নাট্যশাস্ত্রম্ অধ্যায় ১৪

|| নাট্যশাস্ত্রম্ অধ্যায় ১৪ ||

|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ চতুর্দশোঽধ্যায়ঃ
যো বাগভিনয়ঃ প্রোক্তো ময়া পূর্বং দ্বিজোত্তমাঃ |
লক্ষণং তস্য বক্ষ্যামি স্বরব্যঞ্জনসম্ভবম্ || ১||
বাচি যত্নস্তু কর্তব্যো নাট্যস্যেয়ং তনুঃ স্মৃতা |
অঙ্গনেপথ্যসত্ত্বানি বাক্যার্থং ব্যঞ্জয়ন্তি হি || ২||
বাঙ্ময়ানীহ শাস্ত্রাণি বাঙ্নিষ্ঠানি তথৈব চ |
তস্মাদ্বাচঃ পরং নাস্তি বাগ্ হি সর্বস্য কারণম্ || ৩||
আগমনামাখ্যাতনিপাতোপসর্গসমাসতদ্ধিতৈর্যুক্তঃ |
সন্ধিবচনবিভক্ত্যুপগ্রহনিয়ুক্তো বাচিকাভিনয়ঃ || ৪||
দ্বিবিধং হি স্মৃতং পাঠ্যং সংস্কৃতং প্রাকৃতং তথা |
তয়োর্বিভাগং বক্ষ্যামি যথাবদনুপূর্বশঃ || ৫||
ব্যঞ্জনানি স্বরাশ্চৈব সন্ধয়োঽথ বিভক্তয়ঃ |
নামাখ্যাতোপসর্গাশ্চ নিপাতাস্তদ্ধিতাস্তথা || ৬||
এতৈরঙ্গৈঃ সমাসৈশ্চ নানাধাতুসমাশ্রয়ম্ |
বিজ্ঞেয়ং সংস্কৃতং পাঠ্যং প্রয়োগঞ্চ নিবোধত || ৭||
অকারাদ্যাঃ স্বরা জ্ঞেয়া ঔকারান্তাশ্চতুর্দশ |
হকারান্তানি কাদীনি ব্যঞ্জনানি বিদুর্বুধাঃ || ৮||
তত্র স্বরাশ্চতুর্দশ -অ আ ই ঈ উ ঊ ঋ ৠ ঌ ৡ এ ঐ
ও ঔ ইতি স্বরা জ্ঞেয়াঃ ||
কাদীনি ব্যঞ্জনানি যথা -ক খ গ ঘ ঙ চ ছ জ ঝ
ঞ ট ঠ ড ঢ ণ ত থ দ ধ ন প ফ ব ভ ম য র ল ব
শ ষ স হ ইতি ব্যঞ্জনবর্গঃ |
বর্গে বর্গে সমাখ্যাতৌ দ্বৌ বর্ণৌ প্রাগবস্থিতৌ |
অঘোষা ইতি যে ৎবন্যে সঘোষাঃ সম্প্রকীর্তিতাঃ || ৯||
অষ্টৌ স্থানানি বর্ণানামুরঃ কণ্ঠঃ শিরস্তথা |
জিহ্বামূলশ্চ দন্তাশ্চ নাসিকোষ্ঠৌ চ তালু চ || ১০||
অ কু হ বিসর্জনীয়াঃ কণ্ঠ্যাঃ | ই চু য শাস্তালব্যাঃ |
ঋ টু র ষা মূর্ধন্যাঃ | ঌ তু ল সা দন্ত্যাঃ | উ
পূপধ্মানীয়া ওষ্ঠ্যাঃ | প ফ ইতি পফাভ্যাং প্রাক্
অর্ধবিসর্গসদৃশঃ উপধ্মানীয়ঃ | ক খ ইতি কখাভ্যাং
প্রাক্ অর্ধবিসর্গসদৃশো জিহ্বমূলীয়ঃ | এ ঐ কণ্ঠ্যতালব্যৌ |
ও ঔ কণ্ঠ্যোষ্ঠ্যৌ | বকারো দন্ত্যোষ্ঠ্যঃ | ঙ ঞ ণ ন মা
অনুনাসিকাঃ | বিসর্জনীয়ঃ ঔরস্যঃ ইত্যেকে |
সর্ববর্ণানাং মুখং স্থানমিত্যপরে |
দ্বৌ দ্বৌ বর্ণৌ তু বর্গাদ্যৌ শষসাশ্চ ত্রয়োঽপরে |
অঘোষা ঘোষবন্তস্তু ততোঽন্যে পরিকীর্তিতাঃ || ১১||
এতে ঘোষাঘোষাঃ কণ্ঠ্যোষ্ঠ্যা দন্ত্যজিহ্বানুনাসিক্যাঃ |
ঊষ্মাণস্তালব্যাঃ বিসর্জনীয়াশ্চ বোদ্ধব্যাঃ || ১২||
গঘঙ জঝঞ ডঢণ দধন বভম তথৈব যরলবা মতা ঘোষাঃ |
কখ চছ টঠ তথ পফ ইতি বর্গেষ্বঘোষাঃ স্যুঃ || ১৩||
কখগঘঙাঃ কণ্ঠস্থাস্তালুস্থানাস্তু চছজঝঞাঃ |
টঠডঢণা মূর্ধন্যাস্তথদধনাশ্চৈব দন্তস্থাঃ || ১৪||
পফবভমাস্ত্বোষ্ঠ্যাঃ স্যুঃ দন্ত্যা ঌলসা অহৌ চ কণ্ঠস্থৌ |
তালব্যা ইচুয়শা স্যুরৃটুরষা মূর্ধস্থিতা জ্ঞেয়াঃ || ১৫||
ঌৡ দন্ত্যৌ ওঔ কণ্ঠোষ্ঠ্যৌ এঐকারৌ চ কণ্ঠতালব্যৌ |
কণ্ঠ্যো বিসর্জনীয়ো জিহ্বামূলমুদ্ভবঃ কখয়োঃ || ১৬||
পফয়োরোষ্ঠস্থানং ভবেদুকারঃ স্বরো বিবৃতঃ |
স্পৃষ্টাঃ কাদ্যা মান্তাঃ শষসহকারাস্তথা বিবৃতাঃ || ১৭||
অন্তস্থাঃ সংবৃতজাঃ ঙঞণনমা নাসিকোদ্ভবা জ্ঞেয়াঃ |
ঊষ্মাণশ্চ শষসহাঃ যরলববর্ণাস্তথৈব চান্তঃস্থাঃ || ১৮||
জিহ্বামূলীয়ঃ কঃ প উপধ্মানীয়সঞ্জ্ঞয়া জ্ঞেয়ঃ |
কচটতপা স্বরিতাঃ স্যুঃ খছঠথফা স্যুঃ সদা ক্রম্যাঃ || ১৯||
কণ্ঠ্যোরস্যান্ বিদ্যাৎ ঘঝঢধভান্ পাঠ্যসম্প্রয়োগে তু |
বেদ্যো বিসর্জনীয়ো জিহ্বাস্থানে স্থিতো বর্ণঃ || ২০||
এতে ব্যঞ্জনবর্ণাঃ সমাসতঃ সঞ্জ্ঞয়া ময়া কথিতাঃ |
শব্দবিষয়প্রয়োগে স্বরাঁস্তু ভূয়ঃ প্রবক্ষ্যামি || ২১||
যস্মিন্ স্থানে স সমো বিজ্ঞেয়ো যঃ সবর্ণসঞ্জ্ঞোঽসৌ |
য ইমে স্বরাশ্চতুর্দশ নির্দিষ্টাস্তত্র বৈ দশ সমানাঃ |
পূর্বো হ্রস্বঃ তেষাং পরশ্চ দীর্ঘোঽবগন্তব্যঃ || ২২||
ইত্থং ব্যঞ্জনয়োগৈঃ স্বরৈশ্চ সাখ্যাতনামপদবিহিতৈঃ |
কাব্যনিবন্ধাশ্চ স্যুর্ধাতুনিপাতোপসর্গাস্তু || ২৩||
এভির্ব্যঞ্জনবর্গৈর্নামাখ্যাতোপসর্গনিপাতৈঃ |
তদ্ধিতসন্ধিবিভক্তিভিরধিষ্ঠিতঃ শব্দ ইত্যুক্তঃ || ২৪||
পূর্বাচার্যৈরুক্তং শব্দানাং লক্ষণং সমাসয়োগেন |
বিস্তরশঃ পুনরেব প্রকরণবশাৎ সম্প্রবক্ষ্যামি || ২৫||
অর্থপ্রধানং নাম স্যাদাখ্যাতং তু ক্রিয়াকৃতম্ |
দ্যোতয়ন্ত্যুপসর্গাস্তু বিশেষং ভাবসংশ্রয়ম্ || ২৬||
তৎপ্রাহুঃ সপ্তবিধং ষট্কারকসংযুতং প্রথিতসাধ্যম্ |
নির্দেশসম্প্রদানাপদানপ্রভৃতিসঞ্জ্ঞাভিঃ || ২৭||
নামাখ্যাতার্থবিষয়ং বিশেষং দ্যোতয়ন্তি তে |
পৃথক্তত্রোপসর্গেভ্যো নিপাতা নিয়মেঽচ্যুতে || ২৮||
সম্প্রত্যতীতকালক্রিয়াদিসংযোজিতং প্রথিতসাধ্যম্ |
বচনং নাগতয়ুক্তং সুসদৃশসংযোজনবিভক্তম্ || ২৯||
পঞ্চশতধাতুয়ুক্তং পঞ্চগুণং পঞ্চবিধমিদং বাপি |
স্বাদ্যধিকারগুণৈরর্থবিশেষৈর্বিভূষিতন্যাসম্ |
প্রাতিপদিকার্থলিঙ্গৈর্যুক্তং পঞ্চবিধমিদং জ্ঞেয়ম্ || ৩০||
আখ্যাতং পাঠ্যকৃতং জ্ঞেয়ং নানার্থাশ্রয়বিশেষম্ |
বচনং নামসমেতং পুরুষবিভক্তং তদাখ্যাতম্ || ৩১||
প্রাতিপদিকার্থয়ুক্তান্ধাৎবর্থানুপসৃজন্তি যে স্বার্থৈঃ |
উপসর্গা হ্যুপদিষ্টাস্তস্মাৎ সংস্কারশাস্ত্রেঽস্মিন্ || ৩২||
প্রাতিপদিকার্থয়োগাদ্ধাতুচ্ছন্দোনিরুক্তয়ুক্ত্যা চ |
যস্মান্নিপতন্তি পদে তস্মাৎপ্রোক্তা নিপাতাস্তু || ৩৩||
প্রত্যয়বিভাগজনিতাঃ প্রকর্ষসংযোগসৎববচনৈশ্চ |
যস্মাৎপূরয়তেঽর্থান্ প্রত্যয় উক্তস্ততস্তস্মাৎ || ৩৪||
লোকে প্রকৃতিপ্রত্যয়বিভাগসংযোগসৎববচনৈশ্চ |
তাংস্তান্ পূরয়তেঽর্থাংস্তেষু যস্তদ্ধিতস্তস্মাৎ || ৩৫||
একস্য বহূনাং বা ধাতোর্লিঙ্গস্য বা পদানাং বা |
বিভজন্ত্যর্থং যস্মাৎ বিভক্তয়স্তেন তাঃ প্রোক্তাঃ || ৩৬||
বিশিষ্টাস্তু স্বরা যত্র ব্যঞ্জনং বাপি যোগতঃ |
সন্ধীয়তে পদে যস্মাত্তস্মাৎ সন্ধিঃ প্রকীর্তিতঃ || ৩৭||
বর্ণপদক্রমসিদ্ধঃ পদৈকয়োগাচ্চ বর্ণয়োগাচ্চ |
সন্ধীয়তে চ যস্মাত্তস্মাৎ সন্ধিঃ সমুদ্দিষ্টঃ || ৩৮||
লুপ্তবিভক্তির্নাম্নামেকার্থং সংহরৎসমাসোঽপি |
তৎপুরুষাদিকসঞ্জ্ঞৈর্নির্দিষ্টঃ ষড্বিধো বিপ্রাঃ || ৩৯||
এভিঃ শব্দবিধানৈর্বিস্তারব্যঞ্জনার্থসংযুক্তৈঃ |
পদবন্ধাঃ কর্তব্যা নিবদ্ধবন্ধাস্তু চূর্ণা বা || ৪০||
বিভক্ত্যন্তং পদং জ্ঞেয়ং নিবদ্ধং চূর্ণমেব চ |
তত্র চূর্ণপদস্যেহ সন্নিবোধত লক্ষণম্ || ৪১||
অনিবদ্ধপদং ছন্দোবিধানানিয়তাক্ষরম্ |
অর্থাপেক্ষ্যক্ষরস্যূতং জ্ঞেয়ং চূর্ণপদং বুধৈঃ || ৪২||
নিবদ্ধাক্ষরসংযুক্তং যতিচ্ছেদসমন্বিতম্ |
নিবদ্ধং তু পদং জ্ঞেয়ং প্রমাণনিয়তাত্মকম্ || ৪৩||
এবং নানার্থসংযুক্তৈঃ পাদৈর্বর্ণবিভূষিতৈঃ |
চতুর্ভিস্তু ভবেদ্যুক্তং ছন্দো বৃত্তাভিধানবৎ || ৪৪||
ষড্বিংশতিঃ স্মৃতান্যেভিঃ পাদৈশ্ছন্দসি সঙ্খ্যয়া |
সমঞ্চার্ধসমঞ্চৈব তথা বিষমমেব চ || ৪৫||
ছন্দোয়ুক্তং সমাসেন ত্রিবিধং বৃত্তমিষ্যতে |
নানাবৃত্তিবিনিষ্পন্না শব্দস্যৈষা তনূস্স্মৃতা || ৪৬||
ছন্দোহীনো ন শব্দোঽস্তি ন চ্ছন্দশ্শব্দবর্জিতম্ |
তস্মাত্তূভ্যসংযোগো নাট্যস্যোদ্যোতকঃ স্মৃতঃ || ৪৭||
একাক্ষরং ভবেদুক্তমত্যুক্তং দ্ব্যক্ষরং ভবেৎ |
মধ্যং ত্র্যক্ষরমিত্যাহুঃ প্রতিষ্ঠা চতুরক্ষরা || ৪৮||
সুপ্রতিষ্ঠা ভবেৎ পঞ্চ গায়ত্রী ষড্ ভবেদিহ |
সপ্তাক্ষরা ভবেদুষ্ণিগষ্টাক্ষরানুষ্টুবুচ্যতে || ৪৯||
নবাক্ষরা তু বৃহতী পঙ্ক্তিশ্চৈব দশাক্ষরা |
একাদশাক্ষরা ত্রিষ্টুব্ জগতী দ্বাদশাক্ষরা || ৫০||
ত্রয়োদশাঽতিজগতী শক্বরী তু চতুর্দশা |
অতিশক্বরী পঞ্চদশা ষোডশাষ্টিঃ প্রকীর্তিতা || ৫১||
অত্যষ্টিঃ স্যাৎসপ্তদশা ধৃতিরষ্টাদশাক্ষরা |
একোনবিংশতির্ধৃতিঃ কৃতির্বিংশতিরেব চ || ৫২||
প্রকৃতিশ্চৈকবিংশত্যা দ্বাবিংশত্যাকৃতিস্তথা |
বিকৃতিঃ স্যাৎ ত্রয়োবিংশা চতুর্বিংশা চ সঙ্কৃতিঃ || ৫৩||
পঞ্চবিংশত্যতিকৃতিঃ ষড্বিংশত্যুৎকৃতির্ভবেৎ |
অতোঽধিকাক্ষরং ছন্দো মালাবৃত্তং তদিষ্যতে || ৫৪||
ছন্দসাং তু তথা হ্যেতে ভেদাঃ প্রস্তারয়োগতঃ |
অসঙ্খ্যেয়প্রমাণানি বৃত্তান্যাহুরতো বুধাঃ || ৫৫||
গায়ত্রীপ্রভৃতিত্ত্বেষাং প্রমাণং সংবিধীয়তে |
প্রয়োগজানি সর্বাণি প্রায়শো ন ভবন্তি হি || ৫৬||
বৃত্তানি চ চতুষ্ষষ্টির্গায়ত্র্যাং কীর্তিতানি তু |
শতং বিংশতিরষ্টৌ চ বৃত্তান্যুষ্ণিহ্যথোচ্যতে || ৫৭||
ষট্পঞ্চাশচ্ছতে দ্বে চ বৃত্তানামপ্যনুষ্টুভি |
শতানি পঞ্চ বৃতানাং বৃহত্যাং দ্বাদশৈব চ || ৫৮||
পঙ্ক্ত্যাং সহস্রং বৃত্তানাং চতুর্বিংশতিরেব চ |
ত্রৈষ্টুভে দ্বে সহস্রে চ চৎবারিংশত্তথাষ্ট চ || ৫৯||
সহস্রাণ্যপি চৎবারি নবতিশ্চ ষডুত্তরা |
জগত্যাং সমবর্ণানাং বৃত্তানামিহ সর্বশঃ || ৬০||
অষ্টৌ সহস্রাণি শতং দ্ব্যধিকা নবতিঃ পুনঃ |
জগত্যামতিপূর্বায়াং বৃত্তানাং পরিমাণতঃ || ৬১||
শতানি ত্রীণ্যশীতিশ্চ সহস্রাণ্যপি ষোডশ |
বৃত্তানি চৈব চৎবারি শক্বর্যাঃ পরিসঙ্খ্যয়া || ৬২||
দ্বাত্রিংশচ্চ সহস্রাণি সপ্ত চৈব শতানি চ |
অষ্টৌ ষষ্টিশ্চ বৃত্তানি হ্যাশ্রয়ন্ত্যতিশক্বরীম্ || ৬৩||
পঞ্চষষ্টিসহস্রাণি সহস্রার্ধঞ্চ সঙ্খ্যয়া |
ষট্ত্রিংশচ্চৈব বৃত্তানি হ্যষ্ট্যাং নিগদিতানি চ || ৬৪||
একত্রিংশৎসহস্রাণি বৃত্তানাঞ্চ দ্বিসপ্ততিঃ |
তথা শতসহস্রঞ্চ ছন্দাংস্যত্যষ্টিসঞ্জ্ঞিতে || ৬৫||
ধৃত্যামপি হি পিণ্ডেন বৃত্তান্যাকল্পিতানি তু |
তজ্জ্ঞৈঃ শতসহস্রে দ্বে শতমেকং তথৈব চ || ৬৬||
দ্বিষষ্টিশ্চ সহস্রাণি চৎবারিংশচ্চ যোগতঃ |
চৎবারি চৈব বৃত্তানি সমসঙ্খ্যাশ্রয়াণি তু || ৬৭||
অতিধৃত্যাং সহস্রাণি চতুর্বিংশতিরেব চ |
তথা শতসহস্রাণি পঞ্চ বৃত্তশতদ্বয়ম্ || ৬৮||
অষ্টাশীতিশ্চ বৃত্তানি বৃত্তজ্ঞৈঃ কথিতানি চ |
কৃতৌ শতসহস্রাণি দশ প্রোক্তানি সঙ্খ্যয়া || ৬৯||
চৎবারিংশত্তথা চাষ্টৌ সহস্রাণি শতানি চ |
পঞ্চষট্সপ্ততিশ্চৈব বৃত্তানাং পরিমাণতঃ || ৭০||
তথা শতসহস্রাণাং প্রকৃতৌ বিংশতির্ভবেৎ |
সপ্ত বৈ গদিতাস্ত্বত্র নবতিশ্চৈব সঙ্খ্যয়া || ৭১||
সহস্রাণি শতং চৈকং দ্বিপঞ্চাশত্তথৈব চ |
বৃত্তানি পরিমাণেন বৃত্তজ্ঞৈর্গদিতানি তু || ৭২||
চৎবারিংশত্তথৈকঞ্চ লক্ষাণামথ সঙ্খ্যয়া |
তথা চেহ সহস্রাণি নবতিশ্চতুরুত্তরা || ৭৩||
শতত্রয়ং সমাখ্যাতং হ্যাকৃত্যাং চতুরুত্তরম্ |
জ্ঞেয়া শতসহস্রাণামশীতিস্ত্র্যধিকা বুধৈঃ || ৭৪||
অষ্টাশীতি সহস্রাণি বৃত্তানাং ষট্ শতানি চ |
অষ্টৌ চৈব তু বৃত্তানি বিকৃত্যাং গদিতানি তু || ৭৫||
তথা শতসহস্রাণি সপ্তষষ্টিশ্চ সপ্ততিঃ |
সপ্ত চৈব সহস্রাণি ষোডশে দ্বে শতে তথা || ৭৬||
কোটিশ্চৈবেহ বৃত্তানি সঙ্কৃতৌ কথিতানি বৈ |
কোটিত্রয়ঞ্চাভিকৃত্যাং পঞ্চত্রিংশদ্ভিরন্বিতম্ || ৭৭||
পঞ্চাশদ্ভিঃ সহস্রৈশ্চ চতুর্ভিরধিকৈস্তথা |
চতুষ্টয়ং শতানাম্ চ দ্বাত্রিংশদ্ভিঃ সমন্বিতম্ || ৭৮||
ষট্ কোটয়স্তথোৎকৃত্যাং লক্ষাণামেকসপ্ততিঃ |
চতুষ্ষষ্টিশতান্যষ্টৌ সহস্রাণ্যষ্ট চৈব হি || ৭৯||
উক্তাদুৎকৃতিপর্যন্তবৃত্তসঙ্খ্যাং বিচক্ষণঃ |
এতেন চ বিকল্পেন বৃত্তেষ্বেতেষু নির্দিশেৎ || ৮০||
সর্বেষাং ছন্দসামেবং বৃত্তানি কথিতানি বৈ |
তিস্রঃ কোটয়ো দশ তথা সহস্রাণাং শতানি তু || ৮১||
চৎবারিংশত্তথা দ্বে চ সহস্রাণি দশৈব তু |
সপ্তভিঃ সহিতান্যেব সপ্ত চৈব শতানি চ || ৮২||
ষড্বিংশতিরিহান্যানি ব্যাখ্যাতানি সমাসতঃ |
সমানি গণনায়ুক্তিমাশ্রিত্য কথিতানি বৈ || ৮৩||
সর্বেষাং ছন্দসামেবং ত্রিকৈর্বৃত্তং প্রয়োজয়েৎ |
জ্ঞেয়াশ্চাষ্টৌ ত্রিকাস্তত্র সঞ্জ্ঞাভিঃ স্থানমচ্ছরম্ || ৮৪||
ত্রীণ্যক্ষরাণি বিজ্ঞেয়স্ত্রিকোঽংশঃ পরিকল্পিতঃ |
গুরুলঘ্বক্ষরকৃতঃ সর্ববৃত্তেষু নিত্যশঃ || ৮৫||
গুরুপূর্বো ভকারঃ স্যান্মকারে তু গুরুত্রয়ম্ |
জকারো গুরুমধ্যস্থঃ সকারোঽন্ত্যগুরুস্তথা || ৮৬||
লঘুমধ্যস্থিতো রেফস্তকারোঽন্ত্যলঘুঃ পরঃ |
লঘুপূর্বো যকারস্তু নকারে তু লঘুত্রয়ম্ || ৮৭||
এতে হ্যষ্টৌ ত্রিকাঃ প্রাজ্ঞৈর্বিজ্ঞেয়া ব্রহ্মসম্ভবাঃ |
লাঘবার্থং পুনরমী ছন্দোজ্ঞানমবেক্ষ্য চ || ৮৮||
এভির্বিনির্গতাশ্চান্যা জাতয়োঽথ সমাদয়ঃ |
অস্বরাঃ সস্বরাশ্চৈব প্রোচ্যন্তে বৃত্তলক্ষণৈঃ || ৮৯||
গুর্বেকং গিতি বিজ্ঞেয়ং তথা লঘু লিতি স্মৃতম্ |
নিয়তঃ পদবিচ্ছেদো যতিরিত্যভিধীয়তে || ৯০||
গুরু দীর্ঘং প্লুতঞ্চৈব সংযোগপরমেব চ |
সানুস্বারবিসর্গং চ তথান্ত্যঞ্চ লঘু ক্বচিৎ || ৯১||
গায়ত্র্যাং দ্বৌ ত্রিকৌ জ্ঞেয়ৌ উষ্ণিক্ চৈকাধিকাক্ষরা |
অনুষ্টুপ্ দ্ব্যধিকা চৈব বৃহত্যাং চ ত্রিকাস্ত্রয়ঃ || ৯২||
একাক্ষরাধিকা পঙ্ক্তিস্ত্রিষ্টুপ্ চ দ্ব্যধিকাক্ষরা |
চতুস্ত্রিকা তু জগতী সৈকাতিজগতী পুনঃ || ৯৩||
শক্বরী দ্ব্যধিকা পঞ্চত্রিকা জ্ঞেয়াতিশক্বরী |
একাধিকাক্ষরাষ্টিশ্চ দ্ব্যধিকাত্যষ্টিরুচ্যতে || ৯৪||
ষট্ত্রিকাস্তু ধৃতিঃ প্রোক্তা সৈকা চাতিধৃতিস্তথা |
কৃতিশ্চ দ্ব্যধিকা প্রোক্তা প্রকৃত্যাং সপ্ত বৈ ত্রিকাঃ || ৯৫||
আকৃতিস্ত্বধিকৈকেন দ্ব্যধিকা বিকৃতিস্তথা |
অষ্টত্রিকাঃ সঙ্কৃতৌ স্যাৎ সৈকা চাভিকৃতিঃ পুনঃ || ৯৬||
উৎকৃতির্দ্ব্যধিকা চৈব বিজ্ঞেয়া গণমানতঃ |
গুর্বেকং গ ইতি প্রোক্তং গুরুণী গাবিতি স্মৃতৌ |
লঘ্বেকং ল ইতি জ্ঞেয়ং লঘুনী লাবিতি স্মৃতৌ || ৯৭||
সম্পদ্বিরামপাদাশ্চ দৈবতস্থানমক্ষরম্ |
বর্ণঃ স্বরো বিধির্বৃত্তমিতি ছন্দোগতো বিধিঃ || ৯৮||
নৈবাতিরিক্তং হীনং বা যত্র সম্পদ্যতে ক্রমঃ |
বিধানে চ্ছন্দসামেষ সম্পদিত্যভিসঞ্জ্ঞিতঃ || ৯৯||
যত্রার্থস্য সমাপ্তিঃ স্যাৎ স বিরাম ইতি স্মৃতঃ |
পাদশ্চ পদ্যতের্ধাতোশ্চতুর্ভাগ ইতি স্মৃতঃ || ১০০||
অগ্ন্যাদিদৈবতং প্রোক্তং স্থানং দ্বিবিধমুচ্যতে |
শরীরাশ্রয়সম্ভূতং দিগাশ্রয়মথাপি চ || ১০১||
শারীরং মন্ত্রসম্ভূতং ছন্দো গায়ত্রসঞ্জ্ঞিতম্ |
ক্রুষ্টে মধ্যং দিনং প্রোক্তং ত্রৈষ্টুভং পরিকীর্ত্যতে || ১০২||
তৃতীয়সবনঞ্চাপি শীর্ষণ্যং জাগতং হি যৎ |
হ্রস্বং দীর্ঘং প্লুতঞ্চৈব ত্রিবিধঞ্চাক্ষরং স্মৃতম্ || ১০৩||
শ্বেতাদয়স্তথা বর্ণা বিজ্ঞেয়াশ্ছন্দসামিহ |
তারশ্চৈব হি মন্দ্রশ্চ মধ্যমস্ত্রিবিধঃ স্বরঃ || ১০৪||
ধ্রুবাবিধানে চৈবাস্য সম্প্রবক্ষ্যামি লক্ষণম্ |
বিধির্গণকৃতশ্চৈব তথৈবার্থকৃতো ভবেৎ || ১০৫||
ছন্দতো যস্য পাদে স্যাদ্ধীনং বাঽধিকমেব বা |
অক্ষরং নিচৃদিতি প্রোক্তং ভূরিক্ চেতি দ্বিজোত্তমাঃ || ১০৬||
অক্ষরাভ্যাং সদা দ্বাভ্যামধিকং হীনমেব বা |
তচ্ছন্দো নামতো জ্ঞেয়ং স্বরাডিতি বিরাডপি || ১০৭||
সর্বেষামেব বৃত্তানাং তজ্জ্ঞৈর্জ্ঞেয়া গণাস্ত্রয়ঃ |
দিব্যো দিব্যেতরশ্চৈব দিব্যমানুষ এব চ || ১০৮||
গায়ত্র্যুষ্ণিগনুষ্টুপ্ চ বৃহতী পঙ্ক্তিরেব চ |
ত্রিষ্টুপ্ চ জগতী চৈব দিব্যোঽযং প্রথমো গণঃ || ১০৯||
তথাতিজগতী চৈব শক্বরী চাতিশক্বরী |
অষ্টিরত্যষ্টিরপি চ ধৃতিশ্চাতিধৃতির্গণঃ || ১১০||
কৃতিশ্চ প্রকৃতিশ্চৈব হ্যাকৃতির্বিকৃতিস্তথা |
সঙ্কৃত্যভিকৃতী চৈব উৎকৃতির্দিব্যমানুষা || ১১১||
এতেষাং ছন্দসাং ভূয়ঃ প্রস্তারবিধিসংশ্রয়ম্ |
লক্ষণং সম্প্রবক্ষ্যামি নষ্টমুদ্দিষ্টমেব চ || ১১২||
প্রস্তারোঽক্ষরনির্দিষ্টো মাত্রোক্তশ্চ তথৈব হি |
দ্বিকৌ গ্লাবিতি বর্ণোক্তৌ মিশ্রৌ চেত্যপি মাত্রিকৌ || ১১৩||
গুরোরধস্তাদাদ্যস্য প্রস্তারে লঘু বিন্যসেৎ |
অগ্রতস্তু সমাদেয়া গুরবঃ পৃষ্ঠতস্তথা || ১১৪||
প্রথমং গুরুভির্বর্ণৈর্লঘুভিস্ত্ববসানজম্ |
বৃত্তন্তু সর্বছন্দস্সু প্রস্তারবিধিরেব তু || ১১৫||
গুর্বধস্তাল্লঘুং ন্যস্য তথা দ্বিদ্বি যথোদিতম্ |
ন্যস্যেৎ প্রস্তারমার্গোঽযমক্ষরোক্তস্তু নিত্যশঃ || ১১৬||
মাত্রাসঙ্খ্যাবিনির্দিষ্টো গণো মাত্রাবিকল্পিতঃ |
মিশ্রৌ গ্লাবিতি বিজ্ঞেয়ৌ পৃথক্ লক্ষ্যবিভাগতঃ || ১১৭||
মাত্রাগণো গুরুশ্চৈব লঘুনী চৈব লক্ষিতে |
আর্যাণাং তু চতুর্মাত্রাপ্রস্তারঃ পরিকল্পিতঃ || ১১৮||
গীতকপ্রভৃতীনান্তু পঞ্চমাত্রো গণঃ স্মৃতঃ |
বৈতালীয়ং পুরস্কৃত্য ষণ্মাত্রাদ্যাস্তথৈব চ || ১১৯||
ত্র্যক্ষরাস্তু ত্রিকা জ্ঞেয়া লঘুগুর্বক্ষরান্বিতাঃ |
মাত্রাগণবিভাগস্তু গুরুলঘ্বক্ষরাশ্রয়ঃ || ১২০||
অন্ত্যাদ্ দ্বিগুণিতাদ্রূপাদ্ দ্বিদ্বিরেকং গুরোর্ভবেৎ |
দ্বিগুণাঞ্চ লঘোঃ কৃৎবা সঙ্খ্যাং পিণ্ডেন যোজয়েৎ || ১২১||
আদ্যং সর্বগুরু জ্ঞেয়ং বৃত্তন্তু সমসঞ্জ্ঞিতম্ |
কোশং তু সর্বলঘ্বন্ত্যং মিশ্ররূপাণি সর্বতঃ || ১২২||
বৃত্তানাং তু সমানানাং সঙ্খ্যাং সংযোজ্য তাবতীম্ |
রাশ্যূনামর্ধবিষমাং সমাসাদভিনির্দিশেৎ || ১২৩||
একাদিকাং তথা সঙ্খ্যাং ছন্দসো বিনিবেশ্য তু |
যাবৎ পূর্ণন্তু পূর্বেণ পূরয়েদুত্তরং গণম্ || ১২৪||
সমানাং বিষমাণাং চ সঙ্গুণয়্য তথা স্ফুটম্ |
রাশ্যূনামভিজানীয়াদ্বিষমাণাং সমাসতঃ || ১২৫||
এবং কৃৎবা তু সর্বেষাং পরেষাং পূর্বপূরণম্ |
ক্রমান্নৈধনমেকৈকং প্রতিলোমং বিসর্জয়েৎ || ১২৬||
সর্বেষাং ছন্দসামেবং লঘ্বক্ষরবিনিশ্চয়ম্ |
জানীত সমবৃত্তানাং সঙ্খ্যাং সঙ্ক্ষেপতস্তথা || ১২৭||
বৃত্তস্য পরিমাণন্তু ছিৎবার্ধেন যথাক্রমম্ |
ন্যসেল্লঘু যথা সৈকমক্ষরং গুরু চাপ্যথ || ১২৮||
এবং বিন্যস্য বৃত্তানাং নষ্টোদ্দিষ্টবিভাগতঃ |
গুরুলঘ্বক্ষরাণীহ সর্বছন্দস্সু দর্শয়েৎ || ১২৯||
ইতি ছন্দাংসি যানীহ ময়োক্তানি দ্বিজোত্তমাঃ |
বৃত্তান্যেতেষু নাট্যেঽস্মিন্ প্রয়োজ্যানি নিবোধত || ১৩০||
ইতি ভরতীয়ে নাট্যশাস্ত্রে বাচিকাভিনয়ে ছন্দোবিধানং
নাম চতুর্দশোঽধ্যায়ঃ |