নাট্যশাস্ত্রম্ অধ্যায় ০৬

.. নাট্যশাস্ত্রম্ অধ্যায় ৬ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্
অথ ষষ্ঠোঽধ্যায়ঃ .
পূর্বরঙ্গবিধিং শ্রুৎবাপুনরাহুর্মহত্তমাঃ .
ভরতং মুনয়ঃ সর্বে প্রশ্নান্পঞ্চাভিধৎস্ব নঃ .. ১..
যে রসা ইতি পঠ্যন্তে নাট্যে নাট্যবিচক্ষণৈঃ .
রসৎবং কেন বৈ তেষামেতদাখ্যাতুমর্হসি .. ২..
ভাবাশ্চৈব কথং প্রোক্তাঃ কিং বা তে ভাবয়ন্ত্যপি .
সংগ্রহং কারিকাং চৈব নিরুক্তং চৈব তৎবতঃ .. ৩..
তেষাং তু বচনং শ্রুৎবা মুনীনাং ভরতো মুনিঃ .
প্রত্যুবাচ পুনর্বাক্যং রসভাববিকল্পনম্ .. ৪..
অহং বঃ কথয়িষ্যামি নিখিলেন তপোধনাঃ .
সংগ্রহং কারিকাং চৈব নিরুক্তং চ যথাক্রমম্ .. ৫..
ন শক্যমস্য নাট্যস্য গন্তুমন্তং কথঞ্চন .
কস্মাদ্বহুৎবাজ্জ্ঞানানাং শিল্পানাং বাপ্যনন্ততঃ .. ৬..
একস্যাপি ন বৈ শক্যস্ত্বন্তো জ্ঞানার্ণবস্য হি .
গন্তুং কিং পুনরন্যেষাং জ্ঞানানামর্থতত্ত্বতঃ .. ৭..
কিন্ত্বল্পসূত্রগ্রন্থার্থমনুমানপ্রসাধকম্ .
নাট্যস্যাস্য প্রবক্ষ্যামি রসভাবাদিসঙ্গ্রহম্ .. ৮..
বিস্তরেণোপদিষ্টানামর্থানাং সূত্রভাষ্যয়োঃ .
নিবন্ধো যো সমাসেন সঙ্গ্রহং তং বিদুর্বুধাঃ .. ৯..
রসা ভাবা হ্যভিনয়াঃ ধর্মী বৃত্তিপ্রবৃত্তয়ঃ .
সিদ্ধিঃ স্বরাস্তথাতোদ্যং গানং রঙ্গশ্চ সঙ্গ্রহঃ .. ১০..
অল্পাভিধানেনার্থো যঃ সমাসেনোচ্যতে বুধৈঃ .
সূত্রতঃ সাঽনুমতব্যা কারিকার্থপ্রদর্শিনী .. ১১..
নানানামাশ্রয়োৎপন্নং নিঘণ্টুনিগমান্বিতম্ .
ধাৎবর্থহেতুসংযুক্তং নানাসিদ্ধান্তসাধিতম্ .. ১২..
স্থাপিতোঽর্থো ভবেদ্যত্র সমাসেনার্থাসূচকঃ .
ধাৎবর্থবচনেনেহ নিরুক্তং তৎপ্রচক্ষতে .. ১৩..
সঙ্গ্রহো যো ময়া প্রোক্তঃ সমাসেন দ্বিজোত্তমাঃ .
বিস্তরং তস্য বক্ষ্যামি সনিরুক্তং সকারিকম্ .. ১৪..
শৃঙ্গারহাস্যকরুণা রৌদ্রবীরভয়ানকাঃ .
বীভৎসাদ্ভুতসংজ্ঞৌ চেত্যষ্টৌ নাট্যে রসাঃ স্মৃতাঃ .. ১৫..
এতে হ্যষ্টৌ রসাঃ প্রোক্তা দ্রুহিনেন মহাত্মনা .
পুনশ্চ ভাবান্বক্ষ্যামি স্থায়িসঞ্চারিসত্ত্বজান্ .. ১৬..
রতিহাসশ্চ শোকশ্চ ক্রোধোৎসাহৌ ভয়ং তথা .
জুগুপ্সা বিস্ময়শ্চেতি স্থায়িভাবাঃ প্রকীর্তিতাঃ .. ১৭..
নির্বেদগ্লানিশঙ্কাখ্যাস্তথাসূয়া মদঃ শ্রমঃ .
আলস্যং চৈব দৈন্যং চ চিন্তামোহঃ স্মৃতির্ধৃতিঃ .. ১৮..
ব্রীডা চপলতা হর্ষ আবেগো জডতা তথা .
গর্বো বিষাদ ঔৎসুক্যং নিদ্রাপস্মার এব চ .. ১৯..
সুপ্তং বিবোধোঽমর্ষশ্চাপ্যবহিত্থমথোগ্রতা .
মতির্ব্যাধিস্তথোন্মাদস্তথা মরণমেব চ .. ২০..
ত্রাসশ্চৈব বিতর্কশ্চ বিজ্ঞেয়া ব্যভিচারিণঃ .
ত্রয়স্ত্রিংশদমী ভাবাঃ সমাখ্যাতাস্তু নামতঃ .. ২১..
স্তম্ভঃ স্বেদোঽথ রোমাঞ্চঃ স্বরভেদোঽথ বেপথুঃ .
বৈবর্ণ্যমশ্রু প্রলয় ইত্যষ্টৌ সাৎবিকাঃ স্মৃতাঃ .. ২২..
আঙ্গিকৌ বাচিকশ্চৈব হ্যাহার্যঃ সাৎবিকস্তথা .
চৎবারোঽভিনয়া হ্যেতে বিজ্ঞেয়া নাট্যসংশ্রয়াঃ .. ২৩..
লোকধর্মী নাট্যধর্মী ধর্মীতি দ্বিবিধঃ স্মৃতঃ .
ভারতী সাৎবতী চৈব কৈশিক্যারভটী তথা .. ২৪..
চতস্রো বৃত্তয়ো হ্যেতা যাসু নাট্যং প্রতিষ্ঠিতম্ .
আবন্তী দাক্ষিণাত্যা চ তথা চৈবোঢ্রমাগধী .. ২৫..
পাঞ্চালমধ্যমা চেতি বিজ্ঞেয়াস্তু প্রবৃত্তয়ঃ .
দৈবিকী মানুষী চৈব সিদ্ধিঃ স্যাদ্দ্বিবিধৈব তু .. ২৬..
শারীরাশ্চৈব বৈণাশ্চ সপ্ত ষড্জাদয়ঃ স্বরাঃ .
[নিষাদর্ষভগান্ধারমধ্যপঞ্চমধৈবতাঃ ..]
ততং চৈবাবনদ্ধং চ ঘনং সুষিরমেব চ .. ২৭..
চতুর্বিধং চ বিজ্ঞেয়মাতোদ্যং লক্ষণান্বিতম্ .
ততং তন্ত্রীগতং জ্ঞেয়মবনদ্ধং তু পৌষ্করম্ .. ২৮..
ঘনস্তু তালো বিজ্ঞেয়ঃ সুষিরো বংশ এব চ .
প্রবেশাক্ষেপনিষ্ক্রামপ্রাসাদিকমথান্তরম্ ..২৯..
গানং পঞ্চবিধং জ্ঞেয়ং ধ্রুবায়োগসমন্বিতম্ .
চতুরস্রো বিকৃষ্টশ্চ রঙ্গস্ত্র্যশ্রশ্চ কীর্তিতঃ .. ৩০..
এবমেষোঽল্পসূত্রার্থো নির্দিষ্টো নাট্যসংগ্রহঃ .
অতঃ পরং প্রবক্ষ্যামি সূত্রগ্রন্থবিকল্পনম্ .. ৩১..

তত্র রসানেব তাবদাদাবভিব্যাখ্যাস্যামঃ . ন হি রসাদৃতে
কশ্চিদর্থঃ প্রবর্ততে .
তত্র বিভাবানুভাবব্যভিচারিসংযোগাদ্রসনিষ্পত্তিঃ .
কো দৃষ্টান্তঃ . অত্রাহ – যথা হি
নানাব্যঞ্জনৌষধিদ্রব্যসংযোগাদ্রসনিষ্পত্তিঃ তথা
নানাভাবোপগমাদ্রসনিষ্পত্তিঃ . যথা হি –
গুডাদিভির্দ্রব্যৈর্ব্যঞ্জনৈরৌষধিভিশ্চ ষাডবাদয়ো রসা
নির্বর্ত্যন্তে
তথা নানাভাবোপগতা অপি স্থায়িনো ভাবা রসৎবমাপ্নুবন্তীতি .
অত্রাহ – রস ইতি কঃ পদার্থঃ . উচ্যতে – আস্বাদ্যৎবাৎ .
কথমাস্বাদ্যতে রসঃ .
যথা হি নানাব্যঞ্জনসংস্কৃতমন্নং ভুঞ্জান রসানাস্বাদয়ন্তি
সুমনসঃ পুরুষ হর্ষাদীংশ্চাধিগচ্ছন্তি তথা
নানাভাবাভিনয়ব্যঞ্জিতান্ বাগঙ্গসত্তোপেতান্
স্থায়িভাবানাস্বাদয়ন্তি সুমনসঃ প্রেক্ষকাঃ
হর্ষাদীংশ্চাধিগচ্ছন্তি . তস্মান্নাট্যরসা
ইত্যভিব্যাখ্যাতাঃ .
অত্রানুবংশ্যৌ শ্লোকৌ ভবতঃ –

যথা বহুদ্রব্যয়ুতৈর্ব্যঞ্জনৈর্বহুভির্যুতম্ .
আস্বাদয়ন্তি ভুঞ্জানা ভক্তং ভক্তবিদো জনাঃ .. ৩২..
ভাবাভিনয়সংবদ্ধান্স্থায়িভাবাংস্তথা বুধাঃ .
আস্বাদয়ন্তি মনসা তস্মান্নাট্যরসাঃ স্মৃতাঃ .. ৩৩..
অত্রাহ – কিং রসেভ্যো ভাবানামভিনির্বৃত্তিরুতাহো ভাবেভ্যো
রসানামিতি . কেষাঞ্চিন্মতং
পরস্পরসম্বন্ধাদেষামভিনির্বৃত্তিরিতি .
তন্ন . কস্মাৎ . দৃশ্যতে হি ভাবেভ্যো রসানামভিনির্বৃত্তির্ন তু
রসেভ্যো ভাবানামভিনির্বৃত্তিরিতি . ভবন্তি চাত্র শ্লোকাঃ –
নানাভিনয়সম্বদ্ধান্ভাবয়ন্তি রসনিমান্ .
যস্মাত্তস্মাদমী ভাবা বিজ্ঞেয়া নাট্যয়োক্তৃভিঃ .. ৩৪..
নানাদ্রব্যৈবহুবিধৈর্ব্যঞ্জনং ভাব্যতে যথা .
এবং ভাবা ভাবয়ন্তি রসানভিনয়ৈঃ সহ .. ৩৫..
ন ভাবহীনোঽস্তি রসো ন ভাবো রসবর্জিতঃ .
পরস্পরকৃতা সিদ্ধিস্তয়োরভিনয়ে ভবেৎ .. ৩৬..
ব্যঞ্জনৌষধিসংযোগো যথান্নং স্বাদুতাং নয়েৎ .
এবং ভাবা রসাশ্চৈব ভাবয়ন্তি পরস্পরম্ .. ৩৭..
যথা বীজাদ্ভবেদ্বৃক্ষো বৃক্ষাৎপুষ্পং ফলং যথা .
তথা মূলং রসাঃ সর্বে তেভ্যো ভাবা ব্যবস্থিতাঃ .. ৩৮..
তদেষং রসানামুৎপত্তিবর্ণদৈবতনিদর্শনান্যভিব্যাখ্যাস্যামঃ .
তেষামুৎপত্তিহেতবশ্চৎবারো রসাঃ . তদ্যথা – শৃঙ্গারো
রৌদ্রৌ বীরো বীভৎস ইতি . অত্র –
শৃঙ্গারাদ্ধি ভবেদ্ধাস্যো রৌদ্রাচ্চ করুণো রসঃ .
বীরাচ্চৈবাদ্ভুতোৎপত্তির্বীভৎসাচ্চ ভয়ানকঃ .. ৩৯..
শৃঙ্গারানুকৃতির্যা তু স হাস্যস্তু প্রকীর্তিতঃ .
রৌদ্রস্যৈব চ যৎকর্ম স জ্ঞেয়ঃ করুণো রসঃ .. ৪০..
বীরস্যাপি চ যৎকর্ম সোঽদ্ভুতঃ পরিকীর্তিতঃ .
বীভৎসদর্শনং যচ্চ জ্ঞেয়ঃ স তু ভয়ানকঃ .. ৪১..
অথ বর্ণাঃ –
শ্যামো ভবতি শৃঙ্গারঃ সিতো হাস্যঃ প্রকীর্তিতঃ .
কপোতঃ করুণশ্চৈব রক্তো রৌদ্রঃ প্রকীর্তিতঃ .. ৪২..
গৌরো বীরস্তু বিজ্ঞেয়ঃ কৃষ্ণশ্চৈব ভয়ানকঃ .
নীলবর্ণস্তু বীভৎসঃ পীতশ্চৈবাদ্ভুতঃ স্মৃতঃ .. ৪৩..
অথ দৈবতানি –
শৃঙ্গারো বিষ্ণুদেবত্যো হাস্যঃ প্রমথদৈবতঃ .
রৌদ্রো রুদ্রাধিদৈবত্যঃ করুণো যমদৈবতঃ .. ৪৪..
বীভৎসস্য মহাকালঃ কালদেবো ভয়ানকঃ .
বীরো মহেন্দ্রদেবঃ স্যাদদ্ভুতো ব্রহ্মদৈবতঃ .. ৪৫..
এতমেতেষাং রসানামুৎপত্তিবর্ণদৈবতান্যভিব্যাখ্যাতানি .
ইদানীমনুভাববিভাবব্যভিচারিসংযুক্তানাং
লক্ষণনিদর্শনান্যভিব্যাখ্যাস্যামঃ . স্থায়িভাবাংশ্চ
রসৎবমুপনেষ্যামঃ .
তত্র শৃঙ্গারো নাম রতিস্থায়িভাবপ্রভবঃ . উজ্জ্বলবেষাত্মকঃ .
যৎকিঞ্চিল্লোকে শুচি মেধ্যমুজ্জ্বলং দর্শনীয়ং বা
তচ্ছৃঙ্গারেণোপমীয়তে .
যস্তাবদুজ্জ্বলবেষঃ স শৃঙ্গারবানিত্যুচ্যতে . যথা চ
গোত্রকুলাচারোৎপন্নান্যাপ্তোপদেশসিদ্ধানি পুংসাং নামানি ভবন্তি
তথৈবেষাং রসানাং ভাবানাং চ নাট্যাশ্রিতানাং
চার্থানামাচারোৎপন্নান্যোপ্তোপদেশসিদ্ধানি নামানি .
এবমেষ আচারসিদ্ধো হৃদ্যোজ্জ্বলবেষাত্মকৎবাচ্ছৃঙ্গারো রসঃ
.
স চ স্ত্রীপুরুষহেতুক উত্তময়ুবপ্রকৃতিঃ .
তস্য দ্বে অধিষ্ঠানে সম্ভোগো বিপ্রলম্ভশ্চ . তত্র
সম্ভোগস্তাবৎ
ঋতুমাল্যানুলেপনালঙ্কারেষ্টজনবিষয়বরভবনোপভোগোপবন-
গমনানুভবনশ্রবণদর্শনক্রীডালীলাদিভির্বিভাবৈরুৎপদ্যতে
.
তস্য
নয়নচাতুর্যভ্রূক্ষেপকটাক্ষসঞ্চারললিতমধুরাঙ্গহার-
বাক্যাদিভিরনুভাবৈরভিনয়ঃ প্রয়োক্তব্যঃ .
ব্যভিচারিণশ্চাস্যালস্যৌগ্র্যজুগুপ্সাবর্জ্যাঃ .
বিপ্রলম্ভকৃতস্তু
নির্বেদগ্লানিশঙ্কাসূয়াশ্রমচিন্তৌৎসুক্যনিদ্রাস্বপ্নবিবোধব্যাধ্যুন্মাদ-
মদাপস্মারজাড্যমরণাদিভিরনুভাবৈরভিনেতব্যঃ .
অত্রাহ – যদ্যয়ং রতিপ্রভবঃ শৃঙ্গারঃ কথমস্য করুণাশ্রয়িণো
ভাবা ভবন্তি .
অত্রোচ্যতে – পূর্বমেবাভিহিতং সম্ভোগবিপ্রলম্ভকৃতঃ শৃঙ্গার
ইতি .
বৈশিকশাস্ত্রকারৈশ্চ দশাবস্থোঽভিহিতঃ . তাশ্চ
সামান্যাভিনয়ে বক্ষ্যামঃ .
করুণস্তু
শাপক্লেশবিনিপতিতেষ্টজনবিভবনাশবধবন্ধসমুত্থো
নিরপেক্ষভাবঃ .
ঔৎসুক্যচিন্তাসমুত্থঃ সাপেক্ষভাবো বিপ্রলম্ভকৃতঃ .
এবমন্যঃ করুণোঽন্যশ্চ বিপ্রলম্ভ ইতি . এবমেষ
সর্বভাবসংযুক্তঃ শৃঙ্গারো ভবতি .
অপি চ
সুখপ্রায়েষু সম্পন্নঃ ঋতুমাল্যদিসেবকঃ .
পুরুষঃ প্রমদায়ুক্তঃ শৃঙ্গার ইতি সংজ্ঞিতঃ .. ৪৬..
অপি চাত্র সূত্রার্থানুবিদ্ধে আর্যে ভবতঃ .
ঋতুমাল্যালঙ্কারৈঃ প্রিয়জনগান্ধর্বকাব্যসেবাভিঃ .
উপবনগমনবিহারৈঃ শৃঙ্গাররসঃ সমুদ্ভবতি .. ৪৭..
নয়নবদনপ্রসাদৈঃ স্মিতমধুরবচোধৃতিপ্রমোদৈশ্চ .
মধুরৈশ্চাঙ্গবিহারৈস্তস্যাভিনয়ঃ প্রয়োক্তব্যঃ .. ৪৮..

অথ হাস্যো নাম হাসস্থায়িভাবাত্মকঃ . স চ
বিকৃতপরবেষালঙ্কারধার্ষ্ট্যলৌল্যকুহকাসৎপ্রলাপব্যঙ্গদর্শন-
দোষোদাহরণাদিভির্বিভাবৈরুৎপদ্যতে . তস্যোষ্ঠনাসাকপোলস্পন্দন-
দৃষ্টিব্যাকোশাকুঞ্চনস্বেদাস্যরাগপার্শ্বগ্রহণাদিভিরনুভাবৈরভিনয়ঃ
প্রয়োক্তব্যঃ .
ব্যভিচারিণশ্চাস্যাবহিত্থালস্যতন্দ্রানিদ্রাস্বপ্নপ্রবোধাদয়ঃ .
দ্বিবিধশ্চায়মাত্মস্থঃ পরস্থশ্চ . যদা স্বয়ং হসতি
তদাঽত্মস্থঃ .
যদা তু পরং হাসয়তি তদা পরস্থঃ .
অত্রানুবংশ্যে আর্যে ভবতঃ .
বিপরিতালঙ্কারৈর্বিকৃতাচরাভিধানবেষৈশ্চ .
বিকৃতৈরর্থবিশেষৈর্হসতীতি রসঃ স্মৃতো হাস্যঃ .. ৪৯..
বিকৃতাচারৈর্বাক্যৈরঙ্গবিকারৈশ্চ বিকৃতবেষৈশ্চ .
হাসয়তি জনং যস্মাত্তস্মজ্জ্জ্ঞেয়ো রসো হাস্যঃ ..৫০..
স্ত্রীনীচপ্রকৃতাবেষ ভূয়িষ্ঠং দৃশ্যতে রসঃ .
ষড্ভেদাশ্চাস্য বিজ্ঞেয়াস্তাংশ্চ বক্ষ্যাম্যহং পুনঃ .. ৫১..
স্মিতমথ হসিতং বিহসিতমুপহসিতং চাপহসিতমতিহসিতম্ .
দ্বৌ দ্বৌ ভেদৌ স্যাতামুত্তমমধ্যাধমপ্রকৃতৌ..৫২..
তত্র
স্মিতহসিতে জ্যেষ্ঠানাং মধ্যানাং বিহসিতোপহসিতে চ .
অধমানামপহসিতং হ্যতিহসিতং চাপি বিজ্ঞেয়ম্ .. ৫৩..
অত্র শ্লোকাঃ –
ঈষদ্বিকসিতৈর্গণ্ডৈঃ কটাক্ষৈঃ সৌষ্ঠবান্বিতৈঃ .
অলক্ষিতদ্বিজং ধীরমুত্তমানাং স্মিতং ভবেৎ .. ৫৪..
উৎফুল্লানননেত্রং তু গণ্ডৈর্বিকসিতৈরথ .
কিঞ্চিল্লক্ষিতদন্তং চ হসিতং তদ্বিধীয়তে .. ৫৫..
অথ মধ্যমানাম্ –
আকুঞ্চিতাক্ষিগণ্ডং যৎসস্বনং মধুরং তথা .
কালাগতং সাস্যরাগং তদ্বৈ বিহসিতং ভবেৎ..৫৬..
উৎফুল্লনাসিকং যত্তু জিহ্মদৃষ্টিনিরীক্ষিতম্ .
নিকুঞ্চিতাঙ্গকশিরস্তচ্চোপহসিতং ভবেৎ .. ৫৭..
অথাধমানাম্ –
অস্থানহসিতং যত্তু সাশ্রুনেত্রং তথৈব চ .
উৎকম্পিতাংসকশিরস্তচ্চাপহসিঅতং ভবেৎ .. ৫৮..
সংরব্ধসাশ্রুনেত্রং চ বিকৃষ্টস্বরমুদ্ধতম্ .
করোপগূঢপার্শ্বং চ তচ্চাতিহসিতং ভবেৎ .. ৫৯..
হাস্যস্থানানি যানি স্যুঃ কার্যোৎপন্নানি নাটকে .
উত্তমাধমমধ্যানামেবং তানি প্রয়োজয়েৎ .. ৬০..
ইত্যেষ স্বসমুত্থস্তথা পরসমুত্থশ্চ বিজ্ঞেয়ঃ .
দ্বিবিধস্ত্রিপ্রকৃতিগতস্ত্র্যবস্থভাবো রসো হাস্যঃ .. ৬১..

অথ করুণো নাম শোকস্থায়িভাবপ্রভবঃ . স চ
শাপক্লেশবিনিপতিতেষ্টজনবিপ্রয়োগবিভবনাশবধবন্ধবিদ্রবোপঘাত-
ব্যসনসংযোগাদিভির্বিভাবৈঃ সমুপজায়তে .
তস্যাশ্রুপাতপরিদেবনমুখশোষণবৈবর্ণ্যস্রস্তগাত্রতানিশ্শ্বাস-
স্মৃতিলোপাদিভিরনুভাবৈরভিনয়ঃ প্রয়োক্তব্যঃ .
ব্যভিচারিণশ্চাস্য
নির্বেদগ্লানিচিন্তৌৎসুক্যাবেগভ্রমমোহশ্রমভয়বিষাদদৈন্যব্যাধি-
জডতোন্মাদাপস্মারত্রাসালস্যমরণস্তম্ভবেপথুবৈবর্ণ্যাশ্রু-
স্বরভেদাদয়ঃ .
অত্রার্যে ভবতঃ –
ইষ্টবধদর্শনাদ্বা বিপ্রিয়বচনস্য সংশ্রবাদ্বাপি .
এভির্ভাববিশেষৈঃ করুণো নাম সংভবতি .. ৬২..
সস্বনরুদিতৈর্মোহাগমৈশ্চ পরিদৈবতৈর্বিলপিতৈশ্চ .
অভিনেয়ঃ করুণরসো দেহায়াসাভিঘাতৈশ্চ .. ৬৩..

অথ রৌদ্রো নাম ক্রোধস্থায়িভাবাত্মকো
রক্ষোদানবোদ্ধতমনুষ্যপ্রকৃতিঃ
সংগ্রামহেতুকঃ . স চ
ক্রোধাধর্ষণাধিক্ষেপানৃতবচনোপঘাতবাক্পা-
রুষ্যাভিদ্রোহমাৎসর্যাদিভির্বিভাবৈরুৎপদ্যতে . তস্য চ
তাডনপাটনপীডাচ্ছেদনপ্রহরণাহরণশস্ত্রসংপাতসংপ্রহাররুধিরাকর্ষণাদ্যানি
কর্মাণি . পুনশ্চ
রক্তনয়নভ্রুকুটিকরণদন্তোষ্ঠপীডনগণ্ডস্ফুরণ-
হস্তাগ্রনিষ্পেষাদিরনুভাবৈরভিনয়ঃ প্রয়োক্তব্যঃ .

ভাবাশ্চাস্যাসম্মোহোৎসাহাবেগামর্ষচপলতৌগ্র্যগর্বস্বেদবেপথুরোমাঞ্চ-
গদ্গদাদয়ঃ .
অত্রাহ – যদভিহিতং রক্ষোদানবাদীনাং রৌদ্রো রসঃ .
কিমন্যেষাং নাস্তি . উচ্যতে –
অস্ত্যন্যেষামপি রৌদ্রো রসঃ . কিন্ত্বধিকারোঽত্র গৃহ্যতে . তে হি
স্বভাবত
এব রৌদ্রঃ . কস্মাৎ .
বহুবাহবো বহুমুখাঃ প্রোদ্ধূতবিকীর্ণপিঙ্গলশিরোজাঃ .
রক্তোদ্বৃত্তবিলোচনা ভীমাসিতরূপিণশ্চৈব .
যচ্চ কিঞ্চিৎসমারম্ভতে স্বভাবচেষ্টিতং বাগঙ্গাদিকং
তৎসর্বং রৌদ্রমেবৈষাম্ . শৃঙ্গারশ্চ তৈঃ প্রায়শঃ
প্রসভ্যং সেব্যতে . তেষাং
চানুকারিণো যে পুরুষস্তেষামপি সঙ্গ্রামসম্প্রহারকৃতো রৌদ্রো
রসোঽনুমন্তব্যঃ .
অত্রানুবংশ্যে আর্যে ভবতঃ –
যুদ্ধপ্রহারঘাতনবিকৃতচ্ছেদনবিদারণৈশ্চৈব .
সংঙ্গ্রামসম্ভ্রমাদ্যৈরেভিঃ সঞ্জায়তে রৌদ্রঃ .. ৬৪..
নানাপ্রহরণমোক্ষৈঃ শিরঃকবন্ধভুজকর্তনৈশ্চৈব .
এভিশ্চার্থবিশেষৈরস্যাভিনয়ঃ প্রয়োক্তব্যঃ .. ৬৫..
ইতি রৌদ্ররসো দৃষ্টো রৌদ্রবাগঙ্গচেষ্টিতঃ .
শস্ত্রপ্রহারভূয়িষ্ঠ উগ্রকর্মক্রিয়াত্মকঃ .. ৬৬..

অথ বীরো নামোত্তমপ্রকৃতিরুৎসাহাত্মকঃ . স
চাসংমোহাধ্যবসায়ন-
বিনয়বলপরাক্রমশক্তিপ্রতাপপ্রভাবাদিভির্বিভাবৈরুৎপদ্যতে .
তস্য স্থৈর্যধৈর্যশৌর্যত্যাগবৈশারদ্যাদিভিরনুভাবৈরভিনয়ঃ
প্রয়োক্তব্যঃ . ভাবাশ্চাস্য
ধৃতিমতিগর্বাবেগৌগ্র্যামর্ষস্মৃতিরোমাঞ্চাদয়ঃ .

অত্রার্যে রসবিচারমুখে –
উৎসাহাধ্যবসায়াদবিষাদিৎবাদবিস্ময়ামোহাৎ .
বিবিধাদর্থবিশেষাদ্বীররসো নাম সম্ভবতি .. ৬৭..
স্থিতিধৈর্যবীর্যগর্বৈরুৎসাহপরাক্রমপ্রভাবৈশ্চ .
বাক্যৈশ্চাক্ষেপকৃতৈর্বীররসঃ সম্যগভিনেয়ঃ .. ৬৮..

অথ ভয়ানকো নাম ভয়স্থায়িভাবাত্মকঃ . স চ
বিকৃতরবসত্ত্বদর্শনশিবোলূকত্রাসোদ্বেগশূন্যাগারারণ্যগমনস্বজনবধবন্ধ-
দর্শনশ্রুতিকথাদিভির্বিভাবৈরুৎপদ্যতে .তস্য
প্রবেপিতকরচরণনয়নচপলপুলকমুখবৈবর্ণ্যস্বরভেদাদিভিরনুভাবৈরভিনয়ঃ
প্রয়োক্তব্যঃ .
ভাবাশ্চাস্য
স্তম্ভস্বেদগদ্গদরোমাঞ্চবেপথুস্বরভেদবৈবর্ণ্যশঙ্কামোহদৈন্যাবেগ-
চাপলজডতাত্রাসাপস্মারমরণাদয়ঃ .
অত্রার্যাঃ –
বিকৃতরবসত্ত্বদর্শনসংগ্রামারণ্যশূন্যগৃহগমনাৎ .
গুরুনৃপয়োরপরাধাৎকৃতকশ্চ ভয়ানকো জ্ঞেয়ঃ .. ৬৯..
গাত্রমুখদৃষ্টিভেদৈরূরুস্তম্ভাভিবীক্ষণোদ্বেগৈঃ .
সন্নমুখশোষহৃদয়স্পন্দনরোমোদ্গমৈশ্চ ভয়ম্ .. ৭০..
এতৎস্বভাবজং স্যাৎসত্ত্বসমুত্থং তথৈব কর্তব্যম্ .
পুনরেভিরেব ভাবৈঃ কৃতকং মৃদুচেষ্টিতৈঃ কার্যম্ ..৭১..
করচরণবেপথুস্তম্ভগাত্রহৃদয়প্রকম্পেন .
শুষ্কোষ্ঠতালুকণ্ঠৈর্ভয়ানকো নিত্যমভিনেয়ঃ .. ৭২..

অথ বীভৎসো নাম জুগুপ্সাস্থায়িভাবাত্মকঃ . স
চাহৃদ্যাপ্রিয়াচোষ্যানিষ্টশ্রবণদর্শনকীর্তনাদিভির্বিভাবৈরুৎপদ্যতে
. তস্য
সর্বাঙ্গসংহারমুখবিকূণনোল্লেখননিষ্ঠীবনোদ্বেজনাদিভিরনুভাবৈরভিনয়ঃ
প্রয়োক্তব্যঃ . ভাবাশ্চাস্যাপস্মারোদ্বেগাবেগমোহব্যাধিমরণাদয়ঃ .
অত্রানুবংশ্যে আর্যে ভবতঃ –
অনভিমতদর্শনেন চ গন্ধরসস্পর্শশব্দদোষৈশ্চ .
উদ্বেজনৈশ্চ বহুভির্বীভৎসরসঃ সমুদ্ভবতি .. ৭৩..
মুখনেত্রবিকূণনয়া নাসাপ্রচ্ছাদনাবনমিতাস্যৈঃ .
অব্যক্তপাদপতনৈর্বীভৎসঃ সম্যগভিনেয়ঃ .. ৭৪..

অথাদ্ভুতো নাম বিস্ময়স্থায়িভাবাত্মকঃ . স চ
দিব্যজনদর্শনেপ্সিতমনোরথাবাপ্ত্যুপবনদেবকুলাদিগমনসভাবিমান-
মায়েন্দ্রজালসম্ভাবনাদিভির্বিভাবৈরুৎপদ্যতে . তস্য
নয়নবিস্তারানিমেষপ্রেক্ষণরোমাঞ্চাশ্রুস্বেদহর্ষসাধুবাদদানপ্রবন্ধ-
হাহাকারবাহুবদনচেলাঙ্গুলিভ্রমণাদিভিরনুভাবৈরভিনয়ঃ
প্রয়োক্তব্যঃ .
ভাবাশ্চাস্য
স্তম্ভাশ্রুস্বেদগদ্গদরোমাঞ্চাবেগসম্ভ্রমজডতাপ্রলয়াদয়ঃ .
অত্রানুবংশ্যে আর্যে ভবতঃ –
যত্ত্বাতিশয়ার্থয়ুক্তং বাক্যং শিল্পং চ কর্মরূপং বা .
তৎসর্বমদ্ভুতরসে বিভাবরূপং হি বিজ্ঞেয়ম্ .. ৭৫..
স্পর্শগ্রহোল্লুকসনৈর্হাহাকারৈশ্চ সাধুবাদৈশ্চ .
বেপথুগদ্গদবচনৈঃ স্বেদাদ্যৈরভিনয়স্তস্য .. ৭৬..

শৃঙ্গারং ত্রিবিধং বিদ্যাৎদ্বাঙ্নৈপথ্যক্রিয়াত্মকম্ .
অঙ্গনৈপথ্যবাক্যৈশ্চ হাস্যরৌদ্রৌ ত্রিধা স্মৃতৌ .. ৭৭..
ধর্মোপঘাতজশ্চৈব তথার্থাপচয়োদ্ভবঃ .
তথা শোককৃতশ্চৈব করুণস্ত্রিবিধঃ স্মৃতঃ .. ৭৮..
দানবীরং ধর্মবীরং যুদ্ধবীরং তথৈব চ .
রসং বীরমপি প্রাহ ব্রহ্মা ত্রিবিধমেব হি .. ৭৯..
ব্যাজাচ্চৈবাপরাধাচ্চ বিত্রাসিতকমেব চ .
পুনর্ভয়ানকঞ্চৈব বিদ্যাৎ ত্রিবিধমেব হি .. ৮০..
বীভৎসঃ ক্ষোভজঃ শুদ্ধ উদ্বেগী স্যাৎ দ্বিতীয়কঃ .
বিষ্ঠাকৃমিভিরুদ্বেগী ক্ষোভজো রুধিরাদিঅজঃ .. ৮১..
দিব্যশ্চানন্দজশ্চৈব দ্বিধা খ্যাতোঽদ্ভুতো রসঃ .
দিব্যদর্শনজো দিব্যো হর্ষাদানদজঃ স্মৃতঃ .. ৮২..

[অথ শান্তো নাম শমস্থায়িভাবাত্মকো মোক্ষপ্রবর্তকঃ . স তু
তত্ত্বজ্ঞানবৈরাগ্যাশয়শুদ্ধ্যাদিভির্বিভাবৈঃ সমুৎপদ্যতে . তস্য
যমনিয়মাধ্যাত্মধ্যানধারণোপাসনসর্বভূতদয়ালিঙ্গগ্রহণাদিভি-
রনুভাবৈরভিনয়ঃ প্রয়োক্তব্যঃ . ব্যভিচাণশ্চাস্য
নির্বেদস্মৃতিধৃতিসর্বাশ্রমশৌচস্তম্ভরোমাঞ্চাদয়ঃ .
অত্রার্যাঃ শ্লোকাশ্চ ভবন্তি –
মোক্ষাধ্যাত্মসমুত্থস্তত্ত্বজ্ঞানার্থহেতুসংযুক্তঃ .
নৈঃশ্রেয়সোপদিষ্টঃ শান্তরসো নাম সম্ভবতি ..
বুদ্ধীন্দ্রিয়কর্মেন্দ্রিয়সংরোধাধ্যাত্মসংস্থিতোপেতঃ .
সর্বপ্রাণিসুখহিতঃ শান্তরসো নাম বিজ্ঞেয়ঃ ..
ন যত্র দুঃখং ন সুখং ন দ্বেষো নাপি মৎসরঃ .
সমঃ সর্বেষু ভূতেষু স শান্তঃ প্রথিতো রসঃ ..
ভাবা বিকারা রত্যাদ্যাঃ শান্তস্তু প্রকৃতির্মতঃ .
বিকারঃ প্রকৃতৈর্জাতঃ পুনস্তত্রৈব লীয়তে .
স্বং স্বং নিমিত্তমাসাদ্য শান্তাদ্ভাবঃ প্রবর্ততে ..
পুনর্নিমিত্তাপায়ে চ শান্ত এবোপলীয়তে .
এবং নবরসা দৃষ্টা নাট্যজ্ঞৈর্লক্ষণান্বিঅতাঃ ..]
এবমেতে রসা জ্ঞেয়াস্ত্বষ্টৌ লক্ষণলক্ষিতাঃ .
অত ঊর্ধ্বং প্রবক্ষ্যামি ভাবানামপি লক্ষণম্ .. ৮৩..

ইতি ভারতীয়ে নাট্যশাস্ত্রে রসাধ্যায়ঃ ষষ্ঠঃ ..