নাট্যশাস্ত্রম্ অধ্যায় ২১ আহার্যাভিনয়ং

.. নাট্যশাস্ত্রম্ অধ্যায় ২১ আহার্যাভিনয়ং ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ একবিংশোঽধ্যায়ঃ .
আহার্যাভিনয়ং বিপ্রা ব্যাখ্যাস্যাম্যনুপূর্বশঃ .
য্স্মাৎ প্রয়োগঃ সর্বোঽযমাহার্যাভিনয়ে স্থিতঃ .. ১..
নানাবস্থা প্রকৃতয় পূর্বং নৈপথ্যসাধিতাঃ .
অঙ্গাদিভিরভিব্যক্তিমুপগচ্ছন্ত্যয়ত্নতঃ .. ২..
আহার্যাভিনয়ো নাম জ্ঞেয়ো নেপথ্যজো বিধিঃ .
তত্র কার্যঃ প্রয়ত্নস্তু নাট্যস্য শুভমিচ্ছতা .. ৩..
[তস্মিন্যত্নস্তু কর্তব্যো নৈপথ্যে সিদ্ধিমিচ্ছতা .
নাট্যস্যেহ ৎবলঙ্কারো নৈপথ্যং যৎপ্রকীর্তিতম্ ..].. ৪..
চতুর্বিধং তু নেপথ্যং পুস্তোঽলঙ্কার এব চ .
তথাঙ্করচনা চৈব জ্ঞেয়ং সজ্জীবমেব চ .. ৫..
পুস্তস্তু ত্রিবিধো জ্ঞেয়ো নানারূপপ্রমাণতঃ .
সন্ধিমো ব্যাজিমশ্চৈব বেষ্টিমশ্চ প্রকীর্তিতঃ .. ৬..
কিলিঞ্জচর্মবস্ত্রাদ্যৈর্যদ্রূপং ক্রিয়তে বুধৈঃ .
সন্ধিমো নাম বিজ্ঞেয়ঃ পুস্তো নাটকসংস্শ্রয়ঃ .. ৭..
ব্যাজিমো নাম বিজ্ঞেঅয়ো যন্ত্রেণ ক্রিয়তে তু যঃ .
বেষ্ট্যতে চৈব যদ্রুপং বেষ্টিমঃ স তু সংজ্ঞিতঃ .. ৮..
শৈলয়ানবিমানানি চর্মবর্মধ্বজা নগাঃ .
যে ক্রিয়ন্তে হি নাট্যে তু স পুস্ত ইতি সংজ্ঞিতঃ .. ৯..
অলঙ্কারস্তু বিজ্ঞেয়ো মাল্যাভরণবাসসাম্ .
নানাবিধঃ সমায়োগোঽপ্যঙ্গোপাঙ্গবিধিঃ স্মৃতঃ .. ১০..
বেষ্টিমং বিততং চৈব সংঘাত্যং গ্রন্থিমং তথা .
প্রালম্বিতং তথা চৈব মাল্যং পঞ্চবিধং স্মৃতম্ ..১১..
চতুর্বিধং তু বিজ্ঞেয়ং নাট্যে হ্যাভরণং বুধৈঃ .
আবেধ্যং বন্ধনীয়ং চ ক্ষেপ্যমারোপ্যমেব চ .. ১২..
আবেধ্যং কুণ্ডলাদীহ যৎস্যাচ্ছ্রবণভূষণম্ .
আরোপ্যং হেমসূত্রাদি হারাশ্চ বিবিধাশ্রয়াঃ .. ১৩..
শ্রোণীসূত্রাঙ্গদে মুক্তাবন্ধনীয়ানি সর্বদা .
প্রক্ষেপ্য নূপুরং বিদ্যাদ্বস্ত্রাভরণমেব চ .. ১৪..
ভূষণানাং বিকল্পং হি পুরুষস্ত্রীসমাশ্রয়ম্ .
নাবিধং প্রবক্ষ্যামি দেশজাতিসমুদ্ভবম্ ..১৫..
চূডামণিঃ সমুকুটঃ শিরসো ভূষণং স্মৃতম্ .
কুণ্ডলং মোচকং কীলা কর্ণাভরণমিষ্যতে .. ১৬..
মুক্তাবলী হর্ষকং চ সূত্রকং কণ্ঠভূষণম্ .
বেতিকাঙ্গুলিমুদ্রা চ স্যাদঙ্গুলিবিভূষণম্ ..১৭..
হস্তলী বলয়ং চৈব বাহুনালীবিভূষণম্ .
রুচকশ্চূলিকা কার্যা মণিবন্ধবিভূষণম্ .. ১৮..
কেয়ূরে অঙ্গদে চৈব কূর্পরোপরিভূষণে .
ত্রিসরশ্চৈব হারশ্চ তথা বক্ষোবিভূষণম্ .. ১৯..
ব্যালম্বমৌক্তিকো হারো মালা চৈবাঙ্গভূষণম্ .
তলকং সূত্রকং চৈব ভবেৎকটিবিভূষণম্ .. ২০..
অয়ং পুরুষনির্যোগঃ কার্যস্ত্বাভরণাশ্রয়ঃ .
দেবানাং পার্থিবানাং চ পুনর্বক্ষ্যামি যোষিতাম্ .. ২১..
শিখাপাশং শিখাব্যালং পিণ্ডীপত্রং তথৈব চ .
চূডামণির্মকরিকা মুক্তাজালগবাক্ষিকম্ ..২২..
শিরসো ভূষণং চৈব বিচিত্রং শীর্ষজোলকম্ .
কণ্ডকং শিখিপত্রং চ বেণীপুচ্ছঃ সদোরকঃ .. ২৩..
ললাটতিলকং চৈব নানাশিল্পপ্রয়োজিতম্ .
ভ্রূগুচ্ছোপরিগুচ্ছশ্চ কুসুমানুকৃতিস্তথা .. ২৪..
কর্ণিকা কর্ণবলয়ং তথা স্যাৎপত্রকর্ণিকা .
কুণ্ডলং কর্ণমুদ্রা চ কর্ণোৎকীলকমেব চ .. ২৫..
নানারত্নবিচিত্রাণি দন্তপত্রাণি চৈব হি .
কর্ণয়োর্ভূষণং হ্যেতৎকর্ণপূরস্তথৈব চ .. ২৬..
তিলকাঃ পত্রলেখাশ্চ ভবেদ্গণ্ডবিভূষণম্ .
ত্রিবণী চৈব বিজ্ঞেয়ং ভবেদ্বক্ষোবিভূষণম্ .. ২৭..
নেত্রয়োরঞ্জনং জ্ঞেয়মধরস্য চ রঞ্জনম্ .
দন্তানাং বিবিধো রাগশ্চতুর্ণাং শুক্লতাপি বা .. ২৮..
রাগান্তরবিকল্পোঽথ শোভনেনাধিকোজ্বলঃ .
মুগ্ধানাং সুন্দরীণাং চ মুক্তাভাসিতশোভনাঃ .. ২৯..
সুরক্তা বাপি দন্তা স্যুঃঃ পদ্মপল্লবরঞ্জনাঃ .
অশ্মরাগোদ্দ্যোতিতঃ স্যাদধরঃ পল্লবপ্রভঃ .. ৩০..
বিলাসশ্চ ভবেত্তাসাং সবিভ্রান্তনিরীক্ষিতম্ .
মুক্তাবলী ব্যালপঙ্ক্তির্মঞ্জরী রত্নমালিকা .. ৩১..
রত্নাবলী সূত্রকং চ জ্ঞেয়ং কণ্ঠবিভূষণম্ .
দ্বিসরস্ত্রিসরশ্চৈব চতুস্সরকমেব চ ..৩২..
তথা শৃঙ্খলিকা চৈব ভবেৎকণ্ঠবিভূষণম্ .
অঙ্গদং বলয়ং চৈব বাহুমূলবিভূষণম্ .. ৩৩..
নানাশিল্পকৃতাশ্চৈব হারা বক্ষোবিভূষণম্ .
মণিজালাবনদ্ধং চ ভবেৎ স্তনবিভূষণম্ .. ৩৪..
খর্জূরকং সোচ্ছিতিকং বাহুনালীবিভূষণম্ .
কলাপী কটকং শঙ্খো হস্তপত্রং সপূরকম্ .. ৩৫..
মুদ্রাঙ্গুলীয়কং চৈব হ্যঙ্গুলীনাং বিভূষণম্ .
মুক্তাজালাঢ্যতলকং মেখলা কাঞ্চিকাপি বা .. ৩৬..
রশনা চ কলাপশ্চ ভবেচ্ছ্রোণীবিভূষণম্ .
একয়ষ্টির্ভবেৎকাঞ্চী মেখলা ৎবষ্টয়ষ্টিকা .. ৩৭..
দ্বিরষ্টয়ষ্টি রশনা কলাপঃ পঞ্চবিংশকঃ .
দ্বাত্রিংশচ্চ চতুঃষষ্টিঃ শতমষ্টোত্তরং তথা .. ৩৮..
মুক্তাহারা ভবন্ত্যেতে দেবপার্থিবয়োষিতাম্ .
নূপুরঃ কিঙ্কিণীকাশ্চ ঘণ্টিকা রত্নজালকম্ ..৩৯..
সঘোষে কটকে চৈব গুল্ফোপরিবিভূষাণম্ .
জঙ্ঘয়োঃ পাদপত্রং স্যাদঙ্গুলীষ্বঙ্গুলীয়কম্ .. ৪০..
অঙ্গুষ্ঠতিলকাশ্চৈব পাদয়োশ্চ বিভূষণম্ .
তথালক্তকরাগশ্চ নানাভক্তিনিবেশিতঃ .. ৪১..
অশোকপলাবচ্ছায়ঃ স্যাৎ স্বাভাবিক এব চ .
এতদ্বিভূষণং নার্যা আকেশাদানখাদপি .. ৪২..
যথাভবরসাবস্থং বিজ্ঞেয়ং দ্বিজসত্তমাঃ .
আগমশ্চ প্রমাণং চ রূপনির্বর্ণনং তথা .. ৪৩..
বিশ্বকর্মমতাৎকার্যং সুবুদ্ধ্যাপি প্রয়োক্তৃভিঃ .
ন হি শক্যং সুবর্ণেন মুক্তাভির্মণিভিস্তথা .. ৪৪..
স্বাধীনমিতি রুচ্যৈব কর্তুমঙ্গস্য ভূষণম্ .
বিভাগতোঽভিপ্রয়ুক্তমঙ্গশোভাকরং ভবেৎ .. ৪৫..
যথা স্থানান্তরগতং ভূষণং রত্নসংযুতম্ .
ন তু নাট্যপ্রয়োগেষু কর্তব্যং ভূষণং গুরু .. ৪৬..
খেদং জনয়তে তদ্ধি সব্যায়তবিচেষ্টনাৎ .
গুরুভাবাবসন্নস্য স্বেদো মূর্ছা চ জায়তে .. ৪৭..
গুর্বাভরণসন্নো হি চেষ্টাং ন কুরুতে পুনঃ .
তস্মাত্তনুৎবচকৃতং সৌবর্ণং ভূষণং ভবেৎ .. ৪৮..
রত্নবজ্জতুবদ্ধং বা ন খেদজননং ভবেৎ .
স্বেচ্ছয়া ভূষণবিধির্দিব্যানামুপদিশ্যতে .. ৪৯..
যত্নভাববিনিষ্পন্নং মানুষাণাং বিভূষণম্ .
[বেষ্টিতং বিততং চৈব সংঘাত্যং গ্রথিমং তথ .. ৫০..
লম্বশোভি তথা চৈব মাল্যং পঞ্চবিধং স্মৃতম্ .
আচ্ছাদনং বহুবিধং নানাপত্তনসংভবম্ .. ৫১..
তজ্জ্ঞেয়ং ত্রিপ্রকারং তু শুদ্ধং রক্তং বিচিত্রিতম্].
দিব্যানাং ভূষণবিধির্য এষ পরিকীর্তিতঃ .. ৫২..
মানুষাণাং তু কর্তব্যো নানাদেশসমাশ্রয়ঃ .
ভূষণৈশ্চাপি বেষৈশ্চ নানাবস্থাসমাশ্রয়ৈঃ .. ৫৩..
দিব্যাঙ্গনানাং কর্তব্যা বিভক্তিঃ স্বস্বভূমিজা .
বিদ্যাধরীণাং যক্ষীণামপ্সরোনাগয়োষিতাম্ .. ৫৪..
ঋষিদৈবতকন্যানাং বেষৈর্নানাৎবমিষ্যতে .
তথা চ সিদ্ধগন্ধর্বরাক্ষসাসুরয়োষিতাম্ .. ৫৫..
দিব্যানাং নরনারীণাং তথৈব চ শিখণ্ডকম্ .
শিখাপুটশিখণ্ডং তু মুক্তাভূয়িষ্ঠভূষণম্ .. ৫৬..
বিদ্যাধরীণাং কর্তব্যঃ শুদ্ধো বেষপরিচ্ছদঃ .
যক্ষিণ্যোঽপ্সরশ্চৈব কর্যা রত্নবিভূষণাঃ .. ৫৭..
সমস্তানাং ভবেদ্বেষো যক্ষীণা কেবলং শিখা .
দিব্যনামিব কর্তব্যং নাগস্ত্রীণাং বিভূষণম্ .. ৫৮..
মুক্তামণিলতাপ্রায়াঃ ফণাস্তাসাং তু কেবলাঃ .
কার্যং তু মুনিকন্যানামেকবেণীধরং শিরঃ .. ৫৯..
ন চাপি বিভূষণবিধিস্তাসাং বেষো বনোচিতঃ .
মুক্তামরকতপ্রায়ং মণ্ডনং সিদ্ধয়োষিতাম্ .. ৬০..
তাসাং তু চৈব কর্তব্যং পীতবস্ত্রপরিচ্ছদম্ .
পদ্মরাগমণিপ্রায়ং গন্ধর্বীণাং বিভূষণম্ .. ৬১..
বীণাহস্তশ্চ কর্তব্যঃ কৌসুম্ভবসনস্তথা .
ইন্দ্রনীলৈস্তু কর্তব্যং রাক্ষসীণাং বিভূষণম্ .. ৬২..
সিতদংষ্ট্রা চ কর্তব্যা কৃষ্ণবস্ত্রপরিচ্ছদম্ .
বৈডূর্যমুক্তাভরণাঃ কর্তব্যা সুরয়োষিতাম্ .. ৬৩..
শুকপিঞ্ছনিভৈঅর্বস্ত্রৈঃ কার্যস্তাসাং পরিচ্ছদঃ .
পুষ্যরাগৈস্তু মণিভিঃ ক্বচিদ্বৈডূর্যভূষিতৈঃ .. ৬৪..
দিব্যবানরনারীণাং কার্যো নীলপরিচ্ছদঃ .
এবং শৃঙ্গারিণঃ কার্যা বেষা দিব্যাঙ্গনাশ্রয়াঃ .. ৬৫..
অবস্থান্তমাসাদ্য শুদ্ধাঃ কার্যাঃ পুনস্তথা .
মানুষীণাং তু কর্তব্যা নানাদেশসমুদ্ভবাঃ .. ৬৬..
বেষাভরণসংযোগান্ গদতস্তান্নিবোধত .
আবন্ত্যয়ুবতীনাং তু শিরস্সালককুন্তলম্ .. ৬৭..
গৌডীয়ানামলকপ্রায়ং সশিখাপাশবেণিকম্ .
আভীরয়ুবতীনাং তু দ্বিবেণীধর এব তু .. ৬৮..
শিরঃ পরিগমঃ কার্যো নীলপ্রায়মথাম্বরম্ .
তথা পূর্বোতরস্ত্রীণাং সমুন্নদ্ধশিখণ্ডকম্ .. ৬৯..
আকেশাচ্ছাদনং তাসাং দেশকর্মণি কীর্তিতম্ .
তথৈব দক্ষিণস্ত্রীণাং কার্যমুল্লেখ্যসংশ্রয়ম্ .. ৭০..
কুম্ভীবন্ধকসংযুক্তং তথাবর্তললাটিকম্ .
[গণিকানাং তু কর্তব্যমিচ্ছাবিচ্ছিত্তি মণ্ডনম্].. ৭১..
দেশজাতিবিধানেন শেষাণামপি কারয়েৎ .
বেষং তথা চাভরণং ক্ষুরকর্ম পরিচ্ছদম্ .. ৭২..
[আগমং চাপি নৈপথ্যে নাট্যস্যৈবং প্রয়োজয়েৎ].
অদেশয়ুক্তো বেষো হি ন শোভাং জনয়িষ্যতি .. ৭৩..
মেখলোরসি বদ্ধা তু হাস্যং সমুপপাদয়েৎ .
তথা প্রোষিতকান্তাসু ব্যসনাভিহতাসু চ .. ৭৪..
বেষো বৈ মলিনঃ কার্য একবেণীধরং শিরঃ .
বিপ্রলম্ভে তু নার্যাস্তু শুদ্ধো বেষো ভবেদিহ .. ৭৫..
নাত্যাভরণসংযুক্তো ন চাপি মৃজয়ান্বিতঃ .
এবং স্ত্রীণাং ভবেদ্বেষো দেশাবস্থাসমুদ্ভবঃ .. ৭৬..
পুরুষাণাং পুনশ্চৈব বেষান্বক্ষ্যামি তত্ত্বতঃ .
তত্রাঙ্করচনা পূর্বং কর্তব্যা নাট্যয়োক্তৃভিঃ .. ৭৭..
ততঃ পরং প্রয়োক্তব্যা বেষা দেশসমুদ্ভবাঃ .
সিতো নীলশ্চ পীতশ্চ চতুর্থো রক্ত এব চ .. ৭৮..
এতে স্বভাবজা বর্ণা যৈঃ কার্যং ৎবঙ্গবর্তনম্ .
সংযোগজাঃ পুনশ্চান্যে উপবর্ণা ভবন্তি হি ..৭৯..
তানহং সম্প্রবক্ষ্যামি যথাকার্যং প্রয়োক্তৃভিঃ .
সিতনীলসমায়োগে কারণ্ডব ইতি স্মৃতঃ .. ৮০..
সিতপীতসামায়োগাৎপাণ্ডুবর্ণঃ প্রকীর্তিতঃ .
সিতিঅরক্তসমায়োগে পদ্মবর্ণঃ প্রকীর্তিতঃ .. ৮১..
পীতনীলসমায়োগাদ্ধরিতো নাম জায়তে .
নীলরক্তসমায়োগাৎকষায়ো নাম জায়তে .. ৮২..
রক্তপীতসমায়োগাদ্গৌরবর্ণ ইতি স্মৃতঃ .
এতে সংযোগজা বর্ণা হ্যুপবর্ণাস্তথাপরে .. ৮৩..
ত্রিচতুর্বর্ণসংযুক্তা বহবঃ সংপ্রকীর্তিতাঃ .
বলস্থো যো ভবেদ্বর্ণস্তস্য ভাগো ভবেত্ততঃ .. ৮৪..
দুর্বলস্য চ ভাগৌ দ্বৌ নীলং মুক্ত্বা প্রদাপয়েৎ .
নীলস্যৈকো ভবেদ্ভাঅগশ্চৎবারোঽন্যে তু বর্ণকে .. ৮৫..
বলবান্সর্ববর্ণানাং নীল এব প্রকীর্তিতঃ .
এবং বর্ণবিধিং জ্ঞাৎবা নানাসংযোগসংশ্রয়ম্ .. ৮৬..
ততঃ কুর্যাদ্যথায়োগমঙ্গানাং বর্তনং বুধঃ .
বর্তনচ্ছাদনং রূপং স্ববেষপরিবর্জিতম্ .. ৮৭..
নাট্যধর্মপ্রবৃত্তং তু জ্ঞেয়ং তৎপ্রকৃতিস্থিতম্ .
স্ববর্ণমাত্মনশ্ছাদ্যং বর্ণকৈর্বেষসংশ্রয়ৈঃ .. ৮৮..
আকৃতিস্তস্য কর্তব্যা যস্য প্রকৃতিরাস্থিতা .
যথা জন্তুঃ স্বভাবং স্বং পরিত্যজ্যান্যদৈহিকম্ ..৮৯..
তৎস্বভাবং হি ভজতে দেহান্তরমুপাশ্রিতঃ .
বেষেণ বর্ণকৈশ্চৈব চ্ছাদিতঃ পুরুষস্তথা .. ৯০..
পরভাবং প্রকুরুতে যস্য বেষং সমাশ্রিতঃ .
দেবদানবগন্ধর্বয়ক্ষরাক্ষসপন্নগাঃ .. ৯১..
প্রাণিসংজ্ঞাঃ স্মৃতা হ্যেতে জীববন্ধাশ্চ যেঽপরে .
[স্ত্রীভাবাঃ পর্বতাঃ নদ্যঃ সমুদ্রা বাহনানি চ .. ৯২..
নানাশস্ত্রাণ্যপি তথা বিজ্ঞেয়াঃ প্রাণিসংজ্ঞয়া].
শৈলপ্রাসাদয়ন্ত্রাণি চর্মবর্মধ্বজাস্তথা .. ৯৩..
নানাপ্রহরণাদ্যাশ্চ তেঽপ্রাণিন ইতি স্মৃতাঃ .
অথবা কারণোপেতা ভবন্ত্যেতে শরীরিণঃ .. ৯৪..
বেষভাষাশ্রয়োপেতা নাট্যধর্মমবেক্ষ্য তু .
বর্ণানাং তু বিধিং জ্ঞাৎবা বয়ঃ প্রকৃতিমেব চ .. ৯৫..
কুর্যাদঙ্গস্য রচনাং দেশজাতিবয়ঃশ্রিততাম্ .
দেবা গৌরাস্তু বিজ্ঞেয়া যক্ষাশ্চাপ্সরস্তথা .. ৯৬..
রুদ্রার্কদ্রুহিণস্কন্দাস্তপনীয়প্রভাঃ স্মৃতাঃ .
সোমো বৃহস্পতিঃ শুক্রো বরুণস্তারকাগণাঃ .. ৯৭..
সমুদ্রহিমবদ্গঙ্গাঃ শ্বেতা হি স্যুর্বলস্তথা .
রক্তমঙ্গারকং বিদ্যাৎ পীতৌ বুধহুতাশনৌ .. ৯৮..
নারায়ণো নরশ্চৈব শ্যামো নাগশ্চ বাসুকিঃ .
দৈত্যাশ্চ দানবাশ্চৈব রাক্ষসা গুহ্যকা নগাঃ .. ৯৯..
পিশাচা জলমাকাশমসিতানি তু বর্ণতঃ .
ভবন্তি ষট্সু দ্বীপেষু পুরুষশ্চৈব বর্ণতঃ .. ১০০..
কর্তব্যা নাট্যয়োগেন নিষ্টপ্তকনকপ্রভাঃ .
জাম্বূদ্বীপস্য বর্ষে তু নানাবর্ণাশ্রয়া নরাঃ .. ১০১..
উত্তরাংস্তু কুরুস্ত্যক্ত্বা তে চাপি কনকপ্রভাঃ .
ভদ্রাশ্বপুরুষাঃ শ্বেতাঃ কর্তব্যা বর্ণতস্তথা .. ১০২..
কেতুমালে নরা নীলা গৌরাঃ শেষেষু কীর্তিতাঃ .
নানাবর্ণাঃ স্মৃতা ভূতা গন্ধর্বা যক্ষপন্নগাঃ .. ১০৩..
বিদ্যাধরাস্তথা চৈব পিতরস্তু সমা নরাঃ .
পুনশ্চ ভারতে বর্ষে তাংস্তান্বর্ণান্নিবোধত .. ১০৪..
রাজানঃ পদ্মবর্ণাস্তু গৌরাঃ শ্যামাস্তথৈব চ .
যে চাপি সুখিনো মর্ত্যা গৌরা কার্যাস্তু বৈঃ বুধৈঃ .. ১০৫..
কুকর্মিণো গ্রহগ্রস্তাঃ ব্যাধিতাস্তপসি স্থিতাঃ .
আয়স্তকর্মিণশ্চৈব হ্যসিতাশ্চ কুজাতয়ঃ .. ১০৬..
ঋষ্যয়শ্চৈব কর্তব্যা নিত্যং তু বদরপ্রভাঃ .
তপঃস্থিতাশ্চ ঋষয়ো নিত্যামেবাসিতা বুধৈঃ .. ১০৭..
কারণব্যপদেশেন তথা চাত্মেচ্ছয়া পুনঃ .
বর্ণস্তত্র প্রকর্তব্যো দেশজতিবশানুগঃ .. ১০৮..
দেশং কর্ম চ জাতিং চ পৃথিব্যুদ্দেশসংশ্রয়ম্ .
বিজ্ঞায় বর্তনা কার্যা পুরুষাণাং প্রয়োগতঃ .. ১০৯..
কিরাতবর্বরান্ধ্রাশ্চ দ্রবিডাঃ কাশিকোসলাঃ .
পুলিন্দা দাক্ষিণাত্যাশ্চ প্রায়েণ ৎবসিতাঃ স্মৃতাঃ .. ১১০..
শকাশ্চ যবনাশ্চৈব পহ্লবা বাহ্লিকাশ্চ যে .
প্রায়েণ গৌরাঃ কর্তব্যা উত্তরা যে শ্রিতা দিশম্ .. ১১১..
পাঞ্চালাঃ শৌরসেনাশ্চ মাহিষাশ্চৌড্রমাগধাঃ .
অঙ্গা বঙ্গাঃ কলিঙ্গাশ্চ শ্যামাঃ কার্যাস্তু বর্ণতঃ .. ১১২..
ব্রাহ্মণাঃ ক্ষত্রিয়াশ্চৈব গৌরাঃ কার্যাস্তথৈব হি .
বৈশ্যাঃ শূদ্রাস্তথা চৈব শ্যামাঃ কার্যাস্তু বর্ণতঃ .. ১১৩..
এবং কৃৎবা যথান্যায়ং মুখাঙ্গোপাঙ্গবর্তনাম্ .
শ্মশ্রুকর্ম প্রয়ুঞ্জীত দেশকালবয়োঽনুগম্ ..১১৪..
শুদ্ধং বিচিত্রং শ্যামং চ তথা রোমশমেব চ .
ভবেচ্চতুর্বিধং শ্মশ্রু নানাবস্থান্তরাত্মকম্ .. ১১৫..
শুদ্ধং তু লিঙ্গিনাং কার্যং তথামাত্যপুরোধসাম্ .
মধ্যস্থা যে চ পুরুষা যে চ দীক্ষাং সমাশ্রিতাঃ .. ১১৬..
দিব্যা যে পুরুষাঃ কেচিৎসিদ্ধবিদ্যাধরাদয়ঃ .
পার্থিবাশ্চ কুমারাশ্চ যে চ রাজোপজীবিনঃ .. ১১৭..
শৃঙ্গারিণশ্চ যে মর্ত্যা যৌবনোন্মাদিনশ্চ যে .
তেষাং বিচিত্রং কর্তব্যং শ্মশ্রু নাট্যপ্রয়োক্তৃভিঃ .. ১১৮..
অনিস্তীর্ণপ্রতিজ্ঞানাং দুঃখিতানাং তপস্বিনাম্ .
ব্যসনাভিহতানাং চ শ্যামং শ্মশ্রু প্রয়োজয়েৎ .. ১১৯..
ঋষীণাং তাপসানাং চ যে চ দীর্ঘব্রতা নরাঃ .
তথা চ চীরবদ্ধানাং রোমশং শ্মশ্রু কীর্তিতম্ .. ১২০..
এবং নানাপ্রকারং তু শ্মশ্রু কার্যং প্রয়োক্তৃভিঃ .
অত ঊর্ধ্বং প্রবক্ষ্যামি বেষান্নানাপ্রয়োগজান্ .. ১২১..
শুদ্ধো বিচিত্রো মলিনস্ত্রিবিধো বেষ উচ্যতে .
তেষাং নিয়োগং বক্ষ্যামি যথাবদনুপূর্বশঃ .. ১২২..
দেবাভিগমনে চৈব মঙ্গলে নিয়মস্থিতে .
তিথিনক্ষত্রয়োগে চ বিবাহকরণে তথা .. ১২৩..
ধর্মপ্রবৃত্তং যৎকর্ম স্ত্রিয়ো বা পুরুষস্য বা .
বেষস্তেষাং ভবেচ্ছুদ্ধো যে চ প্রায়ত্নিকা নরাঃ .. ১২৪..
দেবদানবয়ক্ষাণাং গন্ধর্বোরগরক্ষসাম্ .
নৃপাণাং কর্কশানাং চ চিত্রো বেষ উদাহৃতঃ .. ১২৫..
বৃদ্ধানাং ব্রাহ্মণানাং চ শ্রেষ্ঠ্যমাত্যপুরোধসাম্ .
বণিজাং কাঞ্চুকীয়ানাং তথা চৈব তপস্বিনাম্ .. ১২৬..
বিপ্রক্ষেত্রিয়বৈশ্যানাং স্থানীয়া যে চ মানবাঃ .
শুদ্ধো বস্ত্রবিধিস্তেষাং কর্তব্যো নাটকাশ্রয়ঃ .. ১২৭..
উন্মত্তানাং প্রমত্তানামধ্বগানাং তথৈব চ .
ব্যসনোপহতানাং চ মলিনো বেষ উচ্যতে .. ১২৮..
শুদ্ধরক্তবিচিত্রাণি বাসাংস্যূর্ধ্বাম্বরাণি চ .
যোজয়েন্নাট্যতত্ত্বজ্ঞো বেষয়োঃ শুদ্ধচিত্রয়োঃ .. ১২৯..
কুর্যাদ্বেষে তু মলিনে মলিনং তু বিচক্ষণঃ .
মুনিনির্গ্রন্থশাক্যেষু যতিপাশুপতেষু চ .. ১৩০..
ব্রতানুগস্তু কর্তব্যো বেষো লোকস্বভাবতঃ .
চীরবল্কলচর্মাণি তাপসানাং তু যোজয়েৎ .. ১৩১..
পরিবাণ্মুনিষ্ক্যানাং বাসঃ কাষায়মিষ্যতে .
নানাচিত্রাণি বাসাংসি কুর্যাৎপাশুপতেষ্বথ .. ১৩২..
কুজাতয়শ্চ যে প্রোক্তাস্তেষাং চৈব যথার্হতঃ .
অন্তঃপুরপ্রবেশে চ বিনিয়ুক্তা হি যে নরাঃ .. ১৩৩..
কাষায়কঞ্চুকপটাঃ কার্যাস্তেঽপি যথাবিধি .
অবস্থানতরতশ্চৈব নৃণাং বেষো ভবেদথ .. ১৩৪..
বেষঃ সাংগ্রামিকশ্চৈব শূরাণাং সংপ্রকীর্তিতঃ .
বিচিত্রশস্ত্রকবচো বদ্ধতূণো ধনুর্ধরঃ .. ১৩৫..
চিত্রো বেষস্তু কর্তব্যো নৃপাণাং নিত্যমেব চ .
কেবলস্তু ভবেচ্ছুদ্ধো নক্ষত্রোৎপাতমঙ্গলে .. ১৩৬..
এবমেষ ভবেদ্বেষো দেশজাতিবয়োঽনুগঃ .
উত্তমাধমমধ্যানাং স্ত্রীণাং নৃণামথাপি চ .. ১৩৭..
এবং বস্ত্রবিধিঃ কার্যঃ প্রয়োগে নাটকাশ্রয়ে .
নানাবস্থাং সমাসাদ্য শুভাশুভকৃতস্তথা .. ১৩৮..
তথা প্রতিশিরশ্চাপি কর্তব্যং নাটকাশ্রয়ম্ .
দিব্যানাং মানুষাণাং চ দেশজাতিবয়ঃশ্রিতম্ .. ১৩৯..
পার্শ্বাগতা মস্তকিনস্তথা চৈব কিরীটিনঃ .
ত্রিবিধো মুকুটো জ্ঞেয়ো দিব্যপার্থিবসংশ্রিতঃ .. ১৪০..
দেবগন্ধর্বয়ক্ষাণাং পন্নগানাং সরক্ষসাম্ .
কর্তব্যা নৈকবিহিঅত মুকুটাঃ পার্শ্বমৌলয়ঃ .. ১৪১..
উত্তমা যে চ দিব্যানাং তে চ কার্যাঃ কিরীটিনঃ .
মধ্যমা মৌলিনশ্চৈব কনিষ্ঠাঃ ষির্ষমৌলিনঃ .. ১৪২..
নরাধিপানাং কর্তব্যা মস্তকে মুকুটা বুধৈঃ .
বিদ্যাধরাণাং চ সিদ্ধানাং চারণানাং তথৈব চ .. ১৪৩..
গ্রন্থিমৎকেশমুকুটাঃ কর্তব্যাস্তু প্রয়োক্তৃভিঃ .
রাক্ষোদানবদৈত্যানাং পিঙ্গকেশেক্ষণানি হি .. ১৪৪..
হরিচ্ছ্শ্মশ্রূণি চ তথা মুকুটাস্যানি কারয়েৎ .
উত্তমশ্চাপি যে তত্র তে কার্যাঃ পার্শ্বমৌলিনঃ .. ১৪৫..
কস্মাত্তু মুকুটাঃ সৃষ্টাঃ প্রয়োগে দিব্য্পার্থিবে .
কেশানাং ছেদনং দৃষ্টং বেদবাদে যথাশ্রুতি .. ১৪৬..
ভদ্রীকৃতস্য বা যজ্ঞে শিরসশ্ছাদনেচ্ছয়া .
কেশানামপ্যদীর্ঘৎবাৎস্মৃতং মুকুটধারণম্ .. ১৪৭..
সেনাপতেঃ পুনশ্চাপি যুবরাজস্য চৈব হি .
যোজয়েদর্ধমুকুটং মহামাত্রাশ্চ যে নরাঃ .. ১৪৮..
অমাত্যানাং কঞ্চুকিনাং তথা শ্রেষ্ঠিপুরোধসাম্ .
বেষ্টনাবদ্ধপট্টানি প্রতিশীর্ষাণি কারয়েৎ .. ১৪৯..
পিশাচোন্মত্তভূতানাং সাধকানাং তপস্বিনাম্ .
অনিস্তীর্ণপ্রতিজ্ঞানাং লম্বকেশং ভবেচ্ছিরঃ .. ১৫০..
শাক্যশ্রোত্রিয়নির্গ্রন্থপরিব্রাড্দীক্ষিতেষু চ .
শিরোমুণ্ডং তু কর্তব্যং যজ্ঞদীক্ষান্বিতেষু চ .. ১৫১..
তথা ব্রতানুগং চৈব শেষানাং লিঙ্গিনাং শিরঃ .
মুণ্ডং বা কুঞ্চিতং বাপি লম্বকেশমথাপি বা .. ১৫২..
ধূর্তানাং চৈব কর্তব্যং যে চ রাত্র্যুপজীবিনঃ .
শৃঙ্গারচিত্তাঃ পুরুষাস্তেষাং কুঞ্চিতমূর্ধজাঃ .. ১৫৩..
বালানামপি কর্তব্যং ত্রিশিখণ্ডবিভূষিতম্ .
জটামকুটবদ্ধং চ মুনীনাং তু ভবেচ্ছিরঃ .. ১৫৪..
চেটানামপি কর্তব্যং ত্রিশিখং মুণ্ডমেব বা .
বিদূষকস্য খলতিঃ স্যাৎকাকপদমেব বা .. ১৫৫..
শেএষাণামর্থয়োগেন দেশজাতিসমাশ্রয়ম্ .
শিরঃ প্রয়োক্তৃভিঃ কার্যং নানাবস্থান্তরাশ্রয়ম্ .. ১৫৬..
ভূষণৈর্বর্ণকৈর্বস্ত্রৈর্মাল্যৈশ্চৈব যথাবিধি .
এবং নানাপ্রকারৈস্তু বুদ্ধ্যা বেষান্প্রকল্পয়েৎ .. ১৫৭..
পূর্বং তু প্রকৃতিং স্থাপ্য প্রয়োগগুণসংভবাম্ .
স্ত্রীণাং বা পুরুষাণাং বাপ্যবস্থাং প্রাপ্য তাদৃশীম্ ..
১৫৮..
সর্বে ভাবাশ্চ দিব্যানাং কার্যা মানুষসংশ্রয়াঃ .
তেষাং চানিমিষৎবাদি নৈব কার্যং প্রয়োক্তৃভিঃ .. ১৫৯..
ইহ ভাবরসাশ্চৈব দৃষ্টিভিঃ সংপ্রতিষ্ঠিতাঃ .
দৃষ্ট্যৈব স্থাপিতো হ্যর্থঃ পশ্চাদঙ্গৈর্বিভাব্যতে .. ১৬০..
এবং জ্ঞেএয়াঙ্গরচনা নানাপ্রকৃতিসংভবা .
সজীব ইতি যঃ প্রোক্তস্তস্য বক্ষ্যামি লক্ষণম্ .. ১৬১..
যঃ প্রাণিনাং প্রবেশো বৈ সজীব ইতি সংজ্ঞিতঃ .
চতুষ্পদোঽথ দ্বিপদস্তথা চৈবাপদঃ স্মৃতঃ .. ১৬২..
উরগানপদান্ বিদ্যাদ্ দ্বিপদান্খগমানুষান্ .
গ্রাম্যা আরণ্যাঃ পশবো বিজ্ঞেয়াঃ স্যুশ্চতুষ্পদাঃ .. ১৬৩..
যে তে তু যদ্ধসংফেটৈরুপরোধৈস্তথৈব চ .
নানাপ্রহরণোপেতাঃ প্রয়োজ্যা নাটকে বুধৈঃ .. ১৬৪..
আয়ুধানি চ কার্যাণি পুরুষাণাং প্রমাণতঃ .
তান্যহং বর্তয়িষ্যামি যথাপুস্তপ্রমাণতঃ .. ১৬৫..
ভিণ্ডির্দ্বাদশতালঃ স্যাদ্দশ কুন্তো ভবেদথ .
অষ্টৌ শতঘ্নী শূলং চ তোমরঃ শক্তিরেব বা .. ১৬৬..
অষ্টৌ তালা ধনুর্জ্ঞেয়মায়ামোঽস্য দ্বিহস্তকঃ .
শরো গদা চ বজ্রা চ চতুস্তালং বিধীয়তে .. ১৬৭..
অঙ্গুলানি ৎবসিঃ কার্যশ্চৎবারিংশৎপ্রমাণতঃ .
দ্বাদশাঙ্গুলকং চক্রং ততোঽর্ধং প্রাস ইষ্যতে .. ১৬৮..
প্রাসবৎপট্টসং বিদ্যাদ্দণ্ডশ্চৈব তু বিংশতিঃ .
বিংশতিঃ কণয়শ্চৈব হ্যঙ্গুলানি প্রমাণতঃ .. ১৬৯..
শোডষাঙ্গুলবিস্তীর্ণং সবলং সংপ্রঘণ্টিকম্ .
ত্রিংশদঙ্গুলিমানেন কর্তব্যং খেটকং বুধৈঃ .. ১৭০..
জর্জরো দণ্ডকাষ্ঠং চ তথৈব প্রতিশীর্ষকম্ .
ছত্রং চামরং চৈব ধ্বজো শৃঙ্গার এব চ .. ১৭১..
যৎকিঞ্চিন্মানুষে লোকে দ্রব্যং পুংসাং প্রয়োজকম্ .
যচ্চোপকরণং সর্বে নাট্যে তৎসংপ্রকীর্তিতম্ .. ১৭২..
যদ্যস্য বিষয়প্রাপ্তং তেনোহ্যং তস্য লক্ষণম্ .
জর্জরে দণ্ডকাষ্ঠে চ সংপ্রবক্ষ্যামি লক্ষণম্ .. ১৭৩..
মাহেন্দ্রা বৈ ধ্বজাজ়্ প্রোক্তা লক্ষণৈর্বিশ্বকর্মণা .
এষান্যতমং কুর্যাজ্জর্জরং দারুকর্মতঃ .. ১৭৪..
অথবা বৃক্ষয়োনিঃ স্যাৎপ্ররোহো বাপি জর্জরঃ .
বেণুরেব ভবেচ্ছ্রেষ্ঠস্তস্য বক্ষ্যামি লক্ষণম্ ..১৭৫..
শ্বেতভূম্যাআঅং তু যো জাতঃ পুষ্যনক্ষত্রজস্তথা .
সংগ্রাহ্যো বৈ ভবেদ্বেণুর্জর্জরার্থে প্রয়ত্নতঃ .. ১৭৬..
প্রমাণমঙ্গুলানাং তু শতমষ্টোত্তর<ং ভবেৎ . পঞ্চপর্বা চতুর্গ্রন্থিস্তালমাত্রস্তথৈব চ .. ১৭৭.. স্থূলগ্রন্থির্ন কর্তব্যো ন শাখী ন চ কীটবান্ . ন কৃমিক্ষতপর্বা চ ন হীনশ্চান্যবেণুভিঃ .. ১৭৮.. মধুসর্পিস্সর্ষপাক্তং মাল্যধূপপুরস্কৃতম্ . উপাস্য বিধিবদ্বেণুং গৃহ্ণিয়াজ্জর্জরং প্রতি .. ১৭৯.. যো বিধির্যঃ ক্রমশ্চৈব মাহেব্দ্রে তু ধ্বজে স্মৃতঃ . স জর্জরস্য কর্তব্যঃ পুষ্যবেণুসমাশ্রয়ঃ .. ১৮০.. ভবেদ্যো দীর্ঘপর্বা তু তনুপত্রস্তথৈব চ . পর্বাগ্রতণ্ডুলশ্চৈব পুষ্যবেণুঃ স কীর্তিতঃ .. ১৮১.. বিধিরেষ ময়া প্রোক্তো জর্জরস্য প্রমাণতজ়ঃ . অত ঊর্ধ্বং প্রবক্ষ্যামি দণ্ডকাষ্ঠস্য লক্ষণম্ .. ১৮২.. কপিত্থবিল্ববংশেভ্যো দণ্ডকাষ্ঠং ভবেদথ . বক্রং চৈব হি কর্তব্যং ত্রিভাগে লক্ষণান্বিতম্ .. ১৮৩.. কীটৈর্নোপহতং যচ্চ ব্যাধিনা ন চ পীডিতম্ . মন্দশাখং ভবেদ্যচ্চ দণ্ডকাষ্ঠং তু তদ্ভবেৎ ..১৮৪.. যস্ত্বেভির্লক্ষণৈর্হীনং দণ্ডকাষ্ঠং সজর্জরম্ . কারয়েৎস ৎবপচয়ং মহান্তং প্রাপ্নুয়াদ্ধ্রুবম্ .. ১৮৫.. অথ শীর্ষবিভাগার্থং ঘটী কার্যা প্রয়ত্নতঃ . স্বপ্রমাণবিনির্দিষ্টা দ্বাত্রিংশত্যঙ্গুলানি বৈ .. ১৮৬.. বিল্বমধ্যেন কর্তব্যা ঘটী সিরসমাশ্রয়া . স্বিন্নেন বিল্বকল্কেন দ্রবেণ চ সমন্বিতা .. ১৮৭.. ভস্মনা বা তুষৈর্বাপি কারয়েৎপ্রতিশীর্ষকম্ . সংছাদ্য তু ততো বস্ত্রৈর্বিল্বদুগ্ধৈর্ঘটাশ্রয়ৈঃ .. ১৮৮.. বিল্বকল্কেন চীরং তু দিগ্ধ্বা সংযোজয়েদ্ঘটীম্ . ন স্থূলাং নানতাং তন্বীং দীর্ঘাং নৈব চ কারয়েৎ. .. ১৮৯.. তস্যামাতপশুষ্কায়াং সুশুষ্কায়ামথাপি বা . ছেদ্যং বুধাঃ প্রকুর্বন্তি বিধিদৃষ্টেন কর্মণা .. ১৯০.. সুতীক্ষ্ণেন তু শস্ত্রেণ অর্ধার্ধং প্রবিভজ্য চ . স্বপ্রমাণবিনির্দিষ্টং ললাটকৃতকোণকম্ .. ১৯১.. অর্ধাঙ্গুলং ললাটং তু কার্যং ছেদ্যং ষডঙ্গুলম্ . অর্ধার্ধমঙ্গুলং ছেদ্যং কটয়োর্দ্ব্যঙ্গুলং ভবেৎ .. ১৯২.. কটান্তে কর্ণনালস্য ছেদ্যং দ্ব্যধিকমঙ্গুলম্ . ত্র্যঙ্গুল.ম্ কর্ণবিবরং তথা স্যাচ্ছেদ্যমেব হি .. ১৯৩.. ততশ্চৈবাবটুঃ কার্যা সুসমা দ্বাদশাঙ্গুলা . ঘট্যাং হ্যেতৎসদা চ্ছেদ্যে বিধানং বিহিতং ময়া .. ১৯৪.. তস্যোপরিগতা কার্যা মুকুটা বহুশিল্পজাঃ . নানারত্নপ্রতিচ্ছন্না বহুরূপোপশোভিতাঃ .. ১৯৪.. তথোপকরণানীহ নাট্যয়োগকৃতানি বৈ . বহুপ্রকারয়ুক্তানি কুর্বীত প্রকৃতিং প্রতি .. ১৯৬.. যৎকিঞ্চিদস্মিন্ লোকে তু চরাচরসমন্বিতে . বিহিতং কর্ম শিল্পং বা তত্তূপকরণং স্মৃতম্ ..১৯৭.. যদ্যস্য বিষয়ং প্রাপ্তং তত্তদেবাভিগচ্ছতি . নাস্তন্তঃ পুরুষাণাং হি নাট্যোপকরণাশ্রয়ে .. ১৯৮.. যদ্যেনোৎপাদিতং কর্ম শিল্পয়োগক্রিয়াপি বা . তস্য তেন কৃতা সৃষ্টিঃ প্রমাণং লক্ষণং তথা .. ১৯৯.. যা কাষ্ঠয়ন্ত্রভূয়িষ্ঠা কৃতা সৃষ্টির্মহাত্মনা . ন সাস্মাকং নাট্যয়োগে কস্মাৎখেদাবহা হি সা .. ২০০.. যদ্দ্রব্যং জীবলোকে তু নানালক্ষণলক্ষিতম্ . তস্যানুকৃতিসংস্থানং নাট্যোওপকরণং ভবেৎ .. ২০১.. প্রাসাদগৃহয়ানানি নানাপ্রহরণানি চ . ন শক্যং তানি বৈ কর্তুং যথোক্তানীহ লক্ষণৈঃ .. ২০২.. লোকধর্মী ভবেত্ত্বন্যা নাট্যধর্মী তথাপরা . স্বভাবো লোকধর্মী তু বিভাবো নাট্যমেব হি .. ২০৩.. আয়সং ন তু কর্তব্যং ন চ সারময়ং তথা . নাট্যোপকরণং তজ্জ্ঞৈর্গুরুখেদকর< ভবেৎ .. ২০৪.. কাষ্ঠচর্মসু বস্ত্র্ষু জতুবেণুদলেষু চ . নাট্যোপকরণানীহ লঘুকর্মাণি কারয়েৎ .. ২০৫.. চর্মবর্মধ্বজাঃ শৈলাঃ প্রাসাদা দেবতাগৃহাঃ . হয়বারণয়ানানি বিমানানি গৃহাণি চ .. ২০৬.. পূর্বং বেণুদলৈঃ কৃৎবা কৃতীর্ভাবসমাশ্রয়াঃ . ততঃ সুরঙ্গৈরচ্ছাদ্য বস্ত্রৈঃ সারূপ্যমানয়েৎ .. ২০৭.. অথবা যদি বস্ত্রাণামসান্নিধ্যং ভবেদিহ . তালীয়ৈর্বা কিলিঞ্জৈর্বা শ্লক্ষ্ণৈর্বস্ত্রক্রিয়া ভবেৎ .. ২০৮.. তথা প্রহরণানি স্যুস্তৃণবেণুদলাদিভিঃ . জন্তুভাণ্ডক্রিয়াভিশ্চ নানারূপাণি নাটকে .. ২০৯.. প্রতিপাদং প্রতিশিরঃ প্রতিহস্তং প্রতিৎবচম্ . তৃণৈঃ কিলিঞ্জৈর্ভাণ্ডৈর্বা সারূপ্যাণি তু কারয়েৎ .. ২১০.. যদ্যস্য সদৃশং রূপং সারূপ্যগুণসংভবম্ . মৃণ্ময়ং তত্তু কৃৎস্নং তু নানারূপং তু কারয়েৎ ..২১১.. ভাণ্ডবস্ত্রমধূচ্ছিষ্টৈর্লাক্ষয়াভ্রদলেন চ . নাগাস্তে বিবিধাঃ কার্যা হ্যতসীশণবিল্বজৈঃ .. ২১২.. নানাকুসুমজাতীশ্চ ফলানি বিবিধানি চ . ভাণ্ডবস্ত্রমধূচ্ছিষ্টৈর্লাক্ষয়া বাপি কারয়েৎ ..২১৩.. ভাণ্ডবস্ত্রমধূচ্ছিষ্টৈস্তাম্রপত্রৈস্তথৈব চ . সম্যক্চ নীলীরাগেণাপ্যভ্রপত্রেণ চৈব হি .. ২১৪.. রঞ্জিতেনাভ্রপত্রেণ মণীশ্চৈব প্রকারয়েৎ . উপাশ্রয়মথাপ্যেষং শুল্ববঙ্গেন কারয়েৎ .. ২১৫.. বিবিধা মুকুটা দিবা পূর্বং যে গদিতা ময়া . তেঽভ্রপত্রোজ্বলাঃ কার্যা মণীব্যালোপশোভিতাঃ .. ২১৬.. ন শাস্ত্রপ্রভবং কর্ম তেষা.ম্ হি সমুদাহৃতম্ . আচার্যবুদ্ধ্যা কর্তব্যমূহাপোহপ্রয়োজিতম্ .. ২১৭.. এষ মর্ত্যক্রিয়ায়োগো ভবিষ্যৎকল্পিতো ময়া . কস্মাদল্পবলৎবং হি মনুষ্যেষু ভবিষ্যতি .. ২১৮.. মর্ত্যানামপি নো শক্যা বিভাবাঃ সর্বকাঞ্চনাঃ . নেষ্টাঃ সুবর্ণরত্নৈস্তু মুকুটা ভূষণানি বা .. ২১৯.. যুদ্ধে নিয়ুদ্ধে নৃত্তে বা বৃষ্টিব্যাপারকর্মণি . গুরুভাবাবসন্নস্য স্বেদো মূর্ছা চ জায়তে .. ২২০.. স্বেদমূর্ছাক্লমার্তস্য প্রয়োগস্তু বিনশ্যতি . প্রাণাত্যয়ঃ কদাচিচ্চ ভবেদ্ব্যায়তচেষ্টয়া .. ২২১.. তস্মাত্তাম্রময়ৈঃ পত্রৈরভ্রকৈ রঞ্জিতৈরপি . ভেণ্ডৈরপি মধূচ্ছিষ্টৈঃ কার্যাণ্যাভরণানি তু .. ২২২.. এবং লোকোপচারেণ স্ববুদ্ধিবিভবেন চ . নাট্যোপকরণানীহ বুধঃ সম্যক্ প্রয়োজয়েৎ .. ২২৩.. ন ভেদ্যং নৈব চ চ্ছেদ্যং ন প্রহর্তব্যমেব চ . রঙ্গে প্রহরণৈঃ কার্যং সংজ্ঞামাত্রং তু কারয়েৎ ..২২৪.. অথবা যোগশিক্ষাভির্বিদ্যামায়াকৃতেন বা . শস্ত্রমোক্ষঃ প্রকর্তব্যো রঙ্গমধ্যে প্রয়োক্তৃভিঃ .. ২২৫.. এবং নানাপ্রকারৈস্তু আয়ুধাভরণানি চ . নোক্তানি যানি চ ময়া লোকাদ্ গ্রাহ্যাণি তান্যপি .. ২২৬.. আহার্যাভিনয়ো হ্যেষ ময়া প্রোক্তঃ সমাসতঃ . অত ঊর্ধ্বং প্রবক্ষ্যামি সামান্যাভিনয়ং প্রতি .. ২২৭.. ইতি ভারতীয়ে নাট্যশাস্ত্রে আহার্যাভিনয়ো নামৈকবিংশোঽধ্যায়ঃ .