রঘুবংশং সর্গ ১২

|| কালিদাসকৃতং রঘুবংশম্ সর্গ ১২ ||

নির্দিষ্টবিষয়স্নেহঃ স দশান্তমুপেয়িবান্ |
আসীদাসন্ননির্বাণঃ প্রদীপার্চিরিবোষসি|| ১২-১||
তং কর্ণমূলমাগত্য রামে শ্রীর্ন্যস্যতামিতি |
কৈকেয়ীশঙ্কয়েএবাহ পলিতচ্ছদ্মনা জরা|| ১২-২||
সা পৌরান্পৌরকান্তস্য রামস্যাভ্যুদয়শ্রুতিঃ |
প্রত্যেকং হ্রাদয়াংচক্রে কুল্যেনোদ্যানপাদপান্|| ১২-৩||
তস্যাভিষেকসংভারে কল্পিতং ক্রূরনিশ্চয়া |
দূষয়ামাস কৈকেয়ী শোকোষ্ণৈঃ পার্থিবাশ্রুভিঃ|| ১২-৪||
সা কিলাশ্বাসিতা চণ্ডী ভর্ত্রা তৎসংশ্রুতৌ বরৌ |
উদ্ববামেন্দ্রসিক্তা ভূর্বিলমগ্নাবিবোরগৌ|| ১২-৫||
তয়োশ্চতুর্দশৈকেন রামং প্রাব্রাজয়ৎসমাঃ |
দ্বিতীয়েন সুতস্যৈচ্ছদ্বৈধব্যৈকফলাং শ্রিয়ম্|| ১২-৬||
পিত্রা দত্তং রুদন্রামঃ প্রাঙ্মহীং প্রত্যপদ্যত |
পশ্চাদ্বনায় গচ্ছেতি তদাজ্ঞাং মুদিতোঽগ্রহীৎ|| ১২-৭||
দধতো মঙ্গলক্ষৌমে বসানস্য চ বল্কলে |
দদৃশুর্বিস্মিতাস্তস্য মুখরাগং সমং জনাঃ|| ১২-৮||
স সীতালক্ষ্মণসখঃ সত্যাদ্গুরুমলোপয়ন্ |
বিবেশ দণ্ডকারণ্যং প্রত্যেকং চ সতাং মনঃ|| ১২-৯||
রাজাপি তদ্বিয়োগার্তঃ স্মৃৎবা শাপং স্বকর্মজম্ |
শরীরত্যাগমাত্রেণ শুদ্ধিলাভমন্যত|| ১২-১০||
বিপ্রোষিতকুমারং তদ্রাজ্যমস্তমিতেশ্বরম্ |
রন্ধ্রান্বেষণদক্ষাণাং দ্বিষামামিষততাং যয়ৌ|| ১২-১১||
অথানাথাঃ প্রকৃতয়ো মাতৃবন্ধুনিবাসিনম্ |
মৌলৈরানায়য়ামাসুর্ভরতং স্তম্ভিতাশ্রুভিঃ|| ১২-১২||
শ্রুৎবা তথাবিধং মৃত্যুং কৈকেয়ীতনয়ঃ পিতুঃ |
মাতুর্ন কেবলং স্বস্যাঃ শ্রিয়োঽপ্যাসীৎপরাঙ্মুখঃ|| ১২-১৩||
সসৈন্যশ্চান্বগাদ্রামং দর্শিতানাশ্রমালয়ৈঃ |
তস্য পশ্যন্সসৌমিত্রেরুদশ্রুর্বসতিদ্রুমান্|| ১২-১৪||
চিত্রকূটবনস্থং চ কথিতস্বর্গতির্গুরোঃ |
লক্ষ্ম্যা নিমন্ত্রয়াংচক্রে তমনুচ্ছিষ্টসংপদা|| ১২-১৫||
স হি প্রথমজে তস্মিন্নকৃতশ্রীপরিগ্রহে |
পরিবেত্তারমাত্মানং মেনে স্বীকরণাদ্ভুবঃ|| ১২-১৬||
তমশক্যমপাক্রষ্টুং নিদেশাৎস্বর্গিণঃ পিতুঃ |
যয়াচে পাদুকে পশ্চাৎকর্তুং রাজ্যাধিদেবতে|| ১২-১৭||
স বিসৃষ্টস্তথেত্যুক্ত্বা ভ্রাত্রা নৈবাবিশৎপুরীম্ |
নন্দিগ্রামগতস্তস্য রাজ্যং ন্যাসমিবাভুনক্|| ১২-১৮||
দৃঢভক্তিরিতি জ্যেষ্ঠে রাজ্যতৃষ্ণাপরাঙ্মুখঃ |
মাতুঃ পাপস্য ভরতঃ প্রায়শ্চিত্তমিবাকরোৎ|| ১২-১৯||
রামোঽপি সহ বৈদেহ্যা বনে বন্যেন বর্তয়ন্ |
চচার সানুজঃ শান্তো বৃদ্ধেক্ষ্বাকুব্রতং যুবা|| ১২-২০||
প্রভাবস্তম্ভিতচ্ছায়মাশ্রিতঃ স বনস্পতিম্ |
কদাচিদঙ্কে সীতায়াঃ শিশ্যে কিংচিদিব শ্রমাৎ|| ১২-২১||
ঐন্দ্রঃ কিল নখৈস্তস্যা বিদদার স্তনৌ দ্বিজঃ |
প্রিয়োপভোগচিহ্নেষু পৌরোভাগ্যমিবাচরন্|| ১২-২২||
তস্মিন্নস্থদিষীকাস্ত্রং রামো রামাববোধিতঃ |
আত্মানং মুমুচে তস্মাদেকনেত্রব্যয়েন সঃ|| ১২-২৩||
রামস্ত্বাসন্নদেশৎবাদ্ভরতাগমনং পুনঃ |
আশঙ্ক্যোৎসুকসারঙ্গাং চিত্রকূটস্থলীং জহৌ|| ১২-২৪||
প্রয়য়াবাতিথেয়েষু বসন্নৃষিকুলেষু সঃ |
দক্ষিণাং দিশমৃক্ষেষু বার্ষিকেষ্বিব ভাস্করঃ|| ১২-২৫||
বভৌ তমনুগচ্ছন্তী বিদেহাধিপতেঃ সুতা |
প্রতিষিদ্ধাপি কৈকেয়্যা লক্ষ্মীরিব গুণোন্মুখী|| ১২-২৬||
অনসূয়াতিসৃষ্টেন পুণ্যগন্ধেন কাননম্ |
সা চকারাঙ্গরাগেণ পুষ্পোচ্চলিতষট্পদম্|| ১২-২৭||
সংধ্যাভ্রকপিশস্তস্য বিরাধো নাম রাক্ষসঃ |
অতিষ্ঠন্মার্গমাবৃত্য রামস্যেন্দোরিব গ্রহঃ|| ১২-২৮||
স জহার তয়োর্মধ্যে মৈথিলীং লোকশোষণঃ |
নভোনভস্যয়োর্বৃষ্টিমবগ্রহ ইবান্তরে|| ১২-২৯||
তং বিনিষ্পিষ্য কাকুৎস্থৌ পুরা দূষয়তি স্থলীম্ |
গন্ধেনাশুচিনা চেতি বসুধায়াং নিচখ্নতুঃ|| ১২-৩০||
পঞ্চবট্যাং ততো রামঃ শাসনাৎকুম্ভজন্মনঃ |
অনপোঢস্থিতিস্তস্থৌ বিন্ধ্যাদ্রিঃ প্রকৃতাবিব|| ১২-৩১||
রাবণাবরজা তত্র রাঘবং মদনাতুরা |
অভিপেদে নিদাঘার্তা ব্যালীব মলয়দ্রুমম্|| ১২-৩২||
সা সীতাসংনিধাবেব তং বব্রে কথিতান্বয়া |
অত্যারূঢো হি নারীণামকালজ্ঞো মনোভবঃ|| ১২-৩৩||
কলত্রবানহং বালে কনীয়াংসং ভজস্ব মে|
ইতি রামো বৃষস্যন্তীং বৃষস্কন্ধঃ শশাস তাম্|| ১২-৩৪||
জ্যেষ্ঠাভিগমনাৎপূর্বং তেনাপ্যনভিনন্দিতাম্ |
সাঽভূদ্রামাশ্রয়া ভূয়ো নদীবোভয়কূলভাক্|| ১২-৩৫||
সংরম্ভং মৈথিলীহাসঃ ক্ষণসৌম্যাং নিনায় তাম্ |
নিবাতস্তিমিতাং বেলাং চন্দ্রোদয় ইবোদধেঃ|| ১২-৩৬||
ফলমস্যোপহাসস্য সদ্যঃ প্রাপ্স্যসি পশ্য মাম্ |
মৃগ্যাঃ পরিভবো ব্যাঘ্র্যামিত্যবেহি ৎবয়া কৃতম্|| ১২-৩৭||
ইত্যুক্ত্বা মৈথিলীং ভর্তুরঙ্কে নিবিশতীং ভয়াৎ |
রূপং শূর্পণখা নাম্নঃ সদৃশং প্রত্যপদ্যত|| ১২-৩৮||
লক্ষ্মণঃ প্রথমং শ্রুৎবা কোকিলামঞ্জুবাদিনীম্ |
শিবাঘোরস্বনাং পশ্চাদ্বুবুধে বিকৃতেতি তাম্|| ১২-৩৯||
পর্ণশালামথ ক্ষিপ্রং বিকৃষ্টাসিঃ প্রবিশ্য সঃ |
বৈরূপ্যপৌনরুক্ত্যেন ভীষণাং তাময়োজয়ৎ|| ১২-৪০||
সা বক্রনখধারিণ্যা বেণুকর্কশপর্বয়া |
অঙ্কুশাকারয়াঙ্গুল্যা তাবতর্জয়দম্বরে|| ১২-৪১||
প্রাপ্য চাশু জনস্থানং খরাদিভ্যস্তথাবিধম্ |
রামোপক্রমমাচখ্যৌ রক্ষঃপরিভবং নবম্|| ১২-৪২||
মুখাবয়বলূনাং তাং নৈরৃতা যৎপুরো দধুঃ |
রামাভিয়ায়িনাং তেষাং তদেবাভূদমঙ্গলম্|| ১২-৪৩||
উদায়ুধানাৎপততস্তান্দৃপ্তান্প্রেক্ষ্য রাঘবঃ |
নিদধে বিজয়াশংসাং চাপে সীতাং চ লক্ষ্মণে|| ১২-৪৪||
একো দাশরথিঃ কামং যাতুধানাঃ সহস্রশঃ |
তে তু যাবন্ত এবাজৌ তাবাংশ্চ দদৃশে স তৈঃ|| ১২-৪৫||
অসজ্জনেন কাকুৎস্থঃ প্রয়ুক্তমথ দূষণম্ |
ন চক্ষমে শুভাচারঃ স দূষণমিবাত্মনঃ|| ১২-৪৬||
তং শরৈঃ প্রতিজগ্রাহ খরত্রিশিরসৌ চ সঃ |
ক্রমশস্তে পুনস্তস্য চাপাৎসমমিবোদ্যয়ুঃ|| ১২-৪৭||
তৈস্ত্রয়াণাং শিতৈর্বাণৈর্যথাপূর্ববিশুদ্ধিভিঃ |
আয়ুর্দেহাতিগৈঃ পীতং রুধিরং তু পতত্রিভিঃ|| ১২-৪৮||
তস্মিন্রামশরোৎকৃত্তে বলে মহতি রক্ষসাম্ |
উত্থিতং দদৃশেঽন্ন্যচ্চ কবন্ধেভ্যো ন কিংচন|| ১২-৪৯||
সা বাণবর্ষিণং রামং যোধয়িৎবা সুরদ্বিষাম্ |
অপ্রবোধায় সুষ্বাপ গৃধ্রচ্ছায়ে বরূথিনী|| ১২-৫০||
রাঘবাস্ত্রবিদীর্ণানাং রাবণং প্রতি রক্ষসাম্ |
তেষাং শূর্পণখৈবৈকা দুষ্প্রবৃত্তিহরাঽভবৎ|| ১২-৫১||
নিগ্রহাৎস্বসুরাপ্তানাং বধাচ্চ ধনদানুজঃ |
রামেণ নিহিতং মেনে পদং দশসু মূর্ধসু|| ১২-৫২||
রক্ষসা মৃগরূপেণ বঞ্চয়িৎবা স রাঘবৌ |
জহার সীতাং পক্ষীন্দ্রপ্রয়াসক্ষণবিঘ্নিতঃ|| ১২-৫৩||
তৌ সীতাবেষিণৌ গৃধ্রং লূনপক্ষমপশ্যতাম্ |
প্রাণৈর্দশরথপ্রীতেরনৃণং কণ্ঠবর্তিভিঃ|| ১২-৫৪||
স রাবণহৃতাং তাভ্যাং বচসাচষ্ট মৈথিলীম্ |
আত্মনঃ সুমহৎকর্ম ব্রণৈরাবেদ্য সংস্থিতঃ|| ১২-৫৫||
তয়োস্তস্মিন্নবীভূতপিতৃব্যাপতিশোকয়োঃ |
পিতরীবাগ্নিসংস্কারাৎপরা ববৃতিরে ক্রিয়াঃ|| ১২-৫৬||
বধনির্ধূতশাপস্য কবন্ধস্যোপদেশতঃ |
মুমূর্চ্ছ সখ্যং রামস্য সমানব্যসনে হরৌ|| ১২-৫৭||
স হৎবা বালিনং বীরস্তৎপদে চিরকাঙ্ক্ষিতে |
ধাতোঃ স্থান ইবাদেশং সুগ্রীবং সংন্যবেশয়ৎ|| ১২-৫৮||
ইতস্ততশ্চ বৈদেহীমন্বেষ্টুং ভর্তৃচোদিতাঃ |
কপয়শ্চেরুরার্তস্য রামস্যেব মনোরথাঃ|| ১২-৫৯||
প্রবৃত্তাবুপলব্ধায়াং তস্যাঃ সংপাতিদর্শনাৎ |
মারুতিঃ সাগরং তীর্ণঃ সংসারমিব নির্মমঃ|| ১২-৬০||
দৃষ্টা বিচিন্বতা তেন লঙ্কায়াং রাক্ষসীবৃতা |
জানকী বিষবল্লীভিঃ পরিতেব মহৌষধিঃ|| ১২-৬১||
তস্যৈ ভর্তুরভিজ্ঞানমঙ্গুলীয়ং দদৌ কপিঃ |
প্রত্যুদ্গতমিবানুষ্ণৈস্তদানন্দাশ্রুবিন্দুভিঃ|| ১২-৬২||
নির্বাপ্য প্রিয়সংদেশৈঃ সীতামক্ষবধোদ্ধতঃ |
স দদাহ পুরীং লঙ্কাং ক্ষণসোঢারিনিগ্রহঃ|| ১২-৬৩||
প্রত্যভিজ্ঞানরত্নং চ রামায়াদর্শয়ৎকৃতী |
হৃদয়ং স্বয়মায়াতং বৈদেহ্যা ইব মূর্তিমৎ|| ১২-৬৪||
স প্রাপ হৃদয়ন্যস্তমণিস্পর্শনিমীলিতঃ |
অপয়োধরসংসর্গাং প্রিয়ালিঙ্গননির্বৃতিম্|| ১২-৬৫||
শ্রুৎবা রামঃ প্রিয়োদন্তং মেনে তৎসঙ্গমোৎসুকঃ |
মহার্ণবপরিক্ষেপং লঙ্কায়াঃ পরিখালঘুম্|| ১২-৬৬||
স প্রতস্থেঽরিনাশায় হরিসৈন্যৈরনুদ্রুতঃ |
ন কেবলং ভুবঃ পৃষ্ঠে ব্যোম্নি সংবাধবর্তিভিঃ|| ১২-৬৭||
নিবিষ্টমুদধেঃ কূলে তং প্রপাদ বিভীষণঃ |
স্নেহাদ্রাক্ষসলক্ষ্ম্যেব বুদ্ধিমাবিশ্য চোদিতঃ|| ১২-৬৮||
তস্মৈ নিশাচরৈশ্বর্যং প্রতিশুশ্রাব রাঘবঃ |
কালে খলু সমালব্ধাঃ ফলং বধ্নন্তি নীতয়ঃ|| ১২-৬৯||
স সেতুং বন্ধয়ামাস প্লবগৈর্লবণাম্ভসি |
রসাতলাদিবোন্মগ্নং শেষং স্বপ্নায় শার্ঙ্গিণঃ|| ১২-৭০||
তেনোত্তীর্য পথা লঙ্কাং রোধয়ামাস পিঙ্গলৈঃ |
দ্বিতীয়ং হেমপ্রাকারং কুর্বদ্ভিরিব বানরৈঃ|| ১২-৭১||
রণঃ প্রববৃতে তত্র ভীমঃ প্লবগরক্ষসাম্ |
দিগ্বিজৃম্ভিতকাকুৎস্থপৌলস্ত্যজয়ঘোষণঃ|| ১২-৭২||
পাদপাবিদ্ধপরিঘঃ শিলানিষ্পিষ্টমুদ্গরঃ |
অতিশস্ত্রনখন্যাসঃ শৈলরুগ্ণমতংগজঃ|| ১২-৭৩||
অথ রামশিরশ্ছেদদর্শনোদ্ভ্রান্তচেতনাম্ |
সীতাং মায়েতি শংসন্তী ত্রিজটা সমজীবয়ৎ|| ১২-৭৪||
কামং জীবতি মে নাথ ইতি সা বিজহৌ শুচম্ |
প্রাঙ্মৎবা সত্যমস্যান্তং জীবিতাস্মীতি লজ্জিতা|| ১২-৭৫||
গরুডাপাতবিশ্লিষ্টমেঘনাদাস্ত্রবন্ধনঃ |
দাশরথ্যোঃ ক্ষণক্লেশঃ স্বপ্নবৃত্ত ইবাভবৎ|| ১২-৭৬||
ততো বিভেদ পৌলস্ত্যঃ শক্ত্যা বক্ষসি লক্ষ্মণম্ |
রামস্ত্বনাহতোঽপ্যাসীদ্বিদীর্ণহৄদয়ঃ শুচা|| ১২-৭৭||
স মারুতিসমানীতমহৌষধিহতব্যথঃ |
লঙ্কাস্ত্রীণাং পুনশ্চক্রে বিলাপাচার্যকং শরৈঃ|| ১২-৭৮||
স নাদং মেঘনাদস্য ধনুশ্চেন্দ্রায়ুধপ্রভম্ |
মেঘস্যেব শরৎকালো ন কিঞ্চিৎপর্যশেষয়ৎ|| ১২-৭৯||
কুম্ভকর্ণঃ কপীন্দ্রেণ তুল্যাবস্থঃ স্বসুঃ কৃতঃ |
রুরোধ রামং শৃঙ্গীব টঙ্কচ্ছিন্নমনঃশিলঃ|| ১২-৮০||
অকালে বোধিতো ভ্রাতা প্রিয়স্বপ্নো বৃথা ভবান্ |
রামেষুভিরিতীবাসৌ দীর্ঘনিদ্রাং প্রবেশিতঃ|| ১২-৮১||
ইতরাণ্যপি রক্ষাংসি পেতুর্বানরকোটিষু |
রজাংসি সমরোত্থানি তচ্ছোণিতনদীষ্বিব|| ১২-৮২||
নির্যয়াবথ পৌলস্ত্যঃ পুনর্যুদ্ধায় মন্দিরাৎ |
অরাবণমরামং বা জগদদ্যেতি নিশ্চিতঃ|| ১২-৮৩||
রামং পদাতিমালোক্য লঙ্কেশং চ বরূথিনম্ |
হরিয়ুগ্যং রথং তস্মৈ প্রজিঘায় পুরংদরঃ|| ১২-৮৪||
তমাধূতধ্বজপটং ব্যোমগঙ্গোর্মিবায়ুভিঃ |
দেবসূতভুজালম্বী জৈত্রমধ্যাস্ত রাঘবঃ|| ১২-৮৫||
মাতলিস্তস্য মাহেন্দ্রমামুমোচ তনুচ্ছদম্ |
যত্রোৎপলদলক্লৈব্যমস্ত্রাণ্যাপুঃ সুরদ্বিষাম্|| ১২-৮৬||
অন্যোন্যদর্শনপ্রাপ্তবিক্রমাবসরং চিরাৎ |
রামরাবণয়োর্যুদ্ধং চরিতার্থমিবাভবৎ|| ১২-৮৭||
ভুজমূর্ধোরুবাহুল্যাদেকোঽপি ধনদানুজঃ |
দদৃশে হ্যয়থাপূর্বো মাতৃবংশ ইব স্থিতঃ|| ১২-৮৮||
জেতারং লোকপালানাং স্বমুখৈরর্চিতেশ্বরম্ |
রামস্তুলিতকৈলাসমারাতিং বহ্বমন্যত|| ১২-৮৯||
তস্য স্ফুরতি পৌলস্ত্যঃ সীতাসংগমশংসিনি |
নিচখানাধিকক্রোধঃ শরং সব্যেতরে ভুজে|| ১২-৯০||
রাবণস্যাপি রামাস্তো ভিত্ত্বা হৃদয়মাশুগঃ |
বিবেশ ভুবমাখ্যাতুমুরগেভ্য ইব প্রিয়ম্|| ১২-৯১||
বচসৈব তয়োর্বাক্যমস্ত্রমস্ত্রেণ নিঘ্নতোঃ |
অন্যোন্যজয়সংরম্ভো ববৃধে বাদিনোরিব|| ১২-৯২||
বিক্রমব্যতিহারেণ সামান্যাঽভূদ্দ্বয়োরপি |
জয়শ্রীরন্তরা বেদির্মত্তবারণয়োরিব|| ১২-৯৩||
কৃতপ্রতিকৃতপ্রীতৈস্তয়োর্মুক্তাং সুরাসুরৈঃ |
পরস্পরশরব্রাতাঃ পুষ্পবৃষ্টিং ন সেহিরে|| ১২-৯৪||
অয়ঃশঙ্কুচিতাং রক্ষঃ শতঘ্নীমথ শত্রবে |
হৃতাং বৈবস্বতস্যেব কূটশাল্মলিমক্ষিপৎ|| ১২-৯৫||
রাঘবো রথমপ্রাপ্তাং তামাশাং চ সুরদ্বিষাম্ |
অর্ধচন্দ্রমুখৈর্বাণৈশ্চিচ্ছেদ কদলীসুখম্|| ১২-৯৬||
অমোঘং সংদধে চাস্মৈ ধনুষ্যেকধনুর্ধরঃ |
ব্রাহ্মমস্ত্রং প্রিয়াশোকশল্যনিষ্কর্ষণৌষধম্|| ১২-৯৭||
তদ্ব্যোম্নি শতধা ভিন্নং দদৃশে দীপ্তিমন্মুখম্ |
বপুর্মহোরগস্যেব করালফলমণ্ডলম্|| ১২-৯৮||
তেন মন্ত্রপ্রয়ুক্তেন নিমেষার্ধাদপাতয়ৎ |
স রাবণশিরঃপঙ্ক্তিমজ্ঞাতব্রণবেদনাম্|| ১২-৯৯||
বালার্কপ্রতিমেবাপ্সু বীচিভিন্না পতিষ্যতঃ |
ররাজ রক্ষঃকায়স্য কণ্ঠচ্ছেদপরম্পরা|| ১২-১০০||
মরুতাং পশ্যতাং তস্য শিরাংসি পতিতান্যপি |
মনো নাতিবিশস্বাস পুনঃসংধানশঙ্কিনাম্|| ১২-১০১||
অথ মদগুরুপক্ষৈলোকপালদ্বিপানা-
মনুগতমলিবৃন্দৈর্গণ্ডভিত্তীর্বিহায় |
উপনতমণিবন্ধে মূর্ধ্নি পৌলস্ত্যশত্রোঃ
সুরভি সুরবিমুক্তং পুষ্পবর্ষং পপাত|| ১২-১০২||
যন্তা হরেঃ সপদি সংহৃতকার্মুকজ্য-
মাপৃচ্ছ্য রাঘবমনুষ্ঠিতদেবকার্যম্ |
নামাঙ্করাবণশরাঙ্কিতকেতুয়ষ্টি-
মূর্ধ্বং রথং হরিসহস্রয়ুজং নিনায়|| ১২-১০৩||
রঘুপতিরপি জাতবেদোবিশুদ্ধাং প্রগৃহ্য প্রিয়াং
প্রিয়সুহৃদি বিভীষণে সংগময়্য শ্রিয়ং বৈরিণঃ |
রবিসুতসহিতেন তেনানুয়াতঃ সসৌমিত্রিণা
ভুজবিজিতবিমানরত্নাধিরূঢঃ প্রতস্থে পুরীম্|| ১২-১০৪||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
রাবণবধো নাম দ্বাদশঃ সর্গঃ ||