রঘুবংশং সর্গ ১৯ – অগ্নিবর্ণশৃঙ্গার

|| কালিদাসকৃতম্ রঘুবংশম্ সর্গ ১৯ অগ্নিবর্ণশৃঙ্গার ||

অগ্নিবর্ণমভিষিচ্য রাঘবঃ স্বে পদে তনয়মগ্নিতেজসম্ |
শিশ্রিয়ে শ্রুতবতামপশ্চিমঃ পশ্চিমে বয়সি নৈমিষং বশী || ১৯-১||
তত্র তীর্থসলিলেন দীর্ঘিকাস্তল্পমন্তরিতভূমিভিঃ কুশৈঃ |
সৌধবাসমুটজেন বিস্মৃতঃ সংচিকায় ফলনিঃস্পৃহস্তপঃ || ১৯-২||
লব্ধপালনবিধৌ ন তৎসুতঃ খেদমাপ গুরুণা হি মেদিনী |
ভোক্তুমেব ভুজনির্জিতদ্বিষা ন প্রসাধয়িতুমস্য কল্পিতা || ১৯-৩||
সোঽধিকারমভিকঃ কুলোচিতং কাশ্চন স্বয়মবর্তয়ৎসমাঃ |
সংনিবেশ্য সচিবেষ্বতঃপরং স্ত্রীবিধেয়নবয়ৌবনোঽভবৎ || ১৯-৪||
কামিনীসহচরস্য কামিনস্তস্য বেশ্মসু মৃদঙ্গনাদিষু |
ঋদ্ধিমন্তমধিকর্দ্ধিরুত্তরঃ পূর্বমুৎসবমপোহদুৎসবঃ || ১৯-৫||
ইন্দ্রিয়ার্থপরিশূন্যমক্ষমঃ সোঢুমেকমপি স ক্ষণান্তরম্ |
অন্তরেব বিহরন্দিবানিশং ন ব্যপৈক্ষত সমুৎসুকাঃ প্রজাঃ || ১৯-৬||
গৌরবাদ্যদপি জাতু মন্ত্রিণাং দর্শনং প্রকৃতিকাঙ্ক্ষিতং দদৌ |
তদ্গবাক্ষবিবরাবলম্বিনা কেবলেন চরণেন কল্পিতম্ || ১৯-৭||
তং কৃতপ্রণতয়োঽনুজীবিনঃ কোমলাত্মনখরাগরূষিতম্ |
ভেজিরে নবদিবাকরাতপস্পৃষ্টপঙ্কজতুলাধিরোহণম্ || ১৯-৮||
যৌবনোন্নতবিলাসিনীস্তনক্ষোভলোলকমলাশ্চ দীর্ঘিকাঃ |
গূঢমোহনগৃহাস্তদম্বুভিঃ স ব্যগাহত বিগাঢমন্মথঃ || ১৯-৯||
তত্র সেকহৃতলোচনাঞ্জনৈর্ধৌতরাগপরিপাটলাধরৈঃ |
অঙ্গনাস্তমধিকং ব্যলোভয়ন্নর্পিতপ্রকৃতকান্তিভির্মুখৈঃ || ১৯-১০||
ঘ্রাণকান্তমধুগন্ধকর্ষিণীঃ পানভূমিরচনাঃ প্রিয়াসখঃ |
অভ্যপদ্যত স বাসিতাসখঃ পুষ্পিতাঃ কমলিনীরিব দ্বিপঃ || ১৯-১১||
সাতিরেকমদকারণং রহস্তেন দত্তমভিলেষুরঙ্গনাঃ |
তাভিরপ্যুপহৃতং মুখাসবং সোঽপিবদ্বকুলতুল্যদোহদঃ || ১৯-১২||
অঙ্কমঙ্কপরিবর্তনোচিতে তস্য নিন্যতুরশূন্যতামুভে |
বল্লকী চ হৃদয়ংগমক্ষমা বল্গুবাগপি চ বামলোচনা || ১৯-১৩||
স স্বয়ং প্রহতপুষ্করঃ কৃতী লোলমাল্যবলয়ো হরন্মনঃ |
নর্তকীরভিনয়াতিলঙ্ঘিনীঃ পার্শ্ববর্তিষু গুরুষ্বলজ্জয়ৎ || ১৯-১৪||
চারু নৃত্যবিগমে স তন্মুখং স্বেদভিন্নতিলকং পরিশ্রমাৎ |
প্রেমদত্তবদনানিলঃ পিবন্নত্যজীবদমরালকেশ্বরৌ || ১৯-১৫||
তস্য সাবরণদৃষ্টসংধয়ঃ কাম্যবস্তুষু নবেষু সঙ্গিনঃ |
বল্লভাভিরুপসৃত্য চক্রিরে সামিভুক্তবিষয়াঃ সমাগমা || ১৯-১৬||
অঙ্গুলীকিসলয়াগ্রতর্জনং ভ্রূবিভঙ্গকুটিলং চ বীক্ষিতম্ |
মেখলাভিরসকৃচ্চ বন্ধনং বঞ্চয়ন্প্রণয়িনীরবাপ সঃ || ১৯-১৭||
তেন দূতিবিদিতং নিষেদুষা পৃষ্ঠতঃ সুরতবাররাত্রিষু |
শুশ্রুবে প্রিয়জনস্য কাতরং বিপ্রলম্ভপরিশঙ্কিনো বচঃ || ১৯-১৮||
লৌল্যমেত্য গৃহিণীপরিগ্রহান্নর্তকীষ্বসুলভাসু তদ্বপুঃ |
বর্ততে স্ম স কথংচিদালিখন্নঙ্গুলীক্ষরণসন্নবর্তিকঃ || ১৯-১৯||
প্রেমগর্বিতবিপক্ষমৎসরাদায়তাশ্চ মদনান্মহীক্ষিতম্ |
নিন্যুরুৎসববিধিচ্ছলেন তং দেব্য উজ্ঝিতরুষঃ কৃতার্থতাম্ || ১৯-২০||
প্রাতরেত্য পরিভোগশোভিনা দর্শনেন কৃতখণ্ডনব্যথাঃ |
প্রাঞ্জলিঃ প্রণয়িনীঃ প্রসাদয়ন্সোঽদুনোৎপ্রণয়মন্থরঃ পুনঃ || ১৯-২১||
স্বপ্নকীর্তিতবিপক্ষমঙ্গনাঃ প্রত্যভৈৎসুরবদন্ত্য এব তম্ |
প্রচ্ছদান্তগলিতাশ্রুবিন্দুভিঃ ক্রোধভিন্নবলয়ৈর্বিবর্তনৈঃ || ১৯-২২||
কৢপ্তপুষ্পশয়নাঁল্লতাগৃহানেত্য দূতিকৃতমার্গদর্শনঃ |
অন্বভূৎপরিজনাঙ্গনারতং সোঽবরোধভয়বেপথূত্তরম্ || ১৯-২৩||
নাম বল্লভজনস্য তে ময়া প্রাপ্য ভাগ্যমপি তস্য কাঙ্ক্ষ্যতে |
লোলুপং ননু মনো মমেতি তং গোত্রবিস্খলিতমূচুরঙ্গনাঃ || ১৯-২৪||
চূর্ণবভ্রু লুলিতস্রগাকুলং ছিন্নমেখলমলক্তকাঙ্কিতম্ |
উত্থিতস্য শয়নং বিলাসিনস্তস্য বিভ্রমরতান্যপাবৃণোৎ || ১৯-২৫||
স স্বয়ং চরণরাগমাদধে যোষিতাং ন চ তথা সমাহিতঃ |
লোভ্যমাননয়নঃ শ্লথাংশুকৈর্মেখলাগুণপদৈর্নিতম্বিভিঃ || ১৯-২৬||
চুম্বনে বিপরিবর্তিতাধরং হস্তরোধি রশনাবিঘট্টনে |
বিঘ্নিতেচ্ছমপি তস্য সর্বতো মন্মথেন্ধনমভূদ্বধূরতম্ || ১৯-২৭||
দর্পণেষু পরিভোগদর্শিনীর্নর্মপূর্বমনুপৃষ্ঠসংস্থিতঃ |
ছায়য়া স্মিতমনোজ্ঞয়া বধূর্হ্রীনিমীলিতমুখীশ্চকার সঃ || ১৯-২৮||
কণ্ঠসক্তমৃদুবাহুবন্ধনং ন্যস্তপাদতলমগ্রপাদয়োঃ |
প্রার্থয়ন্ত শয়নোত্থিতং প্রিয়াস্তং নিশাত্যয়বিসর্গচুম্বনম্ || ১৯-২৯||
প্রেক্ষ্য দর্পণতলস্থমাত্মনো রাজবেষমতিশক্রশোভিনম্ |
পিপ্রিয়ে ন স তথা যথা যুবা ব্যক্তলক্ষ্মপরিভোগমণ্ডনম্ || ১৯-৩০||
মিত্রকৃত্যমপদিশ্য পার্শ্বতঃ প্রস্থিতং তমনবস্থিতং প্রিয়াঃ |
বিদ্ম হে শঠ পলায়নচ্ছলান্যঞ্জসেতি রুরুধুঃ কচগ্রহৈঃ || ১৯-৩১||
তস্য নির্দয়রতিশ্রমালসাঃ কণ্ঠসূত্রমপদিশ্য যোষিতঃ |
অধ্যশেরত বৃহদ্ভুজান্তরং পীবরস্তনবিলুপ্তচন্দনম্ || ১৯-৩২||
সংগমায় নিশি গূঢচারিণং চারদূতিকথিতং পুরোগতাঃ |
বঞ্চয়িষ্যসি কুতস্তমোবৃতঃ কামুকেতি চকৃষুস্তমঙ্গনাঃ || ১৯-৩৩||
যোষিতামুডুপতেরিবার্চিষাং স্পর্শনিবৃতিমসাববাপ্নুবন্ |
আরুরোহ কুমুদাকরোপমাং রাত্রিজাগরপরো দিবাশয়ঃ || ১৯-৩৪||
বেণুনা দশনপীডিতাধরা বীণয়া নখপদাঙ্কিতোরবঃ |
শিল্পকার্য উভয়েন বেজিতাস্তং বিজিহ্মনয়না ব্যলোভয়ন্ || ১৯-৩৫||
অঙ্গসত্ত্ববচনাশ্রয়ং মিথঃ স্ত্রীষু নৃত্যমুপধায় দর্শয়ন্ |
স প্রয়োগনিপুণৈঃ প্রয়োক্তৃভিঃ সংজঘর্ষ সহ মিত্রসংনিধৌ || ১৯-৩৬||
অংসলম্বিকুটজার্জুনস্রজস্তস্য নীপরজসাঙ্গরাগিণঃ |
প্রাবৃষি প্রমদবর্হিণেষ্বভূৎকৃত্রিমাদ্রিষু বিহারবিভ্রমঃ || ১৯-৩৭||
বিগ্রহাচ্চ শয়নে পরাঙ্মুখীর্নানুনেতুমবলাঃ স তৎবরে |
আচকাঙ্ক্ষ ঘনশব্দবিক্লবাস্তা বিবৃত্য বিশতীর্ভুজান্তরম্ || ১৯-৩৮||
কার্তিকীষু সবিতানহর্ম্যভাগ্যামিনীষু ললিতাঙ্গনাসখঃ |
অন্বভুঙ্ক্ত সুরতশ্রমাপহাং মেঘমুক্তবিশদাং স চন্দ্রিকাম্ || ১৯-৩৯||
সৈকতং স সরয়ূং বিবৃণ্বতীং শ্রোণিবিম্বমিব হংসমেখলম্ |
স্বপ্রিয়াবিলসিতানুকারিণীং সৌধজালবিবরৈর্ব্যলোকয়ৎ || ১৯-৪০||
মর্মরৈরগুরুধূপগন্ধিভির্ব্যক্তহেমরশনৈস্তমেকতঃ |
জহ্রুরাগ্রথনমোক্ষলোলুপং হৈমনৈর্নিবসনৈঃ সুমধ্যমাঃ || ১৯-৪১||
অর্পিতস্তিমিতদীপদৃষ্টয়ো গর্ভবেশ্মসু নিবাতকুক্ষিষু |
তস্য সর্বসুরতান্তরক্ষমাঃ সাক্ষিতাং শিশিররাত্রয়ো যয়ুঃ || ১৯-৪২||
দক্ষিণেন পবনেন সংভৃতং প্রেক্ষ্য চূতকুসুমং সপল্লবম্ |
অন্বনৈষুরবধূতবিগ্রহাস্তং দুরুৎসহবিয়োগমঙ্গনাঃ || ১৯-৪৩||
তাঃ স্বমঙ্কমধিরোপ্য দোলয়া প্রেঙ্খয়ন্পরিজনাপবিদ্ধয়া |
মুক্তরজ্জু নিবিডং ভয়চ্ছলাৎকণ্ঠবন্ধনমবাপ বাহুভিঃ || ১৯-৪৪||
তং পয়োধরনিষিক্তচন্দনৈর্মৌক্তিকগ্রথিতচারুভূষণৈঃ |
গ্রীষ্মবেষবিধিভিঃ সিষেবিরে শ্রোণিলম্বিমণিমেখলৈঃ প্রিয়াঃ || ১৯-৪৫||
যৎস লগ্নসহকারমাসবং রক্তপাটলসমাগমং পপৌ |
তেন তস্য মধুনির্গমাৎকৃশশ্চিত্তয়োনিরভবৎপুনর্নবঃ || ১৯-৪৬||
এবমিন্দ্রিয়সুখানি নির্বিশন্নন্যকার্যবিমুখঃ স পার্থিবঃ |
আত্মলক্ষণনিবেদিতানৃতূনত্যবাহয়দনঙ্গবাহিতঃ || ১৯-৪৭||
তং প্রমত্তমপি ন প্রভাবতঃ শেকুরাক্রমিতুমন্যপার্থিবাঃ |
আময়স্তু রতিরাগসংভবো দক্ষশাপ ইব চন্দ্রমক্ষিণোৎ || ১৯-৪৮||
দৃষ্টদোষমপি তন্ন সোঽত্যজৎসঙ্গবস্তু ভিষজামনাশ্রবঃ |
স্বাদুভিস্তু বিষয়ৈর্হৃতস্ততো দুঃখমিন্দ্রিয়গণো নিবার্যতে || ১৯-৪৯||
তস্য পাণ্ডুবদনাল্পভূষণা সাবলম্বগমনা মৃদুস্বনা |
রাজয়ক্ষ্মপরিহানিরায়য়ৌ কাময়ানসমবস্থয়া তুলাম্ || ১৯-৫০||
ব্যোম পশ্চিমকলাস্থিতেন্দু বা পঙ্কশেষমিব ঘর্মপল্বলম্ |
রাজ্ঞি তৎকুলমভূৎক্ষয়াতুরে বামনার্চিরিব দীপভাজনম্ || ১৯-৫১||
বাঢমেষ দিবসেষু পার্থিবঃ কর্ম সাধয়তি পুত্রজন্মনে |
ইত্যদর্শিতরুজোঽস্য মন্ত্রিণঃ শশ্বদূচুরঘশঙ্কিনীঃ প্রজাঃ || ১৯-৫২||
স ৎবনেকবনিতাসখোঽপি সন্পাবনীমনবলোক্য সংততিম্ |
বৈদ্যয়ত্নপরিভাবিনং গদং ন প্রদীপ ইব বায়ুমত্যগাৎ || ১৯-৫৩||
তং গৃহোপবনএব সংগতাঃ পশ্চিমক্রতুবিদা পুরোধসা |
রোগশান্তিমপদিশ্য মন্ত্রিণঃ সংভৃতে শিখিনি গূঢমাদধুঃ || ১৯-৫৪||
তৈঃ কৃতপ্রকৃতিমুখ্যসংগ্রহৈরাশু তস্য সহধর্মচারিণী |
সাধু দৃষ্টশুভগর্ভলক্ষণা প্রত্যপদ্যত নরাধিপশ্রিয়ম্ || ১৯-৫৫||
তস্যাস্তথাবিধনরেন্দ্রবিপত্তিশোকা-
দুষ্ণৈর্বিলোচনজলৈঃ প্রথমাভিতপ্তঃ |
নির্বাপিতঃ কনককুম্ভমুখোজ্ঝিতেন
বংশাভিষেকবিধিনা শিশিরেণ গর্ভঃ || ১৯-৫৬||
তং ভাবার্থং প্রসবসময়াকাঙ্ক্ষিণীনাং প্রজানা-
মন্তর্গূঢং ক্ষিতিরিব নভোবীজমুষ্টিং দধানা |
মৌলৈঃ সার্ধং স্থবিরসচিবৈর্হেমসিংহাসনস্থা
রাজ্ঞী রাজ্যং বিধিবদশিষদ্ভর্তুরব্যাহতাজ্ঞা || ১৯-৫৭||

ইতি শ্রীরঘুবংশে মহাকাব্যে কবিশ্রীকালিদাস-
কৃতাবগ্নিবর্ণশৃঙ্গারো নামৈকোনবিংশঃ সর্গঃ ||