতুশিখরেষু ভানুনা সংবিভক্তমিব সান্ধ্যমাতপম্ || ৮.৪৬||
অদ্রিরাজতনয়ে তপস্বিনঃ পাবনাম্বুবিহিতাঞ্জলিক্রিয়াঃ |
ব্রহ্ম গূঢমভিসন্ধ্যমাদৃতাঃ শুদ্ধয়ে বিধিবিদো গৃণন্ত্যমী || ৮.৪৭||
তন্মুহূর্ত্তমনুমন্তুমর্হসি প্রস্তুতায় নিয়মায় মামপি |
ৎবাং বিনোদনিপুণঃ সখীজনো বল্গুবাদিনি বিনোদয়িষ্যতি || ৮.৪৮||
নির্বিভুজ্য দশনচ্ছদং ততো বাচি ভর্তুরবধীরণাপরা |
শৈলরাজতনয়া সমীপগামাললাপ বিজয়ামহেতুকম্ || ৮.৪৯||
ঈশ্বরো | অপি দিবসাত্যয়োচিতং মন্ত্রপূর্বমনুতস্থিবান্বিধিম্ |
পার্বতীমবচনামসূয়য়া প্রত্যুপেত্য পুনরাহ সস্মিতম্ || ৮.৫০||
মুঞ্চ কোপমনিমিত্তকোপনে সন্ধ্যয়া প্রণমিতো | অস্মি নান্যয়া |
কিং ন বেৎসি সহধর্মচারিণং চক্রবাকসমবৃত্তিমাত্মনঃ || ৮.৫১||
নির্মিতেষু পিতৃষু স্বয়ম্ভুবা যা তনুঃ সুতনু পূর্বমুজ্ঝিতা |
সেয়মস্তমুদয়ং চ সেবতে তেন মানিনি মমাত্র গৌরবম্ || ৮.৫২||
তামিমাং তিমিরবৃদ্ধিপীডিতাং শৈলরাজতনয়ে | অধুনা স্থিতাম্ |
একতস্তটতমালমালিনীং পশ্য ধাতুরসনিম্নগামিব || ৮.৫৩||
সান্ধ্যমস্তমিতশেষমাতপং রক্তলেখমপরা বিভর্তি দিক্ |
সাম্পরায়বসুধা সশোণিতং মণ্ডলাগ্রমিব তির্যগুজ্ঝিতম্ || ৮.৫৪||
যামিনীদিবসসন্ধিসম্ভবে তেজসি ব্যবহিতে সুমেরুণা |
এতদন্ধতমসং নিরঙ্কুশং দিক্ষু দীর্ঘনয়নে বিজৃম্ভতে || ৮.৫৫||
নোর্ধ্বমীক্ষণগতির্ন চাপ্যধো নাভিতো ন পুরতো ন পৃষ্ঠতঃ |
লোক এষ তিমিরৌঘবেষ্টিতো গর্ভবাস ইব বর্ততে নিশি || ৮.৫৬||
শুদ্ধমাবিলমবস্থিতং চলং বক্রমার্জবগুণান্বিতং চ যৎ |
সর্বমেব তমসা সমীকৃতং ধিঙ্মহত্ত্বমসতাং হৃতান্তরম্ || ৮.৫৭||
নূনমুন্নমতি যজ্বনাং পতিঃ শার্বরস্য তমসো নিষিদ্ধয়ে |
পুণ্ডরীকমুখি পূর্বদিঙ্মুখং কৈতকৈরিব রজোভিরাবৃতম্ || ৮.৫৮||
মন্দরান্তরিতমূর্তিনা নিশা লক্ষ্যতে শশভৃতা সতারকা |
ৎবং ময়া প্রিয়সখীসমাগতা শ্রোষ্যতেব বচনানি পৃষ্ঠতঃ || ৮.৫৯||
রুদ্ধনির্গমনমা দিনক্ষয়াৎপূর্বদৃষ্টতনুচন্দ্রিকাস্মিতম্ |
এতদুদ্গিরতি চন্দ্রমণ্ডলং দিগ্রহস্যমিব রাত্রিচোদিতম্ || ৮.৬০||
পশ্য পক্বফলিনীফলৎবিষা বিম্বলাঞ্ছিতবিয়ৎসরো | অম্ভসা |
বিপ্রকৃষ্টবিবরং হিমাংশুনা চক্রবাকমিথুনং বিডম্ব্যতে || ৮.৬১||
শক্যমোষধিপতের্নবোদয়াঃ কর্ণপূররচনাকৃতে তব |
অপ্রগল্ভয়বসূচিকোমলাশ্ছেত্তুমগ্রনখসম্পুটৈঃ করাঃ || ৮.৬২||
অঙ্গুলীভিরিব কেশসঞ্চয়ং সন্নিগৃহ্য তিমিরং মরীচিভিঃ |
কুড্মলীকৃতসরোজলোচনং চুম্বতীব রজনীমুখং শশী || ৮.৬৩||
পশ্য পার্বতি নবেন্দুরশ্মিভিঃ সামিভিন্নতিমিরং নভস্তলম্ |
লক্ষ্যতে দ্বিরদভোগদূষিতং সম্প্রসীদদিব মানসং সরঃ || ৮.৬৪||
রক্তভাবমপহায় চন্দ্রমা জাত এষ পরিশুদ্ধমণ্ডলঃ |
বিক্রিয়া ন খলু কালদোষজা নির্মলপ্রকৃতিষু স্থিরোদয়া || ৮.৬৫||
উন্নতেষু শশিনঃ প্রভা স্থিতা নিম্নসংশ্রয়পরং নিশাতমঃ |
নূনমাত্মসদৃশী প্রকল্পিতা বেধসেহ গুণদোষয়োর্গতিঃ || ৮.৬৬||
চন্দ্রপাদজনিতপ্রবৃত্তিভিশ্চন্দ্রকান্তজলবিন্দুভির্গিরিঃ |
মেখলাতরুষু নিদ্রিতানমূন্বোধয়ত্যসময়ে শিখণ্ডিনঃ || ৮.৬৭||
কল্পবৃক্ষশিখরেষু সম্প্রতি প্রস্ফুরদ্ভিরিব পশ্য সুন্দরি |
হারয়ষ্টিগণনামিবাংশুভিঃ কর্তুমাগতকুতূহলঃ শশী || ৮.৬৮||
উন্নতাবনতভাববত্তয়া চন্দ্রিকা সতিমিরা গিরেরিয়ম্ |
ভক্তিভির্বহুবিধাভিরর্পিতা ভাতি ভূতিরিব মত্তদন্তিনঃ || ৮.৬৯||
এতদুচ্ছ্বসিতপীতমৈন্দবং বোঢুমক্ষমমিব প্রভারসম্ |
মুক্তষট্পদবিরাবমঞ্জসা ভিদ্যতে কুমুদমা নিবন্ধনাৎ || ৮.৭০||
পশ্য কল্পতরুলম্বি শুদ্ধয়া জ্যোৎস্নয়া জনিতরূপসংশয়ম্ |
মারুতে চলতি চণ্ডি কেবলং ব্যজ্যতে বিপরিবৃত্তমংশুকম্ || ৮.৭১||
শক্যমঙ্গুলিভিরুদ্ধৃতৈরধঃ শাখিনাং পতিতপুষ্পপেশলৈঃ |
পত্রজর্জরশশিপ্রভালবৈরেভিরুৎকচয়িতুং তবালকান্ || ৮.৭২||
এষ চারুমুখি যোগতারয়া যুজ্যতে তরলবিম্বয়া শশী |
সাধ্বসাদুপগতপ্রকম্পয়া কন্যয়েব নবদীক্ষয়া বরঃ || ৮.৭৩||
পাকভিন্নশরকাণ্ডগৌরয়োরুল্লসৎপ্রতিকৃতিপ্রসন্নয়োঃ |
রোহতীব তব গণ্ডলেখয়োশ্চন্দ্রবিম্বনিহিতাক্ষ্ণি চন্দ্রিকা || ৮.৭৪||
লোহিতার্কমণিভাজনার্পিতং কল্পবৃক্ষমধু বিভ্রতী স্বয়ম্ |
ৎবামিয়ং স্থিতিমতীমুপস্থিতা গন্ধমাদনবনাধিদেবতা || ৮.৭৫||
আর্দ্রকেসরসুগন্ধি তে মুখং মত্তরক্তনয়নং স্বভাবতঃ |
অত্র লব্ধবসতির্গুণান্তরং কিং বিলাসিনি মদঃ করিষ্যতি || ৮.৭৬||
মান্যভক্তিরথবা সখীজনঃ সেব্যতামিদমনঙ্গদীপনম্ |
ইত্যুদারমভিধায় শঙ্করস্তামপায়য়ত পানমম্বিকাম্ || ৮.৭৭||
পার্বতী তদুপয়োগসম্ভবাং বিক্রিয়ামপি সতাং মনোহরাম্ |
অপ্রতর্ক্যবিধিয়োগনির্মিতামাম্রতেব সহকারতাং যয়ৌ || ৮.৭৮||
তৎক্ষণং বিপরিবর্তিতহ্রিয়োর্নেষ্যতোঃ শয়নমিদ্ধরাগয়োঃ |
সা বভূব বশবর্তিনী দ্বয়োঃ শূলিনঃ সুবদনা মদস্য চ || ৮.৭৯||
ঘূর্ণমাননয়নং স্খলৎকথং স্বেদিবিন্দুমদকারণস্মিতম্|
আননেন ন তু তাবদীশ্বরশ্চক্ষুষা চিরমুমামুখং পপৌ || ৮.৮০||
তাং বিলম্বিতপনীয়মেখলামুদ্বহঞ্জঘনভারদুর্বহাম্ |
ধ্যানসম্ভৃতবিভূতিরীশ্বরঃ প্রাবিশন্মণিশিলাগৃহং রহঃ || ৮.৮১||
তত্র হংসধবলোত্তরচ্ছদং জাহ্নবীপুলিনচারুদর্শনম্ |
অধ্যশেত শয়নং প্রিয়াসখঃ শারদাভ্রমিব রোহিণীপতিঃ || ৮.৮২||
ক্লিষ্টকেশমবলুপ্তচন্দনং ব্যত্যয়ার্পিতনখং সমৎসরম্ |
তস্য তচ্ছিদুরমেখলাগুণং পার্বতীরতমভূন্ন তৃপ্তয়ে || ৮.৮৩||
কেবলং প্রিয়তমাদয়ালুনা জ্যোতিষামবনতাসু পঙ্ক্তিষু |
তেন তৎপরিগৃহীতবক্ষসা নেত্রমীলনকুতূহলং কৃতম্ || ৮.৮৪||
স ব্যবুধ্যত বুধস্তবোচিতঃ শতকুম্ভকমলাকরৈঃ সমম্ |
মূর্চ্ছনাপরিগৃহীতকৈশিকৈঃ কিন্নরৈরুষসি গীতমঙ্গলঃ || ৮.৮৫||
তৌ ক্ষণং শিথিলিতোপগূহনৌ দম্পতী চলিতমানসোর্ময়ঃ |
পদ্মভেদপিশুনাঃ সিষেবিরে গন্ধমাদনবনান্তমারুতাঃ || ৮.৮৬||
ঊরুমূলনখমার্গরাজিভিস্তৎক্ষণং হৃতবিলোচনো হরঃ |
বাসসঃ প্রশিথিলস্য সংযমং কুর্বতীং প্রিয়তমামবারয়ৎ || ৮.৮৭||
স প্রজাগরকষায়লোচনং গাঢদন্তপদতাডিতাধরম্ |
আকুলালকমরংস্ত রাগবান্প্রেক্ষ্য ভিন্নতিলকং প্রিয়ামুখম্ || ৮.৮৮||
তেন ভঙ্গিবিষমোত্তরচ্ছদং মধ্যপিণ্ডিতবিসূত্রমেখলম্ |
নির্মলে | অপি শয়নং নিশাত্যয়ে নোজ্ঝিতং চরণরাগলাঞ্ছিতম্ || ৮.৮৯||
স প্রিয়ামুখরসং দিবানিশং হর্ষবৃদ্ধিজননং সিষেবিষুঃ |
দর্শনপ্রণয়িনামদৃশ্যতামাজগাম বিজয়ানিবেদনাৎ || ৮.৯০||
সমদিবসনিশীথং সঙ্গিনস্তত্র শম্ভোঃ
শতমগমদৃতূনাং সাগ্রমেকা নিশেব |
ন তু সুরতসুখেষু ছিন্নতৃষ্ণো বভূব
জ্বলন ইব সমুদ্রান্তর্গতস্তজ্জলেষু || ৮.৯১||