রঘুবংশং সর্গ ১৫

|| কালিদাসকৃতম্ রঘুবংশম্ সর্গ ১৫ ||

কৃতসীতাপরিত্যাগঃ স রত্নাকরমেখলাম্ |
বুভুজে পৃথিবীপালঃ পৃথিবীমেব কেবলাম্|| ১৫-১||
লবণেন বিলুপ্তেজ্যাস্তামিস্রেণ তমভ্যয়ুঃ |
মুনয়ো যমুনাভাজঃ শরণ্যং শরণার্থিনঃ|| ১৫-২||
অবেক্ষ্য রামং তে তস্মিন্ন প্রজহ্রুঃ স্বতেজসা |
ত্রাণাভাবে হি শাপাস্ত্রাঃ কুর্বন্তি তপসো ব্যয়ম্|| ১৫-৩||
প্রতিশুশ্রাব কাকুৎস্থস্তেভ্যো বিঘ্নপ্রতিক্রিয়াম্ |
ধর্মসংরক্ষণার্থেব প্রবৃত্তির্ভুবি শার্ঙ্গিণঃ|| ১৫-৪||
তে রামায় বধোপায়মাচখ্যুর্বিবুধদ্বিষঃ |
দুর্জয়ো লবণঃ শূলী বিশূলঃ প্রার্থ্যতামিতি|| ১৫-৫||
আদিদেশাথ শত্রুঘ্নং তেষাং ক্ষেমায় রাঘবঃ |
করিষ্যন্নিব নামাস্য যথার্থমরিনিগ্রহাৎ|| ১৫-৬||
যঃ কশ্চন রঘূণাং হি পরমেকঃ পরংতপঃ |
অপবাদ ইবোৎসর্গং ব্যাবর্তয়িতুমীশ্বরঃ|| ১৫-৭||
অগ্রজেন প্রয়ুক্তাশীস্ততো দাশরথী রথী |
যয়ৌ বনস্থলীঃ পশ্যন্পুষ্পিতাঃ সুরভীরভীঃ|| ১৫-৮||
রামাদেশাদনুগতা সেনা তস্যার্থসিদ্ধয়ে |
পশ্চাদধ্যনার্থস্য ধাতোরধিরিবাভবৎ|| ১৫-৯||
আদিষ্টবর্ত্মা মুনিভিঃ স গচ্ছংস্তপসাং বরঃ |
বিররাজ রথপ্রষ্ঠৈর্বালখিল্যৈরিবাংশুমান্|| ১৫-১০||
তস্য মার্গবশাদেকা বভূব বসতির্যতঃ |
রথস্বনোৎকণ্ঠমৃগে বাল্মীকীয়ে তপোবনে|| ১৫-১১||
তমৃষিঃ পূজয়ামাস কুমারং ক্লান্তবাহনম্ |
তপঃপ্রভাবসিদ্ধাভির্বিশেষপ্রতিপত্তিভিঃ || ১৫-১২||
তস্যামেবাস্য যামিন্যামন্তর্বন্তী প্রজাবতী |
সুতাবসূত সংপন্নৌ কোশদণ্ডাবিব ক্ষিতিঃ|| ১৫-১৩||
সংতানশ্রবণাদ্ভ্রাতুঃ সৌমিত্রিঃ সৌমনস্যবান্ |
প্রাঞ্জলির্মুনিমামন্ত্র্য প্রাতর্যুক্তরথো যয়ৌ|| ১৫-১৪||
স চ প্রাপ মধূপঘ্নং কুম্ভীনস্যাশ্চ কুক্ষিজঃ |
বনাৎকরমিবাদায় সত্ত্বরাশিমুপস্থিতঃ || ১৫-১৫||
ধূমধূম্রো বসাগন্ধী জ্বালাবভ্রুশিরোরুহঃ |
ক্রব্যাদ্গণপরীবারশ্চিতাগ্নিরিব জংগমঃ || ১৫-১৬||
অপশূলং তমাসাদ্য লবণং লক্ষ্মণানুজঃ |
রুরোধ সংমুখীনো হি জয়ো রন্ধ্রপ্রহারিণাম্|| ১৫-১৭||
নাতিপর্যাপ্তমালক্ষ্য মৎকুক্ষেরদ্য ভোজনম্ |
দিষ্ট্যা ৎবমসি মে ধাত্রা ভীতেনেবোপপাদিতঃ|| ১৫-১৮||
ইতি সংতর্জ্য শত্রুঘ্নং রাক্ষসস্তজ্জিঘাংসয়া |
প্রাংশুমুৎপাটয়ামাস মুস্তাস্তম্বমিব দ্রুমম্|| ১৫-১৯||
সৌমিত্রের্নিশিতৈর্বাণৈরন্তরা শকলীকৃতঃ |
গাত্রং পুষ্পরজঃ প্রাপ ন শাখী নৈরৃতেরিতঃ|| ১৫-২০||
বিনাশাত্তস্য বৃক্ষস্য রক্ষস্তস্মৈ মহোপলম্ |
প্রজিঘায় কৃতান্তস্য মুষ্টিং পৃথগিব স্থিতম্|| ১৫-২১||
ঐন্দ্রমস্ত্রমুপাদায় শত্রুঘ্নেন স তাডিতঃ |
সিকতাৎবাদপি পরং প্রপেদে পরমাণুতাম্|| ১৫-২২||
তমুপাদ্রবদুদ্যম্য দক্ষিণং দোর্নিশাচরঃ |
একতাল ইবোৎপাতপবনপ্রেরিতো গিরিঃ|| ১৫-২৩||
কার্ষ্ণেন পত্রিণা শত্রুঃ স ভিন্নহৃদয়ঃ পতন্ |
অনিনায় ভুবঃ কম্পং জহারাশ্রমবাসিনাম্|| ১৫-২৪||
বয়সাং পঙ্ক্তয়ঃ পেতুর্হতস্যোপরি বিদ্বিষঃ |
তৎপ্রতিদ্বন্দ্বিনো মূর্ধ্নি দিব্যাঃ কুসুমবৃষ্টয়ঃ|| ১৫-২৫||
স হৎবা লবণং বীরস্তদা মেনে মহৌজসঃ |
ভ্রাতুঃ সোদর্যমাত্মানমিন্দ্রজিদ্বধশোভিনঃ|| ১৫-২৬||
তস্য সংস্তূয়মানস্য চরিতার্থৈস্তপস্বিভিঃ |
শুশুভে বিক্রমোদগ্রং ব্রীডয়াবনতং শিরঃ|| ১৫-২৭||
উপকূলং চ কালিন্দ্যাঃ পুরীং পৌরুষভূষণঃ |
নির্মমে নির্মমোঽর্থেষু মথুরাং মধুরাকৃতিঃ|| ১৫-২৮||
যা সৌরাজ্যপ্রকাশাভির্বভৌ পৌরবিভূতিভিঃ |
স্বর্গাভিষ্যন্দবমনং কৃৎবেবোপনিবেশিতা|| ১৫-২৯||
তত্র সৌধগতঃ পশ্যন্যমুনাং চক্রবাকিনীম্ |
হেমভক্তিমতীং ভূমেঃ প্রবেণীমিব পিপ্রিয়ে|| ১৫-৩০||
সখা দশরথস্যাপি জনকস্য চ মন্ত্রকৃৎ |
সংচস্কারোভয়প্রীত্যা মৈথিলেয়ৌ যথাবিধি|| ১৫-৩১||
স তৌ কুশলবোন্মৃষ্টগর্ভক্লেদৌ তদাখ্যয়া |
কবিঃ কুশলবাবেব চকার কিল নামতঃ|| ১৫-৩২||
সাঙ্গং চ বেদমধ্যাপ্য কিংচিদুৎক্রান্তশৈশবৌ |
স্বকৃতিং গাপয়ামাস কবিপ্রথমপদ্ধতিম্|| ১৫-৩৩||
রামস্য মধুরং বৃত্তং গায়ন্তো মাতুরগ্রতঃ |
তদ্বিয়োগব্যথাং কিংচিচ্ছিথিলীচক্রতুঃ সুতৌ|| ১৫-৩৪||
ইতরেঽপি রঘোর্বংশ্যাস্ত্রয়স্ত্রেতাগ্নিতেজসঃ |
তদ্যোগাৎপতিবত্নীষু পত্নীষ্বাসন্দ্বিসূনবঃ || ১৫-৩৫||
শত্রুঘাতিনি শত্রুঘ্নঃ সুবাহৌ চ বহুশ্রুতে |
মথুরাবিদিশে সূন্বোর্নিদধে পূর্বজোৎসুকঃ|| ১৫-৩৬||
ভূয়স্তপোব্যয়ো মা ভূদ্বাল্মীকেরিতি সোঽত্যগাৎ |
মৈথিলীতনয়োদ্গীতনিঃস্পন্দমৃগমাশ্রমম্|| ১৫-৩৭||
বশী বিবেশ চায়োধ্যাং রথ্যসংস্কারশোভিনীম্ |
লবণস্য বধাৎপৌরৈরীক্ষিতোঽত্যন্তগৌরবম্|| ১৫-৩৮||
স দদর্শ সভামধ্যে সভাসদ্ভিরুপস্থিতম্ |
রামং সীতাপরিত্যাগাদসামান্যপতিং ভুবঃ|| ১৫-৩৯||
তমভ্যনন্দৎপ্রণতং লবণান্তকমগ্রজঃ |
কালনেমিবধাৎপ্রীতস্তুরাষাডিব শার্ঙ্গিণম্|| ১৫-৪০||
স পৃষ্টঃ সর্বতো বার্তমাখ্যদ্রাজ্ঞে ন সংততিম্ |
প্রত্যর্পয়িষ্যতঃ কালে কবেরাদ্যস্য শাসনাৎ|| ১৫-৪১||
অথ জানপদো বিপ্রঃ শিশুমপ্রাপ্তয়ৌবনম্ |
অবতার্যাঙ্কশয়্যাস্থং দ্বারি চক্রন্দ ভূপতেঃ|| ১৫-৪২||
শোচনীয়াসি বসুধে যা ৎবং দশরথাচ্চ্যুতা |
রামহস্তমনুপ্রাপ্য কষ্টাৎকষ্টতরং গতা|| ১৫-৪৩||
শ্রুৎবা তস্য শুচো হেতুং গোপ্তা জিহ্রায় রাঘবঃ |
ন হ্যকালভবো মৃত্যুরিক্ষ্বাকুপদমস্পৃশৎ|| ১৫-৪৪||
স মুহূর্তং ক্ষমস্বেতি দ্বিজমাশ্বাস্য দুঃখিতম্ |
যানং সস্মার কৌবেরং বৈবস্বতজিগীষয়া|| ১৫-৪৫||
আত্তশস্ত্রস্তদধ্যাস্য প্রস্থিতঃ স রঘূদ্বহঃ |
উচ্চচার পুরস্তস্য গূঢরূপা সরস্বতী|| ১৫-৪৬||
রাজন্ প্রজাসু তে কশ্চিদপচারঃ প্রবর্ততে |
তমন্বিষ্য প্রশময়ের্ভবিষ্যসি ততঃ কৃতী|| ১৫-৪৭||
ইত্যাপ্তবচনাদ্রামো বিনেষ্যন্বর্ণবিক্রিয়াম্ |
দিশঃ পপাত পত্রেণ বেগনিষ্কম্পহেতুনা|| ১৫-৪৮||
অথ ধূমাভিতাম্রাক্ষং বৃক্ষশাখাবলম্বিনম্ |
দদর্শ কংচিদৈক্ষ্বাকস্তপস্যন্তমধোমুখম্|| ১৫-৪৯||
পৃষ্টনামান্বয়ো রাজ্ঞা স কিলাচষ্ট ধূমপঃ |
আত্মানং শম্বুকং নাম শূদ্রং সুরপদার্থিনম্|| ১৫-৫০||
তপস্যনধিকারিৎবাৎপ্রজানাং তমঘাবহম্ |
শীর্ষচ্ছেদ্যং পরিচ্ছিদ্য নিয়ন্তা শস্ত্রমাদদে|| ১৫-৫১||
স তদ্বক্ত্রং হিমক্লিষ্টকিঞ্জল্কমিব পঙ্কজম্ |
জ্যোতিষ্কণাহতশ্মশ্রু কণ্ঠনালাদপাতয়ৎ|| ১৫-৫২||
কৃতদণ্ডঃ স্বয়ং রাজ্ঞা লেভে শূদ্রঃ সতাং গতিম্ |
তপসা দুশ্চরেণাপি ন স্বমার্গবিলঙ্ঘিনা|| ১৫-৫৩||
রঘুনাথোঽপ্যগস্ত্যেন মার্গসংদর্শিতাত্মনা |
মহৌজসা সংযুয়ুজে শরৎকাল ইবেন্দুনা|| ১৫-৫৪||
কুম্ভয়োনিরলংকারং তস্মৈ দিব্যপরিগ্রহম্ |
দদৌ দত্তং সমুদ্রেণ পীতেনেবাত্মনিষ্ক্রয়ম্|| ১৫-৫৫||
স দধন্মৈথিলীকণ্ঠনির্ব্যাপারেণ বাহুনা |
পশ্চান্নিববৃতে রামঃ প্রাক্পরাসুর্দ্বিজাত্মজঃ || ১৫-৫৬||
তস্য পূর্বোদিতাং নিন্দাং দ্বিজঃ পুত্রসমাগতঃ |
স্তুৎবা নিবর্তয়ামাস ত্রাতুর্বৈবস্বতাদপি|| ১৫-৫৭||
তমধ্বরায় মুক্তাশ্বং রক্ষঃকপিনরেশ্বরাঃ |
মেঘাঃ সস্যমিবাম্ভোভিরভ্যবর্ষন্নুপায়নৈঃ|| ১৫-৫৮||
দিগ্ভ্যো নিমন্ত্রিতাশ্চৈনমভিজগ্মুর্মহর্ষয়ঃ |
ন ভৌমান্যেব ধিষ্ণ্যানি হিৎবা জ্যোতির্ময়ান্যপি|| ১৫-৫৯||
উপশল্যনিবিষ্টৈস্তৈশ্চতুর্দ্বারমুখী বভৌ |
অয়োধ্যা সৃষ্টলোকেব সদ্যঃ পৈতামহী তনুঃ|| ১৫-৬০||
শ্লাঘ্যস্ত্যাগোঽপি বৈদেহ্যাঃ পত্যুঃ প্রাগ্বংশবাসিনঃ |
অনন্যজানেঃ সৈবাসীদ্যস্মাজ্জায়া হিরণ্ময়ী|| ১৫-৬১||
বিধেরধিকসংভারস্ততঃ প্রববৃতে মখঃ |
আসন্যত্র ক্রিয়াবিঘ্না রাক্ষসা এব রক্ষিণঃ|| ১৫-৬২||
অথ প্রাচেতসোপজ্ঞং রামায়ণমিতস্ততঃ |
মৈথিলেয়ৌ কুশলবৌ জগতুর্গুরুচোদিতৌ|| ১৫-৬৩||
বৃত্তং রামস্য বাল্মীকেঃ কৃতিস্তৌ কিংনরস্বনৌ |
কিং তদ্যেন মনো হর্তুমলং স্যাতাং ন শৃণ্বতাম্|| ১৫-৬৪||
রূপে গীতে চ মাধুর্যংতয়োস্তজ্জ্ঞৈর্নিবেদিতম্ |
দদর্শ সানুজো রামঃ শুশ্রাব চ কুতূহলী|| ১৫-৬৫||
তদ্গীতশ্রবণৈকাগ্রা সংসদশ্রুমুখী বভৌ |
হিমনিষ্যন্দিনী প্রাতর্নির্বাতেব বনস্থলী|| ১৫-৬৬||
বয়োবেষবিসংবাদি রামস্য চ তয়োস্তদা |
জনতা প্রেক্ষ্য সাদৃশ্যং নাক্ষিকম্পং ব্যতিষ্ঠত|| ১৫-৬৭||
উভয়োর্ন তথা লোকঃ প্রাবীণ্যেন বিসিষ্মিয়ে |
নৃপতেঃ প্রীতিদানেষু বীতস্পৃহতয়া যথা|| ১৫-৬৮||
গেয়ে কো নু বিনেতা বাং কস্য চেয়ং কৃতিঃ কবেঃ |
ইতি রাজ্ঞা স্বয়ং পৃষ্টৌ তৌ বাল্মীকিমশংসতাম্|| ১৫-৬৯||
অথ সাবরজো রামঃ প্রাচেতসমুপেয়িবান্ |
ঊরীকৃত্যাত্মনো দেহং রাজ্যমস্মৈ ন্যবেদয়ৎ|| ১৫-৭০||
স তাবাখ্যায় রামায় মৈথিলীয়ৌ তদাত্মজৌ |
কবিঃ কারুণিকো বব্রে সীতায়াঃ সংপরিগ্রহম্|| ১৫-৭১||
তাত শুদ্ধা সমক্ষং নঃ স্নুষা তে জাতবেদসি |
দৌরাত্ম্যাদ্রক্ষসস্তাং তু নাত্রত্যাঃ শ্রদ্দধুঃ প্রজাঃ|| ১৫-৭২||
তাঃ স্বচারিত্র্যমুদ্দিশ্য প্রত্যায়য়তু মৈথিলী |
ততঃ পুত্রবতীমেনাং প্রতিপৎস্যে ৎবদাজ্ঞয়া|| ১৫-৭৩||
ইতি প্রতিশ্রুতে রাজ্ঞা জানকীমাশ্রমান্মুনিঃ |
শিষ্যৈরানায়য়ামাস স্বসিদ্ধিং নিয়মৈরিব|| ১৫-৭৪||
অন্যেদ্যুরথ কাকুৎস্থঃ সংনিপাত্য পুরৌকসঃ |
কবিমাহ্বায়য়ামাস প্রস্তুতপ্রতিপত্তয়ে|| ১৫-৭৫||
স্বরসংস্কারবত্যাসৌ পুত্রাভ্যামথ সীতয়া |
ঋচেবোদর্চিষং সূর্যং রামং মুনিরুপস্থিতঃ|| ১৫-৭৬||
কাষায়পরিবীতেন স্বপদার্পিতচক্ষুষা |
অন্বমীয়ত শুদ্ধেতি শান্তেন বপুষৈব সা|| ১৫-৭৭||
জনাস্তদালোকপথাৎপ্রতিসংহৃতচক্ষুষঃ |
তস্থুস্তেঽবাঙ্মুখাঃ সর্বে ফলিতা ইব শালয়ঃ|| ১৫-৭৮||
তাং দৃষ্টিবিষয়ে ভর্তুর্মুনিরাস্থিতবিষ্টরঃ |
কুরু নিঃসংশয়ং বৎসে স্ববৃত্তে লোকমিত্যশাৎ|| ১৫-৭৯||
অথ বাল্মীকিশিষ্যেণ পুণ্যমাবর্জিতং পয়ঃ |
আচম্যোদীরয়ামাস সীতা সত্যাং সরস্বতীম্|| ১৫-৮০||
বাঙ্মনঃকর্মভিঃ পত্যৌ ব্যভিচারো যথা ন মে |
তথা বিশ্বংভরে দেবি মামন্তর্ধাতুমর্হসি|| ১৫-৮১||
এবমুক্তে তয়া সাধ্ব্যা রন্ধ্রাৎসদ্যোভবাদ্ভুবঃ |
শাতহ্রদমিব জ্যোতিঃ প্রভামণ্ডলমুদ্যয়ৌ|| ১৫-৮২||
তত্র নাগফণোৎক্ষিপ্তসিংহাসননিষেদুষী |
সমুদ্ররশনা সাক্ষাৎপ্রাদুরাসীদ্বসুংধরা|| ১৫-৮৩||
সা সীতামঙ্কমারোপ্য ভর্তৃপ্রণিহিতেক্ষণাম্ |
মামেতি ব্যাহরত্যেব তস্মিন্পাতালমভ্যগাৎ|| ১৫-৮৪||
ধরায়াং তস্য সংরম্ভং সীতাপ্রত্যর্পণৈষিণঃ |
গুরুর্বিধিবলাপেক্ষী শময়ামাস ধন্বিনঃ|| ১৫-৮৫||
ঋষীন্বিসৃজ্য যজ্ঞান্তে সুহৃদশ্চ পুরস্কৃতান্ |
রামঃ সীতাগতং স্নেহং নিদধে তদপত্যয়োঃ|| ১৫-৮৬||
যুধাজিতস্য সংদেশাৎস দেশং সিন্ধুনামকম্ |
দদৌ দত্তপ্রভাবায় ভরতায় ভৃতপ্রজঃ|| ১৫-৮৭||
ভরতস্তত্র গন্ধর্বান্যুধি নির্জিত্য কেবলম্ |
আতোদ্যং গ্রাহয়ামাস সমত্যাজয়দায়ুধম্|| ১৫-৮৮||
স তক্ষপুষ্কলৌ পুত্রৌ রাজধান্যোস্তদাখ্যয়োঃ |
অভিষিচ্যাভিষেকার্হৌ রামান্তিকমগাৎপুনঃ|| ১৫-৮৯||
অঙ্গদং চন্দ্রকেতুং চ লক্ষ্মণোঽপ্যাত্মসংভবৌ |
শাসনাদ্রঘুনাথস্য চক্রে কারাপথেশ্বরৌ|| ১৫-৯০||
ইত্যারোপিতপুত্রাস্তে জননীনাং জনেশ্বরাঃ |
ভর্তৃলোকপ্রপন্নানাং নিবাপান্বিদধুঃ ক্রমাৎ|| ১৫-৯১||
উপেত্য মুনিবেষোঽথ কালঃ প্রোবাচ রাঘবম্ |
রহঃসংবাদিনৌ পশ্যেদাবাং যস্তং ত্যজেরিতি|| ১৫-৯২||
তথেতি প্রতিপন্নায় বিবৃতাত্মা নৃপায় সঃ |
আচখ্যৌ দিবমধ্যাস্ব শাসনাৎপরমেষ্ঠিনঃ|| ১৫-৯৩||
বিদ্বানপি তয়োর্দ্বাঃস্থঃ সময়ং লক্ষ্মণোঽভিনৎ |
ভীতো দুর্বাসসঃ শাপাদ্রামসংদর্শনার্থিনা|| ১৫-৯৪||
স গৎবা সরয়ূতীরং দেহত্যাগেন যোগবিৎ |
চকারাবিতথাং ভ্রাতুঃ প্রতিজ্ঞাং পূর্বজন্মনঃ|| ১৫-৯৫||
তস্মিন্নাত্মচতুর্ভাগে প্রাঙ্নাকমধিতস্থুষি |
রাঘবঃ শিথিলং তস্থৌ ভুবি ধর্মস্ত্রিপাদিব|| ১৫-৯৬||
স নিবেশ্য কুশাবত্যাং রিপুনাগাঙ্কুশং কুশম্ |
শরাবত্যাং সতাং সূক্তৈর্জনিতাশ্রুলবং লবম্|| ১৫-৯৭||
উদক্প্রতস্থে স্থিরধীঃ সানুজোঽগ্নিপুরঃসরঃ |
অন্বিতঃ পতিবাৎসল্যাদ্গৃহবর্জময়োধ্যয়া|| ১৫-৯৮||
জগৃহুস্তস্য চিত্তজ্ঞাঃ পদবীং হরিরাক্ষসাঃ |
কদম্বমুকুলস্থূলৈরভিবৃষ্টাং প্রজাশ্রুভিঃ|| ১৫-৯৯||
উপস্থিতবিমানেন তেন ভক্তানুকম্পিনা |
চক্রে ত্রিদিবনিঃশ্রেণিঃ সরয়ূরনুয়ায়িনাম্|| ১৫-১০০||
যদ্গোপ্রতরকল্পোঽভূৎসংমর্দস্তত্র মজ্জতাম্ |
অতস্তদাখ্যয়া তীর্থং পাবনং ভুবি পপ্রথে|| ১৫-১০১||
স বিভুর্বিবুধাংশেষু প্রতিপন্নাত্মমূর্তিষু |
ত্রিদশীভূতপৌরাণাং স্বর্গান্তরমকল্পয়ৎ|| ১৫-১০২||
নির্বর্ত্যৈবং দশমুখশিরশ্ছেদকার্যং সুরাণাং
বিষ্বক্সেনঃ স্বতনুমবিশৎসর্বলোকপ্রতিষ্ঠাম্ |
লঙ্কানাথং পবনতনয়ং চোভয়ং স্থাপয়িৎবা
কীর্তিস্তম্ভদ্বয়মিব গিরৌ দক্ষিণে চোত্তরে চ|| ১৫-১০৩||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
শ্রীরামস্বর্গারোহণো নাম পঞ্চদশঃ সর্গঃ ||