রঘুবংশং সর্গ ১৬

|| কালিদাসকৃতম্ রঘুবংশম্ সর্গ ১৬ ||

অথেতরে সপ্তরঘুপ্রবীরা জ্যেষ্ঠং পুরোজন্মতয়া গুণৈশ্চ |
চক্রুঃ কুশং রত্নবিশেষভাজং সৌভ্রাত্রমেষাং হি কুলানুকারি || ১৬-১||
তে সেতুবার্তাগজবন্ধমুখৈরভ্যুচ্ছ্রিতাঃ কর্মভিরপ্যবন্ধ্যৈঃ |
অন্যোন্যদেশপ্রবিভাগসীমাং বেলাং সমুদ্রা ইব ন ব্যতীয়ুঃ || ১৬-২||
চতুর্ভুজাংশপ্রভবঃ স তেষাং দানপ্রবৃত্তেরনুপারতানাম্ |
সুরদ্বিপানামিব সাময়োনির্ভিন্নোঽষ্টধা বিপ্রসসার বংশঃ || ১৬-৩||
অথার্ধরাত্রে স্তিমিতপ্রদীপে শয়্যাগৃহে সুপ্তজনে প্রবুদ্ধঃ |
কুশঃ প্রবাসস্থকলত্রবেষামদৃষ্টপূর্বাং বনিতামপশ্যৎ || ১৬-৪||
সা সাধুসাধারণপার্থিবর্দ্ধেঃ স্থিৎবা পুরস্তাৎপুরহূতভাসঃ |
জেতুঃ পরেষাং জয়শব্দপূর্বং তস্যাঞ্জলিং বন্ধুমতো ববন্ধ || ১৬-৫||
অথানপোঢার্গলমপ্যগারং ছায়ামিবাদর্শতলং প্রবিষ্টাম্ |
সবিস্ময়ো দাশরথেস্তনূজঃ প্রোবাচ পূর্বার্ধবিসৃষ্টতল্পঃ || ১৬-৬||
লব্ধান্তরা সাবরণেঽপি গেহে যোগপ্রভাবো ন চ লক্ষ্যতে তে |
বিভর্ষি চাকারমনির্বৃতানাং মৃণালিনী হৈমমিবোপরাগম্ || ১৬-৭||
কা ৎবং শুভে কস্য পরিগ্রহো বা কিং বা মদভ্যাগমকারণং তে |
আচক্ষ্ব মৎবা বশিনাং রঘূণাং মনঃ পরস্ত্রীবিমুখপ্রবৃত্তিঃ || ১৬-৮||
তমব্রবীৎসা গুরুণানবদ্যা যা নীতপৌরা স্বপদোন্মুখেন |
তস্যাঃ পুরঃ সংপ্রতি বীতনাথাং জানীহি রাজন্নধিদেবতাং মাম্ || ১৬-৯||
বস্বৌকসারামভিভূয় সাহং সৌরাজ্যবদ্ধোৎসবয়া বিভূত্যা |
সমগ্রশক্তৌ ৎবয়ি সূর্যবংশ্যে সতি প্রপন্না করুণামবস্থাম্ || ১৬-১০||
বিশীর্ণতল্পাট্টশতো নিবেশঃ পর্যস্তসালঃ প্রভুণা বিনা মে |
বিডম্বয়ত্যস্তনিমগ্নসূর্যং দিনান্তমুগ্রানিলভিন্নমেঘম্ || ১৬-১১||
নিশাসু ভাস্বৎকলনূপুরাণাং যঃ সংচরোঽভূদভিসারিকাণাম্ |
নদন্মুখোল্কাবিচিতামিষাভিঃ স বাহ্যতে রাজপথঃ শিবাভিঃ || ১৬-১২||
আস্ফালিতং যৎপ্রমদাকরাগ্রৈর্মৃদঙ্গধীরধ্বনিমন্বগচ্ছৎ |
বন্যৈরিদানীং মহিষৈস্তদম্ভঃ শৃঙ্গাহতং ক্রোশতি দীর্ঘিকাণাম্ || ১৬-১৩||
বৃক্ষেশয়া যষ্টিনিবাসভঙ্গান্মৃদঙ্গশব্দাপগমাদলাস্যাঃ |
প্রাপ্তা দবোল্কাহতশেষবর্হ্যাঃ ক্রীডাময়ূরা বনবর্হিণৎবম্ || ১৬-১৪||
সোওপানমার্গেষু চ যেষু রামা নিক্ষিপ্তবত্যশ্চরণান্সরাগান্ |
সদ্যোহতন্যঙ্কুভিরস্রদিগ্ধং ব্যাঘ্রৈঃ পদং তেষু নিধীয়তে মে || ১৬-১৫||
চিত্রদ্বিপাঃ পদ্মবনাবতীর্ণাঃ করেণুভির্দত্তমৃণালভঙ্গাঃ |
নখাঙ্কুশাঘাতবিভিন্নকুম্ভাঃ সংরব্ধসিংহপ্রহৃতং বহন্তি || ১৬-১৬||
স্তম্ভেষু যোষিৎপ্রতিয়াতনানামুৎক্রান্তবর্ণক্রমধূসরাণাম্ |
স্তনোত্তরীয়াণি ভবন্তি সঙ্গান্নির্মোকপট্টাঃ ফণিভির্বিমুক্তাঃ || ১৬-১৭||
কালান্তরশ্যামসুধেষু নক্তমিতস্ততো রূঢতৃণাঙ্কুরেষু |
ত এব মুক্তাগুণশুদ্ধয়োঽপি হর্ম্যেষু মূর্চ্ছন্তি ন চন্দ্রপাদাঃ || ১৬-১৮||
আবর্জ্য শাখাং সদয়ং চ যাসাং পুষ্পাণ্যুপাত্তানি বিলাসিনীভিঃ |
বন্যৈঃ পুলিন্দৈরিব বানরৈস্তাঃ ক্লিশ্যন্ত উদ্যানলতা মদীয়াঃ || ১৬-১৯||
রাত্রাবনাবিষ্কৃতদীপভাসঃ কান্তামুখশ্রীবিয়ুতা দিবাপি |
তিরস্ক্রিয়ন্তে কৃমিতন্তুজালৈর্বিচ্ছন্নধূমপ্রসরা গবাক্ষাঃ || ১৬-২০||
বলিক্রিয়াবর্জিতসৈকতানি স্নানীয়সংসর্গমনাপ্নুবন্তি |
উপান্তবানীরগৃহাণি দৃষ্ট্বা শূন্যানি দূয়ে সরয়ূজলানি || ১৬-২১||
তদর্হসীমাং বসতিং বিসৃজ্য মামভ্যুপেতুং কুলরাজধানীম্ |
হিৎবা তনুং কারণমানুষীং তাং যথা গুরুস্তে পরমাত্মমূর্তিম্ || ১৬-২২||
তথেতি তস্যাঃ প্রণয়ং প্রতীতঃ প্রত্যগ্রহীৎপ্রাগ্রহরো রঘূণাম্ |
পূরপ্যভিব্যক্তমুখপ্রসাদা শরীরবন্ধেন তিরোবভূব || ১৬-২৩||
তদদ্ভুতং সংসদি রাত্রিবৃত্তং প্রাতর্দ্বিজেভ্যো নৃপতিঃ শশংস |
শ্রুৎবা ত এনং কুলরাজধান্যা সাক্ষাৎপতিৎবে বৃতমভ্যনন্দন্ || ১৬-২৪||
কুশাবতীং শ্রোত্রিয়সাৎস কৃৎবা যাত্রানুকূলেঽহনি সাবরোধঃ |
অনুদ্রুতো বায়ুরিবাভ্রবৃন্দৈঃ সৈন্যৈরয়োধ্যাভিমুখঃ প্রতস্থে || ১৬-২৫||
সা কেতুমালোপবনা বৃহদ্ভির্বিহারশৈলানুগতেব নাগৈঃ |
সেনা রথোদারগৃহা প্রয়াণে তস্যাভবজ্জংগমরাজধানী || ১৬-২৬||
তেনাতপত্রামলমণ্ডলেন প্রস্থাপিতঃ পূর্বনিবাসভূমিম্ |
বভৌ বলৌঘঃ শশিনোদিতেন বেলামুদন্বানিব নীয়মানঃ || ১৬-২৭||
তস্য প্রয়াতস্য বরূথিনীনাং পীডামপর্যাপ্তবতীব সোঢুম্ |
বসুংধরা বিষ্ণুপদং দ্বিতীয়মধ্যারুরোহেব রজশ্ছলেন || ১৬-২৮||
উদ্যচ্ছমানা গমনায় পশ্চাৎপুরো নিবেশে পথি চ ব্রজন্তী |
সা যত্র সেনা দদৃশে নৃপস্য তত্রৈব সামগ্র্যমতিং চকার || ১৬-২৯||
তস্য দ্বিপানাং মদবারিসেকাৎখুরাভিঘাতাচ্চ তুরংগমাণাম্ |
রেণুঃ প্রপেদে প্রথি পঙ্কভাবং পঙ্কোঽপি রেণুৎবমিয়ায় নেতুঃ || ১৬-৩০||
মার্গৈষিণী সা কটকান্তরেষু বৈন্ধ্যেষু সেনা বহুধা বিভিন্না |
চকার রেবেব মহাবিরাবা বদ্ধপ্রতিশ্রুন্তি গুহামুখানি || ১৬-৩১||
স ধাতুভেদারুণয়াননেমিঃ প্রভুঃ প্রয়াণধ্বনিমিশ্রতূর্যঃ |
ব্যলঙ্ঘয়দ্বিন্ধ্যমুপায়নানি পশ্যন্পুলিন্দৈরুপপাদিতানি || ১৬-৩২||
তীর্থে তদীয়ে গজসেতুবন্ধাৎপ্রতীপগামুত্তরতোস্য গঙ্গাম্ |
অয়ত্নবালব্যজনীবভূবুর্হংসা নভোলঙ্ঘনলোলপক্ষাঃ || ১৬-৩৩||
স পূর্বজানাং কপিলেন রোষাদ্ভস্মাবশেষীকৃতবিগ্রহাণাম্ |
সুরালয়প্রাপ্তিনিমিত্তমম্ভস্ত্রৈস্রোতসং নৌলুলিতং ববন্দে || ১৬-৩৪||
ইত্যধ্বনঃ কেচিদহোভিরন্তে কূলং সমাসাদ্য কুশঃ সরয়্বাঃ |
বেদিপ্রতিষ্ঠান্বিততাধরাণাং যূপানপশ্যচ্ছতশো রঘূণাম্ || ১৬-৩৫||
আধূয় শাখাঃ কুসুমদ্রুমাণাং স্পৃষ্ট্বা চ শীতান্সরয়ূতরংগান্ |
তং ক্লান্তসৈন্যং কুলরাজধান্যাঃ প্রত্যুজ্জগামোপবনান্তবায়ুঃ || ১৬-৩৬||
অথোপশল্যে রিপুমগ্নশল্যস্তস্যাঃ পুরঃ পৌরসখা স রাজা |
কুলধ্বজস্তানি চলধ্বজানি নিবেশয়ামাস বলী বলানি || ১৬-৩৭||
তং শিল্পিসংঘাঃ প্রভুণা নিয়ুক্তাস্তথাগতাং সংভৃতসাধনৎবাৎ |
পুরং নবীচক্রুরপাং বিসর্গান্মেঘা নিদাঘগ্লপিতামিবোর্বীম্ || ১৬-৩৮||
ততঃ সপর্যাং সপশূপহারাং পুরঃ পরার্ঘ্যপ্রতিমাগৃহায়াঃ |
উপোষিতৈর্বাস্তুবিধানবিদ্ভির্নির্বর্তয়ামাস রঘুপ্রবীরঃ || ১৬-৩৯||
তস্যাঃ স রাজোপপদং নিশান্তং কামীব কান্তাহৃদয়ং প্রবিশ্য |
যথার্হমন্যৈরনুজীবিলোকং সংভাবয়ামাস যথাপ্রধানম্ || ১৬-৪০||
সা মন্দুরাসংশ্রয়িভিস্তুরংগৈঃ শালাবিধিস্তম্ভগতৈশ্চ নাগৈঃ |
পূরাবভাসে বিপণিস্থপণ্যা সর্বাঙ্গনদ্ধাভরণেব নারী || ১৬-৪১||
বসন্স তস্যাং বসতৌ রঘূণাং পুরাণশোভামভিরোপিতায়াম্ |
ন মৈথিলেয়ঃ স্পৃহয়াংবভূব ভর্ত্রে দিবো নাপ্যলকেশ্বরায় || ১৬-৪২||
অথাস্য রত্নগ্রথিতোত্তরীয়মেকান্তপাণ্ডুস্তনলম্বিহারম্ |
নিঃশ্বাসহার্যাংশুকমাজগাম ঘর্মঃ প্রিয়াবেশমিবোপদেষ্টুম্ || ১৬-৪৩||
অগস্ত্যচিহ্নাদয়নাৎসমীপং দিগুত্তরা ভাস্বতি সংনিবৃত্তে |
আনন্দশীতামিব বাষ্পবৃষ্টিং হিমস্রুতিং হৈমবতীং সসর্জ || ১৬-৪৪||
প্রবৃদ্ধতাপো দিবসোঽতিমাত্রমত্যর্থমেব ক্ষণদা চ তন্বী |
উভৌ বিরোধক্রিয়য়া বিভিন্নৌ জায়াপতী সানুশয়াবিবাস্তাম্ || ১৬-৪৫||
দিনে দিনে শৈবলবন্ত্যধস্তাৎসোপানপর্বাণি বিমুঞ্চদম্ভঃ |
উদ্দণ্ডপদ্মং গৃহদীর্ঘিকাণাং নারীনিতম্বদ্বয়সং বভূব || ১৬-৪৬||
বনেষু সায়ংতনমল্লিকানাং বিজৃম্ভণোদ্গন্ধিষু কুড্মলেষু |
প্রত্যেকনিক্ষিপ্তপদঃ সশব্দং সংখ্যামিবৈষাং ভ্রমরশ্চকার || ১৬-৪৭||
স্বেদানুবিদ্ধার্ধনখক্ষতাঙ্কে ভূয়িষ্ঠসংদিষ্টশিখং কপোলে |
চ্যুতং ন কর্ণাদপি কামিনীনাং শিরীষপুষ্পং সহসা পপাত || ১৬-৪৮||
যন্ত্রপ্রবাহৈঃ শিশিরৈঃ পরীতান্রসেন ধৌতান্মলয়োদ্ভবস্য |
শিলাবিশেষান্যধিশয়্য নিন্যুর্ধারাগৃহেষ্বাতপমৃদ্ধিবন্তঃ || ১৬-৪৯||
স্নানার্দ্রমুক্তেষ্বনুধূপবাসং বিন্যস্তসায়ংতনমল্লিকেষু |
কামো বসন্তাত্যয়মন্দবীর্যঃ কেশেষু লেভে বলমঙ্গনানাম্ || ১৬-৫০||
আপিঞ্জরা বদ্ধরজঃকণৎবান্মঞ্জুর্যুদারা শুশুভেঽর্জুনস্য |
দগ্ধ্বাপি দেহং গিরিশেন রোষাৎখণ্ডীকৃতা জ্যেব মনোভবস্য || ১৬-৫১||
মনোজ্ঞগন্ধং সহকারভঙ্গং পুরাণশীধুং নবপাটলং চ |
সংবধ্নতা কামিজনেষু দোষাঃ সর্বে নিদাঘাবধিনা প্রমৃষ্টাঃ || ১৬-৫২||
জনস্য তস্মিন্সময়ে বিগাঢে বভূবতুর্দ্বৌ সবিশেষকান্তৌ |
তাপাপনোদক্ষমপাদসেবৌ স চোদয়স্থৌ নৃপতিঃ শশী চ || ১৬-৫৩||
অথোর্মিলোলোন্মদরাজহংসে রোধোলতাপুষ্পবহে সরয়্বাঃ |
বিহর্তুমিচ্ছা বনিতাসখস্য তস্যাম্ভসি গ্রীষ্মসুখে বভূব || ১৬-৫৪||
স তীরভূমৌ বিহিতোপকার্যামানায়িভিস্তামপকৃষ্টনক্রাম্ |
বিগাহিতুং শ্রীমহিমানুরূপং প্রচক্রমে চক্রধরপ্রভাবঃ || ১৬-৫৫||
সা তীরসোপানপথাবতারাদন্যোন্যকেয়ূরবিঘট্টিনীভিঃ |
সনূপুরক্ষোভপদাভিরাসীদুদ্বিগ্নহংসা সরিদঙ্গনাভিঃ || ১৬-৫৬||
পরস্পরাভ্যুক্ষণতৎপরাণাং তাসাং নৃপো মজ্জনরাগদর্শী |
নৌসংশ্রয়ঃ পার্শ্বগতাং কিরাতীমুপাত্তাবালব্যজনাং বভাষে || ১৬-৫৭||
পশ্যাবরোধৈঃ শতশো মদীয়ৈর্বিগাহ্যমানো গলিতাঙ্গরাগৈঃ |
সংধ্যোদয়ঃ সাভ্র ইবেষ বর্ণং পুষ্যত্যনেকং সরয়ূপ্রবাহঃ || ১৬-৫৮||
বিলুপ্তমন্তঃপুরসুন্দরীণাং যদঞ্জনং নৌলুলিতাভিরদ্ভিঃ |
তদ্বধ্নতীভির্মদরাগশোভাং বিলোচনেষু প্রতিমুক্তমাসাম্ || ১৬-৫৯||
এতা গুরুশ্রোণিপয়োধরৎবাদাত্মানমুদ্বোঢুমশক্নুবত্যঃ |
গাঢাঙ্গদৈর্বাহুভিরপ্সু বালাঃ ক্লেশোত্তরং রাগবশাৎপ্লবন্তে || ১৬-৬০||
অমী শিরীষপ্রসবাবতংসাঃ প্রভ্রংশিনো বারিবিহারিণীনাম্ |
পারিপ্লবাঃ স্রোতসি নিম্নগায়াঃ শৈবাললোলাংশ্ছলয়ন্তি মীনান্ || ১৬-৬১||
আসাং জলাস্ফালনতৎপরাণাং মুক্তাফলস্পর্ধিষু শীকরেষু |
পয়োধরোৎসর্পিষু শীর্যমাণঃ সংলক্ষ্যতে ন চ্ছিদুরোঽপি হারঃ || ১৬-৬২||
আবর্তশোভা নতনাভিকান্তের্ভঙ্গো ভ্রুবাং দ্বন্দ্বচরাঃ স্তনানাম্ |
জাতানি রূপাবয়বোপমানান্যদূরবর্তীনি বিলাসিনীনাম্ || ১৬-৬৩||
তীরস্থলীবর্হিভিরুৎকলাপৈঃ প্রস্নিগ্ধকেকৈরভিনন্দ্যমানম্ |
শ্রোত্রেষু সংমূর্চ্ছতি রক্তমাসাং গীতানুগং বারিমৃদঙ্গবাদ্যম্ || ১৬-৬৪||
সংদষ্টবস্ত্রেষ্ববলানিতম্বেষ্বিন্দুপ্রকাশান্তরিতোডুতুল্যাঃ |
অমী জলাপূরিতসূত্রমার্গা মৌনং ভজন্তে রশনাকলাপাঃ || ১৬-৬৫||
এতাঃ করোৎপীডিতবারিধারা দর্পাৎসখীভির্বদনেষু সিক্তাঃ |
বক্রেতরাগ্রৈরলকৈস্তরুণ্যশ্চূর্ণারুণান্বারিলবান্বমন্তি || ১৬-৬৬||
উদ্বন্ধকেশচ্যুতপত্রলেখো বিশ্লেষিমুক্তাফলপত্রবেষ্টঃ |
মনোজ্ঞ এব প্রমদামুখানামম্ভোবিহারাকুলিতোঽপি বেষঃ || ১৬-৬৭||
স নৌবিমানাদবতীর্য রেমে বিলোলহারঃ সহ তাভিরপ্সু |
স্কন্ধাবলগ্নোদ্ধৃতপদ্মিনীকঃ করেণুভির্বন্য ইব দ্বিপেন্দ্রঃ || ১৬-৬৮||
ততো নৃপেণানুগতাঃ স্ত্রিয়স্তা ভ্রাজিষ্ণুনা সাতিশয়ং বিরেজুঃ |
প্রাগেব মুক্তা নয়নাভিরামাঃ প্রাপ্যেন্দ্রনীলং কিমুতোন্ময়ূখম্ || ১৬-৬৯||
বর্ণোদকৈঃ কাঞ্চনশৃঙ্গমুক্তৈস্তমায়তাক্ষ্যঃ প্রণয়াদসিঞ্চন্ |
তথাগতঃ সোঽতিতরাং বভাসে সধাতুনিষ্যন্দ ইবাদ্রিরাজঃ || ১৬-৭০||
তেনাবরোধপ্রমদাসখেন বিগাহমানেন সরিদ্বরাং তাম্ |
আকাশগঙ্গারতিরপ্সরোভির্বৃতো মরুৎবাননুয়াতলীলঃ || ১৬-৭১||
যৎকুম্ভয়োনেরধিগম্য রামঃ কুশায় রাজ্যেন সমং দিদেশ |
তদস্য জৈত্রাভরণং বিহর্তুরজ্ঞাতপাতং সলিলে মমজ্জ || ১৬-৭২||
স্নাৎবা যথাকামমসৌ সদারস্তীরোপকার্যাং গতমাত্র এব |
দিব্যেন শূন্যং বলয়েন বাহুমপোঢনেপথ্যবিধির্দদর্শ || ১৬-৭৩||
জয়শ্রিয়ঃ সংবননং যতস্তদামুক্তপূর্বং গুরুণা চ যস্মাৎ |
সেহেঽস্য ন ভ্রংশমতো ন লোভাৎস তুল্যপুষ্পাভরণো হি ধীরঃ || ১৬-৭৪||
ততঃ সমাজ্ঞাপয়দাশু সর্বানানায়িনস্তদ্বিচয়ে নদীষ্ণান্ |
বন্ধ্যশ্রমাস্তে সরয়ূং বিগাহ্য তমূচুরম্লানমুখপ্রসাদাঃ || ১৬-৭৫||
কৃতঃ প্রয়ত্নো ন চ দেব লব্ধং মগ্নং পয়স্যাভরণোত্তমং তে |
নাগেন লৌল্যাৎকুমুদেন নূনমুপাত্তমন্তর্হ্রদবাসিনা তৎ || ১৬-৭৬||
ততঃ স কৃৎবা ধনুরাততজ্যং ধনুর্ধরঃ কোপবিলোহিতাক্ষঃ |
গারুত্মতং তীরগতস্তরস্বী ভুজংগনাশায় সমাদদেঽস্ত্রম্ || ১৬-৭৭||
তস্মিন্হ্রদঃ সংহিতমাত্র এব ক্ষোভাৎসমাবিদ্ধতরংগহস্তঃ |
রোধাংসি নিঘ্নন্নবপাতমগ্নঃ করীব বন্যঃ পরুষং ররাস || ১৬-৭৮||
তস্মাৎসমুদ্রাদিব মথ্যমানাদুদ্বৃত্তনক্রাৎসহসোন্মমজ্জ |
লক্ষ্ম্যেব সার্ধং সুররাজবৃক্ষঃ কন্যাং পুরস্কৃত্য ভুজংগরাজঃ || ১৬-৭৯||
বিভূষণপ্রত্যুপহারহস্তমুপস্থিতং বীক্ষ্য বিশাংপতিস্তম্ |
সৌপর্ণমস্ত্রং প্রতিসংজহার প্রহ্রেষ্বনির্বন্ধরুষো হি সন্তঃ || ১৬-৮০||
ত্রৈলোক্যনাথপ্রভবং প্রভাবাৎকুশং দ্বিষামঙ্কুশমস্ত্রবিদ্বান্ |
মানোন্নতেনাপ্যভিবন্দ্য মূর্ধ্না মূর্ধাভিষিক্তং কুমুদো বভাষে || ১৬-৮১||
অবৈমি কার্যান্তরমানুষস্য বিষ্ণোঃ সুতাখ্যামপরাং তনুং ৎবাম্ |
সোঽহং কথং নাম তবাচরেয়মারাধনীয়স্য ধৃতের্বিঘাতম্ || ১৬-৮২||
করাভিঘাতোত্থিতকন্দুকেয়মালোক্য বালাতিকুতূহলেন |
হ্রদাৎপতজ্জ্যোতিরিবান্তরিক্ষাদাদত্ত জৈত্রাভরণং ৎবদীয়ম্ || ১৬-৮৩||
তদেতদাজানুবিলম্বিনা তে জ্যাঘাতরেখাকিণলাঞ্ছনেন |
ভুজেন রক্ষাপরিঘেণ ভূমেরুপৈতু যোগং পুনরংসলেন || ১৬-৮৪||
ইমাং স্বসারং চ যবীয়সীং মে কুমুদ্বতীং নার্হসি নানুমন্তুম্ |
আত্মাপরাধং নুদতীং চিরায় শুশ্রূষয়া পার্থিব পাদয়োস্তে || ১৬-৮৫||
ইত্যূচিবানুপহৃতাভরণঃ ক্ষিতীশং
শ্লাঘ্যোও ভবান্স্বজন ইত্যনুভাষিতারম্ |
সংযোজয়াং বিধিবদাস সমেতবন্ধুঃ
কন্যাময়েন কুমুদঃ কুলভূষণেন || ১৬-৮৬||
তস্যাঃ স্পৃষ্টে মনুজপতিনা সাহচর্যায় হস্তে
মাঙ্গল্যোর্ণাবলয়িনি পুরঃ পাবকস্যোচ্ছিখস্য |
দিব্যস্তূর্যধ্বনিরুদচরদ্ব্যশ্নুবানো দিগন্তা –
ন্গন্ধোদগ্রং তদনু ববৃষুঃ পুষ্পমাশ্চর্যমেঘাঃ || ১৬-৮৭||
ইত্থং নাগস্ত্রিভুবনগুরোরৌরসং মৈথিলেয়ং
লব্ধ্বা বন্ধুং তমপি চ কুশঃ পঞ্চমং তক্ষকস্য |
একঃ শঙ্কাং পিতৃবধরিপোরত্যজদ্বৈনতেয়া –
চ্ছান্তব্যালামবনিমপরঃ পৌরকান্তঃ শশাস || ১৬-৮৮||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
কুমুদ্বতীপরিণয়ো নাম ষোডশঃ সর্গঃ ||