রঘুবংশং সর্গ ১০

|| কালিদাসকৃতং রঘুবংশম্ সর্গ ১০ ||

পৃথিবীং শাসতস্তস্য পাকশাসনতেজসঃ |
কিংচিদূনমনূনর্দ্ধেঃ শরদাময়ুতং যয়ৌ|| ১০-১||
ন চোপলেভে পূর্বেষামৃণনির্মোক্ষসাধনম্ |
সুতাভিধানং স জ্যোতিঃ সদ্যঃ শোকতমোপহম্|| ১০-২||
অতিষ্ঠৎপ্রত্যয়াপেক্ষসংততিঃ স চিরং নৃপঃ |
প্রাঙ্মন্থাদনভিব্যক্তরত্নোৎপত্তিরিবার্ণবঃ|| ১০-৩||
ঋষ্যশৃঙ্গাদয়স্তস্য সন্তঃ সন্তানকাঙ্ক্ষিণঃ |
আরেভিরে জিতাত্মানঃ পুত্রীয়ামিষ্টিমৃৎবিজঃ|| ১০-৪||
তস্মিন্নবসরে দেবাঃ পৌলস্ত্যোপপ্লুতা হরিম্ |
অভিজগ্মুর্নিদাঘার্তাশ্ছায়াবৃক্ষমিবাধ্বগাঃ|| ১০-৫||
তে চ প্রাপুরুদন্বন্তং বুবুধে চাদিপূরুষঃ |
অব্যাক্ষেপো ভবিষ্যন্ত্যাঃ কার্যসিদ্ধের্হি লক্ষণম্|| ১০-৬||
ভোগিভোগাসনাসীনং দদৃশুস্তং দিবৌকসঃ |
তৎফণামণ্ডলোদর্চির্মণিদ্যোতিতবিগ্রহম্|| ১০-৭||
শ্রিয়ঃ পদ্মনিষণ্ণায়াঃ ক্ষৌমান্তরিতমেখলে |
অঙ্কে নিক্ষিপ্তচরণমাস্তীর্ণকরপল্লবে|| ১০-৮||
প্রবুদ্ধপুণ্ডরীকাক্ষং বালাতপনিভাংশুকম্ |
দিবসং শারদমিব প্রারম্ভসুখদর্শনম্|| ১০-৯||
প্রভানুলিপ্তশ্রীবৎসং লক্ষ্মীবিভ্রমদর্পণম্ |
কৌস্তুভাখ্যমপাং সারং বিভ্রাণং বৃহতোরসা|| ১০-১০||
বহুভির্বিটপাকারৈর্দিব্যাভরণভূষিতৈঃ |
আবির্ভূতমপাং মধ্যে পারিজাতমিবাপরম্|| ১০-১১||
দৈত্যস্ত্রীগণ্ডলেখানাং মদরাগবিলোপিভিঃ |
হেতিভিশ্চেতনাবদ্ভিরুদীরিতজয়স্বনম্|| ১০-১২||
মুক্তশেষবিরোধেন কুলিশব্রণলক্ষ্মণা |
উপস্থিতং প্রাঞ্জলিনা বিনীতেন গরুত্মতা|| ১০-১৩||
যোগনিদ্রান্তবিশদৈঃ পাবনৈরবলোকনৈঃ |
ভৃগ্বাদীননুগৃহ্ণন্তং সৌখশায়নিকানৃষীন্|| ১০-১৪||
প্রণিপত্য সুরাস্তস্মৈ শময়িত্রে সুরদ্বিষাং |
অথৈনং তুষ্টুবুঃ স্তুত্যমবাঙ্মনসগোচরম্|| ১০-১৫||
নমো বিশ্বসৃজে পূর্বং বিশ্বং তদনু বিভ্রতে |
অথ বিশ্বস্য সংহর্ত্রে তুভ্যং ত্রেধাস্থিতাত্মনে|| ১০-১৬||
রসান্তরাণ্যেকরসং যথা দিব্যং পয়োঽশ্নুতে |
দেশে দেশে গুণেষ্বেবমবস্থাস্তবমবিক্রিয়ঃ|| ১০-১৭||
অমেয়ো মিতলোকস্ত্বমনর্থী প্রার্থনাবহঃ |
অজিতো জিষ্ণুরত্যন্তমব্যক্তো ব্যক্তকারণম্|| ১০-১৮||
হৃদয়স্থমনাসন্নমকামং ৎবাং তপস্বিনম্ |
দয়ালুমনঘস্পৃষ্টং পুরাণমজরং বিদুঃ|| ১০-১৯||
সর্বজ্ঞস্ত্বমবিজ্ঞাতঃ সর্বয়োনিস্ত্বমাত্মভূঃ |
সর্বপ্রভুরনীশস্ত্বমেকস্ত্বং সর্বরূপভাক্|| ১০-২০||
সপ্তসামোপগীতং ৎবাং সপ্তার্ণবজলেশয়ম্ |
সপ্তার্চিমুখমাচখ্যুঃ সপ্তলোকৈকসংশ্রয়ম্|| ১০-২১||
চতুর্বর্গফলং জ্ঞানং কালাবস্থাশ্চতুর্যুগাঃ |
চতুর্বর্ণময়ো লোকস্ত্বত্তঃ সর্বং চতুর্মুখাৎ|| ১০-২২||
অভ্যাসনিগৃহীতেন মনসা হৃদয়াশ্রয়ম্ |
জ্যোতির্ময়ং বিচিন্বন্তি যোগিনস্ত্বাং বিমুক্তয়ে|| ১০-২৩||
অজস্য গৃহ্ণতো জন্ম নিরীহস্য হতদ্বিষঃ |
স্বপতো জাগরূকস্য যাথার্থ্যং বেদ কস্তব|| ১০-২৪||
শব্দাদীন্বিষয়ান্ভোক্তুং চরিতুং দুশ্চরং তপঃ |
পর্যাপ্তোঽসি প্রজাঃ পাতুমৌদাসীন্যেন বর্তিতুম্|| ১০-২৫||
বহুধাপ্যাগমৈর্ভিন্নাঃ পন্থানঃ সিদ্ধিহেতবঃ |
ৎবয়্যেব নিপতন্ত্যোঘা জাহ্নবীয়া ইবার্ণবে|| ১০-২৬||
ৎবয়্যাবেশিতচিত্তানাং ৎবৎসমর্পিতকর্মণাম্ |
গতিস্ত্বং বীতরাগাণামভূয়ঃসংনিবৃত্তয়ে|| ১০-২৭||
প্রত্যক্ষোঽপ্যপরিচ্ছেদ্যো মহ্যাদির্মহিমা তব |
আপ্তবাগনুমানাভ্যাং সাধ্যং ৎবাং প্রতি কা কথা|| ১০-২৮||
কেবলং স্মরণেনৈব পুনাংসি পুরুষং যতঃ |
অনেন বৃত্তয়ঃ শেষা নিবেদিতফলাস্ত্বয়ি|| ১০-২৯||
উদধেরিব রত্নানি তেজাংসীব বিবস্বতঃ |
স্তুতিভ্যো ব্যতিরিচ্যন্তে দূরাণি চরিতানি তে|| ১০-৩০||
অনবাপ্তমবাপ্তব্যং ন তে কিঞ্চন বিদ্যতে |
লোকানুগ্রহ এবৈকো হেতুস্তে জন্মকর্মণোঃ|| ১০-৩১||
মহিমানং যদুৎকীর্ত্য তব সংহ্রিয়তে বচঃ |
শ্রমেণ তদশক্ত্যা বা ন গুণানামিয়ত্তয়া|| ১০-৩২||
ইতি প্রসাদয়ামাসুস্তে সুরাস্তমধোক্ষজম্ |
ভূতার্থব্যাহৃতিঃ সা হি ন স্তুতিঃ পরমেষ্ঠিনঃ || ১০-৩৩||
তস্মৈ কুশলসংপ্রশ্নব্যঞ্জিতপ্রীতয়ে সুরাঃ |
ভয়মপ্রলয়োদ্বেলাদাচখ্যুর্নৈরৃতোদধেঃ|| ১০-৩৪||
অথ বেলাসমাসন্নশৈলরন্ধ্রানুবাদিনা |
স্বরেণোবাচ ভগবান্ পরিভূতার্ণবধ্বনিঃ|| ১০-৩৫||
পুরাণস্য কবেস্তস্য বর্ণস্থানসমীরিতা |
বভূব কৃতসংস্কারা চরিতার্থৈব ভারতী|| ১০-৩৬||
বভৌ সদশনজ্যোৎস্না সা বিভোর্বদনোদ্গতা |
নির্যাতশেষা চরণাদ্গঙ্গেবোর্ধ্বপ্রবর্তিনী|| ১০-৩৭||
জানে বো রক্ষসাক্রান্তাবনুভাবপরাক্রমৌ |
অঙ্গিনাং তমসেবোভৌ গুণৌ প্রথমমধ্যমৌ|| ১০-৩৮||
বিদিতং তপ্যমানং চ তেন মে ভুবনত্রয়ম্ |
অকামোপনতেনেব সাধোর্হৃদয়মেনসা|| ১০-৩৯||
কার্যেষু চৈককার্যৎবাদভ্যর্থ্যোঽস্মি ন বজ্রিণা |
স্বয়মেব হি বাতোঽগ্নেঃ সারথ্যং প্রতিপদ্যতে|| ১০-৪০||
স্বাসিধারাপরিহৃতঃ কামং চক্রস্য তেন মে |
স্থাপিতো দশমো মূর্ধা লভ্যাংশ ইব রক্ষসা|| ১০-৪১||
স্রষ্টুর্বরাতিসর্গাত্তু ময়া তস্য দুরাত্মনঃ |
অত্যারূঢং রিপোঃ সোঢং চন্দনেনেব ভোগিনঃ|| ১০-৪২||
ধাতারং তপসা প্রীতং যয়াচে স হি রাক্ষসঃ |
দৈবাৎসর্গাদবধ্যৎবং মর্ত্যেষ্বাস্থাপরাঙ্মুখঃ|| ১০-৪৩||
সোঽহং দাশরথির্ভূৎবা রণভূমের্বলিক্ষমম্ |
করিষ্যামি শরৈস্তীক্ষ্ণৈস্তচ্ছিরঃকমলোচ্চয়ম্|| ১০-৪৪||
অচিরাদ্যজ্বভির্ভাগং কল্পিতং বিধিবৎপুনঃ |
মায়াবিভিরনালীঢমাদাস্যধ্বে নিশাচরৈঃ|| ১০-৪৫||
বৈমানিকাঃ পুণ্যকৃতস্ত্যজন্তু মরুতাং পথি |
পুষ্পকালোকসংক্ষোভং মেঘাবরণতৎপরাঃ|| ১০-৪৬||
মোক্ষ্যধ্বে স্বর্গবন্দীনাং বেণীবন্ধনদূষিতান্ |
শাপয়ন্ত্রিতপৌলস্ত্যবলাৎকারকচগ্রহৈঃ|| ১০-৪৭||
রাবণাবগ্রহক্লান্তমিতি বাগমৃতেন সঃ |
অভিবৃষ্য মরুৎসস্যং কৃষ্ণমেঘস্তিরোদধে|| ১০-৪৮||
পুরহূতপ্রভৃতয়ঃ সুরকার্যোদ্যতং সুরাঃ |
অংশৈরনুয়য়ুর্বিষ্ণুং পুষ্পৈর্বায়ুমিব দ্রুমাঃ|| ১০-৪৯||
অথ তস্য বিশাংপত্যুরন্তে কামস্য কর্মণঃ |
পুরুষঃ প্রবভূবাগ্নের্বিস্ময়েন সহর্ত্বিজাম্|| ১০-৫০||
হেমপাত্রগতং দোর্ভ্যামাদধানঃ পয়শ্চরুম্ |
অনুপ্রবেশাদাদ্যস্য পুংসস্তেনাপি দুর্বহম্|| ১০-৫১||
প্রাজাপত্যোপনীতং তদন্নং প্রত্যগ্রহীন্নৃপঃ |
বৃষেব পয়সাং সারমাবিষ্কৃতমুদন্বতা|| ১০-৫২||
অনেন কথিতা রাজ্ঞো গুণাস্তস্যান্যদুর্লভাঃ |
প্রসূতিং চকমে তস্মিংস্ত্রৈলোক্যপ্রভবোঽপি যৎ|| ১০-৫৩||
স তেজো বৈষ্ণবং পত্ন্যোর্বিভেজে চরুসংজ্ঞিতম্ |
দ্যাবাপৃথিব্যোঃ প্রত্যগ্রমহর্পতিরিবাতপম্|| ১০-৫৪||
অর্চিতা তস্য কৌসল্যা প্রিয়া কেকয়বংশজা |
অতঃ সংভাবিতাং তাভ্যাং সুমিত্রামৈচ্ছদীশ্বরঃ|| ১০-৫৫||
তে বহুজ্ঞস্য চিত্তজ্ঞে পত্নৌ পত্যুর্মহীক্ষিতঃ |
চরোরর্ধার্ধভাগাভ্যাং তাময়োজয়তামুভে|| ১০-৫৬||
সা হি প্রণয়বত্যাসীৎসপত্ন্যোরুভয়োরপি |
ভ্রমরী বারণস্যেব মদনিস্যন্দরেখয়োঃ|| ১০-৫৭||
তাভির্গর্ভঃ প্রজাভূত্যৈ দধ্রে দেবাংশসংভবঃ |
সৌরীভিরিব নাডীভিরমৃতাখ্যাভিরম্ময়ঃ|| ১০-৫৮||
সমমাপন্নসত্ত্বাস্তা রেজুরাপাণ্ডুরৎবিষঃ |
অন্তর্গতফলারম্ভাঃ সস্যানামিব সংপদঃ|| ১০-৫৯||
গুপ্তং দদৃশুরাত্মানং সর্বাঃ স্বপ্নেষু বামনৈঃ |
জলজাসিকদাশার্ঙ্গচক্রলাঞ্ছিতমূর্তিভিঃ|| ১০-৬০||
হেমপক্ষপ্রভাজালং গগনে চ বিতন্বতা |
উহ্যন্তে স্ম সুপর্ণেন বেগাকৃষ্টপয়োমুচা|| ১০-৬১||
বিভ্রত্যা কৌস্তুভন্যাসং স্তনান্তরবিলম্বিতম্ |
পর্যুপাস্যন্ত লক্ষ্ম্যা চ পদ্মব্যজনহস্তয়া|| ১০-৬২||
কৃতাভিষেকৈর্দিব্যায়াং ত্রিস্রোতসি চ সপ্তভিঃ |
ব্রহ্মর্ষিভিঃ পরং ব্রহ্ম গৃণদ্ভিরুপতস্থিরে|| ১০-৬৩||
তাভ্যস্তথাবিধান্স্বপ্নাঞ্ছ্রুৎবা প্রীতো হি পার্থিবঃ |
মেনে পরার্ধ্যমাত্মানং গুরুৎবেন জগদ্গুরোঃ|| ১০-৬৪||
বিভক্তাত্মা বিভুস্তাসামেকঃ কুক্ষিষ্বনেকধা |
উবাস প্রতিমাচন্দ্রঃ প্রসন্নানামপামিব|| ১০-৬৫||
অথাগ্র্যমহিষী রাজ্ঞঃ প্রসূতিসময়ে সতী |
পুত্রং তমোপহং লেভে নক্তং জ্যোতিরিবৌষধিঃ|| ১০-৬৬||
রাম ইত্যভিরামেণ বপুষা তস্য চোদিতঃ |
নামধেয়ং গুরুশ্চক্রে জগৎপ্রথমমঙ্গলম্|| ১০-৬৭||
রঘুবংশপ্রদীপেন তেনাপ্রতিমতেজসা |
রক্ষাগৃহগতা দীপাঃ প্রত্যাদিষ্টা ইবাভবন্|| ১০-৬৮||
শয়্যাগতেন রামেণ মাতা শাতোদরী বভৌ |
সৈকতাম্ভোজবলিনা জাহ্নবীব শরৎকৃশা|| ১০-৬৯||
কৈকেয়্যাস্তনয়ো জজ্ঞে ভরতো নাম শীলবান্ |
জনয়িত্রীমলংচক্রে যঃ প্রশ্রয় ইব শ্রিয়ম্|| ১০-৭০||
সুতৌ লক্ষ্মণশত্রুঘ্নৌ সুমিত্রা সুষুবে যমৌ |
সম্যগারাধিতা বিদ্যা প্রবোধবিনয়াবিব|| ১০-৭১||
নির্দোষমভবৎসর্বমাবিষ্কৃতগুণং জগৎ |
অন্বগাদিব হি স্বর্গো গাং গতং পুরুষোত্তমম্|| ১০-৭২||
তস্যোদয়ে চতুর্মূর্তেঃ পৌলস্ত্যচকিতেশ্বরাঃ |
বিরজস্কৈর্নভস্বদ্ভির্দিশ উচ্ছ্বসিতা ইব|| ১০-৭৩||
কৃশানুরপধূমৎবাৎপ্রসন্নৎবাৎপ্রভাকরঃ |
রক্ষোবিপ্রকৃতাবাস্তামপবিদ্ধশুচাবিব|| ১০-৭৪||
দশাননকিরীটেভ্যস্তৎক্ষণং রাক্ষসশ্রিয়ঃ |
মণিব্যাজেন পর্যস্তাঃ পৃথিব্যামশ্রুবিন্দবঃ|| ১০-৭৫||
পুত্রজন্মপ্রবেশ্যানাং তূর্যাণাং তস্য পুত্রিণঃ |
আরম্ভং প্রথমং চক্রুর্দেবদুন্দুভয়ো দিবি|| ১০-৭৬||
সংতানকময়ী বৃষ্টির্ভবনে চাস্য পেতুষী |
সন্মঙ্গলোপচারাণাং সৈবাদিরচনাঽভবৎ|| ১০-৭৭||
কুমারাঃ কৃতসংস্কারাস্তে ধাত্রীস্তন্যপায়িনঃ |
আনন্দেনাগ্রজেনেব সমং ববৃধিরে পিতুঃ|| ১০-৭৮||
স্বাভাবিকং বিনীতৎবং তেষাং বিনয়কর্মণা |
মুমূর্চ্ছ সহজং তেজো হবিষেব হবির্ভুজাম্|| ১০-৭৯||
পরস্পরবিরুদ্ধাস্তে তদ্রগোরনঘং কুলম্ |
অলমুদ্যোতয়ামাসুর্দেবারণ্যমিবর্তবঃ
সমানেঽপি হি সৌভ্রাত্রে যথেভৌ রামলক্ষ্মণৌ |
তথা ভরতশত্রুঘ্নৌ প্রীত্যা দ্বন্দ্বং বভূবতুঃ|| ১০-৮১||
তেষাং দ্বয়োর্দ্বয়োরৈক্যং বিভিদে ন কদাচন |
যথা বায়ুর্বিভাবস্বোর্যথা চন্দ্রসমুদ্রয়োঃ|| ১০-৮২||
তে প্রজানাং প্রজানাথাস্তেজসা প্রশ্রয়েণ চ |
মনো জহ্রুর্নিদাঘান্তে শ্যামাভ্রা দিবসা ইব|| ১০-৮৩||
স চতুর্ধা বভৌ ব্যস্তঃ প্রসবঃ পৃথিবীপতেঃ |
ধর্মার্থকামমোক্ষাণামবতার ইবাঙ্গবান্|| ১০-৮৪||
গুণৈরারাধয়ামাসুস্তে গুরুং গুরুবৎসলাঃ |
তমেব চতুরন্তেশং রত্নৈরিব মহার্ণবাঃ|| ১০-৮৫||
সুরগজ ইব দন্তৈর্ভগ্নদৈত্যাসিধারৈ-
র্নয় ইব পণবন্ধব্যক্তয়োগৈরুপায়ৈঃ |
হরিরিব যুগদীর্ঘৈর্দোর্ভিরংশৈস্তদীয়ৈঃ
পতিরবনিপতীনাং তৈশ্চকাশে চতুর্ভিঃ|| ১০-৮৬||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
রামাবতারোও নাম দশমঃ সর্গঃ ||