নাট্যশাস্ত্রম্ অধ্যায় ০১

.. নাট্যশাস্ত্রম্ অধ্যায় ১ ..
.. শ্রীরস্তু ..
ভরতমুনিপ্রণীতং নাট্যশাস্ত্রম্

অথ প্রথমোঽধ্যায়ঃ .
প্রণম্য শিরসা দেবৌ পিতামহমহেশ্বরৌ .
নাট্যশাস্ত্রং প্রবক্ষ্যামি ব্রহ্মণা যদুদাহৃতম্ .. ১..
সমাপ্তজপ্যং ব্রতিনং স্বসুতৈঃ পরিবারিতম্ .
অনধ্যায়ে কদাচিত্তু ভরতং নাট্যকোবিদম্ .. ২..
মুনয়ঃ পর্যুপাস্যৈনমাত্রেয়প্রমুখাঃ পুরা .
পপ্রচ্ছুস্তে মহাত্মানো নিয়তেন্দ্রিয়বুদ্ধয়ঃ .. ৩..
যোঽযং ভগবতা সম্যগ্গ্রথিতো বেদসম্মিতঃ .
নাট্যবেদং কথং ব্রহ্মন্নুৎপন্নঃ কস্য বা কৃতে .. ৪..
কত্যঙ্গঃ কিংপ্রমাণশ্চ প্রয়োগশ্চাস্য কীদৃশঃ .
সর্বমেতদ্যথাতত্ত্বং ভগবন্বক্তুমর্হসি .. ৫..
তেষাং তু বচনং শ্রুৎবা মুনীনাং ভরতো মুনিঃ .
প্রত্যুবাচ ততো বাক্যং নাট্যবেদকথাং প্রতি .. ৬..
ভবদ্ভিঃ শুচিভির্ভূৎবা তথাঽবহিতমানসৈঃ .
শ্রূয়তাং নাট্যবেদস্য সম্ভবো ব্রহ্মনির্মিতঃ .. ৭..
পূর্বং কৃতয়ুগে বিপ্রা বৃত্তে স্বায়ংভুবেঽন্তরে .
ত্রেতায়ুগেঽথ সম্প্রাপ্তে মনোর্বৈবস্বতস্য তু .. ৮..
গ্রাম্যধর্মপ্রবৃত্তে তু কামলোভবশং গতে .
ঈর্ষ্যাক্রোধাদিসংমূঢে লোকে সুখিতদুঃখিতে .. ৯..
দেবদানবগন্ধর্বয়ক্ষরক্ষোমহোরগৈঃ .
জম্বুদ্বীপে সমাক্রান্তে লোকপালপ্রতিষ্ঠিতে .. ১০..
মহেন্দ্রপ্রমুখৈর্দেবৈরুক্তঃ কিল পিতামহঃ .
ক্রীডনীয়কমিচ্ছামো দৃষ্যং শ্রব্যং চ যদ্ভবেৎ .. ১১..
ন বেদব্যবহারোঽযং সংশ্রাব্যঃ শূদ্রজাতিষু .
তস্মাৎসৃজাপরং বেদং পঞ্চমং সার্ববর্ণিকম্ .. ১২..
এবমস্ত্বিতি তানুক্ত্বা দেবরাজং বিসৃজ্য চ .
সস্মার চতুরো বেদান্যোগমাস্থায় তত্ত্ববিৎ .. ১৩..
( নেমে বেদা যতঃ শ্রাব্যাঃ স্ত্রীশূদ্রাদ্যাসু জাতিষু .
বেদমন্যত্ততঃ স্রক্ষ্যে সর্বশ্রাব্যং তু পঞ্চমম্ ..)
ধর্ম্যমর্থ্যং যশস্যং চ সোপদেশ্যং সসঙ্গ্রহম্ .
ভবিষ্যতশ্চ লোকস্য সর্বকর্মানুদর্শকম্ .. ১৪..
সর্বশাত্রার্থসম্পন্নং সর্বশিল্পপ্রবর্তকম্ .
নাট্যাখ্যং পঞ্চমং বেদং সেতিহাসং করোম্যহম্ .. ১৫..
এবং সঙ্কল্প্য ভগবান্ সর্ববেদাননুস্মরন্ .
নাট্যবেদং ততশ্চক্রে চতুর্বেদাঙ্গসম্ভবম্ .. ১৬..
জগ্রাহ পাঠ্যমৃগ্বেদাৎসামভ্যো গীতমেব চ .
যজুর্বেদাদভিনয়ান্ রসানাথর্বণাদপি .. ১৭..
বেদোপবেদৈঃ সম্বদ্ধো নাট্যবেদো মহাত্মনা .
এবং ভগবতা সৃষ্টো ব্রহ্মণা সর্ববেদিনা .. ১৮..
উৎপাদ্য নাট্যবেদং তু ব্রহ্মোবাচ সুরেশ্বরম্ .
ইতিহাসো ময়া সৃষ্টঃ স সুরেষু নিয়ুজ্যতাম্ .. ১৯..
কুশলা যে বিদগ্ধাশ্চ প্রগল্ভাশ্চ জিতশ্রমাঃ .
তেষ্বয়ং নাট্যসংজ্ঞো হি বেদঃ সংক্রাম্যতাং ৎবয়া .. ২০..
তচ্ছৃৎবা বচনং শক্রো ব্রহ্মণা যদুদাহৃতম্ .
প্রাঞ্জলিঃ প্রণতো ভূৎবা প্রত্যুবাচ পিতামহম্ .. ২১..
গ্রহণে ধারণে জ্ঞানে প্রয়োগে চাস্য সত্তম .
অশক্তা ভগবন্ দেবা অয়োগ্যা নাট্যকর্মণি .. ২২..
য ইমে বেদগুহ্যজ্ঞা ঋষয়ঃ সংশিতব্রতাঃ .
এতেঽস্য গ্রহণে শক্তাঃ প্রয়োগে ধারণে তথা .. ২৩..
শ্রুৎবা তু শক্রবচনং মামাহাম্বুজসম্ভবঃ .
ৎবং পুত্রশতসংযুক্তঃ প্রয়োক্তাঽস্য ভবানঘ .. ২৪..
আজ্ঞাপিতো বিদিৎবাঽহং নাট্যবেদং পিতামহাৎ .
পুত্রানধ্যাপয়ামাস প্রয়োগং চাপি তত্ত্বতঃ .. ২৫..
শাণ্ডিল্যং চৈব বাৎস্যং চ কোহলং দত্তিলং তথা .
জটিলম্বষ্টকৌ চৈব তণ্ডুমগ্নিশিখং তথা .. ২৬..
সৈন্ধবং সপুলোমানং শাড্বলিং বিপুলং তথা .
কপিঞ্জলিং বাদিরং চ যমধূম্রায়ণৌ তথা .. ২৭..
জম্বুধ্বজং কাকজঙ্ঘং স্বর্ণকং তাপসং তথা .
কৈদারিং শালিকর্ণং চ দীর্ঘগাত্রং চ শালিকম্ .. ২৮..
কৌৎসং তাণ্ডায়নিং চৈব পিঙ্গলং চিত্রকং তথা .
বন্ধুলং ভল্লকং চৈব মুষ্ঠিকং সৈন্ধবায়নম্ .. ২৯..
তৈতিলং ভার্গবং চৈব শুচিং বহুলমেব চ .
অবুধং বুধসেনং চ পাণ্ডুকর্ণং সুকেরলম্ .. ৩০..
ঋজুকং মণ্ডকং চৈব শম্বরং বঞ্জুলং তথা .
মাগধং সরলং চৈব কর্তারং চোগ্রমেব চ .. ৩১..
তুষারং পার্ষদং চৈব গৌতমং বাদরায়ণম্ .
বিশালং শবলং চৈব সুনামং মেষমেব চ .. ৩২..
কালিয়ং ভ্রমরং চৈব তথা পীঠমুখং মুনিম্ .
নখকুট্টাশ্মকুট্টৌ চ ষট্পদং সোত্তমং তথা .. ৩৩..
পাদুকোপানহৌ চৈব শ্রুতিং চাষস্বরং তথা .
অগ্নিকুণ্ডাজ্যকুণ্ডৌ চ বিতণ্ড্য তাণ্ড্যমেব চ .. ৩৪..
কর্তরাক্ষং হিরণ্যাক্ষং কুশলং দুস্সহং তথা .
লাজং ভয়ানকং চৈব বীভৎসং সবিচক্ষণম্ .. ৩৫..
পুণ্ড্রাক্ষং পুণ্ড্রনাসং চাপ্যসিতং সিতমেব চ .
বিদ্যুজ্জিহ্বং মহাজিহ্বং শালঙ্কায়নমেব চ .. ৩৬..
শ্যামায়নং মাঠরং চ লোহিতাঙ্গং তথৈব চ .
সংবর্তকং পঞ্চশিখং ত্রিশিখং শিখমেব চ .. ৩৭..
শঙ্খবর্ণমুখং শণ্ডং শঙ্কুকর্ণমথাপি চ .
শক্রনেমিং গভস্তিং চাপ্যংশুমালিং শঠং তথা .. ৩৮..
বিদ্যুতং শাতজঙ্ঘং চ রৌদ্রং বীরমথাপি চ .
পিতামহাজ্ঞয়াঽস্মাভির্লোকস্য চ গুণেপ্সয়া .. ৩৯..
প্রয়োজিতং পুত্রশতং যথাভূমিবিভাগশঃ .
যো যস্মিন্কর্মণি যথা যোগ্যস্তস্মিন্ স যোজিতঃ .. ৪০..
ভারতীং সাৎবতীং চৈব বৃঈত্তিমারভটীং তথা .
সমাশ্রিতঃ প্রয়োগস্তু প্রয়ুক্তো বৈ ময়া দ্বিজাঃ .. ৪১..
পরিগৃহ্য প্রণম্যাথ ব্রহ্মা বিজ্ঞাপিতো ময়া .
অথাহ মাং সুরগুরুঃ কৈশিকিমপি যোজয় .. ৪২..
যচ্চ তস্যাঃ ক্ষমং দ্রব্যং তদ্ ব্রূহি দ্বিজসত্তম .
এবং তেনাস্ম্যভিহিতঃ প্রত্যুক্তশ্চ ময়া প্রভুঃ .. ৪৩..
দীয়তাং ভগবন্দ্রব্যং কৈশিক্যাঃ সম্প্রয়োজকম্ .
নৃত্তাঙ্গহারসম্পন্না রসভাবক্রিয়াত্মিকা .. ৪৪..
দৃষ্টা ময়া ভগবতো নীলকণ্ঠস্য নৃত্যতঃ .
কৈশিকী ষ্লক্ষ্ণনৈপথ্যা শৃঙ্গাররসসম্ভবা .. ৪৫..
অশক্যা পুরুষৈঃ সা তু প্রয়োক্তুং স্ত্রীজনাদৃতে .
ততোঽসৃজন্মহাতেজা মনসাঽপ্সরসো বিভুঃ .. ৪৬..
নাট্যালঙ্কারচতুরাঃ প্রাদান্মহ্যং প্রয়োগতঃ .
মঞ্জুকেশীং সুকেশীং চ মিশ্রকেশীং সুলোচনাম্ .. ৪৭..
সৌদামিনীং দেবদত্তাং দেবসেনাং মনোরমাম্ .
সুদতীং সুন্দরীং চৈব বিদগ্ধাং বিপুলাং তথা .. ৪৮..
সুমালাং সন্ততিং চৈব সুনন্দাং সুমুখীং তথা .
মাগধীমর্জুনীং চৈব সরলাং কেরলাং ধৃতিম্ .. ৪৯..
নন্দাং সপুষ্কলাং চৈব কলমাং চৈব মে দদৌ .
স্বাতির্ভাণ্ডনিয়ুক্তস্তু সহ শিষ্যৈঃ স্বয়ম্ভুবা .. ৫০..
নারদাদ্যাশ্চ গন্ধর্বা গানয়োগে নিয়োজিতাঃ .
এবং নাট্যমিদং সম্যগ্বুদ্ধ্বা সর্বৈঃ সুতৈঃ সহ .. ৫১..
স্বাতিনারদসংযুক্তো বেদবেদাঙ্গকারণম্ .
উপস্থিতোঽহং ব্রহ্মাণং প্রয়োগার্থং কৃতাঞ্জলিঃ .. ৫২..
নাট্যস্য গ্রহণং প্রাপ্তং ব্রূহি কিং করবাণ্যহম্ .
এতত্তু বচনং শ্রুৎবা প্রত্যুবাচ পিতামহঃ .. ৫৩..
মহানয়ং প্রয়োগস্য সময়ঃ প্রত্যুপস্থিতঃ .
অয়ং ধ্বজমহঃ শ্রীমান্ মহেন্দ্রস্য প্রবর্ততে .. ৫৪..
অত্রেদানীময়ং বেদো নাট্যসংজ্ঞঃ প্রয়ুজ্যতাম্ .
ততস্তস্মিন্ধ্বজমহে নিহতাসুরদানবে .. ৫৫..
প্রহৃষ্টামরসংকীর্ণে মহেন্দ্রবিজয়োৎসবে .
পূর্বং কৃতা ময়া নান্দী হ্যাশীর্বচসংযুতা .. ৫৬..
অষ্টাঙ্গপদসংযুক্তা বিচিত্রা বেদনির্মিতা .
তদন্তেঽনুকৃতির্বদ্ধা যথা দৈত্যাঃ সুরৈর্জিতাঃ .. ৫৭..
সম্ফেটবিদ্রবকৃতা চ্ছেদ্যভেদ্যাহবাল্মিকা .
ততো ব্রহ্মাদয়ো দেবাঃ প্রয়োগপরিতোষিতাঃ .. ৫৮..
প্রদদুর্মৎসুতেভ্যস্তু সর্বোপকরণানি বৈ .
প্রীতস্তু প্রথমং শক্রো দত্তবান্স্বং ধ্বজং শুভম্ .. ৫৯..
ব্রহ্মা কুটিলকং চৈব ভৃঙ্গারং বরুণঃ শুভম্ .
সূর্যশ্ছত্রং শিবস্সিদ্ধিং বায়ুর্ব্যজনমেব চ .. ৬০..
বিষ্ণুঃ সিংহাসনং চৈব কুবেরো মুকুটং তথা .
শ্রাব্যৎবং প্রেক্ষণীয়স্য দদৌ দেবী সরস্বতী .. ৬১..
শেষা যে দেবগন্ধর্বা যক্ষরাক্ষসপন্নগাঃ .
তস্মিন্সদস্যভিপ্রেতান্নানাজাতিগুণাশ্রয়ান্ .. ৬২..
অংশাংশৈর্ভাষিতং ভাবান্ রসান্ রূপং বলং তথা .
দত্তবন্তঃ প্রহৃষ্টাস্তে মৎসুতেভ্যো দিবৌকসঃ .. ৬৩..
এবং প্রয়োগে প্রারব্ধে দৈত্যদানবনাশনে .
অভবন্ক্ষুভিতাঃ সর্বে দৈত্যা যে তত্র সঙ্গতাঃ .. ৬৪..
বিরূপাক্ষ পুরোগাংশ্চ বিঘ্নান্প্রোৎসাহ্য তেঽব্রুবন্ .
ন ক্ষমিষ্যামহে নাট্যমেতদাগম্যতামিতি .. ৬৫..
ততস্তৈরসুরৈঃ সার্ধং বিঘ্না মায়ামুপাশ্রিতাঃ .
বাচশ্চেষ্টাং স্মৃতিং চৈব স্তম্ভয়ন্তি স্ম নৃত্যতাম্ .. ৬৬..
তথা বিধ্বংসনং দৃষ্ট্বা সূত্রধারস্য দেবরাট্ .
কস্মাৎপ্রয়োগবৈষম্যমিত্যুক্ত্বা ধ্যানমাবিশৎ .. ৬৭..
অথাপশ্যৎসদো বিঘ্নৈঃ সমন্তাদ্পরিবারিতম্ .
সহেতরৈঃ সূত্রধারং নষ্টসংজ্ঞং জডীকৃতম্ .. ৬৮..
উত্থায় ৎবরিতং শক্রং গৃহীৎবা ধ্বজমুত্তমম্ ..
সর্বরত্নোজ্জ্বলতনুঃ কিঞ্চিদুদ্বৃত লোচনঃ ..৬৯..
রঙ্গপীঠগতান্বিঘ্নানসুরাংশ্চৈব দেবরাট্ .
জর্জরীকৃতদেহাংস্তানকরোজ্জর্জরেণ সঃ ..৭০..
নিহতেষু চ সর্বেষুঅ বিঘ্নেষু সহ দানবৈঃ .
সংপ্রহৃষ্য ততো বাক্যমাহুঃ সর্বে দিবৌকসঃ ..৭১..
অহো প্রহরণং দিব্যমিদমাসাদিতং ৎবয়া .
জর্জরীকৃতসর্বাঙ্গা যেনৈতে দানবাঃ কৃতাঃ ..৭২..
যস্মাদনেন তে বিঘ্নাঃ সাসুরা জর্জরীকৃতাঃ .
তস্মাজ্জর্জর এবেতি নামতোঽযং ভবিষ্যতি ..৭৩..
শেষা যে চৈব হিংসার্থমুপয়াস্যন্তি হিংসকাঃ .
দৃষ্ট্বৈব জর্জরং তেঽপি গমিষ্যন্ত্যেবমেব তু ..৭৪..
এবমেবাস্ত্বিতি ততঃ শক্রঃ প্রোবাচ তান্সুরান্ .
রক্ষাভূতশ্চ সর্বেষাং ভবিষ্যত্যেষ জর্জরঃ ..৭৫..
প্রয়োগে প্রস্তুতে হ্যেবং স্ফীতে শক্রমহে পুনঃ .
ত্রাসং সঞ্জনয়ন্তি স্ম বিঘ্নাঃ শেষাস্তু নৃত্যতাম্ ..৭৬..
দৃষ্ট্বা তেষাং ব্যবসিতং দৈত্যানাং বিপ্রকারজম্ .
উপস্থিতোঽহং ব্রহ্মাণং সুতৈঃ সর্বৈঃ সমন্বিতঃ ..৭৭..
নিশ্চিতা ভগবন্বিঘ্না নাট্যস্যাস্য বিনাশনে .
অস্য রক্ষাবিধিং সম্যগাজ্ঞাপয় সুরেশ্বর ..৭৮..
ততশ্চ বিশ্বকর্মাণং ব্রহ্মোবাচ প্রয়ত্নতঃ .
কুরু লক্ষণসংপন্নং নাট্যবেশ্ম মহামতে ..৭৯..
ততোঽচিরেণ কালেন বিশ্বকর্মা মহচ্ছুভম্ .
সর্বলক্ষণসম্পন্নং কৃৎবা নাট্যগৃহং তু সঃ ..৮০..
প্রোক্তবান্দ্রুহিণং গৎবা সভায়ান্তু কৃতাঞ্জলীঃ .
সজ্জং নাট্যগৃহং দেব তদেবেক্ষিতুমর্হসি ..৮১..
ততঃ সহ মহেন্দ্রেণ সুরৈঃ সর্বৈশ্চ সেতরৈঃ .
আঅগতস্ত্বরিতো দৃষ্টুং দ্রুহিণো নাট্যমণ্ডপম্ .. ৮২..
দৃষ্ট্বা নাট্যগৃহং ব্রহ্মা প্রাহ সর্বান্সুরাংস্ততঃ .
অংশভাগৈর্ভবদ্ভিস্তু রক্ষ্যোঽযং নাট্যমণ্ডপঃ .. ৮৩..
রক্ষণে মণ্ডপস্যাথ বিনিয়ুক্তস্তু চন্দ্রমাঃ .
লোকপালাস্তথা দিক্ষু বিদিক্ষ্বপি চ মারুতাঃ .. ৮৪..
নেপথ্যভূমৌ মিত্রস্তু নিক্ষিপ্তো বরুণোঽম্বরে .
বেদিকারক্ষণে বহ্নির্ভাণ্ডে সর্বদিবৌকসঃ .. ৮৫..
বর্ণাশ্চৎবার এবাথ স্তম্ভেষু বিনিয়োজিতাঃ .
আদিত্যাশ্চৈব রুদ্রাশ্চ স্থিতাঃ স্তম্ভান্তরেশ্বথ .. ৮৬..
ধারণীশ্বথ ভূতানি শালাস্বপ্সরস্তথা .
সর্ববেশ্মসু যক্ষিণ্যো মহীপৃষ্ঠে মহোদধিঃ .. ৮৭..
দ্বারশালানিয়ুক্তৌ তু ক্রুতান্তঃ কাল এব চ .
স্থাপিতৌ দ্বারপত্রেষু নাগমুখ্যৌ মহাবলৌ .. ৮৮..
দেহল্যাং যমদণ্ডস্তু শূলং তস্যোপরি স্থিতম্ .
দ্বারপালৌ স্থিতৌ চৌভৌ নিয়তির্মৃত্যুরেব চ .. ৮৯..
পার্শ্বে চ রঙ্গপীঠস্য মহেন্দ্রঃ স্থিতবান্স্বয়ম্ .
স্থাপিতা মত্তবারণ্যাং বিদ্যুদ্দৈত্যনিষূদনী .. ৯০..
স্তম্ভেষু মত্তবারণ্যাঃ স্থাপিতা পরিপালনে .
ভূতয়ক্ষপিশাশ্চ গুহ্যকাশ্চ মহাবলাঃ .. ৯১..
জর্জরে তু বিনিক্ষিপ্তং বজ্রং দৈত্যনিবর্হণম্ .
তৎপর্বসু বিনিক্ষিপ্তাঃ সুরেন্দ্রা হ্যমিতৌজসঃ .. ৯২..
শিরঃপর্বস্থিতো ব্রহ্মা দ্বিতীয়ে শঙ্করস্তথা .
তৃতীয়ে চ স্থিতো বিষ্ণুশ্চতুর্থে স্কন্দ এব চ .. ৯৩..
পঞ্চমে চ মহানাগাঃ শেষবাসুকিতক্ষকাঃ .
এবং বিঘ্নবিনাশায় স্থাপিতা জর্জরে সুরাঃ .. ৯৪..
রঙ্গপীঠস্য মধ্যে তু স্বয়ং ব্রহ্মা প্রতিষ্ঠিতঃ .
ইষ্ট্যর্থং রঙ্গমধ্যে তু ক্রিয়তে পুষ্পমোক্ষণম্ .. ৯৫..
পাতালবাসিনো যে চ যক্ষগুহ্যকপন্নগাঃ .
অধস্তাদ্রঙ্গপীঠস্য রক্ষণে তে নিয়োজিতাঃ .৯৬..
নায়কং রক্ষতীন্দ্রস্তু নায়িকাং চ সরস্বতী .
বিদূষকমথৌঙ্কারঃ শেশাস্তু প্রকৃতির্হরঃ .. ৯৭..
যান্যেতানি নিয়ুক্তানি দৈবতানীহ রক্ষণে .
এতান্যেবাধিদৈবানি ভবিষ্যন্তীত্যুবাচ সঃ .. ৯৮..
এতস্মিন্নন্তরে দেবৈঃ সর্বৈরুক্তঃ পিতামহঃ .
সাম্না তাবদিমে বিঘ্নাঃ স্থাপ্যন্তাং বচসা ৎবয়া .. ৯৯..
পূর্বং সামং প্রয়োক্তব্যং দ্বিতীয়ং দানমেব চ .
তয়োরুপরি ভেদস্তু ততো দণ্ডঃ প্রয়ুজ্যতে .. ১০০..
দেবানাং বচনং শ্রুৎবা ব্রহ্মা বিঘ্নানুবাচ হ .
কস্মাদ্ভবন্তো নাট্যস্য বিনাশায় সমুত্থিতাঃ .. ১০১..
ব্রহ্মণো বচনং শ্রুৎবা বিরূপাক্ষোঽব্রবীদ্বচঃ .
দৈত্যৈর্বিঘ্নগণৈঃ সার্ধং সামপূর্বমিদং ততঃ .. ১০২..
যোঽযং ভগবতা সৃষ্টো নাট্যবেদঃ সুরেচ্ছয়া .
প্রত্যাদেশোঽযমস্মাকং সুরার্থং ভবতা কৃতঃ .. ১০৩..
তন্নৈতদেবং কর্তব্যং ৎবয়া লোকপিতামহ .
যথা দেবস্তথা দৈত্যাস্ত্বত্তঃ সর্বে বিনির্গতাঃ .. ১০৪..
বিঘ্নানাং বচনং শ্রুৎবা ব্রহ্মা বচনমব্রবীৎ .
অলং বো মন্যুনা দৈত্যা বিষাদং ত্যজতানঘাঃ .. ১০৫..
ভবতাং দেবতানাং চ শুভাশুভবিকল্পকঃ .
কর্মভাবান্বয়াপেক্ষী নাট্যবেদো ময়া কৃতঃ .. ১০৬..
নৈকান্ততোঽত্র ভবতাং দেবানাং চানুভাবনম্ .
ত্রৈলোক্যাস্যাস্য সর্বস্য নাট্যং ভাবানুকীর্তনম্ .. ১০৭..
ক্বচিদ্ধর্মঃ ক্বচিৎক্রীডা ক্বচিদর্থঃ ক্বচিচ্ছমঃ .
ক্বচিদ্ধাস্যং ক্বচিদ্যুদ্ধং ক্বচিৎকামঃ ক্বচিদ্বধঃ .. ১০৮..
ধর্মো ধর্মপ্রবৃত্তানাং কামঃ কামোপসেবিনাম্ .
নিগ্রহো দুর্বিনীতানাং বিনীতানাং দমক্রিয়া .. ১০৯..
ক্লীবানাং ধার্ষ্ট্যজননমুৎসাহঃ শূরমানিনাম্ .
অবুধানাং বিবোধশ্চ বৈদুষ্যং বিদুষামপি .. ১১০…
ঈশ্বরাণাং বিলাসশ্চ স্থৈর্যং দুঃখার্দিতস্য চ .
অর্থোপজীবিনামর্থো ধৃতিরুদ্বেগচেতসাম্ .. ১১১..
নানাভাবোপসম্পন্নং নানাবস্থান্তরাত্মকম্ .
লোকবৃত্তানুকরণং নাট্যমেতন্ময়া কৃতম্ .. ১১২..
উত্তমাধমমধ্যানাং নরাণাং কর্মসংশ্রয়ম্ .
হিতোপদেশজননং ধৃতিক্রীডাসুখাদিকৃৎ .. ১১৩..
( এতদ্রসেষু ভাবেষু সর্বকর্মক্রিয়াস্বথ .
সর্বোপদেশজননং নাট্যং লোকে ভবিষ্যতি .. )
দুঃখার্তানাং শ্রমার্তানাং শোকার্তানাং তপস্বিনাম্ .
বিশ্রান্তিজননং কালে নাট্যমেতদ্ভবিষ্যতি .. ১১৪..
ধর্ম্যং যশস্যমায়ুষ্যং হিতং বুদ্ধিবিবর্ধনম্ .
লোকোপদেশজননং নাট্যমেতদ্ভবিষ্যতি .. ১১৫..
ন তজ্জ্ঞানং ন তচ্ছিল্পং ন সা বিদ্যা ন সা কলা .
নাসৌ যোগো ন তৎকর্ম নাট্যেঽস্মিন্ যন্ন দৃশ্যতে .. ১১৬..
তন্নাত্র মন্যুঃ কর্তব্যো ভবদ্ভিরমরান্প্রতি .
সপ্তদ্বীপানুকরণং নাট্যমেতদ্ভবিষ্যতি .. ১১৭..
( যেনানুকরণং নাট্যমেতত্তদ্যন্ময়া কৃতম্ ..)
দেবানামসুরাণাং চ রাজ্ঞামথ কুটুম্বিনাম্ .
ব্রহ্মর্ষীণাং চ বিজ্ঞেয়ং নাট্যং বৃত্তান্তদর্শকম্ .. ১১৮..
যোঽযং স্বভাবো লোকস্য সুখদুঃখসমন্বিতঃ .
সোঽঙ্গাদ্যভিনয়োপেতো নাট্যমিত্যভিধীয়তে .. ১১৯..
( বেদবিদ্যেতিহাসানামাখ্যানপরিকল্পনম্ .
বিনোদকরণং লোকে নাট্যমেতদ্ভবিষ্যতি ..
শ্রুতিস্মৃতিসদাচারপরিশেষার্থকল্পনম্ .
বিনোদজননং লোকে নাট্যমেতদ্ভবিষ্যতি ..)
এতস্মিন্নন্তরে দেবান্ সর্বানাহ পিতামহঃ .
ক্রিয়তামদ্য বিধিবদ্যজনং নাট্যমণ্ডপে .. ১২০..
বলিপ্রদানৈর্হোমৈশ্চ মন্ত্রৌষধিসমন্বিতৈঃ .
ভোজ্যৈর্ভক্ষৈশ্চ পানৈশ্চ বলিঃ সমুপকল্পতাম্ .. ১২১..
মর্ত্যলোকগতাঃ সর্বে শুভাং পূজামবাপ্স্যথ .
অপূজয়িৎবা রঙ্গং তু নৈব প্রেক্ষাং প্রবর্তয়েৎ .. ১২২..
অপূজয়িৎবা রঙ্গং তু যঃ প্রেক্ষাং কল্পয়িষ্যতি .
নিষ্ফলং তস্য তৎ জ্ঞানং তির্যগ্যোনিং চ যাস্যতি .. ১২৩..
যজ্ঞেন সংমিতং হ্যেদদ্রঙ্গদৈবতপূজনম্ .
তস্মাৎসর্বপ্রয়ত্নেন কর্তব্যং নাট্যয়োক্তৃভিঃ .. ১২৪..
নর্তকোঽর্থপতির্বাপি যঃ পূজাং ন করিষ্যতি .
ন কারয়িষ্যন্ত্যন্যৈর্বা প্রাপ্নোত্যপচয়ং তু সঃ .. ১২৫..
যথাবিধিং যথাদৃষ্টং যস্তু পূজাং করিষ্যতি .
স লপ্স্যতে শুভানর্থান্ স্বর্গলোকং চ যাস্যতি .. ১২৬..
এবমুক্ত্বা তু ভগবান্দ্রুহিণঃ সহদেবতৈঃ .
রঙ্গপূজাং কুরুশ্বেতি মামেবং সমচোদয়ৎ .. ১২৭..

ইতি ভারতীয়ে নাট্যশাস্ত্রে নাট্যোৎপত্তির্নাম প্রথমোঽধ্যায়ঃ .