রঘুবংশং সর্গ ১৮ – বংশানুক্রম

|| কালিদাসকৃতম্ রঘুবংশম্ সর্গ ১৮ বংশানুক্রম ||

স নৈষধস্যার্থপতেঃ সুতায়ামুৎপাদয়ামাস নিষিদ্ধশত্রুঃ |
অনূনসারং নিষধান্নগেন্দ্রাৎপুত্রং যমাহুর্নিষধাখ্যমেব || ১৮-১||
তেনোনুবীর্যেণ পিতা প্রজায়ৈ কল্পিষ্যমাণেন ননন্দ যূনা |
সুবৃষ্টিয়োগাদিব জীবলোকঃ সস্যেন সংপত্তিফলোন্মুখেন || ১৮-২||
শব্দাদি নির্বিশ্য সুখং চিরায় তস্মিন্প্রতিষ্ঠাপিতরাজশব্দঃ |
কৌমুদ্বতেয়ঃ কুমুদাবদাতৈর্দ্যামর্জিতাং কর্মভিরারুরোহ || ১৮-৩||
পৌত্রঃ কুশস্যাপি কুশেশয়াক্ষঃ সসাগরাং সাগরধীরচেতাঃ |
একাতপত্রাং ভুবমেকবীরঃ পুরার্গলাদীর্ঘভুজো বুভোজ || ১৮-৪||
তস্যানলৌজাস্তনয়স্তদন্তে বংশশ্রিয়ং প্রাপ নলাভিধানঃ |
যো নড্বলানীব গজঃ পরেষাং বলান্যমৃদ্গান্নলিনাভবক্ত্রঃ || ১৮-৫||
নভশ্চরৈর্গীতয়শাঃ স লেভে নভস্তলশ্যামতনুং তনূজম্ |
খ্যাতং নভঃশব্দময়েন নাম্না কান্তং নভোমাসমিব প্রজানাম্ || ১৮-৬||
তস্মৈ বিসৃজ্যোত্তরকোসলানাং ধর্মোত্তরস্তৎপ্রভবে প্রভুৎবম্ |
মৃগৈরজর্যং জরসোপদিষ্টমদেহবন্ধায় পুনর্ববন্ধ || ১৮-৭||
তেন দ্বিপানামিব পুণ্ডরীকো রাজ্ঞামজয়্যোঽজনি পুণ্ডরীকঃ |
শান্তে পিতর্যাহৃতপুণ্ডরীকা যং পুণ্ডরীকাক্ষমিব শ্রিতা শ্রীঃ || ১৮-৮||
স ক্ষেমধন্বানমমোঘধন্বা পুত্রং প্রজাক্ষেমবিধানদক্ষম্ |
ক্ষ্মাং লম্ভয়িৎবা ক্ষময়োপপন্নং বনে তপঃ ক্ষান্ততরশ্চচার || ১৮-৯||
অনীকিনীনাং সমরেঽগ্রয়ায়ী তস্যাপি দেবপ্রতিমঃ সুতোঽভূৎ |
ব্যশ্রূয়তানীকপদাবসানং দেবাদি নাম ত্রিদিবেঽপি যস্য || ১৮-১০||
পিতা সমারাধনতৎপরেণ পুত্রেণ পুত্রী স যথৈব তেন |
পুত্রস্তথৈবাত্মজবৎসলেন স তেন পিত্রা পিতৃমান্বভূব || ১৮-১১||
পূর্বস্তয়োরাত্মসমে চিরোঢামাত্মোভবে বর্ণচতুষ্টয়স্য |
ধুরং নিধায়ৈকনিধির্গুণানাং জগাম যজ্বা যজমানলোকম্ || ১৮-১২||
বশী সুতস্তস্য বশংবদৎবাৎস্বেষামিবাসীদ্বিষতামপীষ্টঃ |
সকৃদ্বিবিগ্নানপি হি প্রয়ুক্তং মাধুর্যমীষ্টে হরিণান্গ্রহীতুম্ || ১৮-১৩||
অহীনগুর্নাম স গাং সমগ্রামহীনবাহুদ্রবিণঃ শশাস |
যো হীনসংসর্গপরাঙ্মুখৎবাদ্যুবাপ্যনর্থৈর্ব্যসনৈর্বিহীনঃ || ১৮-১৪||
গুরোঃ স চানন্তরমন্তরজ্ঞঃ পুংসাং পুমানাদ্য ইবাবতীর্ণঃ |
উপক্রমৈরস্খলিতৈশ্চতুর্ভিশ্চতুর্দিগীশশ্চতুরো বভূব || ১৮-১৫||
তস্মিন্প্রয়াতে পরলোকয়াত্রাং জেতর্যরীণাং তনয়ং তদীয়ম্ |
উচ্চৈঃশিরস্ত্বাজ্জিতপারিয়াত্রং লক্ষ্মীঃ সিষেবে কিল পারিয়াত্রম্ || ১৮-১৬||
তস্যাভবৎসূনুরুদারশীলঃ শিলঃ শিলাপট্টবিশালবক্ষাঃ |
জিতারিপক্ষোঽপি শিলীমুখৈর্যঃ শালীনতামব্রজদীড্যমানঃ || ১৮-১৭||
তমাত্মসংপন্নমনিন্দিতাত্মা কৃৎবা যুবানং যুবরাজমেব |
সুখানি সোঽভুঙ্ক্ত সুখোপরোধি বৃত্তং হি রাজ্ঞামুপরুদ্ধবৃত্তম্ || ১৮-১৮||
তং রাগবন্ধিষ্ববিতৃপ্তমেব ভোগেষু সৌভাগ্যবিশেষভোগ্যম্ |
বিলাসিনীনামরতিক্ষমাঽপি জরা বৃথা মৎসরিণী জহার || ১৮-১৯||
উন্নাভ ইত্যুদ্গতনামধেয়স্তস্যায়থার্থোন্নতনাভিরন্ধ্রঃ |
সুতোঽভবৎপঙ্কজনাভকল্পঃ কৃৎস্নস্য নাভির্নৃপমণ্ডলস্য || ১৮-২০||
ততঃ পরং বজ্রধরপ্রভাবস্তদাত্মজঃ সংযতি বজ্রঘোষঃ |
বভূব বজ্রাকরভূষণায়াঃ পতিঃ পৃথিব্যাঃ কিল বজ্রণাভঃ || ১৮-২১||
তস্মিন্গতে দ্যাং সুকৃতোপলব্ধাং তৎসংভবং শঙ্খণমর্ণবান্তা |
উৎখাতশত্রুং বসুধোপতস্থে রত্নোপহারৈরুদিতৈঃ খনিভ্যঃ || ১৮-২২||
তস্যাবসানে হরিদশ্বধামা পিত্র্যং প্রপেদে পদমশ্বিরূপঃ |
বেলাতটেষূষিতসৈনিকাশ্বং পুরাবিদো যং ব্যুষিতাশ্বমাহুঃ || ১৮-২৩||
আরাধ্য বিশ্বেশ্বরমীশ্বরেণ তেন ক্ষিতের্বিশ্বসহো বিজজ্ঞে |
পাতুং সহো বিশ্বসখঃ সমগ্রাং বিশ্বংভরামাত্মজমূর্তিরাত্মা || ১৮-২৪||
অংশে হিরণ্যাক্ষরিপোঃ স জাতে হিরণ্যনাভে তনয়ে নয়জ্ঞঃ |
দ্বিষামসহ্যঃ সুতরাং তরূণাং হিরণ্যরেতা ইব সানিলোঽভূৎ || ১৮-২৫||
পিতা পিৎৠণামনৃণস্তমন্তে বয়স্যনন্তানি সুখানি লিপ্সুঃ |
রাজানমাজানুবিলম্বিবাহুং কৃৎবা কৃতী বল্কলবান্বভূব || ১৮-২৬||
কৌসল্য ইত্ত্যুত্তরকোসলানাং পত্যুঃ পতঙ্গান্বয়ভূষণস্য |
তস্যৌরসঃ সোমসুতঃ সুতোঽভূন্নেত্রোৎসবঃ সোম ইব দ্বিতীয়ঃ || ১৮-২৭||
যশোভিরাব্রহ্মসভং প্রকাশঃ স ব্রহ্মভূয়ং গতিমাজগাম |
ব্রহ্মিষ্ঠমাধায় নিজেঽধিকারে ব্রহ্মিষ্ঠমেব স্বতনুপ্রসূতম্ || ১৮-২৮||
তস্মিন্কুলাপীডনিভে বিপীডং সম্যঙ্মহীং শাসতি শাসনাঙ্কাম্ |
প্রজাশ্চিরং সুপ্রজসি প্রজেশে ননন্দুরানন্দজলাবিলাক্ষ্যঃ || ১৮-২৯||
পাত্রীকৃতাত্মা গুরুসেবনেন স্পষ্টাকৃতিঃ পত্ররথেন্দ্রকেতোঃ |
তং পুত্রিণাং পুষ্করপত্রনেত্রঃ পুত্রঃ সমারোপয়দগ্রসংখ্যাম্ || ১৮-৩০||
বংশস্থিতিং বংশকরেণ তেন সংভাব্য ভাবী স সখা মঘোনঃ |
উপস্পৃশন্স্পর্শনিবৃত্তলৌল্যস্ত্রিপুষ্করেষু ত্রিদশৎবমাপ || ১৮-৩১||
তস্য প্রভানির্জিতপুষ্পরাগং পৌষ্যাং তিথৌ পুষ্যমসূত পত্নী |
তস্মিন্নপুষ্যন্নুদিতে সমগ্রাং পুষ্টিং জনাঃ পুষ্য ইব দ্বিতীয়ে || ১৮-৩২||
মহীং মহেচ্ছঃ পরিকীর্য সূনৌ মনীষিণে জৈমিনয়েঽর্পিতাত্মা |
তস্মাৎসয়োগাদধিগম্য যোগমজন্মনেঽকল্পত জন্মভীরুঃ || ১৮-৩৩||
ততঃ পরং তৎপ্রভবঃ প্রপেদে ধ্রুবোপমেয়ো ধ্রুবসংধিরুর্বীম্ |
যস্মিন্নভূজ্জ্যায়সি সত্যসংধে সংধির্ধ্রুবঃ সংনমতামরীণাম্ || ১৮-৩৪||
সুতে শিশাবেব সুদর্শনাখ্যে দর্শাত্যয়েন্দুপ্রিয়দর্শনে সঃ |
মৃগায়তাক্ষো মৃগয়াবিহারী সিংহাদবাপদ্বিপদং নৃসিংহঃ || ১৮-৩৫||
স্বর্গামিনস্তস্য তমৈকমত্যাদমাত্যবর্গঃ কুলতন্তুমেকম্ |
অনাথদীনাঃ প্রকৃতীরবেক্ষ্য সাকেতনাথং বিধিবচ্চকার || ১৮-৩৬||
নবেন্দুনা তন্নভসোপমেয়ং শাবৈকসিংহেন চ কাননেন |
রঘোঃ কুলং কুড্মলপুষ্করেণ তোয়েন চাপ্রৌঢনরেন্দ্রমাসীৎ || ১৮-৩৭||
লোকেন ভাবী পিতুরেব তুল্যঃ সংভাবিতো মৌলিপরিগ্রহাৎসঃ |
দৃষ্টো হি বৃণ্বন্কলভপ্রমাণোঽপ্যাশাঃ পুরোবাতমবাপ্য মেঘঃ || ১৮-৩৮||
তং রাজবীথ্যামধিহস্তি যাতমাধোরণালম্বিতমগ্র্যবেশম্ |
ষড্বর্ষদেশীয়মপি প্রভুৎবাৎপ্রৈক্ষন্ত পৌরাঃ পিতৃগৌরবেণ || ১৮-৩৯||
কামং ন সোঽকল্পত পৈতৃকস্য সিংহাসনস্য প্রতিপূরণায় |
তেজোমহিম্না পুনরাবৃতাত্মা তদ্ব্যাপ চামীকরপিঞ্জরেণ || ১৮-৪০||
তস্মাদধঃ কিংচিদিবাবতীর্ণাবসংস্পৃশন্তৌ তপনীয়পীঠম্ |
সালক্তকৌ ভূপতয়ঃ প্রসিদ্ধৈর্ববন্দিরে মৌলিভিরস্য পাদৌ || ১৮-৪১||
মণৌ মহানীল ইতি প্রভাবাদল্পপ্রমাণেঽপি যথা ন মিথ্যা |
শব্দো মহারাজ ইতি প্রতীতস্তথৈব তস্মিন্যুয়ুজেঽর্ভকেঽপি || ১৮-৪২||
পর্যন্তসংচারিতচামরস্য কপোললোলোভয়কাকপক্ষাৎ |
তস্যাননাদুচ্চরিতো বিবাদশ্চচাল বেলাস্বপি নার্ণবানাম্ || ১৮-৪৩||
নির্বৃত্তজাম্বূনদপট্টশোভে ন্যস্তং ললাটে তিলকং দধানঃ |
তেনৈব শূন্যান্যরিসুন্দরীণাং মুখানি স স্মেরমুখশ্চকার || ১৮-৪৪||
শিরীষপুষ্পাধিকসৌকুমার্যঃ খেদং ন যায়াদপি ভূষণেন |
নিতান্তগুর্বীমপি সোঽনুভাবাদ্ধুরং ধরিত্র্যা বিভরাংবভূব || ১৮-৪৫||
ন্যস্তাক্ষরামক্ষরভূমিকায়াং কার্ত্স্ন্যেন গৃহ্ণাতি লিপিং ন যাবদ্ |
সর্বাণি তাবচ্ছ্রুতবৃদ্ধয়োগাৎফলান্যুপায়ুঙ্ক্ত স দণ্ডনীতেঃ || ১৮-৪৬||
উরস্যপর্যাপ্তনিবেশভাগা প্রৌঢীভবিষ্যন্তমুদীক্ষমাণা |
সংজাতলজ্জেব তমালপত্রচ্ছায়াছলেনোপজুগূহ লক্ষ্মীঃ || ১৮-৪৭||
অনশ্নুবানেন যুগোপমানমবদ্ধমৌর্বীকিণলাঞ্ছনেন |
অস্পৃষ্টখড্গৎসরুণাপি চাসীদ্রক্ষাবতী তস্য ভুজেন ভূমিঃ || ১৮-৪৮||
ন কেবলং গচ্ছতি তস্য কালে যয়ুঃ শরীরাবয়বা বিবৃদ্ধিম্ |
বংশ্যা গুণাঃ খল্বপি লোককান্তাঃ প্রারম্ভসূক্ষ্মাঃ প্রথিমানমাপুঃ || ১৮-৪৯||
স পূর্বজন্মান্তরদৃষ্টপারাঃ স্মরন্নিবাক্লেশকরো গুরূণাম্ |
তিস্রস্ত্রিবর্গাধিগমস্য মূলং জগ্রাহ বিদ্যাঃ প্রকৃতীশ্চ পিত্র্যাঃ || ১৮-৫০||
ব্যূহ্যঃ স্থিতঃ কিংচিদিবোত্তরার্ধমুন্নদ্ধচূডোঽঞ্চিতসব্যজানুঃ |
আকর্ণমাকৃষ্টসবাণধন্বা ব্যরোচতাস্ত্রে স বিনীয়মানঃ || ১৮-৫১||
অথ মধু বনিতানাং নেত্রনির্বেশনীয়-
মনসিজতরুপুষ্পং রাগবন্ধপ্রবালম্ |
অকৃতকবিধি সর্বাঙ্গীণমাকল্পজাতং
বিলসিতপদমাদ্যং যৌবনং স প্রপেদে || ১৮-৫২||
প্রতিকৃতিরচনাভ্যো দূতিসংদর্শিতাভ্যঃ
সমধিকতররূপাঃ শুদ্ধসংতানকামৈঃ |
অধিবিবিদুরমাত্যৈরাহৃতাস্তস্য যূনঃ
প্রথমপরিগৃহীতে শ্রীভুবৌ রাজকন্যাঃ || ১৮-৫৩||

ইতি শ্রীরঘুবংশে মহাকাব্যে কবিশ্রীকালিদাস-
কৃতৌ বংশানুক্রমো নামাষ্টদশঃ সর্গঃ ||