রঘুবংশং সর্গ ১৭

|| কালিদাসকৃতম্ রঘুবংশম্ সর্গ ১৭ ||

অতিথিং নাম কাকুৎস্থাৎপুত্রং প্রাপ কুমুদ্বতী |
পশ্চিমাদ্যামিনীয়ামাৎপ্রসাদমিব চেতনা|| ১৭-১||
স পিতুঃ পিতৃমান্বংশং মাতুশ্চানুপমদ্যুতিঃ |
অপুনাৎসেবিতেবোভৌ মার্গাবুত্তরদক্ষিণৌ|| ১৭-২||
তমাদৌ কুলবিদ্যানামর্থমর্থবিদাং বরঃ |
পশ্চাৎপার্থিবকন্যানাং পাণিমগ্রাহয়ৎপিতা|| ১৭-৩||
জাত্যস্তেনাভিজাতেন শূরঃ শৌর্যবতা কুশঃ |
অমন্যৈতকমাত্মানমনেকং বশিনা বশী|| ১৭-৪||
স কুলোচিতমিন্দ্রস্য সাহায়কমুপেয়িবান্ |
জঘান সমরে দৈত্যং দুর্জয়ং তেন চাবধি|| ১৭-৫||
তং স্বসা নাগরাজস্য কুমুদস্য কুমুদ্বতী |
অন্বগাৎকুমুদানন্দং শশাঙ্কমিব কৌমুদী|| ১৭-৬||
তয়োর্দিবস্পতেরাসীদেকঃ সিংহাসনার্ধভাক্ |
দ্বিতীয়াপি সখী শচ্যাঃ পারিজাতাংশভাগিনী|| ১৭-৭||
তদাত্মসংভবং রাজ্যে মন্ত্রিবৃদ্ধাঃ সমাদধুঃ |
স্মরন্তঃ পশ্চিমামাজ্ঞাং ভর্তুঃ সঙ্গ্রাময়ায়িনঃ|| ১৭-৮||
তে তস্য কল্পয়ামাসুরভিষেকায় শিল্পিভিঃ |
বিমানং নবমুদ্বেদি চতুঃস্তম্ভপ্রতিষ্ঠিতম্|| ১৭-৯||
তত্রৈনং হেমকুম্ভেষু সংভৃতৈস্তীর্থবারিভিঃ |
উপতস্থুঃ প্রকৃতয়ো ভদ্রপীঠোপবেশিতম্|| ১৭-১০||
নদদ্ভিঃ স্নিগ্ধগংভীরং তূর্যৈরাহতপুষ্করৈঃ |
অন্বমীয়ত কল্যাণং তস্যাবিচ্ছিন্নসংততি|| ১৭-১১||
দূর্বায়বাঙ্কুরপ্লক্ষৎবগভিন্নপুটোত্তরান্ |
জ্ঞাতিবৃদ্ধৈঃ প্রয়ুক্তান্স ভেজে নীরাজনাবিধীন্|| ১৭-১২||
পুরোহিতপুরোগাস্তং জিষ্ণুং জৈত্রৈরথর্বভিঃ |
উপচক্রমিরে পূর্বমভিষেক্তুং দ্বিজাতয়ঃ|| ১৭-১৩||
তস্যৌঘমহতী মূর্ধ্নি নিপতন্তী ব্যরোচত |
সশব্দমভিষেকশ্রীর্গঙ্গেব ত্রিপুরদ্বিষঃ|| ১৭-১৪||
স্তূয়মানঃ ক্ষণে তস্মিন্নলক্ষ্যত স বন্দিভিঃ |
প্রবৃদ্ধ ইব পর্জন্যঃ সারঙ্গৈরভিনন্দিতঃ|| ১৭-১৫||
তস্য সন্মন্ত্রপূতাভিঃ স্নানমদ্ভিঃ প্রতীচ্ছতঃ |
ববৃধে বৈদ্যুতশ্চাগ্নের্বৃষ্টিসেকাদিব দ্যুতিঃ|| ১৭-১৬||
স তাবদভিষেকান্তে স্নাতকেভ্যো দদৌ বসু |
যাবতৈষাং সমাপ্যেরন্যজ্ঞাঃ পর্যাপ্তদক্ষিণাঃ|| ১৭-১৭||
তে প্রীতমনসস্তস্মৈ যামাশিষমুদৈরয়ন্ |
সা তস্য কর্মনির্বৃত্তৈর্দূরং পশ্চাৎকৃতা ফলৈঃ|| ১৭-১৮||
বন্ধচ্ছেদং স বদ্ধানাং বধার্হাণামবধ্যতাম্ |
ধুর্যাণাং চ ধুরো মোক্ষমদোহং চাদিশদ্গবাম্|| ১৭-১৯||
ক্রীডাপতত্রিণোপ্যস্য পঞ্জরস্থাঃ শুকাদয়ঃ |
লব্ধমোক্ষাস্তদাদেশাদ্যথেষ্টগতয়োঽভবন্|| ১৭-২০||
ততঃ কক্ষ্যান্তরন্যস্তং গজদন্তাসনং শুচি |
সোওত্তরচ্ছদমধ্যাস্ত নেপথ্যগ্রহণায় সঃ|| ১৭-২১||
তং ধূপাশ্যানকেশান্তং তোয়নির্ণিক্তপাণয়ঃ |
আকল্পসাধনৈস্তৈস্তৈরুপসেদুঃ প্রসাধকাঃ|| ১৭-২২||
তেঽস্য মুক্তাগুণোন্নদ্ধং মৌলিমন্তর্গতস্রজম্ |
প্রত্যূপুঃ পদ্মরাগেণ প্রভামণ্ডলশোভিনা|| ১৭-২৩||
চন্দনেনাঙ্গরাগং চ মৃগনাভিসুগন্ধিনা |
সমাপয়্য ততশ্চক্রুঃ পত্রং বিন্যস্তরোচনম্|| ১৭-২৪||
আমুক্তাভরণঃ স্রগ্বী হংসচিহ্নদুকূলবান্ |
আসীদতিশয়প্রেক্ষ্যঃ স রাজ্যশ্রীবধূবরঃ|| ১৭-২৫||
নেপথ্যদর্শিনশ্ছায়া তস্যাদর্শে হিরণ্ময়ে |
বিররাজোদিতে সূর্যে মরৌ কল্পতরোরিব|| ১৭-২৬||
স রাজককুদব্যগ্রপাণিভিঃ পার্শ্ববর্তিভিঃ |
যয়াবুদীরিতালোকঃ সুধর্মানবমাং সভাম্|| ১৭-২৭||
বিতানসহিতং তত্র ভেজে পৈতৃকমাসনম্ |
চূডামণিভিরুদ্ধৃষ্টং পাদপীঠং মহীক্ষিতাম্|| ১৭-২৮||
শুশুভে তেন চাক্রান্তং মঙ্গলায়তনং মহৎ |
শ্রীবৎসলক্ষণং বক্ষঃ কৌস্তুভেনেব কৈশবম্|| ১৭-২৯||
বভৌ ভূয়ঃ কুমারৎবাদাধিরাজ্যমবাপ্য সঃ |
রেখাভাবাদুপারূঢঃ সামগ্র্যমিব চন্দ্রমাঃ|| ১৭-৩০||
প্রসন্নমুখরাগং তং স্মিতপূর্বাভিভাষিণম্ |
মূর্তিমন্তমমন্যন্ত বিশ্বাসমনুজীবিনঃ|| ১৭-৩১||
স পুরং পুরহূতশ্রীঃ কল্পদ্রুমনিভধ্বজাম্ |
ক্রমমাণশ্চকার দ্যাং নাগেনৈরাবতৌজসা|| ১৭-৩২||
তস্যৈকস্যোচ্ছ্রিতং ছত্রং মূর্ধ্নি তেনামলৎবিষা |
পূর্বরাজবিয়োগৌষ্ম্যং কৃৎস্নস্য জগতো হৃতম্|| ১৭-৩৩||
ধূমাদগ্নেঃ শিখাঃ পশ্চাদুদয়াদংশবো রবেঃ |
সোঽতীত্য তেজসাং বৃত্তিং সমমেবোত্থিতো গুণৈঃ|| ১৭-৩৪||
তং প্রীতিবিশদৈর্নেত্রৈরন্বয়ুঃ পৌরয়োষিতঃ |
শরৎপ্রসন্নৈর্জ্যোতির্ভির্বিভাবর্য ইব ধ্রুবম্|| ১৭-৩৫||
অয়োধ্যাদেবতাশ্চৈনং প্রশস্তায়তনার্চিতাঃ |
অনুদধ্যুরনুধ্যেয়ং সাংনিধ্যৈঃ প্রতিমাগতৈঃ|| ১৭-৩৬||
যাবন্নাশ্যায়তে বেদিরভিষেকজলাপ্লুতা |
তাবদেবাস্য বেলান্তং প্রতাপঃ প্রাপ দুঃসহঃ|| ১৭-৩৭||
বসিষ্ঠস্য গুরোর্মন্ত্রাঃ সায়কাস্তস্য ধন্বিনঃ |
কিং তৎসাধ্যং যদুভয়ে সাধয়েয়ুর্ন সংগতাঃ|| ১৭-৩৮||
স ধর্মস্থসখঃ শশ্বদর্থিপ্রত্যর্থিনাং স্বয়ম্ |
দদর্শ সংশয়চ্ছেদ্যান্ব্যবহারানতন্দ্রিতঃ|| ১৭-৩৯||
ততঃ পরমভিব্যক্তসৌমনস্যনিবেদিতৈঃ |
যুয়োজ পাকাভিমুখৈর্ভৃত্যান্বিজ্ঞাপনাফলৈঃ|| ১৭-৪০||
প্রজাস্তদ্গুরুণা নদ্যো নভসেব বিবর্ধিতাঃ |
তস্মিংস্তু ভূয়সীং বৃদ্ধিং নভস্যে তা ইবায়য়ুঃ|| ১৭-৪১||
যদুবাচ ন তন্মিথ্যা যদ্দদৌ ন জহার তৎ |
সোঽভূদ্ভগ্নব্রতঃ শত্রূনুদ্ধৃত্য প্রতিরোপয়ন্|| ১৭-৪২||
বয়োরূপবিভূতীনামেকৈকং মদকারণম্ |
তানি তস্মিন্সমস্তানি ন তস্যোৎসিচিষে মনঃ|| ১৭-৪৩||
ইত্থং জনিতরাগাসু প্রকৃতিষ্বনুবাসরম্ |
অক্ষোভ্যঃ স নবোঽপ্যাসীদ্দৃঢমূল ইব দ্রুমঃ|| ১৭-৪৪||
অনিত্যাঃ শত্রবো বাহ্যা বিপ্রকৃষ্টাশ্চ তে যতঃ |
অতঃ সোঽভ্যন্তরান্নিত্যাঞ্ষট্পূর্বমজয়দ্রিপূন্|| ১৭-৪৫||
প্রসাদাভিমুখে তস্মিংশ্চপলাপি স্বভাবতঃ |
নিকষে হেমরেখেব শ্রীরাসীদনপায়িনী|| ১৭-৪৬||
কাতর্যং কেবলা নীতিঃ শৌর্যং শ্বাপদচেষ্টিতম্ |
অতঃ সিদ্ধিং সমেতাভ্যামুভাভ্যামন্বিয়েষ সঃ|| ১৭-৪৭||
ন তস্য মণ্ডলে রাজ্ঞো ন্যস্তপ্রণিধিদীধিতেঃ |
অদৃষ্টমভবৎকিংচিদ্ব্যভ্রস্যেব বিবস্বতঃ|| ১৭-৪৮||
রাত্রিংদিববিভাগেষু যদাদিষ্টং মহীক্ষিতাম্ |
তৎসিষেবে নিয়োগেন স বিকল্পপরাঙ্মুখঃ|| ১৭-৪৯||
মন্ত্রঃ প্রতিদিনং তস্য বভূব সহ মন্ত্রিভিঃ |
স জাতু সেব্যমানোঽপি গুপ্তদ্বারো ন সূচ্যতে|| ১৭-৫০||
পরেষু স্বেষু চ ক্ষিপ্তৈরবিজ্ঞাতপরস্পরৈঃ |
সোঽপসর্পৈর্জজাগার যথাকালং স্বপন্নপি|| ১৭-৫১||
দুর্গাণি দুর্গ্রহাণ্যাসংস্তস্য রোদ্ধুরপি দ্বিষাম্ |
ন হি সিংহো গজাস্কন্দী ভয়াদ্গিরিগুহাশয়ঃ|| ১৭-৫২||
ভব্যমুখ্যাঃ সমারম্ভাঃ প্রত্যবেক্ষ্যানিরত্যয়াঃ |
গর্ভশলিসধর্মাণস্তস্য গূঢং বিপেচিরে|| ১৭-৫৩||
অপথেন প্রববৃতে ন জাতূপচিতোঽপি সঃ |
বৃদ্ধৌ নদীমুখেনৈব প্রস্থানং লবণাম্ভসঃ|| ১৭-৫৪||
কামং প্রকৃতিবৈরাগ্যং সদ্যঃ শময়িতুং ক্ষমঃ |
যস্য কার্যঃ প্রতীকারঃ স তন্নৈবোদপাদয়ৎ|| ১৭-৫৫||
শক্যেষ্বেবাভবদ্যাত্রা তস্য শক্তিমতঃ সতঃ |
সমীরণসহায়োঽপি নাম্ভঃপ্রার্থী দবানলঃ|| ১৭-৫৬||
ন ধর্মমর্থকামাভ্যাং ববাধে ন চ তেন তৌ |
নার্থং কামেন কামং ব সোঽর্থেন সদৃশস্ত্রিষু|| ১৭-৫৭||
হীনান্যনৃপকর্ত্ৠণি প্রবৃদ্ধানি বিকুর্বতে |
তেন মধ্যমশক্তীনি মিত্রাণি স্থাপিতান্যতঃ|| ১৭-৫৮||
পরাত্মনোঃ পরিচ্ছিদ্য শক্ত্যাদীনাং বলাবলম্ |
যয়াবেভির্বলিষ্ঠশ্চেৎপরস্মাদাস্ত সোঽন্যথা|| ১৭-৫৯||
কোশেনাশ্রয়ণীয়ৎবমিতি তস্যার্থসংগ্রহঃ |
অম্বুগর্ভো হি জীমূতশ্চাতকৈরভিনন্দ্যতে|| ১৭-৬০||
পরকর্মাপহঃ সোঽভূদুদ্যুতঃ স্বেষু কর্মসু |
আবৃণোদাত্মনো রন্ধ্রং রন্ধ্রেষু প্রহরন্রিপূন্|| ১৭-৬১||
পিত্রা সংবর্ধিতো নিত্যং কৃতাস্ত্রঃ সাংপরায়িকঃ |
তস্য দণ্ডবতো দণ্ডঃ স্বদেহান্ন ব্যশিষ্যত|| ১৭-৬২||
সর্পস্যেব শিরোরত্নং নাস্য শক্তিত্রয়ং পরঃ |
স চকর্ষ পরস্মাত্তদয়স্কান্ত ইবায়সম্|| ১৭-৬৩||
বাপীষ্বিব স্রবন্তীষু বনেষূপবনেষ্বিব |
সার্থাঃ স্বৈরং স্বকীয়েষু চেরুর্বেশ্মস্বিবাদ্রিষু|| ১৭-৬৪||
তপো রক্ষন্স বিঘ্নেভ্যস্তস্করেভ্যশ্চ সংপদঃ |
যথাস্বমাশ্রমৈশ্চক্রে বর্ণৈরপি ষডংশভাক্|| ১৭-৬৫||
খনিভিঃ সুষুবে রত্নং ক্ষেত্রৈঃ সস্যং বনৈর্গজান্ |
দিদেশ বেতনং তস্মৈ রক্ষাসদৃশমেব ভূঃ|| ১৭-৬৬||
স গুণানাং বলানাং চ ষণ্ণাং ষণ্মুখবিক্রমঃ |
বভূব বিনিয়োগজ্ঞঃ সাধনীয়েষু বস্তুষু|| ১৭-৬৭||
ইতি ক্রমাৎপ্রয়ুঞ্জানো রাজনীতিং চতুর্বিধাম্ |
আ তীর্থাদপ্রতীঘাতং স তস্যাঃ ফলমানশে|| ১৭-৬৮||
কূটয়ুদ্ধবিধিজ্ঞেঽপি তস্মিন্সন্মার্গয়োধিনি |
ভেজেঽভিসারিকাবৃত্তিং জয়শ্রীর্বীরগামিনী|| ১৭-৬৯||
প্রায়ঃ প্রতাপভগ্নৎবাদরীণাং তস্য দুর্লভঃ |
রণো গন্ধদ্বিপস্যেব গন্ধভিন্নান্যদন্তিনঃ|| ১৭-৭০||
প্রবৃদ্ধৌ হ্রীয়তে চন্দ্রঃ সমুদ্রোঽপি তথাবিধঃ |
স তু তৎসমবৃদ্ধিশ্চ ন চাভূত্তাবিব ক্ষয়ী|| ১৭-৭১||
সন্তস্তস্যাভিগমনাদত্যর্থং মহতঃ কৃশাঃ |
উদধেরিব জীমূতাঃ প্রাপুর্দাতৃৎবমর্থিনঃ|| ১৭-৭২||
স্তূয়মানঃ স জিহ্রায় স্তুত্যমেব সমাচরন্ |
তথাপি ববৃধে তস্য তৎকারিদ্বেষিণো যশঃ|| ১৭-৭৩||
দুরিতং দর্শনেন ঘ্নংস্তত্ত্বার্থেন নুদংস্তমঃ |
প্রজাঃ স্বতন্ত্রয়াংচক্রে শশ্বৎসূর্য ইবোদিতঃ|| ১৭-৭৪||
ইন্দোরগতয়ঃ পদ্মে সূর্যস্য কুমুদেংঽশবঃ |
গুণাস্তস্য বিপক্ষেঽপি গুণিনো লেভিরেঽন্তরম্|| ১৭-৭৫||
পরাভিসংধানপরং যদ্যপ্যস্য বিচেষ্টিতম্ |
জিগীষোরশ্বমেধায় ধর্ম্যমেব বভূব তৎ|| ১৭-৭৬||
এবমুদ্যন্প্রভাবেণ শাস্ত্রনির্দিষ্টবর্ত্মনা |
বৃষেব দেবো দেবানাং রাজ্ঞাং রাজা বভূব সঃ|| ১৭-৭৭||
পঞ্চমং লোকপালানাং তমূচুঃ সাম্যয়োগতঃ |
ভূতানাং মহতাং ষষ্ঠমষ্টমং কুলভূভৃতাম্|| ১৭-৭৮||
দূরাপবর্জিতচ্ছত্রৈস্তস্যাজ্ঞাং শাসনার্পিতাম্ |
দধুঃ শিরোভির্ভূপালা দেবাঃ পৌরংদরীমিব|| ১৭-৭৯||
ঋৎবিজঃ স তথানর্চ দক্ষিণাভির্মহাক্রতৌ |
যথা সাধারণীভূতং নামাস্য ধনদস্য চ|| ১৭-৮০||
ইন্দ্রাদ্বৃষ্টির্নিয়মিতগদোদ্রেকবৃত্তির্যমোঽভূ-
দ্যাদোনাথঃ শিবজলপথঃ কর্মণে নৌচরাণাম্ |
পূর্বাপেক্ষী তদনু বিদধে কোষবৃদ্ধিং কুবের-
স্তস্মিন্দণ্ডোপনতচরিতং ভেজিরে লোকপালাঃ|| ১৭-৮১||

ইতি শ্রীরঘুবংশে মহাকাব্যে কবিশ্রীকালিদাস-
কৃতাবতিথিবর্ণনং নাম সপ্তদশঃ সর্গঃ ||