রঘুবংশং সর্গ ০৯

|| কালিদাসকৃতং রঘুবংশম্ সর্গ ৯ ||

পিতুরনন্তরমুত্তরকোসলান্সমধিগম্য সমাধিজিতেন্দ্রিয়ঃ |
দশরথঃ প্রশশাস মহারথো যমবতামবতাং চ ধুরি স্থিতঃ || ৯ -১||
অধিগতং বিধিবদ্যদপালয়ৎপ্রকৃতিমণ্ডলমাত্মকুলোচিতম্ |
অভবদস্য ততো গুণবত্তরং সনগরং নগরন্ধ্রকরৌজসঃ || ৯ -২||
উভয়মেব বদন্তি মনীষিণঃ সময়বর্ষিতয়া কৃতকর্মণাম্|
বলনিষূদনমর্থপতিং চ তং শ্রমনুদং মনুদণ্ডধরান্বয়ম্ || ৯ -৩||
জনপদে ন গদঃ পদমাদধাবভিভবঃ কুত এব সপত্নজঃ |
ক্ষিতিরভূৎফলবত্যজনন্দনে শমরতেঽমরতেজসি পার্থিবে || ৯ -৪||
দশদিগন্তজিতা রঘুণা যথা শ্রিয়মপুষ্যদজেন ততঃ পরম্ |
তমধিগম্য তথৈব পুনর্বভৌ ন ন মহীনমহীনপরাক্রমম্ || ৯ -৫||
সমতয়া বসুবৃষ্টিবিসর্জনৈনিয়মনাদসতাং চ নরাধিপঃ |
অনুয়য়ৌ যমপুণ্যজনেশ্বরৌ সবরুণাবরুণাগ্রসরং রুচা || ৯ -৬||
ন মৃগয়াভিরতির্ন দুরোদরং ন চ শশিপ্রতিমাভরণং মধু |
তমুদয়ায় ন বা নবয়ৌবনা প্রিয়তমা যতমানমপাহরৎ || ৯ -৭||
ন কৃপণা প্রভবত্যপি বাসবে ন বিতথা পরিহাসকথাস্বপি |
ন চ সপত্নজনেষ্বপি তেন বাগপরুষা পরুষাক্ষরমীরিতা || ৯ -৮||
উঅদয়মস্তময়ং চ রঘূদ্বহাদুভয়মানশিরে বসুধাধিপাঃ |
স হি নিদেশমলঙ্ঘয়তামভূৎসুহৃদয়োহৃদয়ঃ প্রতিগর্জতাম্ || ৯ -৯||
অজয়দেকরথেন স মেদিনীমুদধিনেমিমধিজ্যশরাসনঃ |
জয়মঘোষয়দস্য তু কেবলং গজবতী জবতীব্রহয়া চমূঃ || ৯ -১০||
অবনিমেকরথেন বরূথিনা জিতবতঃ কিল তস্য ধনুর্ভৃতঃ |
বিজয়দুন্দুভিতাং যয়ুরর্ণবা ঘনরবা নরবাহনসংপদঃ || ৯ -১১||
শমিতপক্ষবলঃ শতকোটিনা শিখরিণাং কুলিশেন পুরংদরঃ |
স শরবৃষ্টিমুচা ধনুষা দ্বিষাং স্বনবতা নবতামরসাননঃ || ৯ -১২||
চরণয়োর্নখরাগসমৃদ্ধিভির্মুকুটরত্নমরীচিভিরস্পৃশন্ |
নৃপতয়ঃ শতশো মরুতো যথা শতমখং তমখণ্ডিতপৌরুষম্ || ৯ -১৩||
নিববৃতে স মহার্ণবরোধসঃ সচিবকারিতবালসুতাঞ্জলীন্ |
সমনুকম্প্য সপত্নপরিগ্রহাননলকানলকানবমাং পুরীম্ || ৯ -১৪||
উপগতোঽপি চ মণ্ডলনাভিতামনুদিতান্যসিতাতপবারণঃ |
শ্রিয়মবেক্ষ্য স রন্ধ্রচলামভূদনলসোঽনলসোমসমদ্যুতিঃ || ৯ -১৫||
তমপহায় ককুৎস্থকুলোদ্ভবং পুরুষমাত্মভবং চ পতিব্রতা |
নৃপতিমন্যমসেবত দেবতা সকমলা কমলাঘবমর্থিষু || ৯ -১৬||
তমলভন্ত পতিং পতিদেবতাঃ শিখরিণামিব সাগরমাপগাঃ |
মগধকোসলকেকয়শাসিনাং দুহিতরোঽহিতরোপিতমার্গণম্ || ৯ -১৭||
প্রিয়তমাভিরসৌ তিসৃভির্বভৌ তিসৃভিরেব ভুবং সহ শক্তিভিঃ |
উপগতো বিনিনীষুরিব প্রজা হরিহয়োঽরিহয়োগবিচক্ষণঃ || ৯ -১৮||
স কিল সংযুগমূর্ধ্নি সহায়তাং মঘবতঃ প্রতিপদ্য মহারথঃ |
স্বভুজবীর্যমগাপয়দুচ্ছ্রিতং সুরবধূরবধূতভয়াঃ শরৈঃ || ৯ -১৯||
ক্রতুষু তেন বিসর্জিতমৌলিনা ভুজসমাহৃতদিগ্বসুনা কৃতাঃ |
কনকয়ূপসমুচ্ছ্রয়শোভিনো বিতমসা তমসাসরয়ূতটাঃ || ৯ -২০||
অজিনদণ্ডভৃতং কুশমেখলাং যতগিরং মৃগশৃঙ্গপরিগ্রহাম্ |
অধিবসংস্তনুমধ্বরদীক্ষিতামসমভাসমভাসয়দীশ্বরঃ || ৯ -২১||
অবভৃথপ্রয়তো নিয়তেন্দ্রিয়ঃ সুরসমাজসমাক্রমণোচিতঃ |
নময়তি স্ম স কেবলমুন্নতং বনমুচে নমুচেররয়ে শিরঃ || ৯ -২২||
অসকৃদেকরথেন তরস্বিনা হরিহয়াগ্রসরেণ ধনুর্ভৃতা |
দিনকরাভিমুখা রণরেণবো রুরুধিরে রুধিরেণ সুরদ্বিষাম্ || ৯ -২৩||
অথ সমাববৃতে কুসুমৈর্নবৈস্তমিব সেবিতুমেকনরাধিপম্ |
যমকুবেরজলেশ্বরবজ্রিণাং সমধুরং মধুরঞ্চিতবিক্রমম্ || ৯ -২৪||
জিগমিষুর্ধনদাধ্যুষিতাং দিশং রথয়ুজা পরিবর্তিতবাহনঃ |
দিনমুখানি রবির্হিমনিগ্রহৈর্বিমলয়ন্মলয়ং নগমত্যজৎ || ৯ -২৫||
কুসুমজন্ম ততো নবপল্লবাস্তদনু ষট্পদকোকিলকূজিতম্ |
ইতি যথাক্রমমাবিরভূন্মধুর্দ্রুমবতীমবতীর্য বনস্থলীম্ || ৯ -২৬||
নয়গুণোপচিতামিব ভূপতেঃ সদুপকারফলাং শ্রিয়মর্থিনঃ |
অভিয়য়ুঃ সরসো মধুসংভৃতাং কমলিনীমলিনীরপতত্রিণঃ || ৯ -২৭||
কুসুমমেব ন কেবলমার্তবং নবমশোকতরোঃ স্মরদীপনম্ |
কিসলয়প্রসবোঽপি বিলাসিনাং মদয়িতা দয়িতাশ্রবণার্পিতঃ || ৯ -২৮||
বিরচিতা মধুনোপবনশ্রিয়ামভিনবা ইব পত্রবিশেষকাঃ |
মধুলিহাং মধুদানবিশারদাঃ কুরবকা রবকারণতাং যয়ুঃ || ৯ -২৯||
সুবদনাবদনাসবসংভৃতস্তদনুবাদিগুণঃ কুসুমোদ্গমঃ |
মধুকরৈরকরোন্মধুলোলুপৈর্বকুলমাকুলমায়তপঙ্ক্তিভিঃ || ৯ -৩০||
উপহিতং শিশিরাপগমশ্রিয়া মুকুলজালমশোভত কিংশুকে |
প্রণয়িনীব নখক্ষতমণ্ডনং প্রমদয়া মদয়াপিতলজ্জয়া || ৯ -৩১||
ব্রণগুরুপ্রমদাধরদুঃসহং জঘননির্বিষয়ীকৃতমেখলম্ |
ন খলু তাবদশেষমপোহিতুং রবিরলং বিরলং কৃতবান্হিমম্ || ৯ -৩২||
অভিনয়ান্পরিচেতুমিবোদ্যতা মলয়মারুতকম্পিতপল্লবা |
অমদয়ৎসহকারলতা মনঃ সকলিকা কলিকামজিতামপি || ৯ -৩৩||
প্রথমমন্যভৃতাভিরুদীরিতাঃ প্রবিরলা ইব মুগ্ধবধূকথাঃ |
সুরভিগন্ধিষু শুশ্রুবিরে গিরঃ কুসুমিতাসু মিতা বনরাজিষু || ৯ -৩৪||
শ্রুতিসুখভ্রমরস্বনগীতয়ঃ কুসুমকোমলদন্তরুচো বভুঃ |
উপবনান্তলতাঃ পবনাহতৈঃ কিসলয়ৈঃ সলয়ৈরিব পাণিভিঃ || ৯ -৩৫||
ললিতবিভ্রমবন্ধবিচেক্ষণং সুরভিগন্ধপরাজিতকেসরম্ |
পতিষু নির্বিবিশুর্মধুমঙ্গনাঃ স্মরসখং রসখণ্ডনবর্জিতম্ || ৯ -৩৬||
শুশুভিরে স্মিতচারুতরাননাঃ স্ত্রিয় ইব শ্লথশিঞ্জিতমেখলাঃ |
বিকচতামরসা গৃহদীর্ঘিকা মদকলোদকলোলবিহংগমাঃ || ৯ -৩৭||
উপয়য়ৌ তনুতাং মধুখণ্ডিতা হিমকরোদয়পাণ্ডুমুখচ্ছবিঃ |
সদৃশমিষ্টসমাগমনির্বৃতিং বনিতয়ানিতয়া রজনীবধূঃ || ৯ -৩৮||
অপতুষারতয়া বিশদপ্রভৈঃ সুরতসঙ্গপরিশ্রমনোদিভিঃ |
কুসুমচাপমতেজয়দংশুভির্হিমকরো মকরোর্জিতকেতনম্ || ৯ -৩৯||
হুতহুতাশনদীপ্তি বনশ্রিয়ঃ প্রতিনিধিঃ কনকাভরণস্য যৎ |
যুবতয়ঃ কুসুম.ম্ দধুরাহিতং তদলকে দলকেসরপেশলম্ || ৯ -৪০||
অলিভিরঞ্জনবিন্দুমনোহরৈঃ কুসুমপঙ্ক্তিনিপাতিভিরঙ্কিতঃ |
ন খলু শোভয়তি স্ম বনস্থলীং ন তিলকস্তিলকঃ প্রমদামিব || ৯ -৪১||
অমদয়ন্মধুগন্ধসনাথয়া কিসলয়াধরসংগতয়া মনঃ |
কুসুমসংভৃতয়া নবমল্লিকা স্মিতরুচা তরুচারুবিলাসিনী || ৯ -৪২||
অরুণরাগনিষেধিভিরংশুকৈঃ শ্রবণলব্ধপদৈশ্চ যবাঙ্কুরৈঃ |
পরভৃতাবিরুতৈশ্চ বিলাসিনঃ স্মরবলৈরবলৈকরসাঃ কৃতাঃ || ৯ -৪৩||
উপচিতাবয়বা শুচিভিঃ কণৈরলিকদম্বকয়োগমুপেয়ুষী |
সদৃশকান্তিরক্ষ্যত মঞ্জরী তিলকজালকজালকমৌক্তিকৈঃ || ৯ -৪৪||
ধ্বজপটং মদনস্য ধনুর্ভৃতশ্ছবিকরং মুখচূর্ণমৃতুশ্রিয়ঃ |
কুসুমকেসররেণুমলিব্রজাঃ সপবনোপবনোত্থিতমন্বয়ুঃ || ৯ -৪৫||
অনুভবন্নবদোলমৃতূৎসবং পটুরপি প্রিয়কণ্ঠজিঘৃক্ষয়া |
অনয়দাসনরজ্জুপরিগ্রহে ভুজলতাং জলতামবলাজনঃ || ৯ -৪৬||
ত্যজত মানমলং বত বিগ্রহৈর্ন পুনরেতি গতং চতুরং বয়ঃ |
পরভৃতাভিরিতীব নিবেদিতে স্মরমতে রমতে স্ম বধূজনঃ || ৯ -৪৭||
অথ যথাসুখমার্তবমুৎসবং সমনুভূয় বিলাসবতীসখঃ |
নরপতিশ্চকমে মৃগয়ারতিং স মধুমন্মধুমন্মথসংনিভঃ || ৯ -৪৮||
পরিচয়ং চললক্ষ্যনিপাতনে ভয়রুচোশ্চ তদিঙ্গিতবোধনম্ |
শ্রমজয়াৎপ্রগুণাং চ করোত্যসৌ তনুমতোঽনুমতঃ সচিবৈর্যয়ৌ || ৯ -৪৯||
মৃগবনোপগমক্ষমবেষভৃদ্বিপুলকণ্ঠনিষক্তশরাসনঃ |
গগনমশ্বখুরোদ্ধতরেণুভির্নৃসবিতা স বিতানমিবাকরোৎ || ৯ -৫০||
গ্রথিতমৌলিরসৌ বনমালয়া তরুপলাশসবর্ণতনুচ্ছদঃ |
তুরগবল্গনচঞ্চলকুণ্ডলো বিরুরুচে রুরুচেষ্টিতভূমিষু || ৯ -৫১||
তনুলতাবিনিবেশিতবিগ্রহা ভ্রমরসংক্রমিতেক্ষণবৃত্তয়ঃ |
দদৃশুরধ্বনি তং বনদেবতাঃ সুনয়নং নয়নন্দিতকোসলম্ || ৯ -৫২||
শ্বগণিবাগুরিকৈঃ প্রথমাস্থিতং ব্যপগতানলদস্যু বিবেশ সঃ |
স্থিরতুরংগমভূমি নিপানবন্মৃগবয়োগবয়োপচিতং বনম্ || ৯ -৫৩||
অথ নভস্য ইব ত্রিদশায়ুধং কনকপিঙ্গতডিদ্গুণসংযুতম্ |
ধনুরধিজ্যমনাধিরুপাদদে নরবরো রবরোষিতকেসরী || ৯ -৫৪||
তস্য স্তনপ্রণয়িভির্মুহুরেণশাবৈ-
র্ব্যাহন্যমানহরিণীগমনং পুরস্তাৎ |
আবির্বভূব কুশগর্ভমুখং মৃগাণাং
যূথং তদগ্রসরগর্বিতকৃষ্ণসারম্ || ৯ -৫৫||
তৎপ্রার্থিতং জবনবাজিগতেন রাজ্ঞা
তূণীমুখোদ্ধৃতশরেণ বিশীর্ণপঙ্ক্তি |
শ্যামীচকার বনমাকুলদৃষ্টিপাতৈ-
র্বাতেরিতোৎপলদলপ্রকরৈরিবার্দ্রৈঃ || ৯ -৫৬||
লক্ষ্যীকৃতস্য হরিণস্য হরিপ্রভাবঃ
প্রেক্ষ্য স্থিতাং সহচরীং ব্যবধায় দেহম্ |
আকর্ণকৃষ্টমপি কামিতয়া স ধন্বী
বাণং কৃপামৃদুমনাঃ প্রতিসংজহার || ৯ -৫৭||
তস্যাপরেষ্বপি মৃগেষু শরান্মুমুক্ষোঃ
কর্ণান্তমেত্য বিভিদে নিবিডোঽপি মুষ্টিঃ |
ত্রাসাতিমাত্রচটুলৈঃ স্মরতঃ সুনেত্রৈঃ
প্রৌঢপ্রিয়ানয়নবিভ্রমচেষ্টিতানি || ৯ -৫৮||
উত্তস্থুষঃ সপদি পল্বলপঙ্কমধ্যা-
ন্মুস্তাপ্ররোহকবলাবয়বানুকীর্ণম্ |
জগ্রাহ স দ্রুতবরাহকুলস্য মার্গং
সুব্যক্তমার্দ্রপদপঙ্ক্তিভিরায়তাভিঃ || ৯ -৫৯||
তং বাহনাদবনতোত্তরকায়মীষ-
দ্বিধ্যন্তমুদ্ধৃতসটাঃ প্রতিহন্তুমীষুঃ |
নাত্মানমস্য বিবিদুঃ সহসা বরাহা
বৃক্ষেষু বিদ্ধমিষুভির্জঘনাশ্রয়েষু || ৯ -৬০||
তেনাভিঘাতরভসস্য বিকৃষ্য পত্রী
বন্যস্য নেত্রবিবরে মহিষস্য মুক্তঃ |
নির্ভিদ্য বিগ্রহমশোণিতলিপ্তপুঙ্খ-
স্তং পাতয়াং প্রথমমাস পপাত পশ্চাৎ || ৯ -৬১||
প্রায়ো বিষাণপরিমোক্ষলঘূত্তমাঙ্গা-
ন্খড্গাংশ্চকার নৃপতির্নিশিতৈঃ ক্ষুরপ্রৈঃ |
শৃঙ্গং স দৃপ্তবিনয়াধিকৃতঃ পরেষা-
মত্যুচ্ছ্রিতং ন মমৃষে ন তু দীর্ঘমায়ুঃ || ৯ -৬২||
ব্যাঘ্রানভীরভিমুখোৎপতিতান্গুহাভ্যঃ
ফুল্লাসনাগ্রবিটপানিব বায়ুরুগ্ণান্ |
শিক্ষাবিশেষলঘুহস্ততয়া নিমেষা-
ত্তূণীচকার শরপূরিতবক্ত্ররন্ধ্রান্ || ৯ -৬৩||
নির্ঘাতোগ্রৈঃ কুঞ্জলীনাঞ্জিঘাংসুর্জ্যানির্ঘোষৈঃ ক্ষোভয়ামাস সিংহান্ |
নূনং তেষামভ্যসূয়াপরোঽভূদ্বীর্যোদগ্রে রাজশব্দো মৃগেষু || ৯ -৬৪||
তান্হৎবা গজকুলবদ্ধতীব্রবৈরান্কাকুৎস্থঃ কুটিলনখাগ্রলগ্নমুক্তান্ |
আত্মানং রণকৃতকর্মণাং গজানামানৃণ্যং গতমিব মার্গণৈরমংস্ত || ৯ -৬৫||
চমরান্পরিতঃ প্রবর্তিতাশ্বঃ ক্বচিদাকর্ণবিকৃষ্টভল্লবর্ষী |
নৃপতীনিব তান্বিয়োজ্য সদ্যঃ সিতবালব্যজনৈর্জগাম শন্তিম্ || ৯ -৬৬||
অপি তুরগসমীপাদুৎপতন্তং ময়ূরং
ন স রুচিরকলাপং বাণলক্ষ্যীচকার |
সপদি গতমনস্কশ্চিত্রমাল্যানুকীর্ণে
রতিবিগলিতবন্ধে কেশপাশে প্রিয়ায়াঃ || ৯ -৬৭||
তস্য কর্কশবিহারসংভবং স্বেদমাননবিলগ্নজালকম্ |
আচচাম সতুষারশীকরো ভিন্নপল্লবপুটো বনানিলঃ || ৯ -৬৮||
ইতি বিস্মৃতান্যকরণীয়মাত্মনঃ সচিবাবলম্বিধুরং ধরাধিপম্ |
পরিবৃদ্ধরাগমনুবন্ধসেবয়া মৃগয়া জহার চতুরেব কামিনী || ৯ -৬৯||
স ললিতকুসুমপ্রবালশয়্যাং জ্বলিতমহৌষধিদীপিকাসনাথাম্ |
নরপতিরতিবাহয়াংবভূব ক্বচিদসমেতপরিচ্ছদস্ত্রিয়ামাম্ || ৯ -৭০||
উষসি স গজয়ূথকর্ণতালৈঃ পটুপটহধ্বনিভির্বিনীতনিদ্রঃ |
অরমত মধুরাণি তত্র শৃণ্বন্বিহগবিকূচিতবন্দিমঙ্গলানি || ৯ -৭১||
অথ জাতু রুরোর্গৃহীতবর্ত্মা বিপিনে পার্শ্বচরৈরলক্ষ্যমাণঃ |
শ্রমফেনমুচা তপস্বিগাঢাং তমসাং প্রাপ নদীং তুরংগমেণ || ৯ -৭২||
কুম্ভপূরণভবঃ পটুরুচ্চৈরুচ্চচার নিনদোঽম্ভসি তস্যাঃ |
তত্র স দ্বিরদবৃংহিতশঙ্কী শব্দপাতিনমিষুং বিসসর্জ || ৯ -৭৩||
নৃপতেঃ প্রতিষিদ্ধমেব তৎকৃতবান্পঙ্ক্তিরথো বিলঙ্ঘ্য যৎ |
অপথে পদমর্পয়ন্তি হি শ্রুতবন্তোঽপি রজোনিমীলিতাঃ || ৯ -৭৪||
হা তাতেতি ক্রন্দিতমাকর্ণ্য বিষণ্ণ-
স্তস্যান্বিষ্যন্বেতসগূঢং প্রভবং সঃ |
শল্যপ্রোতং প্রেক্ষ্য সকুম্ভং মুনিপুত্রং
তাপাদন্তঃশল্য ইবাসীৎক্ষিতিপোঽপি || ৯ -৭৫||
তেনাবতীর্য তুরগাৎপ্রথিতান্বয়েন
পৃষ্টান্বয়ঃ স জলকুম্ভনিষণ্ণদেহঃ |
তস্মৈ দ্বিজেতরতপস্বিসুতং স্খলদ্ভি-
রাত্মানমক্ষরপদৈঃ কথয়াংবভূব || ৯ -৭৬||
তচ্চোদিতঃ স তমনুদ্ধৃতশল্যমেব পিত্রোঃ সকাশমবসন্নদৃশোর্নিনায় |
তাভ্যাং তথাগতমুপেত্য তমেকপুত্রমজ্ঞানতঃ স্বচরিতং নৃপতিঃ শশংস || ৯ -৭৭||
তৌ দংপতী বহু বিলপ্য শিশোঃ প্রহর্ত্রা
শল্যং নিখাতমুদহারয়তামুরস্তঃ |
সোঽভূৎপরাসুরথ ভূমিপতিং শশাপ
হস্তার্পিতৈর্নয়নবারিভিরেব বৃদ্ধঃ || ৯ -৭৮||
দিষ্টান্তমাপ্স্যতি ভবানপি পুত্রশোকা-
দন্ত্যে বয়স্যহমিবেতি তমুক্তবন্তম্ |
আক্রান্তপূর্বমিব মুক্তবিষং ভুজংগং
প্রোবাচ কোসলপতিঃ প্রথমাপরাদ্ধঃ || ৯ -৭৯||
শাপোঽপ্যদৃষ্টতনয়াননপদ্মশোভে
সানুগ্রহো ভগবতা ময়ি পাতিতোঽযম্ |
কৃষ্যাং দহন্নপি খলু ক্ষিতিমিন্ধনেদ্ধো
বীজপ্ররোহজননীং জ্বলনঃ করোতি || ৯ -৮০||
ইত্থং গতে গতঘৃণঃ কিময়ং বিধত্তাং বধ্যস্তবেত্যভিহিতো বসুধাধিপেন |
এধান্হুতাশনবতঃ স মুনির্যয়াচে পুত্রং পরাসুমনুগন্তুমনাঃ সদারঃ || ৯ -৮১||
প্রাপ্তানুগঃ সপদি শাসনমস্য রাজা
সংপাদ্য পাতকবিলুপ্তধৃতির্নিবৃত্তঃ |
অন্তর্নিবিষ্টপদমাত্মবিনাশহেতুং
শাপং দধজ্জ্বলনমৌর্বমিবাম্বুরাশিঃ || ৯ -৮২||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
মৃগয়াবর্ণনো নাম নবমঃ সর্গঃ ||