নাট্যশাস্ত্রম্ অধ্যায় ০৭

|| নাট্যশাস্ত্রম্ অধ্যায় ৭ ||
|| শ্রীরস্তু ||
ভরতমুনিপ্রণীতং নাট্যশাস্ত্রম্
অথ সপ্তমোঽধ্যায়ঃ |
ভাবানিদানীং ব্যাখ্যাস্যামঃ | অত্রাহ- ভাবা ইতি কস্মাৎ |
কিং ভবন্তীতি ভাবাঃ কিং বা ভাবয়ন্তীতি ভাবাঃ | উচ্যতে –
বাগঙ্গসত্ত্বোপেতান্কাব্যার্থান্ভাবয়ন্তীতি ভাবা ইতি |
ভূ ইতি করণে ধাতুস্তথা চ ভাবিতং বাসিতং
কৃতমিত্যনর্থান্তরম্ |
লোকেঽপি চ প্রসিদ্ধম্ | অহো হ্যনেন গন্ধেন রসেন বা সর্বমেব
ভাবিতমিতি |
তচ্চ ব্যাপ্ত্যর্থম্ |
শ্লোকাশ্চাত্র-
বিভাবেনাহৃতো যোঽর্থো হ্যনুভাবৈস্তু গম্যতে |
বাগঙ্গসত্ত্বাভিনয়ৈঃ স ভাব ইতি সংজ্ঞিতঃ || ১||
বাগঙ্গমুখরাগেণ সত্ত্বেনাভিনয়েন চ |
কবেরন্তর্গতং ভাবং ভাবয়ন্ভাব উচ্যতে || ২||
নানাভিনয়সম্বদ্ধান্ভাবয়ন্তি রসানিমান্ |
যস্মাতস্মাদমী ভাবা বিজ্ঞেয়া নাট্যয়োক্তৃভিঃ || ৩||
অথ বিভাব ইতি কস্মাৎ | উচ্যতে- বিভবো বিজ্ঞানার্থঃ |
বিভাবঃ কারণং নিমিত্তং হেতুরিতি পর্যায়াঃ | বিভাব্যতেঽনেন
বাগঙ্গসত্ত্বাভিনয়া ইত্যতো বিভাবঃ | যথা বিভাবিতং বিজ্ঞা-
তমিত্যনর্থান্তরম্ |
অত্র শ্লোকঃ –
বহবোঽর্থা বিভাব্যন্তে বাগঙ্গাভিনয়াশ্রয়াঃ |
অনেন যস্মাত্তেনায়ং বিভাব ইতি সংজ্ঞিতঃ || ৪||
অথানুভাব ইতি কস্মাৎ | উচ্যতে-
অনুভাব্যতেঽনেন বাগঙ্গসত্ত্বকৃতোঽভিনয় ইতি |
অত্র শ্লোকঃ –
বাগঙ্গাভিনয়েনেহ যতস্ত্বর্থোঽনুভাব্যতে |
শাখাঙ্গোপাঙ্গসংযুক্তস্ত্বনুভাবস্ততঃ স্মৃতঃ || ৫ ||
এবং তে বিভাবানুভাবসংযুক্তা ভাবা ইতি ব্যাখ্যাতাঃ | অতো
হ্যেষাং ভাবানাং সিদ্ধির্ভবতি | তস্মাদেষাং ভাবানাং
বিভাবানুভাবসংযুক্তানাং লক্ষণনিদর্শনান্যভিব্যাখ্যাস্যামঃ |
তত্র বিভাবানুভাবৌ লোকপ্রসিদ্ধৌ |
লোকস্বভাবানুগতৎবাচ্চ তয়োর্লক্ষণং
নোচ্যতেঽতিপ্রসঙ্গনিবৃত্যর্থম্ |
ভবতি চাত্র শ্লোকঃ –
লোকস্বভাবসংসিদ্ধা লোকয়াত্রানুগামিনঃ |
অনুভাবা বিভাবাশ্চ জ্ঞেয়াস্ত্বভিনয়ে বুধৈঃ || ৬||
তত্রাষ্টৌ ভাবাঃ স্থায়িনঃ | ত্রয়স্ত্রিংশদ্ব্যভিচারিণঃ |
অষ্টৌ
সাৎবিকা ইতি ভেদাঃ | এবমেতে কাব্যরসাভিব্যক্তিহেতব
একোনপঞ্চাশদ্ভাবাঃ
প্রত্যবগন্তব্যাঃ | এভ্যশ্চ সামান্যগুণয়োগেন রসা নিষ্পদ্যন্তে |
অত্র শ্লোকঃ-
যোঽর্থো হৃদয়সংবাদী তস্য ভাবো রসোদ্ভবঃ |
শরীরং ব্যাপ্যতে তেন শুষ্কং কাষ্ঠমিবাগ্নিনা || ৭||
অত্রাহ- যদি
কাব্যার্থসংশ্রিতৈর্বিভাবানুভাবব্যঞ্জিতৈরেকোনপঞ্চাশদ্ভাবৈঃ
সামান্যগুণয়োগেনাভিনিষ্পদ্যন্তে রসাস্তৎকথং স্থায়িন এব ভাবা
রসৎবমাপ্নুঅবন্তি | উচ্যতে- যথা হি
সমানলক্ষণাস্তুল্যপাণিপাদোদরশরীরাঃ
সমানাঙ্গপ্রত্যঙ্গা অপি পুরুষাঃ
কুলশীলবিদ্যাকর্মশিল্পবিচক্ষণৎবাদ্রাজ-
ৎবমাপ্নুবন্তি তত্রৈব চান্যেঽল্পবুদ্ধয়স্তেষামেবানুচরা ভবন্তি
তথা
বিভাবানুভাবব্যভিচারিণঃ স্থায়িভাবানুপাশ্রিতা ভবন্তি |
বহ্বাশ্রয়ৎবাস্বামিভূতাঃ স্থায়িনো ভাবাঃ |
তদ্বৎস্থানীয়পুরুষগুণভূতা অন্যে ভাবাস্তান্গুণতয়া শ্রয়ন্তে |
স্থায়িভাবা রসৎবমাপ্নুবন্তি | পরিজনভূতা ব্যভিচারিণো
ভাবাঃ |
অত্রাহ- কো দৃষ্টান্ত ইতি | যথা নরেন্দ্রো বহুজনপরিবারোঽপি স
এব নাম
লভতে নান্যঃ সুমহানপি পুরুষঃ তথা
বিভাবানুভাবব্যভিচারিপরিবৃতঃ
স্থায়ী ভাবো রসনাম লভতে |
ভবতি চাত্র শ্লোকঃ –
যথা নরাণাং নৃপতিঃ শিষ্যাণাং চ যথা গুরুঃ |
এবং হি সর্বভাবানাং ভাবঃ স্থায়ি মহানিহ || ৮||
লক্ষণং খলু পূর্বমভিহিতমেষাং রসসংজ্ঞকানাম্ | ইদানীং
ভাবসামান্যলক্ষণমভিধাস্যামঃ | তত্র স্থায়িভাবান্বক্ষ্যামঃ –

রতির্নাম প্রমোদাত্মিকা
ঋতুমাল্যানুলেপনাভরণভোজনবরভবনানুভবনা-
প্রাতিকূল্যাদিভির্বিভাবৈঃ সমুৎপদ্যতে |
তামভিনয়েৎস্মিতবদনমধুরকথন-
ভ্রূক্ষেপকটাক্ষাদিভিরনুভাবৈঃ | অত্র শ্লোকঃ –
ইষ্টার্থবিষয়প্রাপ্ত্যা রতিরিত্যুপজায়তে |
সৌম্যৎবাদভিনেয়া সা বাঙ্মাধুর্যাঙ্গচেষ্টিতৈঃ || ৯||

হাসো নাম
পরচেষ্টানুকরণকুহকাসম্বদ্ধপ্রলাপপৌরোভাগ্যমৌর্খ্যাদিভির্বিভাবৈঃ
সমুৎপদ্যতে | তমভিনয়েৎপূর্বোক্তৈর্হসিতাদিভিরনুভাবৈঃ |
ভবতি চাত্র শ্লোকঃ –
পরচেষ্টানুকরণাদ্ধাসঃ সমুপজায়তে |
স্মিতহাসাতিহসিতৈরভিনেয়ঃ স পণ্ডিতৈঃ || ১০||

শোকো নাম
ইষ্টজনবিয়োগবিভবনাশবধবন্ধদুঃখানুভনবনাদিভির্বিভাবৈঃ
সমুৎপদ্যতে.
তস্যাস্রপাতপরিদেবিতবিলপিতবৈবর্ণ্যস্বরভেদস্রস্তগাত্রতাভূমি-
পতনসস্বনরুদিতাক্রন্দিতদীর্ঘনিঃশ্বসিতজডতোন্মাদমোহমরণাদিভিরনুভা-
বৈরভিনয়ঃ প্রয়োক্তব্যঃ |
রুদিতমত্র ত্রিবিধম্ – আনন্দজমার্তিজমীর্ষ্যাসমুদ্ভবং চেতি |
ভবন্তি চাত্রার্যাঃ –
[আনন্দেঽপ্যার্তিকৃতং ত্রিবিধং রুদিতং সদা বুধৈর্জ্ঞেয়ম্ |
তস্য ৎবভিনয়য়োগান্বিভাবগতিতঃ প্রবক্ষ্যামি || ]
হর্ষোৎফুল্লকপোলং সানুস্মরণাদপাঙ্গবিসৃতাস্রম্ |
রোমাঞ্চগাত্রমনিভৃতমানন্দসমুদ্ভবং ভবতি || ১১||
পর্যাপ্তবিমুক্তাস্রং সস্বনমস্বস্থগাত্রগতিচেষ্টম্ |
ভূমিনিপাতনিবর্তিতবিলপিতমিত্যার্তিজং ভবতি || ১২||
প্রস্ফুরিতৌষ্ঠকপোলং সশিরঃকম্পং তথা সনিঃশ্বাসম্ |
ভ্রুকুটীকটাক্ষকুটিলং স্ত্রীণামীর্ষ্যাকৃতং ভবতি || ১৩||
স্ত্রীনীচপ্রকৃতিষ্বেষ শোকো ব্যসনসম্ভবঃ |
ধৈর্যেণোত্তমমধ্যানাং নীচানাং রুদিতেন চ || ১৪||
ক্রোধো নাম
আধর্ষণাক্রুষ্টকলহবিবাদপ্রতিকূলাদিভির্বিভাবৈঃ
সমুৎপদ্যতে | অস্য
বিকৃষ্টনাসাপুটোদ্বৃত্তনয়নসংদষ্ঠোষ্ঠপুট-
গণ্ডস্ফুরণাদিভিরনুভাবৈরভিনয়ঃ প্রয়োক্তব্যঃ |
রিপুজো গুরুজশ্চৈব প্রণয়িপ্রভবস্তথা |
ভৃত্যজঃ কৃতকশ্চেতি ক্রোধঃ পঞ্চবিধঃ স্মৃতঃ|| ১৫||
অত্রার্যা ভবন্তি –
ভৃকুটীকুটিলোৎকটমুখঃ সন্দষ্ঠোষ্ঠঃ স্পৃশন্করেণ করম্ |
ক্রুদ্ধঃ স্বভুজাপ্রেক্ষী শত্রৌ নির্যন্ত্রণং রুষ্যেৎ || ১৬||
কিঞ্চিদবাঙ্গ্মুখদৃষ্টিঃ সাস্রস্বেদাপমার্জনপরশ্চ |
অব্যক্তোল্বণচেষ্টো গুরৌ বিনয়য়ন্ত্রিতো রুষ্যেৎ || ১৭||
অল্পপ্রতরবিচারো বিকিরন্নশ্রূণ্যপাঙ্গবিক্ষেপৈঃ |
সভ্রুকুটিস্ফুরিতোষ্ঠঃ প্রণয়োপগতাং প্রিয়া রুষ্যেৎ || ১৮||
অথ পরিজনে তু রোষস্তর্জননির্ভর্ত্সনাক্ষিবিস্তারৈঃ |
বিপ্রেক্ষণৈশ্চ বিবিধৈরভিনেয়ঃ ক্রূরতারহিতঃ || ১৯||
কারণমবেক্ষমাণঃ প্রায়েণায়াসলিঙ্গসংযুক্তঃ |
বীররসান্তরচারী কার্যঃ কৃতকো ভবতি কোপঃ || ২০||

উৎসাহো নাম উত্তমপ্রকৃতিঃ. স
চাবিষাদশক্তিধৈর্যশৌর্যাদিভির্বিভাবৈ-
রুৎপদ্যতে. তস্য ধৈর্যত্যাগবৈশারদ্যাদিভিরনুভাবৈরভিনয়ঃ
প্রয়োক্তব্যঃ |
অত্র শ্লোকঃ –
অসম্মোহাদিভির্ব্যক্তো ব্যবসায়নয়াত্মকঃ |
উৎসাহস্ত্বভিনেয়ঃ স্যাদপ্রমাদোত্থিতাদিভিঃ || ২১||

ভয়ং নাম স্ত্রীনীচপ্রকৃতিকম্ |
গুরুরাজাপরাধশ্বাপদশূন্যাগারাটবীপর্বতগহনগজাহিদর্শননির্ভর্ত্সন- কান্তারদুর্দিননিশান্ধকরোলূকনক্তঞ্চরারাবশ্রবণাদিভির্বিভাবৈঃ
সমুৎপদ্যতে |
তস্য
প্রকম্পিতকরচরণহৃদয়কম্পনস্তম্ভমুখশোষজিহ্বাপরিলেহন-
স্বেদবেপথুত্রাসসপরিত্রাণান্বেষণধাবনোৎকৃষ্টাদিভিরনুভবৈরভিনয়ঃ
প্রয়োক্তব্যঃ |
অত্র শ্লোকাঃ –
গুরুরাজাপরাধেন রৌদ্রাণাং চাপি দর্শনাৎ |
শ্রবণাদপি ঘোরাণাং ভয়ং মোহেন জায়তে || ২২||
গাত্রকম্পনবিত্রাসৈর্বক্ত্রশোষণসম্ভ্রমৈঃ
বিস্ফারিতৈক্ষণৈঃ কার্যমভিনেয়ক্রিয়াগুণৈঃ || ২৩||
সত্ত্ববিত্রাসনোদ্ভূতং ভয়মুৎপদ্যতে নৃণাম্ |
স্রস্তাঙ্গাক্ষিনিমেষৈস্তদভিনেয়ং তু নর্তকৈঃ || ২৪||
অত্রার্যা ভবতি –
করচরণহৃদয়কম্পৈর্মুখশোষণবদনলেহনস্তম্ভৈঃ |
সম্ভ্রান্তবদনবেপথুসংত্রাসকৃতৈরভিনয়োঽস্য || ২৫||

জুগুপ্সা নাম স্ত্রীনীচপ্রকৃতিকা | সা
চাহৃদ্যদর্শনশ্রবণাদিভির্বিভাবৈঃ
সমুৎপদ্যতে | তস্যাঃ
সর্বাঙ্গসঙ্কোচনিষ্ঠীবনমুখবিকূণনহৃল্লেখাদি-
ভিরনুভাবৈরভিনয়ঃ প্রয়োক্তব্যঃ |
ভবতি চাত্র শ্লোকঃ –
নাসাপ্রচ্ছাদনেনেহ গাত্রসঙ্কোচনেন চ |
উদ্বেজনৈঃ সহৃল্লেখৈর্জুগুপ্সামভিনির্দিশেৎ || ২৬||

বিস্ময়ো নাম
মায়েন্দ্রজালমানুষকর্মাতিশয়চিত্রপুস্তশিল্পবিদ্যাতিশয়াদিভির্বিভাবৈঃ
সমুৎপদ্যতে | তস্য
নয়নবিস্তারানিমেষপ্রেক্ষিতভ্রূক্ষেপরোমহর্ষণশিরঃকম্পসাধুবাদাদিভি-
রনুভাবৈরভিনয়ঃ প্রয়োক্তব্যঃ |
ভবতি চাত্র শ্লোকঃ –
কর্মাতিশয়নির্বৃত্তো বিস্ময়ো হর্ষসম্ভবঃ |
সিদ্ধিস্থানে ৎবসৌ সাধ্যঃ প্রহর্ষপুলকাদিভিঃ || ২৭||

এবমেতে স্থায়িনো ভাবা রসসংজ্ঞাঃ প্রত্যবগন্তব্যাঃ |

ব্যভিচারিণ ইদানীং ব্যাখ্যাস্যামঃ | অত্রাহ – ব্যভিচারিণ ইতি
কস্মাৎ |
উচ্যতে – বি অভি ইত্যেতাবুপসর্গৌ | চর ইতি গত্যর্থো ধাতুঃ |
বিবিধমাভিমুখ্যেন
রসেষু চরন্তীতি ব্যভিচারিণঃ | বাগঙ্গসত্ত্বোপেতাঃ প্রয়োগে
রসান্নয়ন্তীতি
ব্যভিচারিণঃ | অত্রাহ – কথং নয়ন্তীতি | উচ্যতে – লোকসিদ্ধান্ত
এষঃ –
যথা সূর্য ইদং দিনং নক্ষত্রং বা নয়তীতি | ন চ তেন
বাহুভ্যাং স্কন্ধেন
বা নীয়তে | কিং তু লোকপ্রসিদ্ধমেতৎ | যথেদং সূর্যো নক্ষত্রং দিন
বা নয়তীতি |
এবমেতে ব্যভিচারিণ ইত্যবগন্তব্যাঃ | তানিহ সঙ্গ্রহাভিহিতাংস্ত্র-
যস্ত্রিংশদ্ব্যভিচারিণো ভাবান্ বর্ণয়িষ্যামঃ |

তত্র নির্বেদো নাম
দারিদ্র্যব্যাধ্যবমানাধিক্ষেপাক্রুষ্টক্রোধতাডনেষ্টজন-
বিয়োগতত্ত্বজ্ঞানাদিভির্বিভাবৈঃ সমুৎপদ্যতে স্ত্রীনীচকুসত্ত্বানাম্
.
রুদিতনিঃশ্বসিতোচ্ছ্বসিতসম্প্রধারণাদিভিরনুভাবৈস্তমভিনয়েৎ |
অত্র শ্লোকঃ –
দারিদ্র্যেষ্টবিয়োগাদ্যৈঃ নির্বেদো নাম জায়তে |
সম্প্রধারণনিঃশ্বাসৈস্তস্য ৎবভিনয়ো ভবেৎ || ২৮||
অত্রানুবংশ্যে আর্যে ভবতঃ –
ইষ্টজনবিপ্রয়োগাদ্দারিদ্র্যাদ্ব্যাধিতস্তথা দুঃখাৎ |
ঋদ্ধিং পরস্য দৃষ্ট্বা নির্বেদো নাম সম্ভবতি || ২৯||
বাষ্পপরিপ্লুতনয়নঃ পুনশ্চ নিঃশ্বাসনদীনমুখনেত্রঃ |
যোগীব ধ্যানপরো ভবতি হি নির্বেদবান্পুরুষঃ || ৩০||

গ্লানির্নাম বান্তবিরিক্তব্যাধিতপোনিয়মোপবাসমনস্তাপাতিশয়মদন-
সেবনাতিব্যায়ামাধ্বগমনক্ষুৎপিপাসানিদ্রাচ্ছেদাদিভির্বিভাবৈঃ
সমুৎপদ্যতে | তস্যাঃ ক্ষামবাক্যনয়নকপোলোদরমন্দপদোৎক্ষেপণবেপনা-
নুৎসাহতনুগাত্রবৈবর্ণ্যস্বরভেদাভিরনুভাবৈরভিনয়ঃ প্রয়োক্তব্যঃ
.
অত্রার্যে ভবতঃ –
বান্তবিরিক্তব্যাধিষু তপসা জরসা চ জায়তে গ্লানিঃ |
কার্শ্যেন সাভিনেয়া মন্দভ্রমণেন কম্পেন || ৩১||
গদিতৈঃ ক্ষামক্ষামৈর্নেত্রবিকারৈশ্চ দীনসঞ্চারৈঃ |
শ্লথভাবেনাঙ্গানাং মুহুর্মুহুর্নির্দিশেদ্ গ্লানিম্ || ৩২||

শঙ্কা নাম সন্দেহাত্মিকা স্ত্রীনীচপ্রভবা | চৌর্যাভিগ্রহণ-
নৃপাপরাধপাপকর্মকরণাদিভির্বিভাবৈঃ সমুৎপদ্যতে | তস্যা
মুহুর্মুহুরবলোকনাবকুণ্ঠনমুখশোষণজিহ্বালেহনমুখবৈবর্ণ্য-
স্বরভেদবেপথুশুষ্কোষ্ঠকণ্ঠায়াসসাধর্ম্যাদিভিরনুভাবৈরভিনয়ঃ
প্রয়োক্তব্যঃ |
চৌর্যাদিজনিতা শঙ্কা প্রায়ঃ কার্যা ভয়ানকে |
প্রিয়ব্যলীকজনিতা তথা শৃঙ্গারিণী মতা || ৩৩||
অত্রাকারসংবরণমপি কেচিদিচ্ছন্তি | তচ্চ
কুশলৈরুপাধিভিরিঙ্গিতৈশ্চোপলক্ষ্যম্ |
অত্রার্যে ভবতঃ –
দ্বিবিধা শঙ্কা কার্যাহ্যাত্মসমুত্থা চ পরসমুত্থা চ |
যা তত্রাত্মসমুত্থা সা জ্ঞেয়া দৃষ্টিচেষ্টাভিঃ || ৩৪||
কিঞ্চিৎপ্রবেপিতাঙ্গস্ত্বধোমুখো বীক্ষতে চ পার্শ্বানি |
গুরুসজ্জমানজিহ্বঃ শ্যামাস্যঃ শঙ্কিতঃ পুরুষঃ || ৩৫||

অসূয়া নাম
নানাপরাধদ্বেষপরৈশ্বর্যসৌভাগ্যমেধাবিদ্যালীলাদিভির্বিভাবৈঃ
সমুৎপদ্যতে | তস্যাশ্চ পরিষদি
দোষপ্রখ্যাপনগুণোপঘাতের্ষ্যাচক্ষুঃপ্রদা-
নাধোমুখভ্রুকুটীক্রিয়াবজ্ঞানকুৎসনাদিভিরনুভাবৈরভিনয়ঃ
প্রয়োক্তব্যঃ |
অত্রার্যে ভবতঃ –
পরসৌভাগ্যেশ্বরতামেধালীলাসমুচ্ছ্রয়ান্দৃষ্ট্বা |
উৎপদ্যতে হ্যসূয়া কৃতাপরাধো ভবেদ্যশ্চ || ৩৬||
ভ্রুকুটিকুটিলোৎকটমুখৈঃ সের্ষ্যাক্রোধপরিবৃত্তনেত্রৈশ্চ |
গুণনাশনবিদ্বেষৈস্তত্রাভিনয়ঃ প্রয়োক্তব্যঃ || ৩৭||

মদো নাম মদ্যোপয়োগাদুৎপদ্যতে | স চ ত্রিবিধঃ পঞ্চবিভাবশ্চ |
অত্রার্যা ভবন্তি –
জ্ঞেয়স্তু মদস্ত্রিবিধস্তরুণো মধ্যস্তথাবকৃষ্টশ্চ |
করণং পঞ্চবিধং স্যাত্তস্যাভিনয়ঃ প্রয়োক্তব্যঃ || ৩৮||
কশ্চিন্মত্তো গায়তি রোদিতি কশ্চিত্তথা হসতি কশ্চিৎ |
পরুষবচনাভিধায়ী কশ্চিৎকশ্চিত্তথা স্বপিতি || ৩৯||
উত্তমসত্ত্বঃ শেতে হসতি চ গায়তি চ মধ্যমপ্রকৃতিঃ |
পরুষবচনাভিধায়ী রোদত্যপি চাধমপ্রকৃতিঃ || ৪০||
স্মিতবচনমধুররাগো হৃষ্টতনুঃ কিঞ্চিদাকুলিতবাক্যঃ |
সুকুমারাবিদ্ধগতিস্তরুণমদস্তূত্তমপ্রকৃতিঃ || ৪১||
স্খলিতাঘূর্ণিতনয়নঃ স্রস্তব্যাকুলিতবাহুবিক্ষেপঃ |
কুটিলব্যাবিদ্ধগতির্মধ্যমদো মধ্যমপ্রকৃতিঃ || ৪২||
নষ্টস্মৃতির্হতগতিশ্ছর্দিতহিক্কাকফৈঃ সুবীভৎসঃ |
গুরুসজ্জমানজিহ্বো নিষ্ঠীবতি চাধমপ্রকৃতিঃ || ৪৩||
রঙ্গে পিবতঃ কার্যা মদবৃদ্ধির্নাট্যয়োগমাসাদ্য |
কার্যো মদক্ষয়ো বৈ যঃ খলু পীৎবা প্রবিষ্টঃ স্যাৎ || ৪৪||
সন্ত্রাসাচ্ছোকাদ্বা ভয়াৎপ্রহর্ষাচ্চ কারণোপগতাৎ |
উৎক্রম্যাপি হি কার্যো মদপ্রণাশঃ ক্রমাত্তজ্জ্ঞৈঃ || ৪৫||
এভির্ভাববিশেষৈর্মদো দ্রুতং সম্প্রণাশমুপয়াতি |
অভ্যুদয়সুখৈর্বাক্যৈর্যথৈব শোকঃ ক্ষয়ং যাতি || ৪৬||

শ্রমো নাম অধ্বব্যায়ামসেবনাদিভির্বিভাবৈঃ সমুৎপদ্যতে. তস্য
গাত্রপরিমর্দনসংবাহননিঃশ্বসিতবিজৃম্ভিতমন্দপদোৎক্ষেপণনয়ন-
বদনবিকূণনসীৎকরাদিভিরনুভাবৈরভিনয়ঃ প্রয়োক্তব্যঃ |
অত্রার্যা –
নৃত্তাধ্বব্যায়ামান্নরস্য সঞ্জায়তে শ্রমো নাম |
নিঃশ্বাসখেদগমনৈস্তস্যাভিনয়ঃ প্রয়োক্তব্যঃ || ৪৭||

আলস্যং নাম খেদব্যাধিগর্ভস্বভাবশ্রমসৌহিত্যাদিভির্বিভাবৈঃ
সমুৎপদ্যতে স্ত্রীনীচানাম্ |
তদভিনয়েৎসর্বকর্মানভিলাষশয়না-
সননিদ্রাতন্দ্রীসেবনাদিভিরনুভাবৈঃ |
অত্রার্যা –
আলস্যং ৎবভিনেয়ং খেদাপগতং স্বভাবজং চাপি |
আহারবর্জিতানামারম্ভাণামনারম্ভাৎ || ৪৮||

দৈন্যং নাম দৌর্গত্যমনস্তাপাদিভির্বিভাবৈঃ সমুৎপদ্যতে |
তস্যাধৃতিশিরোরোগগাত্রগৌরবান্যমনস্কতামৃজাপরিবর্জনা-
দিভিরনুভাবৈরভিনয়ঃ প্রয়োক্তব্যঃ |
অত্রার্যা –
চিন্তৌৎসুক্যসমুত্থা দুঃখাদ্যা ভবতি দীনতাং পুংসাম্ |
সর্বমৃজাপরিহারৈর্বিবিধোঽভিনয়ো ভবেত্তস্য || ৪৯||

চিন্তা নাম
ঐশ্বর্যভ্রংশেষ্টদ্রব্যাপহারদারিদ্র্যাদিভির্বিভাবৈরুৎপদ্যতে |
তামভিনয়েন্নিঃশ্বসিতোচ্ছ্বসিতসন্তাপধ্যানাধোমুখচিন্তন-
তনুকার্শ্যাদিভিরনুভাবৈঃ |
অত্রার্যে ভবতঃ –
ঐশ্বর্যভ্রংশেষ্টদ্রব্যক্ষয়জা বহুপ্রকারা তু |
হৃদয়বিতর্কোপগতা নৄণাং চিন্তা সমুদ্ভবতি || ৫০||
সোচ্ছ্বাসৈর্নিঃশ্বসিতৈঃ সন্তাপৈশ্চৈব হৃদয়শূন্যতয়া |
অভিনেতব্যা চিন্তা মৃজাবিহীনৈরধৃত্যা চ || ৫১||

মোহো নাম দৈবোপঘাতব্যসনাভিঘাতব্যাধিভয়াবেগপূর্ববৈরা-
নুস্মরণাদিভির্বিভাবৈঃ সমুৎপদ্যতে | তস্য নিশ্চৈতন্যভ্রমণ-
পতনাঘূর্ণনাদর্শনাদিভিরনুভাবৈরভিনয়ঃ প্রয়োক্তব্যঃ |
অত্র শ্লোকস্তাবদার্যা চ –
অস্থানে তস্করান্দৃষ্ট্বা ত্রাসনৈর্বিবিধৈরপি |
তৎপ্রতীকারশূন্যস্য মোহঃ সমুপজায়তে || ৫২||
ব্যসনাভিঘাতভয়পূর্ববৈরসংস্মরণরোগজো মোহঃ |
সর্বেন্দ্রিয়সম্মোহাত্তস্যাভিনয়ঃ প্রয়োক্তব্যঃ || ৫৩||

স্মৃতির্নাম সুখদুঃখকৃতানাং ভাবানামনুস্মরণম্ |
সা চ স্বাস্থ্যজঘন্যরাত্রিনিদ্রাচ্ছেদসমানদর্শনোদাহরণ-
চিন্তাভ্যাসাদিভির্বিভাবৈঃ সমুৎপদ্যতে | তামভিনয়ে-
চ্ছিরঃকম্পনাবলোকনভ্রূসমুন্নমনাদিভিরনুভাবৈঃ |
অত্রার্যে ভবতঃ –
সুখদুঃখমতিক্রান্তং তথা মতিবিভাবিতং যথাবৃত্তম্ |
চিরবিস্মৃতং স্মরতি যঃ স্মৃতিমানিতি বেদিতব্যোঽসৌ || ৫৪||
স্বাস্থ্যাভ্যাসসমুত্থা শ্রুতিদর্শনসম্ভবা স্মৃতির্নিপুণৈঃ |
শির উদ্বাহনকম্পৈর্ভূক্ষেপৈশ্চাভিনেতব্যা || ৫৫||

ধৃতির্নাম শৌর্যবিজ্ঞানশ্রুতিবিভবশৌচাচারগুরুভক্ত্যধিক-
মনোরথার্থলাভক্রীডাদিভির্বিভাবৈঃ সমুৎপদ্যতে |
তামভিনয়েৎপ্রা-
প্তানাং বিষয়াণামুপভোগাদপ্রাপ্তাতীতোপহৃতবিনষ্টানামনু-
শোচনাদিভিরনুভাবৈঃ |
অত্রার্যে ভবতঃ –
বিজ্ঞানশৌচবিভবশ্রুতিশক্তিসমুদ্ভবা ধৃতিঃ সদ্ভিঃ |
ভয়শোকবিষদাদ্যৈ রহিতা তু সদা প্রয়োক্তব্যা || ৫৬||
প্রাপ্তানামুপভোগঃ শব্দরসস্পর্শরূপগন্ধানাম্ |
অপ্রাপ্তৈশ্চ ন শোকো যস্যাং হি ভবেদ্ ধৃতিঃ সা তু || ৫৭||

ব্রীডা নাম অকার্যকরণাত্মিকা | সা চ
গুরুব্যতিক্রমণাবজ্ঞান- প্রতিজ্ঞাতানির্বহনপশ্চাত্তাপাদিভির্বিভাবৈঃ
সমুৎপদ্যতে |
তাং নিগূঢবদনাধোমুখবিচিন্তনোর্বীলেখনবস্ত্রাঙ্গুলীয়কস্পর্শ-
নখনিকৃন্তনাদিভিরনুভাবৈরভিনয়েৎ |
অত্রার্যে ভবতঃ –
কিঞ্চিদকার্যং কুর্বন্নেবং যো দৃশ্যতে শুচিভিরন্যৈঃ |
পশ্চাত্তাপেন যুতো ব্রীডিত ইতি বেদিতব্যোঽসৌ || ৫৮||
লজ্জানিগূঢবদনো ভূমিং বিলিখন্নখাংশ্চ বিনিকৃন্তন্ |
বস্ত্রাঙ্গুলীয়কানাং সংস্পর্শং ব্রীডিতঃ কুর্যাৎ || ৫৯||

চপলতা নাম রাগদ্বেষমাৎসর্যামর্ষাপ্রতিকূল্যাদিভির্বিভাবৈঃ
সমুৎপদ্যতে | তস্যাশ্চ বাক্পারুষ্যনির্ভর্ত্সনবধবন্ধসম্প্রহার-
তাডনাদিভিরনুভাবৈরভিনয়ঃ প্রয়োক্তব্যঃ |
অত্রার্যা ভবতি –
অবিমৃশ্য তু যঃ কার্যং পুরুষো বধতাডনং সমারভতে |
অবিনিশ্চিতকারিৎবাৎস তু খলু চপলো বুধৈর্জ্ঞেয়ঃ || ৬০||

হর্ষো নাম মনোরথলাভেষ্টজনসমাগমনমনঃপরিতোষদেব-
গুরুরাজভর্তৃপ্রসাদভোজনাচ্ছাদনলাভোপভোগাদিভির্বিভাবৈঃ
সমুৎপদ্যতে | তমভিনয়েন্নয়নবদনপ্রসাদপ্রিয়ভাষণালিঙ্গন-
কণ্টকিতপুলকিতাস্রস্বেদাদিভিরনুভাবৈঃ |
অত্রার্যে ভবতঃ –
অপ্রাপ্যে প্রাপ্যে বা লব্ধেঽর্থে প্রিয়সমাগমে বাঽপি |
হৃদয়মনোরথলাভে হর্ষঃ সঞ্জায়তে পুংসাম্ || ৬১||
নয়নবদনপ্রিয়ভাষালিঙ্গনৈশ্চ রোমাঞ্চৈঃ |
ললিতৈশ্চাঙ্গবিহারৈঃ স্বেদাদ্যৈরভিনয়স্তস্য || ৬২||

আবেগো নাম উৎপাতবাতবর্ষাকুঞ্জরোদ্ভ্রমণপ্রিয়াপ্রিয়শ্রবণ-
ব্যসনাভিঘাতাদির্বিভাবৈঃ সমুৎপদ্যতে | তত্রোৎপাতকৃতো নাম
বিদ্যুদুল্কানির্ঘাতপ্রপতনচন্দ্রসূর্যোপরাগকেতুদর্শনকৃতঃ |
তমভিনয়েৎসর্বাঙ্গস্রস্ততাবৈমনস্যমুখবৈবর্ণ্যবিষাদ-
বিস্ময়াদিভিঃ | বাতকৃতং পুনরবকুণ্ঠনাক্ষিপরিমার্জনবস্ত্র-
সঙ্গূহনৎবরিতগমনাদিভিঃ | বর্ষকৃতং পুনঃ সর্বাঙ্গ-
সম্পিণ্ডনপ্রধাবনচ্ছন্নাশ্রয়মার্গণাদিভিঃ | অগ্নিকৃতং তু
ধূমাকুলনেত্রতাঽঙ্গসঙ্কোচনবিধূননাতিক্রান্তাপক্রান্তাদিভিঃ |
কুঞ্জরোদ্ভ্রমণকৃতং নাম ৎবরিতাপসর্পণচঞ্চলগমন-
ভয়স্তম্ভবেপথুপশ্চাদবলোকনবিস্ময়াদিভিঃ | প্রিয়শ্রবণ-
কৃতং
নামাভ্যুত্থানালিঙ্গনবস্ত্রাভরণপ্রদানাশ্রুপুলকিতাদিভিঃ |
অপ্রিয়শ্রবণকৃতং নাম ভূমিপতনবিষমবিবর্তনপরিধাবন-
বিলাপনাক্রন্দনাদিভিঃ | ব্যসনাভিঘাতজং তু সহসাপসর্পণ-
শস্ত্রচর্মবর্মধারণগজতুরগরথারোহণসম্প্রধারণাদিভিঃ |
এবমষ্টবিকল্পোঽযমাবেগঃ সম্ভ্রমাত্মকঃ |
স্থের্যেণোত্তমমধ্যানাং নীচানাং চাপসর্পণৈঃ || ৬৩||
অত্রার্যে ভবতঃ –
অপ্রিয়নিবেদনাদ্বা সহসা হ্যবধারিতারিবচনস্য |
শস্ত্রক্ষেপাৎ ত্রাসাদাবেগো নাম সম্ভবতি || ৬৪||
অপ্রিয়নিবেদনাদ্যো বিষাদভাবাশ্রয়োঽনুভাবস্য |
সহসারিদর্শনাচ্চেৎপহরণপরিঘট্টনৈঃ কার্যঃ || ৬৫||

জডতানাম সর্বকার্যাপ্রতিপত্তিঃ | ইষ্টানিষ্টশ্রবণদর্শন-
ব্যাধ্যাদিভির্বিভাবৈঃ সমুৎপদ্যতে | তামভিনয়েদকথনাবিভাষণ-
তূষ্ণীম্ভাবাপ্রতিভাঽনিমেষনিরীক্ষণপরবশৎবাদিভিরনুভাবৈঃ |
অত্রার্যা ভবতি –
ইষ্টং বাঽনিষ্টং বা সুখদুঃখে বা ন বেত্তি যো মোহাৎ |
তূষ্ণীকঃ পরবশগো ভবতি স জডসংজ্ঞিতঃ পুরুষঃ || ৬৬||

গর্বো নাম ঐশ্বর্যকুলরূপয়ৌবনবিদ্যাবলধনলাভাদিভির্বিভাবৈঃ
সমুৎপদ্যতে | তস্যাসূয়াবজ্ঞাঘর্ষণানুত্তরদানাসম্ভাষণা-
ঙ্গাবলোকন বিভ্রমাপহসনবাক্পারুষ্যগুরুব্যতিক্রমণাধি-
ক্ষেপবচনবিচ্ছেদাদিভিরনুভাবৈরভিনয়ঃ প্রয়োক্তব্যঃ
অত্রার্যা ভবতি –
বিদ্যাবাপ্তে রূপাদৈশ্বর্যাদথ ধনাগমাদ্বাপি |
গর্বঃ খলু নীচানাং দৃষ্ট্যঙ্গবিচারণৈঃ কার্যঃ || ৬৭||

বিষাদো নাম কার্যানিস্তরণদৈবব্যাপত্তিসমুত্থঃ |
তমভিনয়েৎসহায়ান্বেষণোপায়চিন্তনোৎসাহবিঘাতবৈমনস্য-
নিঃশ্বসিতাদিভিরনুভাবৈরুত্তমমধ্যমানাম্ | অধমানাং তু
বিপরিধাবনালোকনমুখশোষণসৃক্বপরিলেহননিদ্রা-
নিঃশ্বসিতধ্যানাদিভিরনুভাবৈঃ |
অত্রার্যা শ্লোকৌ –
কার্যানিস্তরণাদ্বা চৌর্যাভিগ্রহণরাজদোষাদ্বা |
দৈবাদর্থবিপত্তের্ভবতি বিষাদঃ সদা পুংসাম্ || ৬৮||
বৈচিত্র্যোপায়চিন্তাভ্যাং কার্য উত্তমমধ্যয়োঃ |
নিদ্রানিঃশ্বসিতধ্যানৈরধমানাং তু যোজয়েৎ || ৬৯||

ঔৎসুক্যং নাম ইষ্টজনবিয়োগানুস্মরণোদ্যানদর্শনা-
দিভির্বিভাবৈঃ সমুৎপদ্যতে | তস্য দীর্ঘনিঃশ্বসিতাধোমুখ-
বিচিন্তননিদ্রাতন্দ্রীশয়নাভিলাষাদিভিরনুভবৈরভিনয়ঃ
প্রয়োক্তব্যঃ |
অত্রার্যা ভবতি –
ইষ্টজনস্য বিয়োগাদৌৎসুক্যং জায়তে হ্যনুস্মৃত্যা |
চিন্তানিদ্রাতন্দ্রীগাত্রগুরুৎবৈরভিনয়োঽস্য || ৭০||

নিদ্রা নাম দৌর্বল্যশ্রমক্লমমদালস্যচিন্তাঽত্যাহার-
স্বভাবাদিভির্বিভাবৈঃ সমুৎপদ্যতে | তামভিনয়েদ্বদন-
গৌরবশরীরাবলোকননেত্রঘূরণনগাত্রবিজৃম্ভন-
মান্দ্যোচ্ছ্বসিতসন্নগাত্রতাঽক্ষিনিমীলনাদিভিরনুভাবৈঃ |
অত্রার্যে ভবতঃ –
আলস্যাদ্দৌর্বল্যাৎক্লমাচ্ছ্রমাচ্চিন্তনাৎস্বভাবাচ্চ |
রাত্রৌ জাগরণাদপি নিদ্রা পুরুষস্য সম্ভবতি || ৭১||
তাং মুখগৌরবগাত্রপ্রতিলোলননয়নমীলনজডৎবৈঃ |
জৃম্ভণগাত্রবিমর্দৈরনুভাবৈরভিনয়েৎপ্রাজ্ঞঃ|| ৭২||

অপস্মারো নাম
দেবয়ক্ষনাগব্রহ্মরাক্ষসভূতপ্রেতপিশাচ- গ্রহণানুস্মরনোচ্ছিষ্টশূন্যাগারসেবনাশুচি-
কালান্তরাপরিপতনব্যাদ্যাদিভির্বিভাবৈঃ সমুৎপদ্যতে |
তস্য স্ফুরিতনিঃশ্বসিতোৎকম্পিতধাবনপতনস্বেদ-
স্তম্ভবদনফেনজিহ্বাপরিলেহনাদিভিরনুভাবৈরভিনয়ঃ
প্রয়োক্তব্যঃ |
অত্রার্যে ভবতঃ –
ভূতপিশাচগ্রহণানুস্মরণোচ্ছিষ্টশূন্যগৃহগমনাঅৎ |
কালান্তরাতিপাতাদশুচেশ্চভবত্যপস্মারঃ || ৭৩||
সহসা ভূমৌ পতনং প্রবেপনং বদনফেনমোক্ষশ্চ |
নিঃসংজ্ঞস্যোত্থানং রূপাণ্যেতান্যপস্মারে || ৭৪||

সুপ্তং নাম নিদ্রাভিভববিষয়োপগমনক্ষিতিতলশয়ন-
প্রসারণানুকর্ষণাদিভির্বিভাবৈঃ সমুৎপদ্যতে
নিদ্রাসমুত্থম্ | তদুচ্ছ্বসিতংসন্নগাত্রাক্ষিনিমীলন-
সর্বেন্দ্রিয় সম্মোহনোৎস্বপ্নায়িতাদিভিরনুভাবৈরভিনয়েৎ |
অত্রার্যে ভবতঃ –
নিদ্রাভিভবেন্দ্রিয়োপরমণমোহাইর্হবেৎসুপ্তম্ |
অক্ষিনিমীলনোচ্ছ্বসনৈঃ স্বপ্নায়িতজল্পিতৈঃ কার্যঃ || ৭৫||
সোচ্ছ্বাসৈর্নিঃশ্বাসৈর্মন্দাক্ষিনিমীলনেন নিশ্চেষ্টঃ |
সর্বেন্দ্রিয়সম্মোহাৎসুপ্তং স্বপ্নৈশ্চ যুঞ্জীত || ৭৬||

বিবোধো নাম আহারপরিণামনিদ্রাচ্ছেদস্বপ্নান্ত-
তীব্রশব্দশ্রবণাদিভির্বিভাবৈঃ সমুৎপদ্যতে |
তমভিনয়েজ্জৃম্ভণাক্ষিপরিমর্দনশয়নমোক্ষণাদিভিরনুভাবৈঃ |
অত্রার্যা ভবতি –
আহারবিপরিণামাচ্ছব্দস্পর্শাদিভিশ্চ সম্ভূতঃ |
প্রতিবোধস্ত্বভিনেয়ো জৃম্ভণবদনাক্ষিপরিমর্দৈঃ || ৭৭||

অমর্ষো নাম বিদ্যৈশ্বর্যশৌর্যবলাধিকৈরধিক্ষিপ্তস্যাবমানিতস্য বা
সমুৎপদ্যতে | তমভিনয়েচ্ছিরঃকম্পনপ্রস্বেদনাধোমুখচিন্তন-
ধ্যানাধ্যবসায়োপায়সহায়ান্বেষণাদিভিরনুভাবৈঃ |
অত্র শ্লোকৌ –
আক্ষিপ্তানাং সভামধ্যে বিদ্যাশৌর্যবলাধিকৈঃ |
নৄণামুৎসাহসংযোগাদমর্ষো নাম জায়তে || ৭৮||
উৎসাহাধ্যবসায়াভ্যামধোমুখবিচিন্তনৈঃ |
শিরঃপ্রকম্পস্বেদাদ্যৈস্তং প্রয়ুঞ্জীত পণ্ডিতঃ || ৭৯||

অবহিত্থং নাম আকারপ্রচ্ছাদনাত্মকম্ | তচ্চ
লজাভয়াপজয়-
গৌরবজৈহ্ময়াদিভির্বিভাবিঃ সমুৎপদ্যতে |
তস্যান্যথাকথনাবলোকিত-
কথাভঙ্গকৃতকধৈর্যাদিভিরনুভাবৈরভিনয়ঃ প্রয়োক্তব্যঃ |
অত্র শ্লোকো ভবতি –
ধার্ষ্ট্যজৈহ্ম্যাদিসম্ভীতমবহিত্থং ভয়ত্মকম্ |
তচ্চাগণনয়া কার্যং নাতীবোত্তরভাষণাৎ || ৮০||

উগ্রতা আম চৌর্যাভিগ্রহাণনৃপাপরাধাসৎপ্রলাপাদিভির্বিভাবৈঃ
সমুৎপদ্যতে |
তাং চ বধবন্ধনতাডননির্ভৎসনাদিভিরনুভাবৈরভিনয়েৎ |
অত্রার্যা ভবতি –
চৌর্যাভিগ্রহনবশান্নৃপাপরাধাদথোগ্রতা ভব্তি |
বধবন্ধতাডনাদিভিরনুভাবৈরভিনয়স্তস্যাঃ || ৮১||
ভবতি চাত্র শ্লোকঃ –
নানাশাত্রার্থবোধেন মতিঃ সংজায়তে নৃণাম্ |
শিষ্যোপদেশার্থকৃতস্তস্যাস্ত্বভিনয়ো ভবেৎ || ৮২||

ব্যাধির্নাম বাতপিত্তকফসন্নিপাতপ্রভবঃ | তস্য জ্বরাদয়ো
বিশেষাঃ | জ্বরস্তু দ্বিবিধঃ সশীতঃ সদাহশ্চ |
তত্র সশীতো নাম প্রবেপিতসর্বাঙ্গোপ্কম্পননিকুঞ্চনা-
গ্ন্যভিলাষরোমাঞ্চহনুবলননাসাবিকূননমুখ-
শোষণপরিদেবিতাদিভিরনুভাবৈরভিনেয়ঃ | সদাহো নাম
বিক্ষিপ্তাঙ্গকরচরণভূম্যভিলাষানুলেপনশীতাভি-
লাষপরিদেবনমুখশোষোৎক্রুষ্টাদিভিরনুভাবৈঃ |
যে চান্যে ব্যাধয়স্তেঽপি খলু মুখবিকূণনগাত্র-
স্তম্ভস্রস্তাক্ষিনিঃশ্বসনস্তনিতোৎক্রুষ্টবেপনা-
দিভিরনুভাবৈরভিনেয়াঃ |
অত্র শ্লোকো ভবতি –
সমাসতস্তু ব্যাধীনাং কর্তব্যোঽভিনয়ো বুধৈঃ |
স্রস্তাঙ্গগাত্রবিক্ষেপৈস্তথা মুখবিকূণনৈঃ || ৮৩||

উন্মাদো নাম ইষ্টজনবিয়োগবিভবনাশাভিঘাত-
বাতপিত্তশ্লেষ্মপ্রকোপাদিভির্বিভাবৈরুৎপদ্যতে |
তমনিমিত্তহসিতরুদিতোৎক্রুষ্টাসম্বদ্ধপ্রলাপশয়িতোপবিষ্টোত্থিত-
প্রধাবিতনৃত্তগীতপঠিতভস্মপাংস্ববধূলনতৃণনির্মাল্যকুচেল-
চীরঘটককপালশরাবাভরণধারণোপভোগৈরনেকৈশ্চানবস্থিতৈশ্চেষ্টা-
নুকরণাদিভিরনুভাবৈরভিনয়েৎ |
অত্রার্যে ভবতঃ –
ইষ্টজনবিভবনাশাদভিঘাতাদ্বাতপিত্তকফকোপাৎ |
বিবিধাচ্চিত্তবিকারাদুন্মাদো নাম সম্ভবতি || ৮৪||
অনিমিত্তরুদিতহসিতোপবিষ্টগীতপ্রধাবিতোৎক্রুষ্টৈঃ |
অন্যৈশ্চ বিকারৈরকৃতৈরুন্মাদং সম্প্রয়ুঞ্জীত || ৮৫||

মরণং নাম ব্যাধিজমভিঘাতজঞ্চ | তত্র
যদান্ত্রয়কৃচ্ছূলদোষবৈষম্য-
গণ্ডপিটকজ্বরবিষূচিকাদিভিরুৎপদ্যতে তদ্ব্যাধিপ্রভবম্ |
অভিঘাতজং তু
শস্ত্রাহিদংশবিষপানশ্বাপদগজতুরগরথপশুয়ানপাত-
বিনাশপ্রভবম্ | এতয়োরভিনয়বিশেষান্বক্ষ্যামঃ –
তত্র ব্যাধিজং বিষণ্ণগাঅত্রাব্যায়তাঙ্গবিচেষ্টিতনিমীলিতনয়ন-
হিক্কাশ্বাসোপেতানবেক্ষিতপরিজনাব্যক্তাক্ষরকথনাদিভিরনুভাবৈরভিনয়েৎ
.
অত্র শ্লোকো ভবতি –
ব্যাধীনামেকভাবো হি মরণাভিনয়ঃ স্মৃতঃ |
বিষণ্ণগাত্রৈর্নিশ্চেষ্টৈরিন্দ্রিঅয়ৈশ্চ বিবর্জিতঃ || ৮৬||
অভিঘাতজে তু নানাপ্রকারাঅভিনয়বিশেষাঃ.
শস্ত্রক্ষতাহিদষ্টবিষপীত-
গজাদিপতিতশ্বাপদহতাঃ | যথা তত্র শস্ত্রক্ষতে তাবৎসহসা
ভূমিপতনবেপন-
স্ফুরণাদিভিরভিনয়ঃ প্রয়োক্তব্যঃ | অহিদষ্টবিষপীতয়োর্বিষয়োগো
যথা
কার্শ্যবেপথুবিদাহহিক্কাফেনস্কন্ধভঙ্গজডতামরণানীত্যষ্টৌ
বিষবেগাঃ |
অত্র শ্লোকৌ ভবতঃ –
কার্শ্যং তু প্রথমে বেগে দ্বিতীয়ে বেপথুর্ভবেৎ |
দাহং তৃতীয়ে হিক্কাং চ চতুর্থে সম্প্রয়োজয়েৎ || ৮৭||
ফেনঞ্চ পঞ্চমে কুর্যাৎষষ্ঠে স্কন্ধস্য ভঞ্জনম্ |
জডতাং সপ্তমে কুর্যাদষ্টমে মরণং ভবেৎ || ৮৮||
অত্রার্যা ভবতি –
শ্বাপদগজতুরগরথোদ্ভবং তু পশুয়ানপতনজং বাঽপি |
শাস্ত্রক্ষতবৎকুর্যাদনবেক্ষিতগাত্রসঞ্চারম্ || ৮৯||
ইত্যেব মরণং জ্ঞেয়ং নানাবস্থান্তরাত্মকম্ |
প্রয়োক্তব্যং বুধৈঃ সম্যগ্যথা ভবাঙ্গচেষ্টিতৈঃ || ৯০||

ত্রাসো নাম বিদ্যুদুল্কাশনিপাতনির্ঘাতাম্বুধরমহাসত্ত্বপশু-
রবাদিভির্বিভাবৈরুৎপদ্যতে | তমভিনয়েৎসংক্ষিপ্তাঙ্গোৎকম্পনবেপথু-
স্তম্ভরোমাঞ্চগদ্গদপ্রলাপাদিভিরনুভাবৈঃ |
অত্র শ্লোকো ভবতি –
মহাভৈরবনাদদ্যৈস্ত্রাসঃ সমুপজায়তে |
স্রস্তাঙ্গাক্ষিনিমেষৈশ্চ তস্য ৎবভিনয়ো ভবেৎ || ৯১||

বিতর্কো নাম সন্দেহবিমর্শবিপ্রতিপত্ত্যাদিভির্বিভাবৈরুৎপদ্যতে |
তমভিন-
যেদ্বিবিধবিচারিতপ্রশ্নসম্প্রধারণমন্ত্রসঙ্গূহনাদিভিরনুভাবৈঃ
.
অত্র শ্লোকো ভবতি –
বিচারণাদিসম্ভূতঃ সন্দেহাতিশয়াত্মকঃ |
বিতর্কঃ সোঽভিনেয়স্তু শিরোভ্রূক্ষেপকম্পনৈঃ || ৯২||

এবমেতে ত্রয়স্ত্রিংশদ্ব্যভিচারিণো ভাবা দেশকালাবস্থা-
নুরূপ্যেণামগতপরগতমধ্যস্থা উত্তমমধ্যমাধমৈঃ
স্ত্রীপুংসৈঃ স্বপ্রয়োগবশাদুপপাদ্যা ইতি |
ত্রয়স্ত্রিংশদিমে ভাবা বিজ্ঞেয়া ব্যভিচারিণঃ |
সাত্ত্বিকাংস্তু পুনর্ভাবান্প্রবক্ষ্যাম্যনুপূর্বশঃ || ৯৩||

অত্রাহ – কিমন্যে ভাবাঃ সত্ত্বেন বিনাঽভিনীয়ন্তে যস্মাদুচ্যতে
এতে সাত্ত্বিকা ইতি | অত্রোচ্যতে –
ইহ হি সত্ত্বং নাম মনঃপ্রভবম্ | তচ্চ সমাহিতমনস্ত্বাদুচ্যতে
.
মনসঃ সমাধৌ সত্ত্বনিষ্পত্তির্ভবতি | তস্য চ যোঽসৌ স্বভাবো
রোমাঞ্চাশ্রুবৈবর্ণ্যাদিলক্ষণো যথাভাবোপগতঃ স ন
শক্যোঽন্যমনসা
কর্তুমিতি | লোকস্বভাবানুকরণৎবাচ্চ নাট্যস্য সত্ত্বমীপ্সিতম্ |
কো দৃষ্টান্তঃ – ইহ হি নাট্যাধর্মিপ্রবৃত্তাঃ সুখদুঃখকৃতা
ভাবাস্তথা
সত্ত্ববিশুদ্ধাঃ কার্যা যথা সরূপা ভবন্তি | তত্র দুঃখং নাম
রোদনাত্মকং
তৎকথমদুঃখিতেন সুখং চ প্রহর্ষাত্মকমসুখিতেন বাভিনেয়ম্ |
এতদেবাস্য সত্ত্বং যৎ দুঃখিতেন সুখিতেন বাঽশ্রুরোমাঞ্চৌ
দর্শিয়িতব্যৌ
ইতি কৃৎবা সাত্ত্বিকা ভাবা ইত্যভিব্যাখ্যাতাঃ | ত ইমে –
স্তম্ভঃ স্বেদোঽথ রোমাঅঞ্চঃ স্বরভেদোঽথ বেপথুঃ |
বৈবর্ণ্যমশ্রুপ্রলয় ইত্যষ্টৌ সাত্ত্বিকা মতাঃ || ৯৪||
অত্রার্যাঃ | তত্র –
ক্রোধভয়হর্ষলজাদুঃখশ্রমরোগতাপঘাতেভ্যঃ |
ব্যায়ামক্লমধর্মৈঃ স্বেদঃ সম্পীডনাচ্চৈব || ৯৫||
হর্ষভয়শোকবিস্ময়বিষাদরোষাদিসম্ভবঃ স্তম্ভঃ |
শীতভয়হর্ষরোষস্পর্শজরারোগজঃ কম্পঃ || ৯৬||
আনন্দামর্ষাভ্যাং ধূমাঞ্জনজৃম্ভণাদ্ভয়াচ্ছোকাৎ |
অনিমেষপ্রেক্ষণতঃ শীতাদ্রোগাদ্ভবেদশ্রু || ৯৭||
শীতক্রোধভয়শ্রমরোগক্লমতাপজং চ বৈবর্ণ্যম্ |
স্পর্শভয়শীতহর্ষাৎ ক্রোধাদ্রোগাচ্চ রোমাঞ্চঃ || ৯৮||
স্বরভেদো ভয়হর্ষক্রোধজরারৌক্ষ্যরোগমদজনিতঃ |
শ্রমমূর্ছমদনিদ্রাভিঘাতমোহাদিভিঃ প্রলয়ঃ || ৯৯||
এবমেতে বুধৈর্জ্ঞেয়া ভাবা হ্যষ্টৌ তু সাত্ত্বিকাঃ |
কর্ম চৈষাং প্রবক্ষ্যামি রসভাবানুভাবকম্ || ১০০||
নিঃসংজ্ঞো নিষ্প্রকম্পশ্চ স্থিতঃ শূন্যজডাকৃতিঃ |
স্কন্নগাত্রতয়া চৈব স্তম্ভং ৎবভিনয়েদ্বুধঃ || ১০১||
ব্যজনগ্রহণাচ্চাপি স্বেদাপনয়নেন চ |
স্বেদস্যাভিনয়ো যোজ্যস্তথা বাতাভিলাষতঃ || ১০২||
মুহুঃ কণ্টিকিতৎবেন তথোল্লুকসনেন চ |
পুলকেন চ রোমাঞ্চং গাত্রস্পর্শেন দর্শয়েৎ || ১০৩||
স্বরভেদোঽভিনেতব্যো ভিন্নগদ্গদনিস্বনৈঃ |
বেপনাৎস্ফুরণাৎকম্পাদ্বেপথুং সম্প্রদর্শয়েৎ || ১০৪||
মুখবর্ণপরাবৃত্ত্যা নাডীপীডনয়োগতঃ |
বৈবর্ণ্যমভিনেতব্যং প্রয়ত্নাত্তদ্ধি দুষ্করম্ || ১০৫||
বাষ্পাম্বুপ্লুতনেত্রৎবান্নেত্রসংমার্জনেন চ |
মুহুরশ্রুকণাপাতৈরস্রং ৎবভিনয়েদ্বুধঃ || ১০৬||
নিশ্চেষ্টো নিষ্প্রকম্পৎবাদব্যক্তশ্বসিতাদপি |
মহীনিপতনাচ্চাপি প্রলয়াভিনয়ো ভবেৎ || ১০৭||

একোনপঞ্চাশদিমে যথাবদ্ভাবাস্ত্র্যবস্থা গদিতা ময়েহ |
ভূয়শ্চ যে যত্র রসে নিয়োজ্যাস্তান্ শ্রোতুমর্হন্তি চ বিপ্রমুখ্যাঃ
|| ১০৮||

[অত্র শ্লোকাঃ –
শঙ্কাব্যাধিস্তথাগ্লানিশ্চিন্তাসূয়া ভয়ং তথা |
বিস্ময়শ্চ বিতর্কশ্চ স্তম্ভশ্চপলতা তথা ||
রোমাঞ্চহর্ষৌ নিদ্রা চ তথোন্মাদমদাবপি |
স্বেদশ্চৈবাবহিত্থং চ প্রলয়ো বেপথুস্তথা ||
বিষাদশ্রমনির্বেদা গর্বাবেগৌ ধৃতিঃ স্মৃতিঃ |
মতির্মোহো বিবোধশ্চ সুপ্তমৌৎসুক্যবর্জিতে ||
ক্রোধামর্ষৌ চ হাসশ্চ শোকোঽপস্মার এব চ |
দৈন্যং চ মরণং চৈব রতিরুৎসাহসংযুতা ||
ত্রাসবৈবর্ণ্যরুদিতৈঃ স্বরভেদঃ শমোঽপি চ |
জডতা চ তথা ষট্ চ চৎবারিংশৎপ্রকীর্তিতাঃ || ]
আলস্যৌগ্র্যজুগুপ্সাখ্যৈরেবং ভাবৈস্তু বর্জিতাঃ |
উদ্ভাবয়ন্তি শৃঙ্গারং সর্বে ভাবাঃ স্বসংজ্ঞয়া || ১০৯||
[যথাঽবসরমেতে হি স্থায়িসঞ্চারিসত্ত্বজাঃ |
উদ্দীপয়ন্তি শৃঙ্গারং রসমাসাদ্য সংজ্ঞিতম্ || ]
গ্লানিঃ শঙ্কা হ্যসূয়া চ শ্রমশ্চপলতা তথা |
সুপ্তং নিদ্রাবহিত্থং চ হাস্যে ভাবাঃ প্রকীর্তিতাঃ || ১১০||
নির্বেদশ্চৈব চিন্তা চ দৈন্যং গ্লান্যাস্রমেব চ
জডতা মরণং চৈব ব্যাধিশ্চ করুণে স্মৃতাঃ || ১১১||
গর্বোঽসূয়া মদোৎসাহাবাবেগোঽমর্ষ এব চ |
ক্রোধশ্চপলতৌগ্র্যং চ বিজ্ঞেয়া রৌদ্রসম্ভবাঃ || ১১২||
অসম্মোহস্তথোৎসাহ আবেগো হর্ষ এব চ |
মতিশ্চৈব তথোগ্রৎবমমর্ষো মদ এব চ || ১১৩||
রোমাঞ্চঃ স্বরভেদশ্চ ক্রোধোঽসূয়া ধৃতিস্তথা |
গর্বশ্চৈব বিতর্কশ্চ বীরে ভাবা ভবন্তি হি || ১১৪||
স্বেদশ্চ বেপথুশ্চৈব রোমাঞ্চো গদ্গদস্তথা |
ত্রাসশ্চ মরণশ্চৈঅব বৈবর্ণ্যং চ ভয়ানকে || ১১৫||
অপস্মারস্তথোন্মাদো বিষাদো মদ এব চ |
মৃত্যুর্ব্যাধির্ভয়ং চৈব ভাবা বীভৎসসংশ্রয়াঃ || ১১৬||
স্তম্ভঃ স্বেদশ্চ মোহশ্চ রোমাঞ্চো বিস্ময়স্তথা |
আবেগো জডতা হর্ষো মূর্ছা চৈবাদ্ভুতাশ্রয়াঃ || ১১৭||
যে ৎবেতে সাত্ত্বিকা ভাবা নানাভিনয়সংশ্রিতাঃ |
রসেষ্বেতেষু সর্বে তে জ্ঞেয়া নাট্যপ্রয়োক্তৃভিঃ || ১১৮||
ন হ্যেকরসজং কাব্যং কিঞ্চিদস্তি প্রয়োগতঃ |
ভাবো বাপি রসো বাপি প্রবৃত্তির্বৃত্তিরেব চ || ১১৯||
[বহূনাং সমবেতানাং রূপং যস্য ভবেদ্বহু |
স মন্তব্যো রসঃ স্থায়ী শেষাঃ সঞ্চারিণো মতাঃ ||
দীপয়ন্তঃ প্রবর্তন্তে যে পুনঃ স্থায়িনং রসম্ |
তে তু সঞ্চারিণো জ্ঞেয়াস্তে হি স্থায়িৎবমাগতাঃ ||
বিভাবানুভাবয়ুতো হ্যঙ্গবস্তুসমাশ্রয়ঃ |
সংচারিভিস্তু সংযুক্তঃ স্থায়্যেব তু রসো ভবেৎ ||
স্থায়ী সত্ত্বাতিরেকেণ প্রয়োক্তব্যঃ প্রয়োক্তৃভিঃ |
সঞ্চার্যাকারমাত্রেণ স্থায়ী যস্মাদবস্থিতঃ ||
যে ৎবেতে সাত্ত্বিকা ভাবা নানাভিনয়য়োজিতাঃ |
রসেষ্বেতেষু সর্বেষু তে জ্ঞেয়া নাট্যকোবিদৈঃ ||
ন হ্যেকরসজং কাব্যং নৈকভাবৈকবৃত্তিকম্ |
বিমর্দে রাগমায়াতি প্রয়ুক্তং হি প্রয়ত্নতঃ ||
ভাবা বাঽপি রসা বাঽপি প্রবৃত্তির্বৃত্তিরেব বা |
বীভৎসাদ্ভুতশান্তানাং ত্রৈবিধ্যং নাত্র কথ্যতে ||
ষণ্ণাং রসানাং ত্রৈবিধ্যং নানাভাবারসান্বিতম্ |
সত্ত্বপ্রয়োজিতো হ্যর্থঃ প্রয়োগোঽত্র বিরাজতে ||
বিদিৎবা হি বিরাজন্তে লোকে চিত্রং হি দুর্লভম্ || ]
নানাভাবার্থসংপন্নাঃ স্থায়িসত্ত্বাভিচারিণঃ |
পুষ্পাবকীর্ণাঃ কর্তব্যাঃ কাব্যেষু হি রসা বুধৈঃ || ১২০||
এবং রসাশ্চ ভাবাশ্চ ব্যবস্থা নাটকে স্মৃতাঃ |
য এবমেতাঞ্জানাতি স গচ্ছেৎসিদ্ধিমুত্তমাম্ || ১২১||

ইতি শ্রীভারতীয়ে নাট্যশাস্ত্রে ভাবব্যঞ্জকো নাম সপ্তমোঽধ্যায়ঃ ||