রঘুবংশং সর্গ ০৮

| কালিদাসকৃতং রঘুবংশম্ সর্গ ৮ ||

অথ তস্য বিবাহকৌতুকং ললিতং বিভ্রত এব পার্থিবঃ |
বসুধামপি হস্তগামিনীমকরোদিন্দুমতীমিবাপরাম্ || ৮-১||
দুরিতৈরপি কর্তুমাত্মসাৎপ্রয়তন্তে নৃপসূনবো হি যৎ |
তদুপস্থিতমগ্রহীদজঃ পিতুরাজ্ঞেতি ন ভোগতৃষ্ণয়া || ৮-২||
অনুভূয় বসিষ্ঠসংভৃতৈঃ সলিলৈস্তেন সহাভিষেচনম্ |
বিশদোচ্ছ্বসিতেন মেদিনী কথয়ামাস কৃতার্থতামিব || ৮-৩||
স বভূব দুরাসদঃ পরৈর্গুরুণাঽথর্ববিদা কৃতক্রিয়ঃ |
পবনাগ্নিসমাগমো হ্যয়ং সহিতং ব্রহ্ম যদস্ত্রতেজসা || ৮-৪||
রঘুমেব নিবৃত্তয়ৌবনং তমমন্যন্ত নবেশ্বরং প্রজাঃ |
স হি তস্য ন কেবলাং শ্রিয়ং প্রতিপেদে সকলান্গুণানপি || ৮-৫||
অধিকং শুশুভে শুভংযুনা দ্বিতয়েন দ্বয়মেব সংগতম্ |
পদমৃদ্ধমজেন পৈতৃকং বিনয়েনাস্য নবং চ যৌবনম্ || ৮-৬||
সদয়ং বুভুজে মহাভুজঃ সহসোদ্বেগমিয়ং ব্রজেদিতি |
অচিরোপনতাং স মেদিনীং নবপাণিগ্রহণাং বধূমিব || ৮-৭||
অহমেব মতো মহীপতেরিতি সর্বঃ প্রকৃতিষ্বচিন্তয়ৎ |
উদধেরিব নিম্নগাশতেষ্বভবন্নাস্য বিমাননা ক্বচিৎ || ৮-৮||
ন খরো ন চ ভূয়সা মৃদুঃ পবমানঃ পৃথিবীরুহানিব |
স পুরস্কৃতমধ্যমক্রমো নময়ামাস নৃপাননুদ্ধরন্ || ৮-৯||
অথ বীক্ষ্য রঘুঃ প্রতিষ্ঠিতং প্রকৃতিষ্বাত্মজমাত্মবত্তয়া |
বিষয়েষু বিনাশধর্মসু ত্রিদিবস্থেষ্বপি নিঃস্পৃহোঽভবৎ || ৮-১০||
গুণবৎসুতরোপিতশ্রিয়ঃ পরিণামে হি দিলীপবংশজাঃ |
পদবীং তরুবল্কবাসসাং প্রয়তাঃ সংযমিনাং প্রপেদিরে || ৮-১১||
তমরণ্যসমাশ্রয়োন্মুখং শিরসা বেষ্টনশোভিনা সুতঃ |
পিতরং প্রণিপত্য পাদয়োরপরিত্যাগময়াচতাত্মনঃ || ৮-১২||
রঘুরশ্রুমুখস্য তস্য তৎকৃতবানীপ্সিতমাত্মজপ্রিয়ঃ |
ন তু সর্প ইব ৎবচং পুনঃ প্রতিপেদে ব্যপবর্জিতাং শ্রিয়ম্ || ৮-১৩||
স কিলাশ্রমমন্ত্যমাশ্রিতো নিবসন্নাবসথে পুরাদ্বহিঃ |
সমুপাস্যত পুত্রভোগ্যয়া স্নুষয়েবাবিকৃতেন্দ্রিয়ঃ শ্রিয়া || ৮-১৪||
প্রশমস্থিতপূর্বপার্থিবং কুলমভ্যদ্যতনূতনেশ্বরম্ |
নভসা নিভৃতেন্দুনা তুলামুদিতার্কেণ সমারুরোহ তৎ || ৮-১৫||
যতিপার্থিবলিঙ্গধারিণৌ দদৃশাতে রঘুরাঘবৌ জনৈঃ |
অপবর্গমহোদয়ার্থয়োর্ভুবমংশাবিব ধর্ময়োর্গতৌ || ৮-১৬||
অজিতাধিগমায় মন্ত্রিভির্যুয়ুজে নীতিবিশারদৈরজঃ |
অনুপায়িপদোপপ্রাপ্তয়ে রঘুরাপ্তৈঃ সমিয়ায় যোগিভিঃ || ৮-১৭||
নৃপতিঃ প্রকৃতীরবেক্ষিতুং ব্যবহারাসনমাদদে যুবা |
পরিচেতুমুপাংশু ধারণাং কুশপূতং প্রবয়াস্তু বিষ্টরম্ || ৮-১৮||
অনয়ৎপ্রভুশক্তিসংপদা বশমেকো নৃপতীননন্তরান্ |
অপরঃ প্রণিধানয়োগ্যয়া মরুতঃ পঞ্চ শরীরগোচরান্ || ৮-১৯||
অকরোদচিরেশ্বরঃ ক্ষিতৌ দ্বিষদারম্ভফলানি ভস্মসাৎ |
ইতরো দহনে স্বকর্মণাং ববৃতে জ্ঞানময়েন বহ্নিনা || ৮-২০||
পণবন্ধমুখান্গুণানজঃ ষডুপায়ুঙ্ক্ত সমীক্ষ্য তৎফলম্ |
রঘুরপ্যজয়ৎগুণত্রয়ং প্রকৃতিস্থং সমলোষ্টকাঞ্চনঃ || ৮-২১||
ন নবঃ প্রভুরা ফলোদয়াৎস্থিরকর্মা বিররাম কর্মণঃ |
ন চ যোগবিধের্নবেতরঃ স্থিরধীরা পরমাত্মদর্শনাৎ || ৮-২২||
ইতি শত্রুষু চেন্দ্রিয়েষু চ প্রতিষিদ্ধপ্রসরেষু জাগ্রতৌ |
প্রসিতাবুদয়াপবর্গয়োরুভয়ীং সিদ্ধিমুভাববাপতুঃ || ৮-২৩||
অথ কাশ্চিদজব্যপেক্ষয়া গময়িৎবা সমদর্শনঃ সমাঃ |
তমসঃ পরমাপদব্যয়ং পুরুষং যোগসমাধিনা রঘুঃ || ৮-২৪||
শ্রুতদেহবিসর্জনঃ পিতুশ্চিরমশ্রূণি বিমুচ্য রাঘবঃ |
বিদধে বিধিমস্য নৈষ্ঠিকং যতিভিঃ সার্ধমনগ্নিরগ্নিচিৎ || ৮-২৫||
অকরোৎস তদৌর্ধ্বদৈহিকং পিতৃভক্ত্যা পিতৃকার্যকল্পবিৎ |
ন হি তেন পথা তনুত্যজস্তনয়াবর্জিতপিণ্ডকাঙ্ক্ষিণঃ || ৮-২৬||
স পরার্ধ্যগতেরশোচ্যতাং পিতুরুদ্দিশ্য সদর্থবেদিভিঃ |
শমিতাধিরধিজ্যকার্মুকঃ কৃতবানপ্রতিশাসনং জগৎ || ৮-২৭||
ক্ষিতিরিন্দুমতী চ ভামিনী পতিমাসাদ্য তমগ্র্যপৌরুষম্ |
প্রথমা বহুরত্নসূরভূদপরা বীরমজীজনৎসুতম্ || ৮-২৮||
দশরশ্মিশতোপমদ্যুতিং যশসা দিক্ষু দশস্বপি শ্রুতম্ |
দশপূর্বরথং যমাখ্যয়া দশকণ্ঠারিগুরুং বিদুর্বুধাঃ || ৮-২৯||
ঋষিদেবগণস্বধাভুজাং শ্রুতয়াগপ্রসবৈঃ স পার্থিবঃ |
অনৃণৎবমুপেয়িবান্বভৌ পরিধের্মুক্ত ইবোষ্ণদীধিতিঃ || ৮-৩০||
বলমার্তভয়োপশান্তয়ে বিদুষাং সৎকৃতয়ে বহু শ্রুতম্ |
বসু তস্য বিভোর্ন কেবলং গুণবত্তাপি পরপ্রয়োজনা || ৮-৩১||
স কদাচিদবেক্ষিতপ্রজঃ সহ দেব্যা বিজহার সুপ্রজাঃ |
নগরোপবনে শচীসখো মরুতাং পালয়িতেব নন্দনে || ৮-৩২||
অথ রোধসি দক্ষিণাদধেঃ শ্রিতগোকর্ণনিকেতমীশ্বরম্ |
উপবীণয়িতুং যয়ৌ রবেরুদয়াবৃত্তিপথেন নারদঃ || ৮-৩৩||
কুসুমৈর্গ্রথিতামপার্থিবৈঃ স্রজমাতোদ্যশিরোনিবেশিতাম্ |
অহরৎকিল তস্য বেগবানধিবাসস্পৃহয়েব মারুতঃ || ৮-৩৪||
ভ্রমরৈঃ কুসুমানুসারিভিঃ পরিকীর্ণা পরিবাদিনী মুনেঃ |
দদৃশে পবনাপলেপজং সৃজতী বাষ্পমিবাঞ্জনাবিলম্ || ৮-৩৫||
অভিভূয় বিভূতিমার্তবীং মধুগন্ধাতিশয়েন বীরুধাম্ |
নৃপতেরমরস্রগাপ সা দয়িতোরুস্তনকোটিসুস্থিতীম্ || ৮-৩৬||
ক্ষণমাত্রসখীং সুজাতয়োঃ স্তনয়োস্তামবলোক্য বিহ্বলা |
নিমিমীল নরোত্তমপ্রিয়া হৃতচন্দ্রা তমসেব কৌমুদী || ৮-৩৭||
বপুষা করণোজ্ঝিতেন সা নিপতন্তী পতিমপ্যপাতয়ৎ |
ননু তৈলনিষেকবিন্দুনা সহ দীপার্চিরুপৈতি মেদিনীম্ || ৮-৩৮||
উভয়োরপি পার্শ্ববর্তিনাং তুমুলেনার্তরবেণ বেজিতাঃ |
বিহগাঃ কমলাকরালয়াঃ সমদুঃখা ইব তত্র চুক্রুশুঃ || ৮-৩৯||
নৃপতের্ব্যজনাদিভিস্তমো নুনুদে সা তু তথৈব সংস্থিতা |
প্রতিকারবিধানমায়ুষঃ সতি শেষে হি ফলায় কল্পতে || ৮-৪০||
প্রতিয়োজয়িতব্যবল্লকীসমবস্থামথ সত্ত্ববিপ্লবাৎ |
স নিনায় নিতান্তবৎসলঃ পরিগৃহ্যোচিতমঙ্কমঙ্গনাম্ || ৮-৪১||
পতিরঙ্কনিষণ্ণয়া তয়া করণাপায়বিভিন্নবর্ণয়া |
সমলক্ষ্যত বিভ্রদাবিলাং মৃগলেখামুষসীব চন্দ্রমাঃ || ৮-৪২||
বিললাপ স বাষ্পগদ্গদং সহজামপ্যপহায় ধীরতাম্ |
অভিতপ্তময়োঽপি মার্দবং ভজতে কৈব কথা শরীরিষু || ৮-৪৩||
কুসুমান্যপি গাত্রসংগমাৎপ্রভবন্ত্যায়ুরপোহিতুং যদি |
ন ভবিষ্যতি হন্ত সাধনং কিমিবান্যৎপ্রহরিষ্যতো বিধেঃ || ৮-৪৪||
অথবা মৃদু বস্তু হিংসিতুং মৃদুনৈবারভতে প্রজান্তকঃ |
হিমসেকবিপত্তিরত্র মে নলিনী পূর্বনিদর্শনং মতা || ৮-৪৫||
স্রগিয়ং যদি জীবিতাপহা হৃদয়ে কিং নিহিতা ন হন্তি মাম্ |
বিষমপ্যমৃতং ক্বচিদ্ভবেদমৃতং বা বিষমীশ্বরেচ্ছয়া || ৮-৪৬||
অথবা মম ভাগ্যবিপ্লবাদশনিঃ কল্পিত এব বেধসা |
যদনেন তরুর্ন পাতিতঃ ক্ষপিতা তদ্বিটপাশ্রিতা লতা || ৮-৪৭||
কৃতবত্যসি নাবধীরণামপরাদ্ধেঽপি যদা চিরং ময়ি |
কথমেকপদে নিরাগসং জনমাভাষ্যমিমং ন মন্যসে || ৮-৪৮||
ধ্রুবমস্মি শঠঃ শুচিস্মিতে বিদিতঃ কৈতববৎসলস্তব |
পরলোকমসংনিবৃত্তয়ে যদনাপৃচ্ছ্য গতাসি মামিতঃ || ৮-৪৯||
দয়িতাং যদি তাবদন্বগাদ্বিনিবৃত্তং কিমিদং তয়া বিনা |
সহতাং হতজীবিতং মম প্রবলামাত্মকৃতেন বেদনাম্ || ৮-৫০||
সুরতশ্রমসংভৃতো মুখে ধ্রিয়তে স্বেদলবোদ্গমোঽপি তে |
অথ চাস্তমিতা ৎবমাত্মনা ধিগিমাং দেহভৃতামসারতাম্ || ৮-৫১||
মনসাপি ন বিপ্রিয়ং ময়া কৃতপূর্বং তব কিং জহাসি মাম্ |
ননু শব্দপতিঃ ক্ষিতেরহং ৎবয়ি মে ভাবনিবন্ধনা রতিঃ || ৮-৫২||
কুসুমোৎখচিতান্বলীভৃতশ্চলয়ন্ভৃঙ্গরুচস্তবালকান্ |
করভোরু করোতি মারুতস্ত্বদুপাবর্তনশঙ্কি মে মনঃ || ৮-৫৩||
তদপোহিতুমর্হসি প্রিয়ে প্রতিবোধেন বিষাদমাশু মে |
জ্বলিতেন গুহাগতং তমস্তুহিনাদ্রেরিব নক্তমোষধিঃ || ৮-৫৪||
ইদমুচ্ছ্বসিতালকং মুখং তব বিশ্রান্তকথং দুনোতি মাম্ |
নিশি সুপ্তমিবৈকপঙ্কজং বিরতাভ্যন্তরষট্পদস্বনম্ || ৮-৫৫||
শশিনং পুনরেতি শর্বরী দয়িতা দ্বন্দ্বচরং পতত্রিণম্ |
ইতি তৌ বিরহান্তরক্ষমৌ কথমত্যন্তগতা ন মাং দহেঃ || ৮-৫৬||
নবপল্লবসংস্তরেঽপি তে মৃদু দূয়েত যদঙ্গমর্পিতম্ |
তদিদং বিষহিষ্যতে কথং বদ বামোরু চিতাধিরোহণম্ || ৮-৫৭||
ইয়মপ্রতিবোধশায়িনীং রশনা ৎবাং প্রথমা রহঃসখী |
গতিবিভ্রমসাদনীরবা ন শুচা নানু মৃতেব লক্ষ্যতে || ৮-৫৮||
কলমন্যভৃতাসু ভাসিতং কলহংসীষু মদালসং গতম্ |
পৃষতীষু বিলোলমীক্ষিতং পবনাধূতলতাসু বিভ্রমাঃ || ৮-৫৯||
ত্রিদিবোৎসুকয়াপ্যবেক্ষ্য মাং নিহিতাঃ সত্যমমী গুণাস্ত্বয়া |
বিরহে তব মে গুরুব্যথং হৃদয়ং ন ৎববলম্বিতুং ক্ষমাঃ || ৮-৬০||
মিথুনং পরিকল্পিতং ৎবয়া সহকারঃ ফলিনী চ নন্বিমৌ |
অবিধায় বিবাহসৎক্রিয়ামনয়োর্গম্যত ইত্যসাংপ্রতম্ || ৮-৬১||
কুসুমং কৃতদোহদস্ত্বয়া যদশোকোঽযমুদীরয়িষ্যতি |
অলকাভরণং কথং নু তত্তব নেষ্যামি নিবাপমাল্যতাম্ || ৮-৬২||
স্মরতেব সশব্দনূপুরং চরণানুগ্রহমন্যদুর্লভম্ |
অমুনা কুসুমাশ্রুবর্ষিণা ৎবমশোকেন সুগাত্রি শোচ্যসে || ৮-৬৩||
তব নিঃশ্বসিতানুকারিভির্বকুলৈরর্ধচিতাং সমং ময়া |
অসমাপ্য বিলাসমেখলাং কিমিদং কিন্নরকণ্ঠি সুপ্যতে || ৮-৬৪||
সমদুঃখসুখঃ সখীজনঃ প্রতিপচ্চন্দ্রনিভোঽযমাত্মজঃ |
অহমেকরসস্তথাপি তে ব্যবসায়ঃ প্রতিপত্তিনিষ্ঠুরঃ || ৮-৬৫||
ধৃতিরস্তমিতা রতিশ্চ্যুতা বিরতং গেয়মৃতুর্নিরুৎসবঃ |
গতমাভরণপ্রয়োজনং পরিশূন্যং শয়নীয়মদ্য মে || ৮-৬৬||
গৃহিণী সচিবঃ সখী মিথঃ প্রিয়শিষ্যা ললিতে কলাবিধৌ |
করুণাবিমুখেন মৃত্যুনা হরতা ৎবাং বদ কিং ন মে হৃতম্ || ৮-৬৭||
মদিরাক্ষি মদাননার্পিতং মধু পীৎবা রসবৎকথং নু মে |
অনুপাস্যসি বাষ্পদূষিতং পরলোকোপনতং জলাঞ্জলিম্ || ৮-৬৮||
বিভবেঽপি সতি ৎবয়া বিনা সুখমেতাবদজস্য গণ্যতাম্ |
অহৃতস্য বিলোভনান্তরৈর্মম সর্বে বিষয়াস্ত্বদাশ্রয়াঃ || ৮-৬৯||
বিলপন্নিতি কোসলাধিপঃ করুণার্থগ্রথিতং প্রিয়াং প্রতি |
অকরোৎপৃথিবীরুহানপি স্রুতশাখারসবাষ্পদূষিতান্ || ৮-৭০||
অথ তস্য কথংচিদঙ্কতঃ স্বজনস্তামপনীয় সুন্দরীম্ |
বিসসর্জ তদন্ত্যমণ্ডনামনলায়াগুরুচন্দনৈধসে || ৮-৭১||
প্রমদামনু সংস্থিতঃ শুচা নৃপতিঃ সন্নিতি বাচ্যদর্শনাৎ |
ন চকার শরীরমগ্নিসাৎসহ দেব্যা ন তু জীবিতাশয়া || ৮-৭২||
অথ তেন দশাহতঃ পরে গুণশেষামপদিশ্য ভামিনীম্ |
বিদুষা বিধয়ো মহর্দ্ধয়ঃ পুর এবোপবনে সমাপিতাঃ || ৮-৭৩||
স বিবেশ পুরীং তয়া বিনা ক্ষণদাপায়শশাঙ্কদর্শনঃ |
পরিবাহমিবাবলোকয়ন্স্বশুচঃ পৌরবধূমুখাশ্রুষু || ৮-৭৪||
অথ তং সবনায় দীক্ষিতঃ প্রণিধানাদ্গুরুরাশ্রমস্থিতঃ |
অভিষঙ্গজডং বিজজ্ঞিবানিতি শিষ্যেণ কিলান্ববোধয়ৎ || ৮-৭৫||
অসমাপ্তবিধির্যতো মুনিস্তব বিদ্বানপি তাপকারণম্ |
ন ভবন্তমুপস্থিতঃ স্বয়ং প্রকৃতৌ স্থাপয়িতুং পথশ্চ্যুতম্ || ৮-৭৬||
ময়ি তস্য সুবৃত্ত বর্ততে লঘুসংদেশপদা সরস্বতী |
শ্রুণু বিশ্রুতসত্ত্বসার তাং হৃদি চৈনামপধাতুমর্হসি || ৮-৭৭||
পুরুষস্য পদেষ্বজন্মনঃ সমতীতং চ ভবচ্চ ভাবি চ |
স হি নিষ্প্রতিঘেন চক্ষুষা ত্রিতয়ং জ্ঞানময়েন পশ্যতি || ৮-৭৮||
চরতঃ কিল দুশ্চরং তপস্তৃণবিন্দোঃ পরিশঙ্কিতঃ পুরা |
প্রজিঘায় সমাধিভেদিনীং হরিরস্মৈ হরিণীং সুরাঙ্গনাম্ || ৮-৭৯||
স তপঃপ্রতিবন্ধমন্যুনা প্রমুখাবিষ্কৃতচারুবিভ্রমম্ |
অশপদ্ভব মানুষীতি তাং শমবেলাপ্রলয়োর্মিণা ভুবি || ৮-৮০||
ভগবন্পরবানয়ং জনঃ প্রতিকূলাচরিতং ক্ষমস্ব মে |
ইতি চোপনতাং ক্ষিতিস্পৃশং কৃতবানা সুরপুষ্পদর্শনাৎ || ৮-৮১||
ক্রথকৈশিকবংশসংভবা তব ভূৎবা মহিষী চিরায় সা |
উপলব্ধবতী দিবশ্চ্যুতং বিবশা শাপনিবৃত্তিকারণম্ || ৮-৮২||
তদলং তদপায়চিন্তয়া বিপদুৎপত্তিমতামুপস্থিতা |
বসুধেয়মবেক্ষ্যতাং ৎবয়া বসুমত্যা হি নৃপাঃ কলত্রিণঃ || ৮-৮৩||
উদয়ে মদবাচ্যমুজ্ঝতা শ্রুতমাবিষ্কৃতমাত্মবত্ত্বয়া |
মনসস্তদুপস্থিতে জ্বরে পুনরক্লীবতয়া প্রকাশ্যতাম্ || ৮-৮৪||
রুদতা কুত এব সা পুনর্ভবতা নানুমৃতাপি লভ্যতে |
পরলোকজুষাং স্বকর্মভির্গতয়ো ভিন্নপথা হি দেহিনাম্ || ৮-৮৫||
অপশোকমনাঃ কুটুম্বিনীমনুগৃহ্ণীষ্ব নিবাপদত্তিভিঃ |
স্বজনাশ্রু কিলাতিসংততং দহতি প্রেতমিতি প্রচক্ষতে || ৮-৮৬||
মরণং প্রকৃতিঃ শরীরিণাং বিকৃতির্জীবিতমুচ্যতে বুধৈঃ |
ক্ষণমপ্যবতিষ্ঠতে শ্বসন্যদি জন্তুর্ননু লাভবানসৌ || ৮-৮৭||
অবগচ্ছতি মূঢচেতনঃ প্রিয়নাশং হৃদি শল্যমর্পিতম্ |
স্থিরধীস্তু তদেব মন্যতে কুশলদ্বারতয়া সমুদ্ধৃতম্ || ৮-৮৮||
স্বশরীরশরীরিণাবপি শ্রুতসংযোগবিপর্যয়ৌ যদা |
বিরহঃ কিমিবানুতাপয়েদ্বদ বাহ্যৈর্বিষয়ৈর্বিপশ্চিতম্ || ৮-৮৯||
ন পৃথগ্জনবচ্ছুচো বশং বশিনামুত্তম গন্তুমর্হসি |
দ্রুমসানুমতাং কিমন্তরং যদি বায়ৌ দ্বিতয়েঽপি তে চলাঃ || ৮-৯০||
স তথেতি বিনেতুরুদারমতেঃ প্রতিগৄহ্য বচো বিসসর্জ মুনিম্ |
তদলব্ধপদং হৃদি শোকঘনে প্রতিয়াতমিবান্তিকমস্য গুরোঃ || ৮-৯১||
তেনাষ্টৌ পরিগমিতাঃ সমাঃ কথংচিদ্বালৎবাদবিতথসূনৃতেন সূনোঃ |
সাদৃশ্যপ্রতিকৃতিদর্শনৈঃ প্রিয়ায়াঃ স্বপ্নেষু ক্ষণিকসমাগমোৎসবৈশ্চ || ৮-৯২||
তস্য প্রসহ্য হৃদয়ং কিল শোকশঙ্কুঃ
প্লক্ষপ্ররোহ ইব সৌধতলং বিভেদ |
প্রাণান্তহেতুমপি তং ভিষজামসাধ্যং
লাভং প্রিয়ানুগমনে ৎবরয়া স মেনে || ৮-৯৩||
সম্যগ্বিনীতমথ বর্মহরং কুমার-
মাদিশ্য রক্ষণবিধৌ বিধিবৎপ্রজানাম্ |
রোগোপসৃষ্টতনুদুর্বসতিং মুমুক্ষুঃ
প্রায়োপবেশনমতির্নৃপতির্বভূব || ৮-৯৪||
তীর্থে তোয়ব্যতিকরভবে জহ্নুকন্যাসরয়্বো-
র্দেহত্যাগাদমরগণনালেখ্যমাসাদ্য সদ্যঃ |
পূর্বাকারাধিকতররুচা সংগতঃ কান্তয়াসৌ
লীলাগারেষ্বরমত পুনর্নন্দনাভ্যন্তরেষু || ৮-৯৫||

ইতি শ্রীরঘুবংশে মহাকাব্যে কবিশ্রীকালিদাস-
কৃতাবজবিলাপো নামাষ্টমঃ সর্গঃ ||