রঘুবংশং সর্গ ১৪

|| কালিদাসকৃতং রঘুবংশম্ সর্গ ১৪ ||

ভর্তুঃ প্রণাশাদথ শোচনীয়ং দশান্তরং তত্র সমং প্রপন্নে |
অপশ্যতাং দাশরথী জনন্যৌ ছেদাদিবোপঘ্নতরোর্ব্রতত্যৌ|| ১৪-১||
উভাবুভাভ্যাং প্রণতৌ হতারী যথাক্রমং বিক্রমশোভিনৌ তৌ |
বিস্পষ্টমস্রান্ধতয়া ন দৃষ্টৌ জ্ঞাতৌ সুতস্পর্শসুখোপলম্ভাৎ|| ১৪-২||
আনন্দজঃ শোকজমশ্রুবাষ্পস্তয়োরশীতং শিশিরো বিভেদ |
গঙ্গাসরয়্বোর্জলমুষ্ণতপ্তং হিমাদ্রিনিস্যন্দ ইবাবতীর্ণঃ|| ১৪-৩||
তে পুত্রয়োর্নৈঋতশস্ত্রমার্গানার্দ্রানিবাঙ্গে সদয়ং স্পৃশন্তৌ |
অপীপ্সিতং ক্ষত্রকুলাঙ্গনানাং ন বীরসূশব্দমকাময়েতাম্|| ১৪-৪||
ক্লেশাবহা ভর্তুরলক্ষণাহং সীতেতি নাম স্বমুদীরয়ন্তী |
স্বর্গপ্রতিষ্ঠস্য গুরোর্মহিষ্যাবভক্তিভেদেন বধূর্ববন্দে|| ১৪-৫||
উত্তিষ্ঠ বৎসে ননু সানুজোঽসৌ বৃত্তেন ভর্তা শুচিনা তবৈব |
কৃচ্ছ্রং মহত্তীর্ণ ইব প্রিয়ার্হাং তামূচতুস্তে প্রিয়মপ্যমিথ্যা|| ১৪-৬||
অথাভিষেকং রঘুবংশকেতোঃ প্রারব্ধমানন্দজলৈর্জনন্যোঃ |
নির্বর্তয়ামাসুরমাত্যবৃদ্ধাস্তীর্থাহৃতৈঃ কাঞ্চনকুম্ভতোয়ৈঃ|| ১৪-৭||
সরিৎসমুদ্রান্সরসীশ্চ গৎবা রক্ষঃকপীন্দ্রৈরুপপাদিতানি |
তস্যাপতন্মূর্ধ্নি জলানি জিষ্ণোর্বিন্ধ্যস্য মেঘপ্রভবা ইবাপঃ|| ১৪-৮||
তপস্বিবেষক্রিয়য়াপি তাবদ্যঃ প্রেক্ষণীয়ঃ সুতরাং বভূব |
রাজেন্দ্রনেপথ্যবিধানশোভা তস্যোদিতাসীৎপুনরুক্তদোষা|| ১৪-৯||
স মৌলরক্ষোহরিভিঃ সসৈন্যস্তূর্যস্বনানন্দিতপৌরবর্গঃ |
বিবেশ সৌধোদ্গতলাজবর্ষামুত্তোরণামন্বয়রাজধানীম্|| ১৪-১০||
সৌমিত্রিণা সাবরজেন মন্দমাধূতবালব্যজনো রথস্থঃ |
ধৃতাতপত্রো ভরতেন সাক্ষাদুপায়সংঘাত ইব প্রবৃদ্ধঃ|| ১৪-১১||
প্রাসাদকালাগুরুধূমরাজিস্তস্যাঃ পুরো বায়ুবশেন ভিন্না |
বনান্নিবৃত্তেন রঘূত্তমেন মুক্তা স্বয়ং বেণিরিবাবভাসে|| ১৪-১২||
শ্বশ্রূজনানুষ্ঠিতচারুবেষাং কর্ণীরথস্থাং রঘুবীরপত্নীম্ |
প্রাসাদবাতায়নদৃশ্যবন্ধৈঃ সাকেতনার্যোঽঞ্জলিভিঃ প্রণেমুঃ|| ১৪-১৩||
স্ফুরৎপ্রভামণ্ডনমানসূয়ং সা বিভ্রতী শাশ্বতমঙ্গরাগম্ |
ররাজ শুদ্ধেতি পুনঃ স্বপুর্যৈ সংদর্শিতা বহ্নিগতেব ভর্ত্রা|| ১৪-১৪||
বেশ্মানি রামঃ পরিবর্হবন্তি বিশ্রাণ্য সৌহার্দনিধিঃ সুহৃদ্ভ্যঃ |
বাষ্পায়মানো বলিমন্নিকেতমালেখ্যশেষস্য পিতুর্বিবেশ|| ১৪-১৫||
কৃতাঞ্জলিস্তত্র যদম্ব সত্যান্নাভ্রশ্যত স্বর্গফলাদ্গুরুর্নঃ |
তচ্চিন্ত্যমানং সুকৃতং তবেতি জহার লজ্জাং ভরতস্য মাতুঃ || ১৪-১৬||
তথৈব সুগ্রীববিভীষণাদীনুপাচরৎকৃত্রিমসংবিধাভিঃ |
সংকল্পমাত্রোদিতসিদ্ধয়স্তে ক্রান্তা যথা চেতসি বিস্ময়েন|| ১৪-১৭||
সভাজনায়োপগতান্স দিব্যান্মুনীন্পুরস্কৃত্য হতস্য শত্রোঃ |
শুশ্রাব তেভ্যঃ প্রভবাদি বৃত্তং স্ববিক্রমে গৌরবমাদধানম্|| ১৪-১৮||
প্রতিপ্রয়াতেষু তপোধনেষু সুখাদবিজ্ঞাতগতার্ধমাসান্ |
সীতাস্বহস্তোপহৃতাগ্র্যপূজান্রক্ষঃকপীন্দ্রান্বিসসর্জ রামঃ || ১৪-১৯||
তচ্চাত্মচিন্তাসুলভং বিমানং হৃতং সুরারেঃ সহ জীবিতেন |
কৈলাসনাথোদ্বহনায় ভূয়ঃ পুষ্পং দিবঃ পুষ্পকমন্বমংস্ত|| ১৪-২০||
পিতুর্নিয়োগাদ্বনবাসমেবং নিস্তীর্য রামঃ প্রতিপন্নরাজ্যঃ |
ধর্মার্থকামেষু সমাং প্রপেদে যথা তথৈবাবরজেষু বৃত্তিম্|| ১৪-২১||
সর্বাসু মাতুষ্বপি বৎসলৎবাৎস নির্বিশেষপ্রতিপত্তিরাসীৎ |
ষডাননাপীতপয়োধরাসু নেতা চমূনামিব কৃত্তিকাসু|| ১৪-২২||
তেনার্থবাঁল্লোভপরাঙ্মুখেন তেন ঘ্নতা বিঘ্নভয়ং ক্রিয়াবান্ |
তেনাস লোকঃ পিতৃমান্বিনেত্রা তেনৈব শোকাপনুদেব পুত্রী|| ১৪-২৩||
স পৌরকার্যাণি সমীক্ষ্য কালে রেমে বিদেহাধিপতের্দুহিত্রা |
উপস্থিতশ্চারু বপুস্তদীয়ং কৃৎবোপভোগোৎসুকয়েব লক্ষ্ম্যা|| ১৪-২৪||
তয়োর্যথাপ্রার্থিতমিন্দ্রিয়ার্থানাসেদুষোঃ সদ্মসু চিত্রবৎসু |
প্রাপ্তানি দুঃখান্যপি দণ্ডকেষু সংচিন্ত্যমানানি সুখান্যভূবন্|| ১৪-২৫||
অথাধিকস্নিগ্ধবিলোচনেন মুখেন সীতা শরপাণ্ডুরেণ |
আনন্দয়িত্রী পরিণেতুরাসীদনক্ষরব্যঞ্জিতদোহদেন|| ১৪-২৬||
তামঙ্কমারোপ্য কৃশাঙ্গয়ষ্টিং বর্ণান্তরাক্রান্তপয়োধরাগ্রাম্ |
বিলজ্জমানাং রহসি প্রতীতঃ পপ্রচ্ছ রামাং রমণোঽভিলাষম্|| ১৪-২৭||
সা দষ্টনীবারবলীনি হিংস্রৈঃ সংবদ্ধবৈখানসকন্যকানি |
ইয়েষ ভূয়ঃ কুশবন্তি গন্তুং ভাগীরথীতীরতপোবনানি|| ১৪-২৮||
তস্যৈ প্রতিশ্রুত্য রঘুপ্রবীরস্তদীপ্সিতং পার্শ্বচরানুয়াতঃ |
আলোকয়িষ্যন্মুদিতাময়োধ্যাং প্রাসাদমভ্রংলিহমারুরোহ|| ১৪-২৯||
ঋদ্ধাপণং রাজপথং স পশ্যন্বিগাহ্যমানাং সরয়ূং চ নৌভিঃ |
বিলাসিভিশ্চাধ্যুষিতানি পৌরৈঃ পুরোপকণ্ঠোপবনানি রেমে|| ১৪-৩০||
স কিংবদন্তীং বদতাং পুরোগঃ স্ববৃত্তমুদ্দিশ্য বিশুদ্ধবৃত্তঃ |
সর্পাধিরাজোরুভুজোঽপসর্পং পপ্রচ্ছ ভদ্রং বিজিতারিভদ্রঃ|| ১৪-৩১||
নির্বন্ধপৃষ্টঃ স জগাদ সর্বং স্তুবন্তি পৌরাশ্চরিতং ৎবদীয়ম্ |
অন্যত্র রক্ষোভবনোষিতায়াঃ পরিগ্রহান্মানবদেব দেব্যাঃ|| ১৪-৩২||
কলত্রনিন্দাগুরুণা কিলৈবমভ্যাহতং কীর্তিবিপর্যয়েণ |
অয়োঘনেনায় ইবাভিতপ্তং বৈদেহিবন্ধোর্হৃদয়ং বিদদ্রে|| ১৪-৩৩||
কিমাত্মনির্বাদকথামুপেক্ষে জায়ামদোষামুত সংত্যজামি |
ইত্যেকপক্ষাশ্রয়বিক্লবৎবাদাসীৎস দোলাচলচিত্তবৃত্তিঃ|| ১৪-৩৪||
নিশ্চিত্য চানন্যনিবৃত্তি বাচ্যং ত্যাগেন পত্ন্যাঃ পরিমার্ষ্টুমৈচ্ছৎ |
অপি স্বদেহাৎকিমুতেন্দ্রিয়ার্থাদ্যশোধনানাং হি যশো গরীয়ঃ|| ১৪-৩৫||
স সংনিপত্যাবরজান্হতৌজাস্তদ্বিক্রিয়াদর্শনলুপ্তহর্ষান্ |
কৌলীনমাত্মাশ্রয়মাচচক্ষে তেভ্যঃ পুনশ্চেদমুবাচ বাক্যম্|| ১৪-৩৬||
রাজর্ষিবংশস্য রবিপ্রসূতেরুপস্থিতঃ পশ্যত কীদৃশোঽযম্ |
মত্তঃ সদাচারশুচেঃ কলঙ্কঃ পয়োদবাতাদিব দর্পণস্য|| ১৪-৩৭||
পৌরেষু সোঽহং বহুলীভবন্তমপাং তরংগেষ্বিব তৈলবিন্দুম্ |
সোঢুং ন তৎপূর্বমবর্ণমীশে আলানিকং স্থাণুরিব দ্বিপেন্দ্রঃ|| ১৪-৩৮||
তস্যাপনোদায় ফলপ্রবৃত্তাবুপস্থিতায়ামপি নির্ব্যপেক্ষঃ |
ত্যক্ষামি বৈদেহসুতাং পুরস্তাৎসমুদ্রনেমিং পিতুরাজ্ঞয়েব|| ১৪-৩৯||
অবৈমি চৈনামনঘেতি কিংতু লোকাপবাদো বলবান্মতো মে |
ছায়া হি ভূমেঃ শশিনো মলৎবেনারোপিতা শুদ্ধিমতঃ প্রজাভিঃ|| ১৪-৪০||
রক্ষোবধান্তো ন চ মে প্রয়াসো ব্যর্থঃ স বৈরপ্রতিমোচনায় |
অমর্ষণঃ শোণিতকাঙ্ক্ষয়া কিং পদা স্পৃশন্তং দশতি দ্বিজিহ্বঃ|| ১৪-৪১||
তদেব সর্গঃ করুণার্দ্রচিত্তৈর্ন মে ভবদ্ভিঃ প্রতিষেধনীয়ঃ |
যদ্যর্থিতা নির্হৃতবাচ্যশল্যান্প্রাণান্ময়া ধারয়িতুং চিরং বঃ|| ১৪-৪২||
ইত্যুক্তবন্তং জনকাত্মজায়াং নিতান্তরূক্ষাভিনিবেশমীশম্ |
ন কশ্চন ভ্রাতৃষু তেষু শক্তো নিষেদ্ধুমাসীদনুমোদিতুং বা|| ১৪-৪৩||
স লক্ষ্মণং লক্ষ্মণপূর্বজন্মা বিলোক্য লোকত্রয়গীতকীর্তিঃ |
সৌম্যেতি চাভাষ্য যথার্থভাষী স্থিতং নিদেশে পৃথগাদিদেশ|| ১৪-৪৪||
প্রজাবতী দোহদশংসিনী তে তপোবনেষু স্পৃহয়ালুরেব |
স ৎবং রথী তদ্ব্যপদেশনেয়াং প্রাপয়্য বাল্মীকিপদং ত্যজৈনাম্|| ১৪-৪৫||
স শুশ্রুবান্মাতরি ভার্গবেন পিতুর্নিয়োগাৎপ্রহৃতং দ্বিষদ্বৎ |
প্রত্যগ্রহীদগ্রজশাসনং তদাজ্ঞা গুরূণাং? হ্যবিচারণীয়া|| ১৪-৪৬||
অথানুকূলশ্রবণপ্রতীতামত্রস্নুভির্যুক্তধুরং তুরংগৈঃ |
রথং সুমন্ত্রপ্রতিপন্নরশ্মিমারোপ্য বৈদেহসুতাং প্রতস্থে|| ১৪-৪৭||
সা নীয়মানা রুচিরান্প্রদেশান্প্রিয়ংকরো মে প্রিয় ইত্যনন্দৎ |
নাবুদ্ধ কল্পদ্রুমতাং বিহায় জাতং তমাত্মন্যসিপত্রবৃক্ষম্|| ১৪-৪৮||
জুগূহ তস্যাঃ পথি লক্ষ্মণো যৎসব্যেতরেণ স্ফুরতা তদক্ষ্ণা |
আখ্যাতমস্যৈ গুরু ভাবি দুঃখমত্যন্তলুপ্তপ্রিয়দর্শনেন|| ১৪-৪৯||
সা দুর্নিমিত্তোপগতাদ্বিষাদাৎসদ্যঃপরিম্লানমুখারবিন্দা |
রাজ্ঞঃ শিবং সাবরজস্য ভূয়াদিত্যাশশংসে করণৈরবাহ্যৈঃ|| ১৪-৫০||
গুরোর্নিয়োগাদ্বনিতাং বনান্তে সাধ্বীং সুমিত্রাতনয়ো বিহাস্যন্ |
অবার্যতেবোত্থিতবীচিহস্তৈর্জহ্নোর্দুহিত্রা স্থিতয়া পুরস্তাৎ|| ১৪-৫১||
রথাৎস যন্ত্রা নিগৃহীতবাহাত্তাং ভ্রাতৃজায়াং পুলিনেঽবতার্য |
গঙ্গাং নিষাদাহৃতনৌবিশেষস্ততার সংধামিব সত্যসংধঃ|| ১৪-৫২||
অথ ব্যবস্থাপিতবাক্কথংচিৎসৌমিত্রিরন্তর্গতবাষ্পকণ্ঠঃ |
ঔৎপাতিকং মেঘ ইবাশ্মবর্ষং মহীপতেঃ শাসনমুজ্জগার|| ১৪-৫৩||
ততোঽভিষঙ্গানিলবিপ্রবিদ্ধা প্রভ্রশ্যমানাভরণপ্রসূনা |
স্বমূর্তিলাভপ্রকৃতিং ধরিত্রীং লতেব সীতা সহসা জগাম|| ১৪-৫৪||
ইক্ষ্বাকুবংশপ্রভবঃ কথং ৎবাং ত্যজেদকস্মাৎপতিরার্যবৃত্তঃ |
ইতি ক্ষিতিঃ সংশয়িতেব তস্যৈ দদৌ প্রবেশং জননী ন তাবৎ|| ১৪-৫৫||
সা লুপ্তসংজ্ঞা ন বিবেদ দুঃখং প্রত্যাগতাসুঃ সমতপ্যতান্তঃ |
তস্যাঃ সুমিত্রাত্মজয়ত্নলব্ধো মোহাদভূৎকষ্টতরঃ প্রবোধঃ|| ১৪-৫৬||
ন চাবদদ্ভর্তুরবর্ণমার্যা নিরাকরিষ্ণোর্বৃজিনাদৃতেঽপি |
আত্মানমেবং স্থিরদুঃখভাজং পুনঃ পুনর্দুষ্কৃতিনং নিনিন্দ|| ১৪-৫৭||
আশ্বাস্য রামাবরজঃ সতীং তামাখ্যাতবাল্মীকিনিকেতমার্গঃ |
নিঘ্নস্য মে ভর্তৃনিদেশরৌক্ষ্যং দেবি ক্ষমস্বেতি বভূব নম্রঃ|| ১৪-৫৮||
সীতা তমুত্থাপ্য জগাদ বাক্যং প্রীতাস্মি তে সৌম্য চিরায় জীব |
বিডৌজসা বিষ্ণুরিবাগ্রজেন ভ্রাত্রা যদিত্থং পরবানসি ৎবম্|| ১৪-৫৯||
শ্বশ্রূজনং সর্বমনুক্রমেণ বিজ্ঞাপয় প্রাপিতমৎপ্রণামঃ |
প্রজানিষেকং ময়ি বর্তমানং সূনোরনুধ্যায়ত চেতসেতি|| ১৪-৬০||
বাচ্যস্ত্বয়া মদ্বচনাৎস রাজা বহ্নৌ বিশুদ্ধামপি যৎসমক্ষম্ |
মাং লোকবাদশ্রবণাদহাসীঃ শ্রুতস্য কিং তৎসদৃশং কুলস্য|| ১৪-৬১||
কল্যাণবুদ্ধেরথবা তবায়ং ন কামচারো ময়ি শঙ্কনীয়ঃ |
মমৈব জন্মান্তরপাতকানাং বিপাকবিস্ফূর্জিথুরপ্রসহ্যঃ|| ১৪-৬২||
উপস্থিতাং পূর্বমপাত্য লক্ষ্মীং বনং ময়া সার্ধমসি প্রপন্নঃ |
তদাস্পদং প্রাপ্য তয়াতিরোষাৎসোঢাস্মি ন ৎবদ্ভবনে বসন্তী|| ১৪-৬৩||
নিশাচরোপপ্লুতভর্তৃকাণাং তপস্বিনীনাং ভবতঃ প্রসাদাৎ |
ভূৎবা শরণ্যা শরণার্থমন্যং কথং প্রপৎস্যে ৎবয়ি দীপ্যমানে|| ১৪-৬৪||
কিংবা তবাত্যন্তবিয়োগমোঘে কুর্যামুপেক্ষাং হতজীবিতেঽস্মিন্ |
স্যাদ্রক্ষণীয়ং যদি মে ন তেজস্তদীয়মন্তর্গতমন্তরায়ঃ|| ১৪-৬৫||
সাহং তপঃ সূর্যনিবিষ্টদৃষ্টিরূর্ধ্বং প্রসূতেশ্চরিতুং যতিষ্যে |
ভূয়ো যথা মে জননান্তরেঽপি ৎবমেব ভর্তা ন চ বিপ্রয়োগঃ|| ১৪-৬৬||
নৃপস্য বর্ণাশ্রমপালনং যৎস এব ধর্মো মনুনা প্রতীতঃ |
নির্বাসিতাপ্যেবমতস্ত্বয়াহং তপস্বিসামান্যমবেক্ষণীয়া|| ১৪-৬৭||
তথেতি তস্যাঃ প্রতিগৃহ্য বাচং রামানুজে দৃষ্টিপথং ব্যতীতে |
সা মুক্তকণ্ঠং ব্যসনাতিভারাচ্চক্রন্দ বিগ্না কুররীব ভূয়ঃ|| ১৪-৬৮||
নৃত্যং ময়ূরাঃ কুসুমানি বৃক্ষা দর্ভানুপাত্তান্বিজহুর্হরিণ্যঃ |
তস্যাঃ প্রপন্নে সমদুঃখভাবমত্যন্তমাসীদ্রুদিতং বনেঽপি|| ১৪-৬৯||
তামভ্যগচ্ছদ্রুদিতানুকারী কবিঃ কুশেধ্মাহরণায় যাতঃ |
নিষাদবিদ্ধাণ্ডজদর্শনোত্থঃ শ্লোকৎবমাপদ্যত যস্য শোকঃ|| ১৪-৭০||
তমশ্রু নেত্রাবরণং প্রমৃজ্য সীতা বিলাপাদ্বিরতা ববন্দে |
তস্যৈ মুনির্দোহদলিঙ্গদর্শী দাশ্বান্সুপুত্রাশিষমিত্যুবাচ|| ১৪-৭১||
জানে বিসৃষ্টাং প্রণিধানতস্ত্বাং মিথ্যাপবাদক্ষুভিতেন ভর্ত্রা |
তন্মা ব্যথিষ্ঠা বিষয়ান্তরস্ত্বং প্রাপ্তাসি বৈদেহি পিতুর্নিকেতম্|| ১৪-৭২||
উৎখাতলোকত্রয়কণ্টকেঽপি সত্যপ্রতিজ্ঞেঽপ্যবিকত্থনেঽপি |
ৎবাং প্রত্যকস্মাৎকলুষপ্রবৃত্তাবস্ত্যেব মন্যুর্ভরতাগ্রজে মে|| ১৪-৭৩||
তবোরুকীর্তিঃ শ্বশুরঃ সখা মে সতাং ভবোচ্ছেদকরঃ পিতা তে |
ধুরি স্থিতা ৎবং পতিদেবতানাং কিং তন্ন যেনাসি মমানুকম্প্যা|| ১৪-৭৪||
তপস্বিসংসর্গবিনীতসত্ত্বে তপোবনে বীতভয়া বসাস্মিন্ |
ইতো ভবিষ্যত্যনঘপ্রসূতেরপত্যসংস্কারময়োবিধিস্তে|| ১৪-৭৫||
অশূন্যতীরাং মুনিসংনিবেশৈস্তমোপহন্ত্রীং তমসাং বগাহ্য |
তৎসৈকতোৎসঙ্গবলিক্রিয়াভিঃ সংপৎস্যতে তে মনসঃ প্রসাদঃ|| ১৪-৭৬||
পুষ্পং ফলং চার্তবমাহরন্ত্যো বীজং চ বালেয়মকৃষ্টরোহি |
বিনোদয়িষ্যন্তি নবাভিষঙ্গামুদারবাচো মুনিকন্যকাস্ত্বাম্|| ১৪-৭৭||
পয়োঘটৈরাশ্রমবালবৃক্ষান্সংবর্ধয়ন্তী স্ববলানুরূপৈঃ |
অসংশয়ং প্রাক্তনয়োপপত্তেঃ স্তনংধয়প্রীতিমবাপ্স্যসি ৎবম্|| ১৪-৭৮||
অনুগ্রহপ্রত্যভিনন্দিনীং তাং বাল্মীকিরাদায় দয়ার্দ্রচেতাঃ |
সায়ং মৃগাধ্যাসিতবেদিপার্শ্বং স্বমাশ্রমং শান্তমৃগং নিনায়|| ১৪-৭৯||
তামর্পয়ামাস চ শোকদীনাং তদাগমপ্রীতিষু তাপসীষু |
নির্বিষ্টসারাং পিতৃভির্হিমাংশোরন্ত্যাং কলাং দর্শ ইবৌষধীষু|| ১৪-৮০||
তা ইঙ্গুদীস্নেহকৃতপ্রদীপমাস্তীর্ণমেধ্যাজিনতল্পমন্তঃ |
তস্যৈ সপর্যানুপদং দিনান্তে নিবাসহেতোরুটজং বিতেরুঃ || ১৪-৮১||
তত্রাভিষেকপ্রয়তা বসন্তী প্রয়ুক্তপূজা বিধিনাতিথিভ্যঃ |
বন্যেন সা বল্কলিনী শরীরং পত্যুঃ প্রজাসংততয়ে বভার|| ১৪-৮২||
অপি প্রভুঃ সানুশয়োঽধুনা স্যাৎকিমুৎসুকঃ শক্রজিতোঽপি হন্তা |
শশংস সীতাপরিদেবনান্তমনুষ্ঠিতং শাসনমগ্রজায়|| ১৪-৮৩||
বভূব রামঃ সহসা সবাষ্পস্তুষারবর্ষীব সহস্যচন্দ্রঃ |
কৌলীনভীতেন গৃহান্নিরস্তা ন তেন বৈদেহসুতা মনস্তঃ|| ১৪-৮৪||
নিগৃহ্য শোকং স্বয়মেব ধীমান্বর্ণাশ্রমাবেক্ষণজাগরূকঃ |
স ভ্রাতৃসাধারণভোগমৃদ্ধং রাজ্যং রজোরিক্তমনাঃ শশাস|| ১৪-৮৫||
তামেকভার্যাং পরিবাদভীরোঃ সাধ্বীমপি ত্যক্তবতো নৃপস্য |
বক্ষস্যসংঘট্টসুখং বসন্তী রেজে সপত্নীরহিতেব লক্ষ্মীঃ|| ১৪-৮৬||
সীতাং হিৎবা দশমুখরিপুর্নোপমেয়ে যদন্যাং
তস্যা এব প্রতিকৃতিসখো যৎক্রতূনাজহার |
বৃত্তান্তেন শ্রবণবিষয়প্রাপিণা তেন ভর্তুঃ
সা দুর্বারং কথমপি পরিত্যাগদুঃখং বিষেহে|| ১৪-৮৭||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
সীতাপরিত্যাগো নাম চতুর্দশঃ সর্গঃ ||